Siasinonto ti Makalasat iti “Aldaw ni Jehova”?

“Ania a kita ti tattao ti rebbeng koma a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova!”​—2 PEDRO 3:11, 12.

1. Siasino ti agtartrabaho buyogen ti espiritu ken bileg ni Elias?

NANGPILI ni Jehova a Dios manipud iti sangatauan kadagiti makipagtawid iti Anakna, ni Jesu-Kristo, iti nailangitan a Pagarian. (Roma 8:16, 17) Bayat nga addada pay ditoy daga, agtartrabaho dagiti napulotan a Kristiano buyogen ti espiritu ken bileg ni Elias. (Lucas 1:17) Iti napalabas nga artikulo, nakitatayo ti pagpadaan dagiti aramidda ken dagiti inaramid ni propeta Elias. Ngem ti ngay trabaho ti kasuno ni Elias, ni propeta Eliseo?​—1 Ar-ari 19:15, 16.

2. (a) Ania ti maudi a milagro nga inaramid ni Elias, ken ti damo nga inaramid ni Eliseo? (b) Ania ti mangpaneknek a saan a napan sadi langit ni Elias?

² Ti maudi a milagro nga inaramid ni Elias isu ti panangbisngayna iti danum ti Karayan Jordan babaen ti panangyablatna iti opisial a kawesna. Iti kasta, nabalinan da Elias ken Eliseo ti bimmallasiw iti namaga a daga. Bayat a magmagnada iti makindaya nga igid ti karayan, naipan ni Elias iti sabali a disso ditoy daga babaen ti alawig. (Kitaenyo ti kahon iti panid 15 a napauluan “Iti Ania a Langit nga Immuli ni Elias?”) Nabati ti opisial a kawes ni Elias. Idi inyablat ni Eliseo iti Jordan, nagbisngay manen ti danumna, ket nakaballasiw iti namaga a daga. Silalawag nga impakita daytoy a milagro a nagbalinen ni Eliseo a kasuno ni Elias a mangitandudo iti pudno a panagdaydayaw idiay Israel.​—2 Ar-ari 2:6-15.

Nasken Dagiti Nadiosan a Galad

3. Ania ti kinuna da Pablo ken Pedro maipapan iti kaadda ni Jesus ken ti “aldaw ni Jehova”?

³ Sinigsiglo manipud idi kaaldawan da Elias ken Eliseo, innaig da apostol Pablo ken Pedro ti sumungsungad nga “aldaw ni Jehova” iti kaadda ni Jesu-Kristo ken iti masanguanan idi a “baro a langlangit ken maysa a baro a daga.” (2 Tesalonica 2:1, 2; 2 Pedro 3:10-13) Tapno makalasat iti naindaklan nga aldaw ni Jehova​—inton dadaelen ti Dios dagiti kabusorna ken isalakanna ti ilina​—masapul a birokentayo ni Jehova ket iparangarangtayo ti kinaemma ken kinalinteg. (Sofonias 2:1-3) Ngem adda dadduma pay a galad a maipalgak bayat nga usigentayo dagiti pasamak a nakainaigan ni propeta Eliseo.

4. Ania ti paset ti kinaregta iti panagserbi ken Jehova?

⁴ Nasken ti kinaregta iti panagserbi iti Dios no kayattayo ti makalasat iti “aldaw ni Jehova.” Naregta da Elias ken Eliseo a nagserbi ken Jehova. Buyogen ti kasta met laeng a regta, mangipapaay ita ti natda kadagiti napulotan a Kristiano iti sagrado a serbisio ken Jehova ken idadauloda ti pannakaikaskasaba ti naimbag a damag.a Manipud pay idi ngalay ti dekada 1930, parparegtaenda amin dagidiay mangipangag iti mensahe ti Pagarian ken mangnamnama nga agbiag nga agnanayon ditoy daga nga idedikarda ti bagbagida ken Jehova ken agpabautisar. (Marcos 8:34; 1 Pedro 3:21) Riniwriw ti nangipangag iti daytoy a pammaregta. Addada idi iti naespirituan a kasipngetan ken natayda iti basol, ngem ita naammuandan ti kinapudno ti Dios, inawatda ti namnama a biag nga agnanayon iti paraiso a daga, ket naregtada nga agserserbi ken Jehova. (Salmo 37:29; Apocalipsis 21:3-5) Babaen ti kinaregta, kooperasion, kinamanagpadagus, ken dadduma pay a naimbag nga aramidda, dakkel a bang-ar ti ipapaayda kadagiti naespirituan a kakabsat ni Kristo nga adda pay la ditoy daga.​—Mateo 25:31-46.

