Ti Maudi nga Al-aldaw—Tiempo iti Panagani
“Ket kimmitaak, ket, adtoy! ti maysa nga ulep a napudaw, ket iti ulep adda a nagtugaw ti maysa nga umas-asping iti anak ti tao, nga adda iti ulona ti maysa a balangat a balitok ken iti imana maysa a kompay a natadem.”—APOCALIPSIS 14:14.
1. Ania dagiti sumagmamano a bambanag a namagbalin a naisalsalumina daytoy a siglo?
ANIAN a nakarirriribuk a tiempo daytoy maika-20 a siglo! Kasapulan nga ibturan ti sangatauan dagiti dua a narurungsot a gubat sangalubongan. Agsasaruno a pagpagilian ti ginunggon ti rebolusion. Ti bisin ti nangpataud iti ad-adu a panagsagaba ngem iti napalabas iti natauan a historia. Ti ekonomiko a panagpangpangadua, krimen, polusion, ken dagiti nakabutbuteng a saksakit ti mamagpegpeggad iti salun-at ti tunggal maysa. Maigiddato iti dayta, nakaaramid met ti tao kadagiti dadakkel a sientipiko a panagadelantar. Nakontrolnan ti pannakabalin ti atomo ket nakapagna payen iti rabaw ti bulan. Pudno unay, ti kaputotantayo ket naisalsalumina iti adu a pamay-an. Nupay kasta, maysa a banag ti agtaktakder kas ti kapapatgan unay a pasamak iti tiempotayo, ket iti sibay dayta amin dagiti dadduma a bambanag pudno nga awan ti patpategda.
2. Ania a pasamak ti impadto ni Daniel a mapagtengto iti tiempotayo?
2 Daytoy pudpudno a mangaramid-historia a pasamak ti naipadto pay laeng idi maikanem a siglo K.K.P. babaen ken ni mamadto a Daniel. Denggenyo ti nadiosan ti pannakaipaltiingna a reportna: “Nakitak kadagiti parparmata iti rabii, ket, adtoy! immay babaen kadagiti ul-ulep ti langit ti maysa a kasla anak ti tao; ket dimteng ti Dati a Lakay, ket isu inyasidegda iti saklangna. Ket isu naikkan ti panagturay ken dayag ken maysa a pagarian, nga amin dagiti il-ili, nasnasion ken pagsasao agserbida koma kenkuana.”—Daniel 7:13, 14.
3. (a) Asino “ti Dati a Lakay,” ket aniat’ intedna iti “maysa a kasla anak ti tao”? (b) Asino daytoy maysa a “kasla anak ti tao,” ket kasanot’ panagrikna dagiti Judio a narelihiusuan a papangulo idi impabigbig ni Jesus daytoy?
3 “Ti Dati a Lakay” ket isu ni Jehova a Dios. Ni Daniel ti nakakita kenkuana “kadagiti ul-ulep ti langit,” kayatna a sawen, ti di makita a pagturayan ti espiritu, a mangmangted ti kinaari iti “maysa a kasla anak ti tao.” Asino dayta “maysa”? Sinungbatan ni Jesus dayta a saludsod idi 33 K.P. idi isut’ adda a mauk-ukom iti saklang ti Sanhedrin. Ti Judio a nangato a padi ti namagsapata kenkuana a sawenna no isu ti Kristo wenno saan. Kas sungbat, situtured nga inyaplikar ni Jesus ti padto ni Daniel kenkuana, a kunkunana: “Ket kunak kadakayo nga iti masanguanan makitayonto ti Anak ti tao nga agtugaw iti makanawan ti pannakabalin nga umay iti rabaw dagiti ulep ti langit.” Imbes nga agrukbab iti Ari a pinili ni Jehova, ti nangato a padi ti nangakusar kenkuana iti panagtabbaaw. Iti sumaganad, dagiti relihiuso a papangulo a Judio ti nangpilit ken ni Poncio Pilato a kondenaren ni Jesus ken patay.—Mateo 26:63-65; 27:1, 2, 11-26.
