Ammoyo Kadi ti ‘Aguray’?

“Anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova!”​—2 PEDRO 3:11, 12.

1, 2. Kasanotayo nga iyilustrar ti ‘panaguray’ iti aldaw ni Jehova?

PANUNOTENYO ti maysa a pamilia nga agur-uray kadagiti bisitada iti pangrabii. Asideg unayen ti naituding nga oras nga isasangpetda. Agidasdasaren ti asawa a babai. Timmulong ni lakayna ken dagiti annakda tapno sigurado a nakasagana amin a kasapulan. Magagaranda amin. Wen, sigagagar nga ur-urayen ti intero a pamilia ti isasangbay dagiti bisita ken padpadaananda ti naimas a taraon ken naragsak a panaglalangen.

² Kas Kristiano, adda ur-urayentayo a napatpateg a banag. Ania dayta? Ur-urayentayo amin ti “aldaw ni Jehova”! Agingga a di pay dimteng, masapul a tuladentayo ni propeta Mikias, a nagkuna: “Ken Jehova nga agtultuloyakto nga agsiput. Ipakitakto ti panagur-uray iti Dios ti pannakaisalakanko.” (Mikias 7:7) Kayat kadi a sawen dayta a basta aguraytayo lattan? Saan. Adu ti trabaho a nasken a mairingpas.

3. Sigun iti 2 Pedro 3:11, 12, ania a kababalin ti nasken a salimetmetan dagiti Kristiano?

³ Tulongannatayo ni apostol Pedro a maaddaan iti umiso a kababalin bayat nga agur-uray. Kunana: “Anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova!” (2 Pedro 3:11, 12) Imutektekanyo ta iti dayta a teksto, saan nga agsalsaludsod ni Pedro. Iti dua a suratna nga impaltiing ti Dios, dineskribirna no ania a kita a tattao ti rumbeng a pagbalinan dagiti Kristiano. Indagadagna met nga itultuloyda a salimetmetan ‘ti nasantuan a panagbibiag ken ar-aramid ti nadiosan a debosion.’ Nupay agarup 30 a tawenen ti naglabas sipud idi inted ni Jesu-Kristo ti pagilasinan “ti panungpalan ti sistema ti bambanag,” nasken nga agtultuloy idi nga agsalukag dagiti Kristiano. (Mateo 24:3) Masapul nga itultuloyda ti ‘aguray ken agtalinaed a silalagip unay’ iti kaadda ti aldaw ni Jehova.

4. Ania ti ramanen ti ‘panagtalinaed a silalagip unay iti kaadda ti aldaw ni Jehova’?

⁴ Ti Griego a sao a naipatarus kas ‘agtalinaed a silalagip unay’ literal a kaipapananna “papartaken.” Siempre, saantayo a literal a ‘mapapartak’ ti aldaw ni Jehova. Iti dayta a banag, ‘saantayo nga ammo ti aldaw wenno uray ti oras no kaano a dadaelen ni Jesu-Kristo dagiti kabusor ni Amana.’ (Mateo 24:36; 25:13) Kuna ti maysa a reperensia a ti sao a nagtaudan ti ebkas a “papartaken” kaipapananna “‘darasen’ ket iti kasta, mainaig unay dayta iti ‘panagbalin a naregta, aktibo, maseknan iti maysa a banag.’” No kasta, idagdagadag ni Pedro kadagiti padana a manamati a masapul a sigagagarda a mangnamnama iti kaadda ti aldaw ni Jehova. Maaramidda dayta no kanayon a silalagipda iti dayta. (2 Pedro 3:12) Ita ta nakaas-asidegen “ti naindaklan ken nakaam-amak nga aldaw ni Jehova,” masapul a maaddaantayo iti umasping a kababalin.​—Joel 2:31.

