Ti ‘Kita ti Tao a Rumbeng a Pagbalinanyo’

“Yantangay marunawto a kasta dagitoy amin a banag, anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion!”​—2 PED. 3:11.

1. Apay a naintiempuan a pammaregta kadagiti Kristiano iti kaaldawantayo ti maikadua a surat ni Pedro?

IDI inlanad ni apostol Pedro ti maikadua a naipaltiing a suratna, adun a pannakaidadanes ti inibturan ti kongregasion Kristiano. Ngem saan a dayta ti nangpabaaw iti regtada wenno nangpabannayat iti panagrang-ayda. Gapuna, nagusar ti Diablo iti maysa a taktika a namin-adun a napaneknekan nga epektibo. Kas impalgak ni Pedro, pinadas ni Satanas nga allilawen ti ili ti Dios babaen kadagiti ulbod a mannursuro nga addaan iti “mata a napno iti pannakikamalala” ken “puso a nasanay iti kinaagum.” (2 Ped. 2:1-3, 14; Jud. 4) Gapuna, ti maikadua a surat ni Pedro ket mangidagdagadag iti panagtalinaed a matalek.

2. Ania ti nakaisentruan ti 2 Pedro kapitulo 3, ken ania ti rumbeng nga isaludsodtayo iti bagitayo?

² Insurat ni Pedro: “Ibilangko nga umiso, bayat nga addaak itoy a tabernakulo, a parayrayenkayo babaen ti panangpalagip kadakayo, yantangay pagaammok a ti pannakaikkat ti tabernakulok ket dandanin . . . Gapuna aramidekto met ti amin a kabaelak iti tunggal tiempo tapno, kalpasan ti ipapanawko, mabalinyo a dakamaten iti bagbagiyo dagitoy a banag.” (2 Ped. 1:13-15) Wen, ammo ni Pedro nga asidegen ti ipapatayna ngem kayatna nga agtultuloy a malaglagip dagiti naintiempuan a balakadna. Kinapudnona, nagbalin dagita a paset ti Biblia a mabalintayo amin a basaen. Nangruna a rumbeng a paginteresantayo ti kapitulo 3 ti maikadua a surat ni Pedro yantangay naisentro dayta iti ‘maudi nga al-aldaw’ ti agdama a sistema ti bambanag ken iti pannakadadael ti piguratibo a langlangit ken daga. (2 Ped. 3:3, 7, 10) Ania ti balakad kadatayo ni Pedro? Apay a magun-odtayo ti anamong ni Jehova no ipangagtayo ti balakadna?

3, 4. (a) Ania ti ipampamatmat ti 2 Pedro 3:11, 12, ken ania ti impakdaar ni Pedro? (b) Ania dagiti tallo a punto nga usigentayo?

³ Kalpasan a dinakamatna ti pannakadadael ti lubong ni Satanas, kinuna ni Pedro: “Anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion!” (2 Ped. 3:11, 12) Babaen kadagita a sasao, ipampamatmat ni Pedro a dagidiay laeng mangar-aramid iti pagayatan ni Jehova ken mangiparparangarang kadagiti nadiosan a galad ti maispal iti um-umay nga “aldaw ti pammales.” (Isa. 61:2) Gapuna, innayon ti apostol: “Dakayo, ngarud, dungdungnguen, nga addaan iti daytoy naipakpakauna a pannakaammo, agaluadkayo tapno saankayo a mayadayo a maikanunong kadakuada [dagiti ulbod a mannursuro] babaen iti biddut dagiti managsalungasing-linteg a tattao ket matnagkayo manipud bukodyo a kinatibker.”​—2 Ped. 3:17.