4. Kaano nga inawat ni Jesus ti balangat ti kinaari, ken agpapan pay iti ania nga ibubusor?
4 Daytoy a ranta a panangdadael kadagiti sasao ni Jesus ti napaay idi isut’ napagungar manipud ken patay ket immuli sadi langit tapno urayen ti tiempo nga inkeddeng ni Jehova a panangiyawat kenkuana ti Pagarian. (Aramid 2:24, 33, 34; Salmo 110:1, 2) Dayta a tiempo immay idi 1914. Sigun kadagiti isuamin a pammaneknek, iti kamaudianan a paset dayta a tawen, inawat ni Jesus ti balangat ti kinaari manipud “ti Dati a Lakay” ket nangrugin nga agturay. (Mateo 24:3-42) Ti kappasngay a Pagarian ti naipasango iti napait nga ibubusor. Ngem uray dagiti narelihiusuan a papangulo dagiti Judio idi umuna a siglo, amin dagiti nagkaykaysa a pannakabalin dagiti nasnasion, ken uray pay ni Satanas ken dagiti demoniona dida nalapdan iti pannakatungpal ti pagayatan ti Dios. (Salmo 2:2, 4-6; Apocalipsis 12:1-12) Idi 1914 nagallangugan ti nainlangitan a kuro iti apagpag-isu a panawenna: “Ti pagarian ti lubong nagbalin a kukua ni Apotayo ken ni Kristona, ket isut’ agarinto nga awan inggana.” (Apocalipsis 11:15) Nanipud iti dayta a petsa, agbibiagtayon “kadagiti maudi nga al-aldaw” daytoy dakes a sistema dagiti bambanag.—2 Timoteo 3:1.
Panawen iti Panagani
5. (a) Sigun iti padto ni Daniel, asinonto ti agserbi a kabbaro a nabalangatan nga Ari? (b) Ania a sirmata ti nakita ni Juan a nakairamanan met ni Jesus kas iti kabbaro a nabalangatan nga Ari?
5 Sigun iti padto ni Daniel, inton awaten ni Jesus ti balangatna “amin dagiti il-ili, nasnasion ken pagsasao agserbidan[to] kenkuana.” Kasano dayta idinto a ti intero a sangatauan ti nangilaksid kenkuana kas Ari? Ti dramatiko a sirmata a naipanayag ken ni apostol Juan ipamatmatna ti sungbat. Ibaga kadatayo ni Juan ti nakitana: “Adtoy! ti maysa nga ulep a napudaw, ket iti ulep adda a nagtugaw ti maysa nga umas-asping iti anak ti tao, nga adda iti ulona ti maysa a balangat a balitok ket iti imana maysa a kompay a natadem.” (Apocalipsis 14:14) Umas-asping iti sirmata ni Daniel, nakita ni Jesus ditoy nga adda iti maysa nga ulep ket nailasin a kas “maysa . . . nga umas-asping iti anak ti tao.” Isu nabalangatan iti kinaari, ket iti imana saan nga agiggem iti setro no di ti maysa a kompay iti agan-ani. Apay?
6. Ania a trabaho ti nangbilinan ni Jehova a pakiramanan ti kabbaro a nabalangatan a Jesus?
6 Intuloy ni Juan: “Ket sabali nga anghel rimmuar iti templo a pukpukkawanna iti dakkel a timek daydi nagtugaw iti ulep: ‘Iserrekmo ta kompaymo ket agparaspaska, ta dimteng ti oras a panagani, ta ti anien ti daga natangkenanen.’” Ni Jesus, nupay maysa nga Ari, kaskasdi agtultulnog kadagiti instruksion a maiyal-allatiw manipud ken ni Jehova idiay “santuario ti templo.” Gapuna idi a binilin ni Jehova a makiraman iti trabaho a panagani bayat dagiti maudi nga al-aldaw, isut’ nagtulnog. Ni Jesus “inaramatna daydi kompayna iti daga, ket ti daga naparaspasan.”—Apocalipsis 14:15, 16; Hebreo 9:24; 1 Corinto 11:3.
7. (a) Ania “ti anien iti daga”? (b) Ania ti pangrugian daytoy a “panagani”?
7 Ania “ti anien iti daga”? Isuda dagiti tattao a rummuar iti daytoy sataniko a sistema dagiti bambanag tapno agserbida ken ni Jehova ken ti tinudinganna nga Ari. Ti panagani nangrugi babaen ti pannakaurnong dagiti natda ti 144,000 a makipagturay a kadua ni Jesus iti nainlangitan a pagarianna. (Mateo 13:37-43) Dagitoy isuda “ti Israel ti Dios,” ti “umuna a bungbunga ti Dios ken ti Kordero.” Isuda ti nasubbot “iti amin a kaputotan ken pagsasao ken ili ken nasion.” (Galacia 6:16; Apocalipsis 14:4; 5:9, 10) Iti daytoy a pamay-an, dagiti indibidual manipud amin nga “il-ili, nasnasion ken pagsasao” mangrugida nga agserbi ken naitrono a Jesus.