Aguray Buyogen ‘Dagiti Nasantuan a Panagbiag’

5. Kasanotayo a maipakita a sigagagar a mangnamnamatayo a maimatangan “ti aldaw ni Jehova”?

⁵ No sigagagar a mangnamnamatayo iti pannakaispal inton aldaw ni Jehova, nasken nga iparangarangtayo dayta babaen “dagiti nasantuan a panagbibiag ken ar-aramid ti nadiosan a debosion.” Ti ebkas a “dagiti nasantuan a panagbibiag” ti nalabit mangipalagip kadatayo iti balakad ni Pedro: “Kas natulnog nga annak, sumardengkayo a maisuksukog maitunos kadagiti tarigagay a sigud nga adda kadakayo iti kinaignoranteyo, no di ket, maitunos iti Daydiay Santo a nangayab kadakayo, agbalinkayo met a nasantuan a mismo iti isuamin a kababalinyo, agsipud ta adda a naisurat: ‘Masapul a nasantuankayo, agsipud ta nasantuanak.’”​—1 Pedro 1:14-16.

6. Tapno agbalin a nasantuan, ania ti nasken nga aramidentayo?

⁶ Tapno agbalin a nasantuan, masapul a taginayonentayo ti pisikal, mental, moral, ken naespirituan a kinadalus. Agsagsaganatayo kadi agpaay ‘iti aldaw ni Jehova’ babaen ti panagtalinaedtayo a nasantuan kas indibidual a mangaw-awit iti nagan ni Jehova? Saan a nalaka ita a taginayonen ti kasta a kinasin-aw gapu ta agtultuloy ti panagrakaya dagiti moral a pagalagadan ti lubong. (1 Corinto 7:31; 2 Timoteo 3:13) Ikagkagumaantayo kadi a pagminaren ti nagdumaan dagiti moral a pagalagadantayo ken dagiti moral a pagalagadan ti lubong? No saan, adda rason a maseknantayo. Saan ngata a bumabbaban dagiti personal a pagalagadantayo nupay nangatngato dagitoy ngem kadagiti pagalagadan ti lubong? No kasta, masapul a mangaramidtayo kadagiti positibo nga addang a mangatur kadagiti bambanag tapno maay-ayotayo ti Dios.

7, 8. (a) Kasano a mabalin a malipatantayo ti kinapateg ti panangsalimetmet iti “nasantuan a panagbibiag”? (b) Ania dagiti mabalin nga aramiden tapno maatur dagiti bambanag?

⁷ Gapu iti iseserrek ti pornograpia iti Internet ken gapu ta mabalin dayta a magun-od iti pribado, dadduma a saan idi a makagun-od kadagiti kasta nga imoral a material ti addaan ita iti “aglaplapusanan a suplay iti seksual a material,” kuna ti maysa a doktor ti medisina. No sapulentayo dagiti kasta a narugit a benneg ti Internet, nabatad nga iyaleng-alengtayo ti bilin ti Biblia a “dikay sagiden ti aniaman a narugit.” (Isaias 52:11) Talaga kadi nga ‘agtaltalinaedtayo a silalagip unay iti kaadda ti aldaw ni Jehova’? Wenno nalabit pampanunotentayo a mabayag pay dayta nga aldaw, nga ipagaruptayo nga uray mulitantayo ti isiptayo kadagiti narugit a material, adda pay gundaway a dalusan ti bagitayo? No kasta ti parikuttayo, anian a nagganat nga iyararaw ken ni Jehova nga ‘iliklikna ti matatayo manipud panagkita iti awan pategna ken taginayonenna a sibibiag ti bukodtayo a dana’!​—Salmo 119:37.