⁴ Yantangay maysa ni Pedro kadagiti addaan iti “naipakpakauna a pannakaammo,” ammona a bayat ti maudi nga al-aldaw masapul nga ad-adda nga agannad dagiti Kristiano tapno mataginayonda ti kinatarnawda. Inlawlawag ni apostol Juan idi agangay no apay. Nasirmatana ti pannakaikkat ni Satanas idiay langit ken ti ‘dakkel nga ungetna’ kadagidiay “mangtungtungpal kadagiti bilin ti Dios ken addaan iti trabaho a panangsaksi ken Jesus.” (Apoc. 12:9, 12, 17) Sigurado nga agballiginto dagiti nasungdo a napulotan nga adipen ti Dios agraman ti kakaduada a “sabsabali a karnero.” (Juan 10:16) Ngem komustatayo kas indibidual? Makapagtalinaedtayo kadi a natarnaw? Maaramidtayo dayta no ikagumaantayo ti (1) mangpatanor kadagiti nadiosan a galad, (2) agtalinaed a nadalus iti moral ken naespirituan, ken (3) maaddaan iti umiso a panangmatmat kadagiti pakasuotan. Usigentayo dagita a punto.

Patanoren Dagiti Nadiosan a Galad

5, 6. Ania dagiti galad nga ikagumaantayo a patanoren, ken apay nga agkalikagum dayta iti “napasnek a panagregget”?

⁵ Iti umun-una a paset ti maikadua a surat ni Pedro, kinunana: “Babaen ti panangipaayyo iti isuamin a napasnek a panagregget kas isusungbat, inayonyo iti pammatiyo ti kinasingpet, iti kinasingpetyo ti pannakaammo, iti pannakaammoyo ti panagteppel, iti panagteppelyo ti panagibtur, iti panagibturyo ti nadiosan a debosion, iti nadiosan a debosionyo ti nainkabsatan a panagayat, iti nainkabsatan a panagayatyo ti ayat. Ta no adda kadakayo dagitoy a banag ken aglippiasda, lapdandanto ti panagbalinyo a di aktibo wenno di nabunga maipapan iti umiso a pannakaammo ken ni Apotayo a Jesu-Kristo.”​—2 Ped. 1:5-8.

⁶ Pudno, agkalikagum iti “napasnek a panagregget” ti pannakiraman kadagiti aktibidad a tumulong kadatayo a mangpatanor kadagiti nadiosan a galad. Kas pagarigan, kasapulan ti panagregget tapno matabunuan ti amin a gimong, inaldaw a mabasa ti Biblia, ken mataginayon ti nasayaat nga eskediul ti personal a panagadal. Ken kasapulan pay ti panagregget agraman ti nasayaat a panagplano tapno maaddaan iti regular, makaparagsak, ken makaisuro a Panagdaydayaw ti Pamilia. Ngem no mairuamtayon kadagita a rutina, nalaklakatayon nga aramiden dagita a makagunggona nga aktibidad​—nangruna no matagtagiragsaktayon dagiti gunggona.

7, 8. (a) Ania ti komento ti dadduma maipapan iti Panagdaydayaw ti Pamilia? (b) Kasano a nagunggonaanka iti panagdaydayaw ti pamiliayo?

⁷ No maipapan iti urnos a panagdaydayaw ti pamilia, insurat ti maysa a kabsat: “Naaddaankami iti gundaway a mangadal iti nagadu a topiko.” Kuna ti sabali pay: “Kinapudnona, diak kayat idi nga agpatingga ti panagadal iti libro ti kongregasion. Dayta ti paboritok a gimong. Ngem ita ta nayussuatmi ti Panagdaydayaw ti Pamilia, nabigbigko nga ammo a talaga ni Jehova no ania ti kasapulantayo ken no kaano nga ipaayna dayta.” Kuna ti maysa nga ulo ti pamilia: “Nagdakkel ti naitulong kadakami ti panagdaydayaw ti pamilia. Anian a nagsayaat ti kaadda ti kasta a panagadal a mabalinmi nga ibagay iti espesipiko a kasapulanmi kas agassawa! Mariknami nga ad-addan a maiparparangarangmi ti bunga ti nasantuan nga espiritu, ken naragragsakkami itan iti ministerio.” Kuna pay ti sabali nga ulo ti pamilia: “Agsukimat dagiti annakmi a bukbukodda ken nagadu ti maad-adalda​—banag a pakaragsakanda. Gapu iti dayta nga urnos, ad-adda a makapagtalekkami nga ammo ni Jehova dagiti pakaseknanmi ken sungbatanna dagiti kararagmi.” Kasta met kadi ti panangmatmatyo iti daytoy nagsayaat a naespirituan a probision?

