Apay a Saan a Masungbatan ti Dadduma a Kararag?

Mabalintayo ti umadani iti Dios iti amin a gundaway. No kasano a maragsakan ti naayat nga ama no siwayawaya nga iyebkas kenkuana dagiti annakna ti rikriknada, maragsakan met ni Jehova a Dios nga umimdeng kadagiti kararagtayo. Ngem kas iti asinoman a masirib nga ama, adda naimbag a rason ti Dios a di mangsungbat kadagiti dadduma a kararag. Talaga kadi a ditay mabalin nga ammuen dagita a rason, wenno adda impalgak ti Biblia maipapan kadagita?

Inlawlawag ni apostol Juan: “Daytoy ti adda kadatayo a panagtalek kenkuana, nga, uray ania ti dawatentayo maitunos iti pagayatanna, denggennatayo.” (1 Juan 5:14) Masapul a dagiti kararagtayo maitunosda iti pagayatan ti Dios. Dadduma ti mangikararag kadagiti bambanag a saan a maitunos iti pagayatan ti Dios​—kas iti panangabak iti loteria wenno iti pusta. Adda dagiti agkararag buyogen ti di umiso a motibo. Namakdaar ni adalan a Santiago maibusor kadagiti kasta a di umiso a kararag, a kunkunana: “Agdawatkayo, ket kaskasdi a saankayo nga umawat, agsipud ta agdawdawatkayo maipaay iti dakes a panggep, tapno busbosenyo dayta kadagiti panaggartemyo iti linalasag a ragragsak.”​—Santiago 4:3.

Kas pagarigan, dagiti agkalaban a dasig dagiti basketbolista agpada nga ikarkararagda a mangabakda. Ditay namnamaen a sungbatan ti Dios ti kasta a kararag dagiti agsasalisal. Awan nakaidumaan dayta kadagiti moderno-aldaw a panaggugubat a dagiti agkalaban a dasig ket agpada a mangikarkararag iti balligi.

Saan a maipangag ti kararag dagidiay mangsalsalungasing iti linteg ti Dios. Kinuna idi ni Jehova kadagidiay managinsisingpet nga agdaydayaw kenkuana: “Uray no mamin-adu nga agkararagkayo, saanak nga umimdeng; dagiti mismo nga imayo napnoda iti panagibukbok iti dara.” (Isaias 1:15) Kuna ti Biblia: “Daydiay mangyadayo ti lapayagna iti panagdengngeg iti linteg​—uray ti kararagna nakarimrimon.”​—Proverbio 28:9.

Iti kasumbangirna, kanayon nga ipangag ni Jehova dagiti napasnek a kararag dagidiay agdaydayaw kenkuana, a mangar-aramid iti amin a kabaelanda nga agserbi kenkuana maitunos iti pagayatanna. Ngem kayatna kadi a sawen a patganna ti amin a kararagda? Saan. Usigenyo ti dadduma a Nainkasuratan a pagarigan.

Naisangsangayan ti kinasinged ni Moises iti Dios; kaskasdi, masapul nga agkararag ‘maitunos iti pagayatan ti Dios.’ Maisupadi iti imbaga ti Dios a panggepna, kiniddaw ni Moises a mapalubosan a sumrek iti daga ti Canaan: “Palubosannak a bumallasiw, pangngaasim, ket kitaek ti nasayaat a daga nga adda iti ballasiw ti Jordan.” Ngem naipakpakauna ken Moises a di makastrek iti dayta a daga gapu iti naaramidanna a basol. Isu nga imbes a patganna ti kiddaw ni Moises, kinuna kenkuana ni Jehova: “Umanayen dayta kenka! Saankan a pulos agsao pay kaniak maipapan itoy a banag.”​—Deuteronomio 3:25, 26; 32:51.

Inkararag ni apostol Pablo a maikkat koma ti ibilangna a “siit iti lasag.” (2 Corinto 12:7) Daytoy a “siit” mabalin a tukoyenna ti nakaro a sakit iti mata wenno ti awan sardayna a panangidadanes dagiti bumusbusor ken “sinankakabsat.” (2 Corinto 11:26; Galacia 4:14, 15) Insurat ni Pablo: “Namitlo a nagpakaasiak iti Apo tapno sumina koma kaniak dayta.” Ngem ammo ti Dios a no itultuloy ni Pablo ti mangasaba iti laksid ti mangparparigat kenkuana a “siit iti lasag,” agserbi dayta a nalawag a pammaneknek iti pannakabalin ti Dios ken iti naan-anay a panagtalek ni Pablo kenkuana. Isu nga imbes a patganna ti kiddaw ni Pablo, kinuna ti Dios kenkuana: “Ti pannakabalinko maan-anay iti pagkapuyan.”​—2 Corinto 12:8, 9.

Wen, ti Dios ti kasayaatan a makaammo no ania kadagiti kararagtayo ti sungbatanna nga agpaay a pagimbagantayo. Kanayon nga ipaay ni Jehova no ania ti pagimbagantayo a maitunos kadagiti naayat a panggepna a nairekord iti Biblia.