8. (a) Iti ania a tawen ti nalawag a nagpatinggaan ti panangurnong kadagiti maudi a napulotan? (b) Kasano, sigun iti sabali pay a sirmata ni Juan, a nagtultuloy ti trabaho a panagani?
8 Nupay kasta, saanda nga agmaymaysa. Ni Juan, iti sabali a sirmata, nakitana ti pannakaselio dagiti kamaudianan iti 144,000. (Apocalipsis 7:1-8) Kaawatan, ti pannakaurnong dagitoy ket nairingpasen idi agangay 1935. Ngem kalpasanna, kinuna ni Juan, isut’ nakakita ti “dakkel a bunggoy, nga awan ti nakabalin a bumilang, a naggapuda kadagiti isuamin a pagarian ken tribo ken il-ili ken pagsasao, nga agtaktakderda iti sanguanan ti trono ken iti sanguanan daydi Kordero.” (Apocalipsis 7:9-17) Gapuna ti trabaho a panagani nagtultuloy ta adu pay manipud “kadagiti il-ili, nasnasion ken pagsasao” ti nangrugi nga agserbi ken ni Jesus kas Ari.
9. Asino dagitoy kabarbaro nga immay, ket ania a dadduma a padpadto ti nangdakamat ti panagparangda bayat “ti maudi a paset dagiti aldaw”?
9 Dagitoy kabbaro nga immay ket ur-urayenda ti panangtagiragsakda ti biag iti maysa a paraiso a daga iti sidong ti Ari a tinudingan ni Jehova. (Salmo 37:11, 29; 72:7-9) Ti pannakaurnongda ti naipadto iti sumagmamano pay a dadduma a padto. Ni Isaias, kas pangarigan, impadtona a “kadagiti maudi a paset dagiti al-aldaw” dagiti nasnasion agayusdanto iti balay ni Jehova. (Isaias 2:2 3) Impadto ni Haggeo ti pannakakintayeg dagiti nasnasion a sadiay “dagiti napateg a gamgameng kadagiti amin a nasnasion umaydanto.” (Haggeo 2:7) Nagsao ni Zacarias maipapan kadagiti “sangapulo a lallaki a naggapuda kadagiti amin a pagsasao dagiti nasnasion” a mangitiponto iti bagbagida iti ili ti Dios. (Zacarias 8:23) Mainayon pay, impadto a mismo ni Jesus ti maipapan daytoy “dakkel a bunggoy.” Kunana: “Ngem inton ti Anak ti tao umayto agraman iti dayagna, ken amin dagiti anghel maikuyog kenkuana, isu ti panagtugawnanto iti trono ti gloriana. Ket iti sanguananna maurnongto dagiti isuamin a nasion ket paglalasinennanto dagiti maysa ken maysa kadagiti tao, a kas iti pastor ilasinna dagiti karnero kadagiti kalding. Ket isaadnanto dagiti karnero iti makanawanna, ken dagiti kalding iti makatigidna.”—Mateo 25:31-33.
10. (a) Babaen iti ania a pamay-an a maani “ti anien ti daga”? (b) Asino laeng dagiti makituntunos kadagiti anghel iti daytoy a trabaho?
10 Wen, ti sangatauan ti agdama a masuksukimat tapno makita no asino dagiti “karnero” ken no asino dagiti “kalding.” Kasanot’ panangar-aramid itoy trabaho a panangsukimat? Iti sirmata ni Juan, “ti anien iti daga” ket maani a maitunos iti nakapigpigsa a mensahe nga iwarwaragawag dagiti anghel. Maysa nga anghel ti nangiwaragawag iti mensahe ti “agnanayon a naimbag a damag.” Ti sabali ti nangiyanunsio ti pannakarba ti “Babilonia a Dakkel.” Ket ti maikatlo namakdaar a maibusor iti panagdayaw “iti atap nga animal,” ti napolitikaan a sistema dagiti bambanag ni Satanas. (Apocalipsis 14:6-10) Pudno, awan ti asinoman a nakangngeg ti aktual a timek dagitoy nga anghel. Ngem nakangngegda kadagiti umas-asping a mensahe nga iyeb-ebkas dagiti matalek a tattao. (Mateo 24:14; Isaias 48:20; Zacarias 2:7; Santiago 1:27; 1 Juan 2:15-17) Gapuna, nalawag, dagiti mensahe ti maipakpakaammoda babaen kadagiti natauan a pannakangiwat iti sidong ti angheliko a panangiwanwan. Ti maysa a tao mailasin kas ‘karnero’ wenno kas ‘kalding’ babaen iti inna panangabrasa kadagiti angheliko a mensahe. Kabayatan daytoy maika-20 a siglo, dagiti laeng Saksi ni Jehova ti makituntunos kadagiti anghel iti daytoy nasken unay a trabaho.