⁸ Ti kaaduan kadagiti Saksi ni Jehova, agtutubo ken nataengan, salsalimetmetanda dagiti nangato a moral a pagalagadan ti Dios ken likliklikanda dagiti imoral a pananggargari daytoy a lubong. Gapu ta sipapanunotda iti kinaganat ti tiempotayo ken ti pakdaar ni Pedro nga ‘umayto a kasla mannanakaw ti aldaw ni Jehova,’ itultuloyda a salimetmetan ti “nasantuan a panagbibiag.” (2 Pedro 3:10) Ipakita dagiti aramidda nga ‘ur-urayenda ken agtaltalinaedda a silalagip unay iti kaadda ti aldaw ni Jehova.’a

Aguray Buyogen ti “Ar-aramid ti Nadiosan a Debosion”

9. Tignayennatayo ti nadiosan a debosion a mangaramid iti ania?

⁹ Ti “ar-aramid ti nadiosan a debosion” ket napateg met tapno malaglagiptayo ti aldaw ni Jehova. Ti “nadiosan a debosion” ramanenna ti panagraem iti Dios a mangtignay kadatayo a mangaramid kadagiti makaay-ayo kenkuana. Ti panagbalin a nasungdo ken ni Jehova isu ti puersa a pakaigapuan dagita nga ar-aramid ti nadiosan a debosion. Pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) Ti Dios “saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” (2 Pedro 3:9) No kasta, saannatay kadi a tignayen ti nadiosan a debosion tapno parayrayen ti panagreggettayo a tumulong kadagiti tattao a mangam-ammo ken ni Jehova ken tumulad kenkuana?​—Efeso 5:1.

10. Apay a nasken a pagannadantayo ti “makaallilaw a pannakabalin ti kinabaknang”?

¹⁰ Mapno ti biagtayo kadagiti ar-aramid ti nadiosan a debosion no ikagumaantayo a biroken nga umuna ti Pagarian ti Dios. (Mateo 6:33) Ramanen daytoy ti natimbeng a panangmatmat kadagiti material a bambanag. Nangballaag ni Jesus: “Pagtalinaedenyo a silulukat dagiti matayo ket agaluadkayo iti tunggal kita ti kinaagum, agsipud ta uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” (Lucas 12:15) Nupay kasla narigat a panunoten a mabulseknatayo ti panagayat iti kuarta, nasken a laglagipentayo a “ti pakaringgoran daytoy a sistema ti bambanag ken ti makaallilaw a pannakabalin ti kinabaknang” mabalin a “leppesenda ti sao” ti Dios. (Mateo 13:22) Saan a nalaka ti agbirok iti pagbiag. Gapuna, iti dadduma a paset ti lubong, adu ti agkuna a tapno matagiragsak ti nasaysayaat a biag, masapul a mapanda iti nasalsaliwanwan a pagilian, nalabit ibatida ti pamiliada iti sumagmamano a tawen. Kasta met laeng ti kapanunotan ti dadduma nga adipen ti Dios. No mapanda iti sabali a pagilian, kabaelanda nga ipaay dagiti moderno a pagnam-ayan ti pamiliada. Ngem ania ti mabalin a mapasamak iti espiritualidad dagiti imbatida nga ay-ayatenda? No awan ti umiso a mangidaulo iti pagtaengan, maparayrayda ngata ti espiritualidad a kasapulan tapno malasatanda ti aldaw ni Jehova?

11. Kasano a ti maysa a temporario a mangmangged iti sabali a pagilian impakitana a napatpateg dagiti ar-aramid ti nadiosan a debosion ngem iti kinabaknang?

¹¹ Ti maysa a temporario a mangmangged a taga Pilipinas, naammuanna ti kinapudno iti Biblia babaen dagiti Saksi ni Jehova idiay Japan. Apaman a naadalna dagiti Nainkasuratan a responsabilidad ti kinaulo, nabigbigna a masapul a tulonganna ti pamiliana nga agbalin a managdaydayaw ken ni Jehova. (1 Corinto 11:3) Kasta unay ti panangbusor ni baketna iti baro a pammatina ken kayat ni baketna nga itultuloyna ti agipatulod iti kuarta imbes nga agawid tapno isurona iti pamiliana dagiti naibatay-Biblia a patpatienna. Ngem nagawid latta gapu iti pannakariknana iti kinaganat ti panawen ken panangipategna kadagiti ay-ayatenna. Nagunggonaan ti naanus ken naayat a panangtratona kadagiti kameng ti pamiliana. Idi agangay, nagkaykaysa ti pamiliana iti pudno a panagdayaw, ken simrek ni baketna iti amin-tiempo a ministerio.

