Panangmatmat ti Biblia

Panagsao kadagiti Dildila​—Naggapu Aya iti Dios?

“DIREKTA, nariknak kadagiti im-imak ti karkarna a rikna, ket dayta . . . kimmaro! Kasla sangaribo​—kasla sangapulo ribo​—kalpasanna maysa a milion a boltahe ti elektrisidad . . . nagsaoak iti pagsasao a diak maawatan iti agarup dua nga oras.”

Daytoy a kapadasan iladawanna ti maysa kadagiti mapagdedebatean unay nga ar-aramid nga inaig dagiti adu iti pudno a panagdayaw ita: panagsao kadagiti dildila. Daytoy a banag ti nangnangruna a pakaseknan dagiti grupo a Pentecostal ken dagiti karismatiko a movimiento kadagiti dadduma nga ig-iglesia.

Ni Dr. Vinson Synan iti Pentecostal Holiness Church impaganetgetna ti parikut a sangsanguen dagiti managdayaw maipapan iti akem a panagsao kadagiti dildila. Kinunana: “Ti panagsao kadagiti dildila ket maysa a pakaibabainantayo.” Apay? Napaliiw ni Dr. Synan a ti panagsao kadagiti dildila itatta mabalin nga awan pagimbaganna kadatayo. “Nupay no nakababain,” intuloyna a kinuna, ti “glossolalia [panagsao kadagiti dildila] ket maysa a sagut a pinili ti Dios kadagiti umiso a tiempo iti historia tapno palawaen ken pabaruen ti Iglesia.”​—Kuami dagiti italiko.

Ti maysa kadagita nga ‘umiso a tiempo’ isu ti karkarna a pasamak agarup 1,900 a tawtawenen ti napalabas.

Apay Masapul dagiti Dildila?

Pentecostes idi iti tawen 33 K.P. Dimtengen ti panagbalbaliw. Maysa a baro a tulag ti masapul a mangsukat iti Linteg ti tulag dagiti Judio idi ugma. Maipaay iti ania a rason? Tapno malukatan ti maysa a nasaysayaat a pamay-an iti panagdayaw ken ni Jehova a Dios. Kasano a makita dagiti tattao a ti bendision ti Dios ti adda iti daytoy a panagbalbaliw iti panagdayaw? Isut’ mangusar iti kellaat a pannakairuar dagiti namilagruan a paspasamak, agraman ti panagsao kadagiti dildila, tapno tignayen dagiti puspuso dagiti nalinteg a tattao. Dagitoy makitada a ti mannakabalin-amin a Dios dagiti ammada ti pudno a mangipapaayen iti pananganamong kadagiti ad-adalan ni Jesus.

Ti sagut a panagsao kadagiti dildila ti agserbi pay iti sabali a panggep iti Pentecostes. Idi kaaldawan ni Jesus, ti panagimprenta ken panagibrodkas awan pay idi, ket dagiti naisurat a rekord saan pay a gagangay kadagiti gagangay a tattao. Gapuna, ti naimbag a damag maipapan iti pagayatan ken pangpanggep ti Dios ti masapul a maipakaammo kadagiti pagsasao dagiti manamati. Dagiti managdaydayaw ken ni Jehova immayda iti Piesta ti Pentecostes idiay Jerusalem manipud kadagiti dinosena a dagdaga iti Africa, Asia, ken Europa, ket nagsaoda kadagiti sumagmamano a nagduduma a pagsasao. Agarup 120 kadagiti ad-adalan ni Jesus ti nagtataripnong met idiay Jerusalem. Babaen ti pannakapabilegda iti nasantuan nga espiritu ti Dios, dagiti ad-adalan nangrugida nga agsao kadagiti nadumaduma a pagsasao. Anian a bangkete dagiti naimbag a damdamag ti naidasar kadagiti umariwekwek a managdaydayaw! Dagitoy “nangngegda ida nga agsasao iti sao[da] kadagiti nakaskasdaaw nga aramid ti Dios.”​—Aramid 2:5-11.

Kasano kaepektibo daytoy a milagro? Tallo ribo a managdengngeg ti nagbalin a manamati iti dayta met laeng nga aldaw! (Aramid 2:41) Idi nagsublida kadagiti adayo a pagtaenganda, dagitoy a kabbaro a kumberte namaneknekdada maipapan iti pudno a panagdayaw “kadagiti kaadayuan a paspaset iti daga.”​—Aramid 1:8.