11. Kasano kapateg ti panangisaknap kadagitoy angheliko a mensahe?
11 Ti panangisaknap kadagitoy a mensahe ti ad-adda a narikut a trabaho ngem iti aniaman pay a maar-aramid itatta. Awan ti napolitikaan nga irarang-ay wenno sientipiko a diskubre nga as-asideg iti kinapategna. Dagitoy a mensahe itudtudoda ti dalan iti solusion dagiti isuamin a parparikut ti sangatauan ken ibagbagana ti agnanayon a pannakaisalakan dagiti matalek a tattao. Ken, kangrunaanna pay, daytat’ adda ti pakainaiganna iti pannakasantipikar iti nagan ni Jehova.
Ti Tinawen a Report
12, 13. Mangted ti sumagmamano a detalye manipud iti tinawen a report a mangipamatmat a ti dakkel nga “anien” ti naurnongen.
12 Daytat’ gapuna no apay a dagiti Saksi ni Jehova segseggaanda kada tawen a mabasa ti tinawen a report ti ar-aramid ti organisasion ni Jehova. Pagragsakanda a makita ti agtultuloy a pammaneknek iti panangbembendisionna iti trabahoda. No sukimatenyo ti 1987 a report, a makita kadagiti pinanid 12 agingga iti 15 daytoy a magasin, makitayonto a dagiti anghel ken dagiti natauan a katrabahuanda ket aktiboda unay iti napalabas a tawen.
13 Ti naimbag a damag ti nangngegan kadagiti 210 a dagdaga—pudno unay a ‘tunggal tribo ken nasion ken pagsasao’ a madanon itatta. (Marcos 13:10) Mainayon pay, maysa a kangatauan a bilang, a 3,395,612 ti agtartrabaho a sangsangkamaysa a mangaramid iti dayta—nga ad-adu ngem idi sakbay ti Nakristianuan a historia. Dagiti bilang ti ad-adda pay a nakaskasdaaw kadagiti dadduma nga indibidual a dagdaga. Idiay Estados Unidos, maysa a baro a kangatuan a bilang a 773,219 ti nagtengan. Dua a dadduma pay a pagilian, ti Brazil ken Mexico, ti nakakita kadagiti kangatuan a bilang a 216,216 ken 222,168; ken innem a dadduma pay, ti Britania, Alemania, Italia, Japan, Nigeria, ken ti Filipinas, ti nakaireport kadagiti kangatuan a bilang a nasursurok ngem 100,000. Iti kasumbangirna, addada met dagdaga a dadakkel ti populasionna ken adda laeng sumagmamano a ribo nga agibumbunannag wenno basbassit pay. Ti trabaho dagitoy matalek a kararua ti nakapatpateg unay bayat a pagregreggetanda a salimetmetan ti lawag ti kinapudno a rumanraniag iti sidong dagiti narikut a kasasaad.—Mateo 5:14-16.
14. Ania a kita dagiti tattao ti maur-urnongen iti organisasion ni Jehova?
14 Siempre, ti ili ti Dios saan laeng nga interesado iti irarang-ay gapu laeng iti kasta a rason. Ammoda, nupay kasta, nga amin dagidiay a kabbaro a sumsumrek iti organisasion ni Jehova isuda “dagiti napateg a gamgameng” iti imatang ni Jehova. Adu pay dagiti “agsaibbek ken agsangit gapu kadagiti amin a kinarimon” a maim-imatanganda iti Kakristianuan. (Ezequiel 9:4) Agayusda amin iti “bantay ni Jehova” agsipud ta kayatda ti pasursuruan kadagiti daldalan ti Dios. (Isaias 2:2, 3) Anian a nagpigsa a pammaneknek iti pammendision ni Jehova—nga iti daytoy narugit ken materialistiko a sistema dagiti bambanag, ginasgasut a ribo kadagiti kabbaro kada tawen a mangipamatmat iti bagbagida kas dagiti “napateg a gamgameng” ni Jehova!