5. Apay a nakapatpateg ti panagaramid iti naimbag kadagiti “kakabsat” ni Jesus, ket ania nga ehemplo idi kaaldawan ni Eliseo ti agpaay kadatayo?

⁵ Dagidiay agaramid iti naimbag kadagiti “kakabsat” ni Jesus agsipud ta pasurotna dagitoy a napulotan adda namnamada a makalasat iti “aldaw ni Jehova.” Adda idi agassawa iti away ti Sunem a sibabaknang a naparaburan gapu iti kinaimbag ken panangpadagusda ken Eliseo ken ti adipenna. Awan ti anak daytoy a pagassawaan, ket lakayen ti asawa a lalaki. Ngem inkari ni Eliseo iti Sunamita a mangipasngayto iti anak a lalaki, ket kasta ti napasamak. Idi natay daytoy kakaisuna nga anak sumagmamano a tawen kalpasanna, napan ni Eliseo sadi Sunem ket pinagungarna. (2 Ar-ari 4:8-17, 32-37) Anian a nagbaknang a gunggona gapu iti panangpadagus ken Eliseo!

6, 7. Ania ti maadaltayo ken Naaman, ket ania ti pakainaigan daytoy iti pannakaisalakan iti “aldaw ni Jehova”?

⁶ Kasapulan ti kinapakumbaba iti panangawat iti naibatay-Biblia a panangiturong dagiti “kakabsat” ni Kristo tapno makalasat iti aldaw ni Jehova. Nasken idi nga agpakumbaba ti agkukutel a panguluen ti buyot ti Siria a ni Naaman a mangaramid iti singasing ti kautibo a balasitang nga Israelita a mapan idiay Israel ket sapulenna ni Eliseo tapno maimbagan. Imbes a rummuar iti balayna a sumabet ken Naaman, nangibaon ni Eliseo iti mangibaga kenkuana iti daytoy: “Inka ket agdiguska iti mamimpito a daras idiay Jordan, ket ti lasagmo mabaliwanto kenka, ket nadaluskanto.” (2 Ar-ari 5:10) Nasair ti amor propio ni Naaman, ket nagluksaw, ngem idi sipapakumbaba a napan bimmatok iti namimpito a daras idiay Jordan, “ti lasagna nabaliwan a kas lasag ti ubing a bassit, ket isu ti nadalus idi.” (2 Ar-ari 5:14) Sakbay a nagawid, nagsubli ni Naaman idiay Samaria tapno agyaman iti propeta ni Jehova. Nagpakita ni Eliseo ken Naaman ngem dina inawat ti uray ania a sagut agsipud ta dina kayat nga usaren ti inted-Dios a pannakabalin nga agpaay iti material a pagimbaganna. Sipapakumbaba a kinuna ni Naaman ken Eliseo: “Manipud ita ken iti masakbayan ti adipenmo dinto agidatag iti mapuoran a daton wenno sakripisio kadagiti sabsabali a didios, no di laeng ken ni Jehova.”​—2 Ar-ari 5:17.

⁷ Babaen ti sipapakumbaba a panangsurot iti Nainkasuratan a balakad dagiti napulotan, riniwriw ti sibabaknang a maparparaburan ita. Maysa pay, babaen ti panamati iti daton a pangsubbot ni Jesus, nadalusanen iti naespirituan dagitoy nasingpet-panagpuspusona a tattao. Tagtagiragsakendan ti pribilehio nga agbalin a gagayyem ni Jehova a Dios ken ni Jesu-Kristo. (Salmo 15:1, 2; Lucas 16:9) Ket ti debosionda iti Dios ken iti panagserbida kenkuana masupapakanto babaen ti pannakailisida iti agnanayon a pannakadadael nga asidegen a lak-amen dagiti natangsit, di agbabawi a managbasol iti umad-adani nga “aldaw ni Jehova.”​—Lucas 13:24; 1 Juan 1:7.