⁸ Diyo ipalubos a dagiti babassit a bambanag ti mangsinga iti panagdaydayaw ti pamiliayo. Kinuna ti maysa a pagassawaan: “Uppat nga agsasaruno a Huebes nga adda napasamak iti pamiliami a gistay nangpasardeng iti panagadalmi, ngem dimi impalubos dayta.” Siempre, adda dagiti gundaway a mabalin a baliwanyo ti eskediulyo. Ngem ti napateg ket diyo koma liwliwayan ti Panagdaydayaw ti Pamiliayo​—uray maysa laeng a lawas!

9. Kasano a ni Jehova pinakiredna ni Jeremias, ken ania ti masursurotayo iti ulidan ti propeta?

⁹ Mapagwadantayo ni propeta Jeremias. Kasapulanna ti naespirituan a taraon nga impaay ni Jehova ken impategna unay dayta. Iti kasta, siaanus a nakasabaanna dagiti manangyaleng-aleng a tattao. ‘Ti sao ni Jehova ket nagbalin a kas sumsumged nga apuy a napupok kadagiti tulangko,’ kinunana. (Jer. 20:8, 9) Nakatulong met dayta kenkuana nga agibtur bayat dagiti narigat a tiempo agingga iti pannakadadael ti Jerusalem. Addaantayo ita iti kompleto a naisurat a Sao ti Dios. No adalentayo dayta a naimbag ken tuladentayo ti panagpampanunot ti Dios, siraragsak a makapagibturtayo iti ministerio, makapagtalinaedtayo a matalek iti laksid dagiti pakasuotan, ken makapagtultuloytayo a nadalus iti moral ken naespirituan, kas ken Jeremias.​—Sant. 5:10.

Agtalinaed a “Di Namulitan ken Awan Pakapilawanna”

10, 11. Apay a masapul a pagreggetantayo ti agtalinaed a “di namulitan ken awan pakapilawanna,” ken ania ti kalikaguman dayta kadatayo?

¹⁰ Kas Kristiano, ammotayo nga agbibiagtayon iti maudi nga al-aldaw. Gapuna, ditay pakasdaawan a naigamer ti lubong kadagiti bambanag a karimon ni Jehova, kas iti kinaagum, seksual a kinalulok, ken kinaranggas. Kastoy ti pakabuklan ti taktika ni Satanas: ‘No saan a maala iti pammutbuteng dagiti adipen ti Dios, nalabit guyugoyenna ida nga agbasol.’ (Apoc. 2:13, 14) Gapuna, masapul nga ipapusotayo ti naayat a balakad ni Pedro: “Aramidenyo ti amin a kabaelanyo tapno iti kamaudiananna masarakannakayo [ti Dios] a di namulitan ken awan pakapilawanna ken sitatalna.”​—2 Ped. 3:14.

¹¹ Ti sasao nga “aramidenyo ti amin a kabaelanyo” ket umasping iti immuna a balakad ni Pedro nga ipaayyo ti “isuamin a napasnek a panagregget.” Nalawag a ni Jehova​—daydiay nangpaltiing ken Pedro a mangyebkas kadagita a sasao​—ammona a masapul a pagreggetantayo ti agtalinaed a “di namulitan ken awan pakapilawanna” manipud iti narugit a lubong ni Satanas. Ti panagregget ramanenna ti panangsaluad iti pusotayo tapno saan a tumulok kadagiti dakes a tarigagay. (Basaen ti Proverbio 4:23; Santiago 1:14, 15.) Ramanenna pay ti panagtalinaed a natibker a mangsaranget kadagidiay agduadua iti Nakristianuan a panagbiagtayo ken “agsao [kadatayo] a sibabassawang.”​—1 Ped. 4:4.

12. Ania a pammatalged ti mabasatayo iti Lucas 11:13?

¹² Gapu iti kinaimperpektotayo, maysa a karit ti panangaramid iti umiso. (Roma 7:21-25) Makapagballigitayo laeng no agpannuraytayo ken Jehova, a sipaparabur a mangipaay iti nasantuan nga espiritu kadagidiay napasnek nga agkiddaw kenkuana. (Luc. 11:13) Iti kasta, tumulong dayta nga espiritu tapno masukaytayo dagiti galad a makaay-ayo iti Dios ken madaerantayo saan laeng a dagiti pakasulisogan no di ket dagiti pay pakasuotan a kumarkaro bayat nga umad-adani ti aldaw ni Jehova.