Nasurok la bassit a dua a dekada kalpasan ti Pentecostes, impakaammo ni Pablo a ti sagut a dildila agpatingganton kamaudiananna. (1 Corinto 13:8) Apay a nainkalintegan daytoy? Agsipud ta dagiti milagro iti Pentecostes, kas panangpatalged iti immuna a Kinakristiano, natungpaldan a naimbag ti panggepda ket saandan a kasapulan.

Mabalin a kasta met ti panangmatmattayo iti kaso idiay Bantay Sinai nasurok a 1,500 a tawtawen a nasaksakbay. Ditoy nangpataud ti Dios kadagiti saan a gagangay a pagilasinan tapno ipaganetget kadagiti naurnong a tattao a ti Linteg ti tulag naggapu iti Dios. Ngem apaman a daytoy a baro nga urnos ti inawaten dagiti tattao, dagitoy a partikular a namilagruan a pagilasinan saandan a makita.​—Exodo 19:16-19.

Panagsao kadagiti Dildila Itatta?

Itatta adu ti makarikna a matultulonganda babaen iti nasantuan nga espiritu ti Dios nga agsao kadagiti dildila. Kasanotay nga itunos daytoy iti Nainkasuratan a pammaneknek a ti sagut a panagsao kadagiti dildila naglabasen?

Ti panagsao kadagiti dildila gagangay a maaramid babaen iti nakaro nga emosional a panangiyebkas kadagiti timtimek a saan a maawatan ti maysa. Gapuna daytat’ saan a mabalin a naggapu iti Dios. Kinuna ni Jesus a dagiti relihiuso a managinsisingpet ti mangpadas a manginaig iti naganna kadagita a “datdatlag,” ngem dina inawat dagitoy nga imbilangna ida a “managaramid ti kinadakes.” (Mateo 7:21-23) Naimpadtuan a namakdaar ni Pablo nga iti masanguanan addadanto dagiti ulbod a milagro, wenno “ulbod a pagilasinan ken datdatlag.” Gapuna, “tunggal di nalinteg a panangallilaw” isu ti paglaingan ti kangrunaan a manangallilaw, ni Satanas a Diablo.​—2 Tesalonica 2:8-10.

Ammoyo kadi a ti panagsao kadagiti dildila ket paset iti pagano a relrelihion iti Grecia idi kaaldawan ni Pablo? Dagiti ritualda ti nalaokan iti panagsao kadagiti dildila a mapakuyogan iti ar-aramid a panangsugsugat iti lasag ken ti nakaro a lamolamo a panagsalsala. Dagita a historikal nga ulidan nalawag nga ipakitana a ti panagsao kadagiti dildila ti mabalin a mapasamak iti sidong ti impluensia a kangrunaanna saan a nasantuan.

Gapu iti Pannakasapul ti Panagsao

No agduaduakay pay laeng maipapan iti nagtaudan dagiti napnuan rikna a panagsao kadagiti dildila itatta, usigenyo ti 1 Juan 4:1, a kunaenna: “Ay-ayatek . . . no di ket suutenyo dagiti espiritu, no nagtaudda iti Dios.” Wen, suutenyo babaen iti nainget a panagadal iti Sao ti Dios, a buyogen iti panangidawdawat ti tulong babaen iti kararag. (Aramid 17:11) Kitaenyo no dagidiay relihion nga agsasao kadagiti dildila itatta ti pudno a maiwanwanwan nga agturong iti “isuamin a kinapudno.”​—Juan 16:13.

Idi dagiti Kristiano nagsaoda kadagiti dildila idi umuna a siglo, daytoy ti nangpabileg kadagiti managdengngeg. Ti napaltiingan a mensahe ti masapul a nalawag ken maawatan.​—1 Corinto 14:26-28.

Dagidiay a mangpadayaw iti kinapudno iti Biblia ti mangiyeb-ebkas iti sasao a manglab-aw kadagiti sasao a nagtaud kadagiti napaltiingan a pagsasao idi aldaw ti Pentecostes idi ugma. Apay a kasta? Agsipud ta iwarwaragawagda ti panagturay ti Pagarian ti Dios babaen ken Kristo a maipaay kadagiti amin a nasungdo a sangatauan kadagiti ad-adu pay a managdengngeg ken iti agnanayon. Ti mensaheda ket paset iti naisurat a rekord ti Biblia, ket saan a kas iti panagsao dagiti immuna-siglo a Kristiano kadagiti dildila, ti Biblia, nga interamente wenno pasetna, ket magun-odanen iti agarup 1,800 a pagsasao.

[Ladawan iti panid 21]

Dagiti immuna-siglo a Kristiano naikkanda ti sagut a mamaneknek babaen kadagiti ganggannaet a pagsasao