“Asino ti Makikadua Kaniak? Asino?”

8. (a) Ania ti kababalin dagidiay makalasat iti “aldaw ni Jehova” maipanggep iti panagaramid iti pagayatan ti Dios? (b) Ania a mision ti naited ken Jehu? (c) Ania ti mapasamak ken Jezabel?

⁸ Dagidiay mangnamnama a makalasat iti “aldaw ni Jehova” masapul met a saanda nga agpangadua a mangaramid iti pagayatan ti Dios. Situtured nga impakauna idi ni Elias ti pannakaikisap ti pamilia ni Ari Acab a mammapatay ken agdaydayaw ken Baal. (1 Ar-ari 21:17-26) Nupay kasta, sakbay a naaramid daytoy a panangikisap, nasken nga iringpas ni Eliseo a kasuno ni Elias ti di pay nalpas a trabaho. (1 Ar-ari 19:15-17) Idi dimteng ti tiempo nga intuding ni Jehova, nagbaon ni Eliseo iti adipen a mangpulot ken Jehu a panguluen ti buyot kas baro nga ari ti Israel. Idi naiparukpoknan ti lana iti ulo ni Jehu, kinuna kenkuana ti babaonen: “Kastoy ti kuna ni Jehova, a Dios ti Israel, ‘Siak pinulotanka nga ari iti ili ni Jehova, iti Israel met laeng. Ket kabilemto ti balay ni Acab nga apom, tapno maibalesko koma ti daga dagiti adipenko a mammadto, ken dagiti dara dagiti isuamin nga ad-adipen ni Jehova, iti ima ni Jezabel. Ta isuamin a balay ni Acab mapukawto.’” Maipalladawto ni Reyna Jezabel kadagiti aso ket saanto a maipaayan iti nadayaw a pannakaitabon.​—2 Ar-ari 9:1-10.

9, 10. Kasano a natungpal ti sao ni Elias maipanggep ken Jezabel?

⁹ Binigbig dagiti tattao ni Jehu ti pannakapulotna ket inwaragawagda kas baro nga ari ti Israel. Dinagdagus ni Jehu ti napan idiay Jezreel tapno irugina ti trabahona a panangpapatay kadagiti apostata a nangisungsong iti panagdaydayaw ken Baal. Ti immuna a naglak-am iti makapapatay a pana ni Jehu isu ni Ari Joram nga anak ni Acab. Nakalugan a rimmuar iti siudad tapno damagenna no immay makikappia ni Jehu. “Ania a talna, iti kinabayag a dagiti pannakiabig ni Jezabel nga inam ken dagiti panagbagbaglanna kastada unay ti karuay?” insungbat ni Jehu. Ket simmalput ti pana ni Jehu iti puso ni Joram.​—2 Ar-ari 9:22-24.

¹⁰ Dagiti nadiosan a babbai saanda a tuladen ni Jezabel wenno ti asinoman a kas kenkuana. (Apocalipsis 2:18-23) Idi dimteng ni Jehu idiay Jezreel, nagpaardiod ni Jezabel. Timman-aw iti tawa sana siuuyaw a kinablaawan ni Jehu. Sinaludsod ni Jehu kadagiti kakadua ni Jezabel: “Asino ti makikadua kaniak? Asino?” Dagus a timman-aw ti dua wenno tallo nga opisial ti palasio. Kumapponda ngata ken Jehu? “Itapuakyo!” indagadagna. Ket nagtignayda a di nagpangadua, nga intapuakda iti tawa ni nadangkes a Jezabel. Nalabit napayatpayatan dagiti kabalio. Idi immay dagiti tattao a mangitabon kenkuana, ‘awan ti nasakaranda a pulos kenkuana no di laeng ti bangabangana, ken dagiti sakana, ken dagiti dakulap dagiti imana.’ Anian a makapikapik a kaitungpalan ti sao ni Elias: “Dagiti aso lamutendanto ti lasag ni Jezabel”!​—2 Ar-ari 9:30-37.