Bumilegkayo Babaen Kadagiti Pakasuotan

13. No tumaud dagiti pakasuotan, ania ti tumulong kadatayo nga agibtur?

¹³ Bayat nga agbibiagtayo iti daytoy daan a sistema ti bambanag, sigurado a dumteng ti nagduduma a pakasuotan. Ngem imbes a paupay kadagita, apay a diyo ibilang dagiti pakasuotan kas gundaway a mangpatalged iti ayatyo iti Dios ken mangpasudi iti pammatiyo kenkuana ken iti Saona? Insurat ni adalan a Santiago: “Ibilangyo a rag-o amin, kakabsatko, no maipasangokayo iti nadumaduma a pakasuotan, yantangay ammoyo a daytoy nasubok a kualidad ti pammatiyo mangpataud iti panagibtur.” (Sant. 1:2-4) Laglagipenyo met nga “ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot.”​—2 Ped. 2:9.

14. Kasano a makapabileg kenka ti kapadasan ni Jose?

¹⁴ Usigenyo ti kapadasan ti anak ni Jacob a ni Jose, nga inlako dagiti kakabsatna kas tagabo. (Gen. 37:23-28; 42:21) Napukaw kadi ti pammati ni Jose gapu iti kinaulpit a napasaranna? Nagsakit kadi ti nakemna iti Dios gapu ta impalubosna a mapasamak kenkuana dayta a kinaulpit? Nalawag nga ibaga ti Biblia a saan! Kinapudnona, adda pay dadduma a napasaranna a suot. Idi agangay, siuulbod a naakusaran a nanggandat a mangrames isu a naibalud. Kaskasdi, saan a kimmapuy ti debosionna iti Dios. (Gen. 39:9-21) Imbes ketdi, impalubosna a dagiti pakasuotan ti nangpabileg kenkuana ket sibabaknang a nabendisionan gapu iti dayta.

15. Ania ti masursurotayo iti kapadasan ni Noemi?

¹⁵ Pudno, makapaladingit wenno makapaupay dagiti suot. Nalabit a narikna met dayta ni Jose. Ken sigurado a narikna dayta ti dadduma a matalek nga adipen ti Dios. Usigenyo ni Noemi, a nabalo ken natayan iti dua nga annak. “Saandak nga awagan iti Noemi,” kinunana. “Awagandak iti Mara [kaipapananna “Napait”], ta ti Mannakabalin-amin pinagbalinna a napait unay kaniak.” (Ruth 1:20, 21) Normal laeng ken matarusantayo no apay a kasta ti reaksion ni Noemi. Ngem kas Jose, saan a kimmapuy ti espiritualidad ken kinatarnawna. Gapuna, binendisionan ni Jehova daytoy a matalek a babai. (Ruth 4:13-17, 22) Malaksid iti dayta, inton agbalin a Paraiso ti daga, maikkatto ti amin a pannakadangran a pinataud ni Satanas ken ti dakes a lubongna. “Dagiti immun-una a banag saandanto a maipalagip, saandanto met a tumpuar iti puso.”​—Isa. 65:17.

16. Ania ti rumbeng a panangmatmattayo iti panagkararag, ken apay a kasta?

¹⁶ Aniaman a suot ti mapasarantayo, ti ayat ti Dios ti mangsaranay kadatayo. (Basaen ti Roma 8:35-39.) Nupay saan nga agsardeng ni Satanas a mangupay kadatayo, saan nga agballigi no pagtalinaedentayo a ‘nasimbeng ti panagpampanunottayo’ ken kanayon wenno ‘naridamtayo no maipapan kadagiti kararag.’ (1 Ped. 4:7) Kinuna ni Jesus: “Ngarud, agtalinaedkayo a siririing iti isuamin a tiempo nga umar-ararawkayo tapno makapagballigikayo iti pananglisi kadagitoy amin a banag a naikeddeng a mapasamak, ken iti panagtakder iti sanguanan ti Anak ti tao.” (Luc. 21:36) Imutektekanyo ta inusar ni Jesus ti sao nga ‘umararaw,’ maysa a nakapaspasnek a kita ti kararag. Babaen ti panangibalakadna nga umararawtayo, ipagpaganetget ni Jesus a saan nga ita ti tiempo a tagilag-anentayo ti takdertayo kenkuana ken iti Amana. Dagidiay laeng naanamongan ti addaan iti namnama a makalasat iti aldaw ni Jehova.