Dagiti Naganat a Pannawen
15. (a) Kasano kadakkel ti teritoria a masaknapan iti trabaho a panangasaba? (b) Sigun iti sirmata ni Juan, kasano kaaktibo ti “dakkel a bunggoy”?
15 Ti trabaho a panangaskasaba dagiti Saksi ni Jehova ket naganat unay. Apay? Umuna, ti teritoria ket nakadakdakkel. Ti “naimbag a damag” masapul a maiyanunsio “iti tunggal nasion ken tribo ken pagsasao ken il-ili.” (Apocalipsis 14:6) Iti pangngarig ni Jesus, “amin a nasnasion” ti malasinlasinda kadagiti “karnero” ken kadagiti “kalding.” Nagdakkelan pay ti trabaho nga aramiden. Anian a maiyanatup, ngarud, a ti “dakkel a bunggoy” a nakita ni Juan ti mangidaydayaw iti Dios iti “aldaw ken rabii idiay templona.” (Apocalipsis 7:15) Kas kaitungpalan daytoy a sirmata, daytoy “dakkel a bunggoy,” a makitintinnulong kadagiti napulotan a kakabsatda, ti nangireport a nangbusbosda ti dagup a 739,019,286 nga oras iti trabaho a panangaskasaba idi napan a tawen—maysa a bilang a ngangngani dakkel unay a ripiripen. Iti sangalubongan, ireprepresentar daytoy ti promedio a nasurok nga 18 nga oras iti kada bulan iti tunggal agibumbunannag. Iyarigyo daytoy iti promedio a 12 nga oras iti makabulan sangapulo a tawen laeng ti napalabas, ket makitayo a ti kapartak ti trabaho a panangaskasaba ket rumangrang-ay. Kasano ti pannakaidilig ti personal a promedioyo iti sangalubongan a promedio?
16. (a) Aniat’ nasayaat a pamay-an a “panangikasaba ti sao . . . a siagawa”? (b) Mano ti nakiraman iti daytoy a trabaho idi napan a tawen?
16 Kitaenyo pay met, ti baro a kangatuan a bilang dagiti auxiliary ken regular a payunir: 650,095. Daytoy kaipapananna nga ad-adu dagiti payunir nga adda iti tay-ak iti napan a tawen ngem ti bilang dagiti agibumbunnag idi 1955. Maysakayo aya kadagidiay a payunir? No wen, nasarakanyo ti maysa a nagsayaatan a pamay-an a panangiyaplikar a personal iti balakad ni Pablo: “Ikasabam ti sao, umagawaka.” (2 Timoteo 4:2) Apay a dikay iplano ti pannakiramanyo ti payunir a serbisio iti uray maysa laeng a bulan bayat ti 1988 a tawen serbisio?
Dagiti Panginanamaan iti Ad-adda Pay nga Irarang-ay
17. Ania a bilang ti mangipakpakita a ti panginanamaan iti masanguanan a panagrang-ay ket nasayaat?
17 Dagiti panginanamaan a maipaay iti masanguanan a panagrang-ay ket pudno a nagsayaatanda. Ti bilang dagiti panangiyadal ti Biblia kadagiti pagtaengan ket 3,005,048—ket tunggal estudiante ti Biblia ti mainanama a ‘napateg a gameng’! Mainayon pay, 8,965,221 ti timmabuno iti pannakarambak ti Pangrabii ti Apo idi napalabas nga Abril. Ti kaaduan kadagidiay a timmabuno ket saanda a Saksi ni Jehova. Dadduma ti kabbaro nga interesadoda laeng. Isuda ti maabrasa unay ken maparegta nga agtultuloy a mangaramid iti nagsayaat nga irarang-ay. Mabalin a dadduma ti timmabuno kadagiti kakasta nga okasion iti namin-ano a darasen sakbayna. Kaawatan a tinagiragsakda ti pannakikaduada kadagiti Saksi ngem saanda pay a narikna ti pannakasapul a mangaramid iti ad-adu ngem dayta.
18. Sigun kadagiti padto ni Jesus ken ni Zacarias, aniat’ rebbeng nga aramiden ti maysa a tao tapno maibilang kas maysa kadagiti “karnero” ni Jehova?
