Baro a Lubong Sigun iti Kari ti Dios
TI Biblia, ti naisurat a Sao ti Dios, ikkannatayo iti namnama babaen ti panangikunana: “Adda baro a langlangit ken baro a daga nga ur-urayentayo sigun iti karina, ket kadagitoy agtaeng ti kinalinteg.”—2 Pedro 3:13.
Ania ti “baro a langlangit”? Ti Biblia inaigna ti langit iti panagturay. (Aramid 7:49) Ti “baro a langlangit” ket maysa a baro a gobierno a mangituray iti intero a daga. Baro daytoy agsipud ta sukatanna ti agdama a sistema ti turay; maysa met daytoy a baro nga addang iti pannakaibanag ti panggep ti Dios. Daytoy ti Pagarian nga insuro ni Jesus nga ikararagtayo. (Mateo 6:10) Tangay ti Dios nga adda idiay langit ti Gubuayanna, maawagan dayta iti “pagarian ti langlangit.”—Mateo 7:21.
Ania ti “baro a daga”? Saan a baro a globo, tangay nalawag a kuna ti Biblia a mapagnaedan nga agnanayon ti daga. Ti “baro a daga” ket maysa a baro a kagimongan dagiti tattao. Baro daytoy agsipud ta awanton dagiti nadangkes. (Proverbio 2:21, 22) Amin a tattao idaydayaw ken agtulnogdanto iti Namarsua ken agbiagda a mayannurot kadagiti pagalagadanna. (Salmo 22:27) Maaw-awis ita dagiti tattao iti amin a nasion nga ammuenda dagita a pagalagadan ken agbiagda a maitunos kadagita. Ar-aramidem kadi dayta?
Iti baro a lubong ti Dios, amin a tattao raemendanto ti turayna. Agtultulnogka kadi iti Dios gapu iti ayatmo kenkuana? (1 Juan 5:3) Nabatad kadi dayta iti pagtaengam? iti panggedan wenno eskuelaan? iti wagas ti panagbiagmo?
Iti dayta a baro a lubong, agkaykaysanto amin a tattao nga agdaydayaw iti pudno a Dios. Daydayawem kadi ti Namarsua iti langit ken daga? Talaga kadi a sangsangkamaysa a kaduam nga agdaydayaw dagiti padam a managdaydayaw a naggapu iti amin a nasion, amin a puli, amin a pagsasao?—Salmo 86:9, 10; Isaias 2:2-4; Sofonias 3:9.
[Kahon iti panid 17]
Ti Dios a Nangikari Kadagitoy a Banag
Isu ti Namarsua iti pisikal a langit ken ti planeta a Daga. Isu ti inyam-ammo ni Jesu-Kristo kas “ti maymaysa a pudno a Dios.”—Juan 17:3.
Dagiti inaramidda a didiosen ti daydayawen ti kaaduan a tattao. Minilion dagiti agrukrukbab kadagiti awan biagna a ladawan. Dagiti dadduma idaydayawda dagiti natauan nga organisasion, materialistiko a pilosopia, wenno dagiti bukodda a tarigagay. Uray dagidiay agkunkuna nga agus-usar iti Biblia, saanda a pulos nga idaydayaw ti nagan daydiay kuna ti Biblia a “ti maymaysa a pudno a Dios.”—Deuteronomio 4:35.
Maipapan iti bagina, kuna ti Namarsua: “Siak ni Jehova. Dayta ti naganko.” (Isaias 42:5, 8) Agarup 7,000 a daras nga agparang daytoy a nagan iti Biblia kadagiti orihinal a pagsasao a nakaisuratanna. Insuro ni Jesu-Kristo kadagiti pasurotna nga ikararagda ti kastoy: “Amami nga adda iti langlangit, masantipikar koma ti naganmo.”—Mateo 6:9.
Ania dagiti galad ti pudno a Dios? Dineskribirna ti bagina kas “naasi ken managparabur, nabannayat nga agunget ken naruay iti naayat a kinamanangngaasi ken kinapudno” ken dusaenna dagidiay sipapakinakem a manglabsing kadagiti bilinna. (Exodo 34:6, 7) Ti pakasaritaan ti pannakilangenna iti sangatauan pasingkedanna ti kinapudno dayta a deskripsion.
Masapul a masantipikar, wenno maibilang a nasantuan dayta a nagan ken ti makinnagan iti dayta. Kas Namarsua ken Sapasap a Soberano, maikari a pagtulnogan ken isu laeng ti dayawentayo. Ar-aramidem kadi dayta?
[Kahon/Ladawan iti panid 18]
Ania Dagiti Panagbalbaliw nga Iyeg ti “Baro a Langlangit ken Baro a Daga”?
Agbalin a Paraiso ti Daga Lucas 23:43
Maysa a sangalubongan a kagimongan a dagiti Juan 13:35;
tattao iti amin a nasion, amin a puli, Apocalipsis 7:9, 10
amin a pagsasao nagkaykaysada iti ayat
Sangalubongan a talna, pudno Salmo 37:10, 11;
a kinatalged para iti amin Mikias 4:3, 4
Makapnek a trabaho, nawadwad a taraon Isaias 25:6; 65:17, 21-23
Awanen ti sakit, ladingit, ipapatay Isaias 25:8;
Maysa a lubong a nagkaykaysa Apocalipsis 15:3, 4
iti panagdaydayaw iti pudno a Dios
[Kahon/Dagiti Ladawan iti panid 19]
Magunggonaankanto Kadi?
Ti Dios saanna a mabalin ti agulbod!—Tito 1:2.
Kuna ni Jehova: “Ti saok . . . saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”—Isaias 55:11.
Mangparparsuan ni Jehova iti “baro a langlangit ken baro a daga.” Agturturayen ti nailangitan a gobierno. Naipasdeken ti pundasion ti “baro a daga.”
Kalpasan ti panangipalgakna iti dadduma kadagiti nakaskasdaaw a banag nga iyeg ti ‘baro a langit ken baro a daga’ iti sangatauan, nailanad iti Apocalipsis a kinuna ti Dios a mismo, ti Sapasap a Soberano: “Adtoy! Pagbalbalinek a baro ti amin a bambanag.” Kinunana pay: “Isuratmo, agsipud ta dagitoy a sasao matalek ken napudnoda.”—Apocalipsis 21:1, 5.
Ti napateg a saludsod ket, Ar-aramidentayo kadi dagiti kasapulan a panagbalbaliw tapno maikaritayo nga agbalin a paset dayta a “baro a daga” iti sidong ti “baro a langlangit”?