Naimpusuan a Panangsuporta iti Pudno a Panagdaydayaw

11. Siasino ni Jehonadab, ket kasanona nga impakita ti panangsuportana iti pudno a panagdaydayaw?

¹¹ Dagidiay mangnamnama a makalasat iti “aldaw ni Jehova” ken agbiag nga agnanayon ditoy daga masapul a naimpusuan a suportaranda ti pudno a panagdaydayaw. Masapul nga agbalinda a kas ken Jehonadab, wenno Jonadab, maysa a di-Israelita a managdaydayaw ni Jehova. Bayat a sireregta nga intultuloy ni Jehu ti misionna, kayat ni Jehonadab nga ipakita ti pananganamong ken panangsuportana. Gapuna, napanna sinabat ti baro nga ari ti Israel, nga agturturong idi idiay Samaria tapno papatayenna dagiti nabati iti balay ni Acab. Idi makitana ni Jehonadab, sinaludsod ni Jehu: “Nalinteg ta pusom, a kas ti pusok nalinteg ita pusom?” Wen ti sungbat ni Jehonadab ket inyawat ni Jehu ti imana sana inawis ni Jehonadab a lumugan iti karuahena a pakigubat, a kunkunana: “Kumuyogka kaniak, ket kitaem ti regtak a maipaay ken ni Jehova.” Inawat a dagus ni Jehonadab ti pribilehio a mangipakita iti panangsuportana iti mangpapatay a pinulotan ni Jehova.​—2 Ar-ari 10:15-17.

12. Apay a nainkalintegan a kalikaguman ni Jehova ti naipamaysa a debosion?

¹² Talaga a maitutop ti naimpusuan a panangsuporta iti pudno a panagdaydayaw, ta ni Jehova ti Namarsua ken Sapasap a Soberano, a maiparbeng a mangkalikagum ken maikari iti naipamaysa a debosiontayo. Imbilinna kadagiti Israelita: “Dika mangaramid iti maipaay kenka a ladawan a kinitikitan, uray ania a katulad ti adda idiay ngato sadi langit, wenno ti adda iti baba ditoy daga, wenno ti adda iti danum iti uneg ti daga: Dika iruknoy ti bagim kadakuada wenno pagserbian ida; ta siak ni Jehova a Diosmo managimonak a Dios.” (Exodo 20:4, 5) Dagidiay mangnamnama a makalasat iti “aldaw ni Jehova” masapul nga isu laeng ti dayawenda iti “espiritu ken kinapudno.” (Juan 4:23, 24) Masapul a natibkerda maipaay iti pudno a panagdaydayaw, kas kada Elias, Eliseo, ken Jehonadab.

13. Kas iti pannakidasig ti puso ni Jehonadab ken Jehu, siasino ti mangbigbigbig iti Mesianiko nga Ari, ket kasanoda nga ipakpakita daytoy?

¹³ Idi naikisapen ti sangakabbalayan ni Acab, insaruno ni Ari Jehu nga inlasin dagiti agdaydayaw ken Baal ket inikkatna a namimpinsan daytoy ulbod a relihion iti Israel. (2 Ar-ari 10:18-28) Iti kaaldawantayo, nadutokan ti nailangitan nga Ari a ni Jesu-Kristo a mangikisap kadagiti kabusor ni Jehova ken mangalangon iti kinasoberanona. Kas iti pannakidasig ti puso ni Jehonadab ken Jehu, ti “dakkel a bunggoy” ti “sabsabali a karnero” ni Jesus ita naimpusuan a bigbigenda ni Kristo kas Mesianiko nga Ari ken tultulonganda dagiti naespirituan a kakabsatna ditoy daga. (Apocalipsis 7:9, 10; Juan 10:16) Pampaneknekanda daytoy babaen ti panangannurotda iti pudno a relihion ken sireregta a pannakiramanda iti Nakristianuan a ministerio, a pakpakdaaranda dagiti kabusor ti Dios maipapan iti umas-asideg nga “aldaw ni Jehova.”​—Mateo 10:32, 33; Roma 10:9, 10.

Sumungsungaden Dagiti Makapikapik a Pasamak!