Agtalinaed nga Aktibo iti Panagserbi ken Jehova

17. No narigat ti mangasaba iti teritoriayo, ania ti masursuroyo iti ulidan dagiti nagkauna a propeta?

¹⁷ Makapabang-ar ti pannakiramantayo kadagiti naespirituan nga aktibidad. Ipalagipna kadatayo ti sasao ni Pedro: “Anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion!” (2 Ped. 3:11) Ti kangrunaan kadagita nga aramid ket ti panangikasaba iti naimbag a damag. (Mat. 24:14) Agpayso a narigat ti mangasaba iti dadduma a teritoria, nalabit gapu iti panangyaleng-aleng wenno ibubusor wenno iti kinaokupado dagiti tattao iti inaldaw a pakaseknanda iti biag. Naipasango met kadagiti kasta a kasasaad dagiti nagkauna nga adipen ni Jehova. Ngem saanda a simmuko no di ket “maulit-ulit” nga inkasabada ti mensahe ti Dios. (Basaen ti 2 Cronicas 36:15, 16; Jer. 7:24-26) Ania ti nakatulong kadakuada a nakapagtultuloy? Minatmatanda ti annongenda kas iti panangmatmat ni Jehova, saan a kas iti panangmatmat ti lubong. Imbilangda pay a dakkel a pribilehio ti panangawit iti nagan ti Dios.​—Jer. 15:16.

18. Anianto ti epekto ti pannakaikasaba ti Pagarian mainaig iti pannakasantipikar ti nagan ti Dios?

¹⁸ Addaantayo met iti pribilehio a mangipakaammo iti nagan ken panggep ni Jehova. Panunotenyo daytoy: Gapu iti panangasabatayo, awanto ti pagpambar dagiti kabusor ti Dios inton makikuentada kenkuana bayat ti dakkel nga aldawna. Kinapudnona, kas ken Faraon idi, maammuandanto a ni Jehova ti agtigtignay a maibusor kadakuada. (Ex. 8:1, 20; 14:25) Padayawanto met ni Jehova dagiti matalek nga adipenna babaen ti panangipalgakna nga isuda ti pannakabagina.​—Basaen ti Ezequiel 2:5; 33:33.

19. Kasano a maipakitatayo a kayattayo nga aprobetsaren ti kinaanus ni Jehova?

¹⁹ Iti maudi a paset ti maikadua a surat ni Pedro, kinunana kadagiti kapammatianna: “Ibilangyo ti kinaanus ni Apotayo kas pannakaisalakan.” (2 Ped. 3:15) Wen, itultuloytay koma nga aprobetsaren ti kinaanus ni Jehova. Kasano? Babaen ti panangsukay kadagiti galad a makaay-ayo kenkuana, panagtalinaed a “di namulitan ken awan pakapilawanna,” ken panangtaginayon iti umiso a panangmatmat kadagiti pakasuotan. Kanayonanna, masapul nga agtultuloytayo nga okupado iti panagserbi iti Dios. No aramidentayo dagita, maikaritayo kadagiti manayon a bendision nga itden ti “baro a langlangit ken baro a daga.”​—2 Ped. 3:13.

Malagipyo Kadi?

• Kasano a mapatanortayo dagiti nadiosan a galad?

• Kasano a makapagtalinaedtayo a “di namulitan ken awan pakapilawanna”?

• Ania ti masursurotayo kada Jose ken Noemi?

• Apay a dakkel a pribilehio ti pannakiraman iti panangasaba a trabaho?

[Ladawan iti panid 9]

Kas asawa a lalaki, ania ti makatulong kenka ken iti pamiliam a mangsukay kadagiti nadiosan a galad?

[Ladawan iti panid 10]

Ania ti masursurotayo iti panangsango ni Jose kadagiti pakasuotan?