12. Apay a nasken nga iyun-unatayo iti biagtayo dagiti naespirituan a bambanag?

¹² Mabalin a mayarig ti kasasaadtayo kadagiti tattao nga adda iti mapupuoran a pasdek. Nainsiriban kadi a sambuten nga iruar dagiti material a bambanag manipud iti maur-uram a pasdek a dandanin marpuog? Imbes ketdi, saan kadi a napatpateg nga amang ti panangisalakan kadagiti biag​—ti mismo a biagtayo ken ti biag ti pamiliatayo ken dadduma pay nga agnanaed iti dayta a pasdek? Bueno, napartak ti iyaadani ti pannakarpuog daytoy dakes a sistema ti bambanag, ket adda dagiti agpegpeggad a biag. Gapu ta ammotayo dayta, awan duadua a masapul nga iyun-unatayo dagiti naespirituan a pagimbagan ken sireregta nga ipamaysa ti biagtayo iti makaispal-biag a trabaho a panangikasaba iti Pagarian.​—1 Timoteo 4:16.

Kasapulantayo ti Agbalin a “Di Namulitan”

13. Ania ti kayattayo a kasasaadtayo inton dumteng ti aldaw ni Jehova?

¹³ Kas panangyunay-unay iti kinapateg ti panaguray, kuna ni Pedro: “Dungdungnguen, yantangay ur-urayenyo dagitoy a banag, aramidenyo ti amin a kabaelanyo tapno iti kamaudiananna masarakannakayo [ti Dios] a di namulitan ken awan pakapilawanna ken sitatalna.” (2 Pedro 3:14) Malaksid iti imbalakadna a panangsalimetmet iti nasantuan a panagbiag ken kadagiti ar-aramid ti nadiosan a debosion, impaganetget ni Pedro ti kinapateg ti panangmatmat ni Jehova kadatayo kas maysa nga indibidual a nadalusan iti napateg a dara ni Jesus. (Apocalipsis 7:9, 14) Kalikaguman daytoy ti panamati ti indibidual iti daton ni Jesus ken agbalin a dedikado ken bautisado nga adipen ni Jehova.

14. Ania ti karaman iti panagbalin a “di namulitan”?

¹⁴ Idagadag kadatayo ni Pedro nga aramidentayo ti amin a kabaelantayo nga agbalin a “di namulitan.” Tagtaginayonentayo met laeng kadi a nadalus dagiti arig pagan-anay a Nakristianuan a kondukta ken kababalintayo, a di namansaan iti lubong? No madlawtayo a narugitan ti kawestayo, dagus nga ikagumaantayo nga ikkaten dayta. Nangnangruna no ti paboritotayo a pagan-anay ti narugitan, kayattayo a labaan dayta. Kasta met kadi ti mariknatayo no namulitan ti Nakristianuan a pagan-anaytayo, no iyar-arig, gapu iti di umiso a kababalin wenno konduktatayo?

15. (a) Apay a masapul a mangaramid dagiti Israelita kadagiti nabarayubayan a pingir kadagiti pandiling ti kawkawesda? (b) Apay a naiduma unay dagiti agdama nga adipen ni Jehova?

¹⁵ Masapul a mangaramid idi dagiti Israelita “kadagiti nabarayubayan a pingir kadagiti pandiling ti kawkawesda” ken “mangikabilda iti asul a linas iti ngatuen ti nabarayubayan a pingir ti pandiling.” Apay? Tapno malaglagipda dagiti bilin ni Jehova, pagtulnoganda dagita, ken ‘agbalinda a nasantuan’ iti Diosda. (Numeros 15:38-40) Kas agdama nga ad-adipen ni Jehova, naidumatayo unay iti lubong gapu ta salsalimetmetantayo dagiti linteg ken prinsipio ti Dios. Kas pagarigan, salsalimetmetantayo ti moral a kinadalus, raementayo ti kinasagrado ti dara, ken liklikantayo ti aniaman a kita ti idolatria. (Aramid 15:28, 29) Adu ti mangraem kadatayo gapu iti natibker a determinasiontayo nga agtalinaed a di natulawan.​—Santiago 1:27.