14. Ania ti agur-uray iti ulbod a relihion?

¹⁴ Pinagpatingga idi ni Jehu ti panagdaydayaw ken Baal idiay Israel. Iti kaaldawantayo, babaen ti Natantan-ok a Jehu, ni Jesu-Kristo, dadaelento ti Dios ti Babilonia a Dakkel, ti sangalubongan nga imperio ti ulbod a relihion. Din agbayag makitatayto ti kaitungpalan ti sasao ti anghel ken apostol Juan: “Dagiti sangapulo a sara a nakitam, ken ti atap nga animal, dagitoy guraendanto ti balangkantis [Babilonia a Dakkel] ket pagbalinendanto a walangwalang ken lamolamo, ket kanendanto dagiti nalasag a paspasetna ket isu puorandanto a naan-anay iti apuy. Ta ti Dios inkabilna dayta kadagiti pusoda nga itungpalda ti panunotna, uray ti panangitungpalda ti maymaysa a panunotda babaen ti panangitedda ti pagarianda iti atap nga animal, agingga a dagiti sasao ti Dios natungpalton.” (Apocalipsis 17:16, 17; 18:2-5) “Dagiti sangapulo a sara” iladawanda dagiti militarisado a napolitikaan a puersa a mangiturturay ditoy daga. Nupay makikamkamalalada ita iti Babilonia a Dakkel iti naespirituan a pamay-an, ababan ti tiempona. Dadaelento ti napolitikaan nga elemento daytoy a lubong ti ulbod a relihion, ket ti “atap nga animal”​—ti Naciones Unidas​—ti mangipangulonto kadagiti “sangapulo a sara” a mangdadael kenkuana.b Anian a pannakaidaydayawto ni Jehova!​—Apocalipsis 19:1-6.

15. Anianto ti mapasamak inton gay-atenda a dadaelen ti organisasion ti Dios ditoy daga?

¹⁵ Kalpasan ti panangraut ni Ari Jehu iti panagdaydayaw ken Baal, insaruno ti naarian a sangakabbalayanna dagiti napolitikaan a kabusor ti Israel. Kastanto met ti aramiden ti Ari a ni Jesu-Kristo. Agtalinaedto dagiti napolitikaan a puersa kalpasan ti pannakadadael ti ulbod a relihion nga umasping iti Baalismo. Iti panangimpluensia ni Satanas a Diablo, naan-anay a rumautto dagitoy a bumusbusor iti kinasoberano ni Jehova ket gay-atendanto a dadaelen ti organisasion ti Dios ditoy daga. (Ezequiel 38:14-16) Ngem bilinento ni Jehova ti Ari a ni Jesu-Kristo a mangparmek kadakuada babaen ti panangdadaelna kadakuada inton Har–​Magedon, “ti gubat ti naindaklan nga aldaw ti Dios a Mannakabalin-amin,” a mangan-anay iti pannakaalangon ti kinasoberano ni Jehova.​—Apocalipsis 16:14, 16; 19:11-21; Ezequiel 38:18-23.

Panagserbi a Sireregta a kas ken Eliseo

16, 17. (a) Kasanotay nga ammo a naregta ni Eliseo agingga iti kanibusanan ti biagna? (b) Ania ti aramidentayo kadagiti pana ti kinapudno?

¹⁶ Agingga iti gibusan ti “aldaw ni Jehova” ti intero a dakes a sistema ti bambanag ni Satanas, agtalinaed dagiti adipen ti Dios a natured ken naregta a kas ken Eliseo. Malaksid iti trabahona kas adipen ni Elias, agmaymaysa ni Eliseo a nagserbi kas propeta ni Jehova iti nasurok a 50 a tawen! Ngem naregta ni Eliseo agingga iti kanibusanan ti naunday a panagbiagna. Sakbay la unay ti ipapatayna, sinarungkaran ni Ari Joas nga apoko ni Jehu. Imbilin ni Eliseo kenkuana a mangibiat iti pana iti tawa. Simiag ti pana, ket kinuna ni Eliseo: “Ti pana ni Jehova iti balligi, ti met laeng pana ti panagballigi a maibusor iti Siria; ta sika kabilemto dagiti taga Siria idiay Afec, inggana iti matalipuposmo ida.” Iti panangidawat ni Eliseo, insaruno ni Joas a kinabil ti daga babaen dagiti panana. Ngem kurang ti regtana a nangaramid iti dayta, ta namitlona laeng a kinabil. Kinuna ni Eliseo a, kas resultana, mamitlonto la a maparmek ni Joas ti Siria, ket kasta ti napasamak. (2 Ar-ari 13:14-19, 25) Saan a naan-anay ti panangparmek ni Ari Joas kadagiti taga Siria, ‘inggana iti matalipuposda koma.’