Masapul nga ‘Awan Pakapilawantayo’

16. Ania ti karaman iti panagtalinaedtayo nga “awan pakapilawanna”?

¹⁶ Kuna met ni Pedro a masapul nga ‘awan pakapilawantayo.’ Kasano a maaramidtayo dayta? Mabalin a madalusan ti pannakamulit ngem saan a kasta no adda pakapilawan. Ti pakapilawan ipasimudaagna nga adda problema, depekto iti makin-uneg. Binalakadan ni apostol Pablo dagiti padana a Kristiano idiay Filipos: “Itultuloyyo nga aramiden ti amin a bambanag nga awan panagtantanabutob ken panagririkiar, tapno awan pakababalawanyo ken natarnawkay koma, annak ti Dios nga awan pakapilawanna iti tengnga ti nakillo ken tiritir a kaputotan, nga iti tengngada agsilsilnagkayo kas silsilaw iti lubong.” (Filipos 2:14, 15) No tungpalentayo dayta a balakad, liklikantayo dagiti panagtanabutob ken pannakiriri ket agserbitayo iti Dios buyogen ti nasin-aw a motibo. Ti panagayat ken ni Jehova ken kadagiti kaarrubatayo ti mangtignay kadatayo a mangikasaba iti “daytoy naimbag a damag ti pagarian.” (Mateo 22:35-40; 24:14) Maysa pay, itultuloytayo nga ipakaammo ti naimbag a damag nupay saan a maawatan ti kaaduan a tattao no apay a boluntario nga usarentayo ti panawen ken pigsatayo a tumulong kadagiti dadduma a mangammo maipapan iti Dios ken iti Saona, ti Biblia.

17. Ania koma ti motibotayo no gumawgaw-attayo kadagiti pribilehio iti kongregasion Kristiano?

¹⁷ Gapu ta kayattayo ti agtalinaed nga “awan pakapilawanna,” nasken a sukimatentayo dagiti motibotayo kadagiti aniaman nga ar-aramidentayo. Inwaksitayon ti pamay-an ti lubong a mangaramid kadagiti bambanag gapu kadagiti inaagum a panggep, kas iti panagregget a gumun-od iti kinabaknang wenno pannakabalin. No gumawgaw-attayo kadagiti pribilehio iti kongregasion Kristiano, sapay koma ta agtalinaed a nasin-aw dagiti motibotayo ken kanayon a maigapu iti panagayat ken ni Jehova ken kadagiti sabsabali. Makaay-ayo a makita dagiti naespirituan a lallaki a ‘mangragragpat iti akem a manangaywan’ buyogen ti rag-o ken napakumbaba a tarigagay nga agpaadipen ken ni Jehova ken kadagiti kapammatianda. (1 Timoteo 3:1; 2 Corinto 1:24) Kinapudnona, dagidiay kualipikado nga agserbi kas papanglakayen ‘ipastoranda ti arban ti Dios . . . a situtulok; saan met nga iti panagayat iti nakusit a gunggona, no di ket sigagagar; saan met a kas agturay kadagidiay tawid ti Dios, no di ket agbalinkayo a pagulidanan ti arban.’​—1 Pedro 5:1-4.

Masapul nga Adda Kadatayo ti ‘Talna’

18. Ania dagiti agdindinamag a galad dagiti Saksi ni Jehova?

¹⁸ Kamaudiananna, kuna ni Pedro a masapul nga adda kadatayo ti ‘talna.’ Tapno matungpaltayo dayta a kalikagum, masapul nga adda natalna a relasiontayo ken ni Jehova ken kadagiti kaarrubatayo. Impaganetget ni Pedro ti kinapateg ti “nasged nga ayat iti maysa ken maysa” ken iti panangtaginayon iti natalna a relasion kadagiti padatayo a Kristiano. (1 Pedro 2:17; 3:10, 11; 4:8; 2 Pedro 1:5-7) Tapno mataginayontayo ti talna nga adda kadatayo, masapul nga ayatentayo ti maysa ken maysa. (Juan 13:34, 35; Efeso 4:1, 2) Ad-adda nga agminar dayta nga ayat ken talna no maangay dagiti internasional a kombensiontayo. Iti maysa a kombension idiay Costa Rica idi 1999, maysa a tindero iti eropuerto ti masuron gapu ta di ginagara a malingdan ti puestona kadagiti Saksi a mangpasangbay kadagiti delegado. Ngem iti sumaganad nga aldaw, nadlawna ti ayat ken talna a naiparangarang kadagiti nabara a panangpasangbay dagiti lumugar a Saksi kadagiti delegado, nupay dida personal nga agaammo. Iti maudi nga aldaw, nakiraman ti tindero a nangpasangbay ket nagpayadal iti Biblia.

19. Apay a napateg a salimetmetan ti natalna a relasion kadagiti kapammatiantayo?

¹⁹ Ti kinapasnektayo a mangsalimetmet iti natalna a relasion kadagiti kapammatiantayo mabalin nga apektaranna ti napasnek a panaguraytayo iti aldaw ni Jehova ken iti inkarina a baro a lubong. (Salmo 37:11; 2 Pedro 3:13) Ipapantayo nga adda kapammatiantayo a narigattay a pakitunosan. Mailadawantayo kadi ti bagitayo nga agbibiag a natalna iti Paraiso a kadua dayta a kabsat? No adda ing-ingpen kadatayo ti maysa a kabsat, dagus koma a ‘makikappiatayo kenkuana.’ (Mateo 5:23, 24) Napateg ti panangaramid iti dayta no kayattayo ti maaddaan iti natalna a relasion ken ni Jehova.​—Salmo 35:27; 1 Juan 4:20.

20. Kadagiti ania a pamay-an a nasken nga iparangarang ti ‘panaguray’?

²⁰ Personal kadi nga ‘ur-urayen ken agtaltalinaedtayo a silalagip unay iti kaadda ti aldaw ni Jehova’? Maiparangarang ti nasged a tarigagaytayo a makita ti panagpatingga ti kinadakes babaen ti panagtalinaedtayo a nasantuan iti daytoy imoral a lubong. Kanayonanna, agminar kadagiti ar-aramid ti nadiosan a debosiontayo no sigagagar met laeng nga ur-urayentayo ti aldaw ni Jehova ken ti biag iti sidong ti turay ti Pagarian. Ken ipakpakitatayo a kayattayo ti agbiag iti natalna a baro a lubong no salimetmetantayo ti natalna a relasion kadagiti padatayo nga agdaydayaw ita. No aramidentayo dagita, ipakpakitatayo nga ammotayo ti ‘aguray’ ken ‘agtaltalinaedtayo a silalagip unay iti kaadda ti aldaw ni Jehova.’

[Footnote]

Malagipyo Pay?

• Ania ti kayat a sawen ti agtalinaed a “silalagip unay iti kaadda ti aldaw ni Jehova”?

• Kasanotayo a maipakita nga ammotayo ti ‘aguray’ babaen ti konduktatayo?

• Apay a napateg ti “ar-aramid ti nadiosan a debosion”?

• Ania ti nasken nga aramidentayo tapno matmatannatayo ni Jehova a “di namulitan ken awan pakapilawanna ken sitatalna”?

[Ladawan iti panid 11]

Ipakita ti nasantuan a panagbiag nga ammotayo ti ‘aguray’

[Dagiti Ladawan iti panid 12]

Makaispal-biag ti trabaho a panangikasaba iti Pagarian

[Ladawan iti panid 14]

Bayat nga ur-urayentayo ti aldaw ni Jehova, salimetmetantayo ti natalna a relasion kadagiti sabsabali