¹⁷ Nupay kasta, kas ken Eliseo, sireregta a makidangdangadang dagiti napulotan a natda maibusor iti ulbod a panagdaydayaw. Kasta met ti ar-aramiden dagiti kakaduada nga addaan naindagaan a namnama. Maysa pay, nasayaat a laglagipen dagiti amin a mangnamnama a makalasat iti “aldaw ni Jehova” ti sasao ni naregta nga Eliseo maipapan iti panangpana iti daga. Alaentayo dagiti pana ti kinapudno ket sireregta nga ibiattayo dagitoy​—a maulit-ulit​—wen, agingga nga ibaga ni Jehova a nalpasen ti trabahotayo kadagitoy.

18. Kasanotay nga ipangag ti sasao ti 2 Pedro 3:11, 12?

¹⁸ Din agbayag gibusanto ti “aldaw ni Jehova” ti agdama a dakes a sistema ti bambanag. Gapuna, pagutugottayo iti makapabileg a sasao ni apostol Pedro. “Yantangay isuamin dagitoy a bambanag marunawdanto a kasta,” kinuna ni Pedro, “ania a kita ti tattao ti rebbeng koma a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova!” (2 Pedro 3:11, 12) Inton marunaw amin a paset daytoy a sistema iti apuy ti pungtot ti Dios nga idissuorto ni Jesu-Kristo, dagidiayto laeng nalinteg ti panagbiagda ken addaan nadiosan a debosion ti makalasat. Nasken ti kinadalus iti moral ken naespirituan. Kasta met ti panagayat kadagiti pada a tattao, a maipakita babaen ti panangipaay iti kasapulanda, nangruna iti naespirituan a pamay-an babaen ti Nakristianuan a ministeriotayo.

19. Ania ti masapul nga aramidentayo tapno makalasat iti “aldaw ni Jehova”?

¹⁹ Dagiti kadi sao ken aramidyo ipabigbignakayo kas matalek ken naregta nga adipen ti Dios? No kasta, addaankay iti namnama a makalasat iti “aldaw ni Jehova” nga agturong iti baro a lubong nga inkari ti Dios. Wen, mabalin a makalasatkayto no agaramidkayo iti naimbag kadagiti naespirituan a kakabsat ni Kristo agsipud ta pasurotna ida, kas ti panangpadagus ti agassawa a taga Sunem ken Eliseo. Tapno makalasatkayo masapul nga agbalinkay met a kas ken Naaman, a sipapakumbaba a nagtungpal iti nadibinuan nga instruksion ken nagbalin a managdaydayaw ni Jehova. No tarigagayanyo ti agbiag nga agnanayon iti paraiso a daga, masapul a naimpusuan a suportaranyo ti pudno a panagdaydayaw, kas iti inaramid ni Jehonadab. Iti kasta mabalin a maysakayto kadagiti matalek nga adipen ni Jehova, nga iti saanen a mabayag matungpalto kadakuada ti sasao ni Jesus: “Umaykayo, dakayo a binendisionan ni Amak, tawidenyo ti pagarian a naisagana a maipaay kadakayo manipud iti pannakabangon ti lubong.”​—Mateo 25:34.

[Dagiti Footnote]

Kasanoyo a Sungbatan?

◻ Ania ti sumagmamano a galad a kasapulan tapno makalasat iti “aldaw ni Jehova”?

◻ Ania nga ulidan ti impaay dagiti agassawa idiay Sunem idi kaaldawan ni Eliseo?

◻ Ania ti maadaltayo ken Naaman?

◻ Kasanotay a matulad ti ulidan ni Jehonadab?

◻ Kasanonatay nga apektaran ti 2 Pedro 3:11, 12?