18 Dagita ti rebbeng a makomendaran iti interesda iti kinapudno iti Biblia. Ngem laglagipenyo, idiay pangngarig ni Jesus ti “karnero” a mapan iti biag nga agnanayon ket isuda dagidiay nangipakita iti tulong kadagiti napulotan a kakabsat ni Jesus ken nakikooperasion kadakuada. (Mateo 25:34-40, 46) Iti padto ni Zacarias, ti naan-anay a bilang dagiti “sangapulo a lallaki” ti nangiwaragawag nga awan ti panagkedkedna: “Dakami kumuyogkaminto kadakayo a tattao, ta nangngegmi a ti Dios adda kadakayo a tattao.” (Zacarias 8:23) Saanda laeng nga addaan iti nainggayyeman a kababalin. Isuda “kumpetdanto” iti ili ti Dios ken kumuyogda kadakuada, nga idedikarda ti bagbagida nga agserbi iti Dios dagitoy. Kadagiti kaaldawantayo, daytoy ramanenna ti panagbalin a mairaman a naan-anay iti organisasion ni Jehova.
Saanen nga Agbayag
19, 20. (a) Sigun iti sirmata ni Juan, aniat’ mapasamak inton mairingpasen ti panangurnong “iti anien iti daga”? (b) Aniat’ kaipapanannanto daytoy amin kadagidiay madi nga agpasakop ken ni Jesus kas Ari?
19 Ti trabaho a panagani ket naganat maipaay iti maikadua a rason. Iti mabiit daytanto ti mairingpasen. (Mateo 24:32-34) Aniat’ mapasamak kalpasanna? Basaenyo ti sumaganad a mapasamak iti sirmata ni Juan: “Ket sabali nga anghel rimmuar iti templo nga adda sadi langit, nga addaan met ti maysa a kompay a natadem. Ket sabali nga anghel rimmuar iti altar isu nga adda pannakabalinna iti apuy. Ket pinukkawanna iti dakkel a timek daydi addaan ti kompay a natadem, a kinunana: ‘Aramatem dayta kompaymo a natadem ket purosem dagiti bungbunga ti ubas ti daga, ta dagiti ubasna naluomdan.’ Ket daydi anghel inaramatna daydi kompayna itoy daga ket inurnongna ti apiten nga ubas ti daga, ket impisokna iti pagpespesan daydi dakkel a pagdapilan iti pungtot ti Dios.”—Apocalipsis 14:17-19.
20 Kalpasan ti pannakaani “dagiti napateg a gamgameng,” awanton ti adu pay a rason a maipaay iti panagtultuloy daytoy narugit a daan a lubong. “Ti ubas ti daga,” daytoy intero a sataniko a nainlubongan a sistema dagiti bambanag, ti mapukanton ket madadael. Iti dayta a tiempo, uray pay dagiti bumusbusor mapilitandanto a mangbigbig iti Ari a tinudingan ni Jehova. Insurat ni Juan: “Adtoy! Isu [ni Jesus] umay a buyogen dagiti ul-ulep, ket makitanto dagiti isuamin a matmata, ken kasta met dagiti nangduyok kenkuana; ket dagiti isuamin a kapkaputotan ditoy daga agdung-awdanto gapu kenkuana.” (Apocalipsis 1:7; Mateo 24:30) Kalpasanna, dagiti sasao ni Jesus kadagiti narelihiusuan a papangulo a Judio, nga isuda ti kangrunaan “kadagidiay nangduyok kenkuana,” matungpalton. (Mateo 26:64) Siempre, dagidiay narelihiusuan a managinsisingpet saandanto a mapagungar tapno “makitada” a personal ni Jesus. (Mateo 23:33) Ngem amin dagidiay mangipakita iti dayta nga espiritu ket madidanto nga awaten ti Ari a tinudingan ni Jehova mapilitandanto a mangbigbig kenkuana inton umay a mangdadael kadagiti nasnasion inton Armagedon.—Apocalipsis 19:11-16, 19-21.
21. Apay rebbeng nga agtrabaho a sigagaget ti ili ti Dios a maitunos kadagiti nainlangitan nga anghel?
21 Pudno unay, ti ilalasat ti indibidual a tattao ti adda a nakatayá. Addaantay iti nadagsen a responsibilidad kas dagiti katrabahuan dagiti anghel. Ngem anian a nagdakkel a pribilehio! Sapay koma ta agtultuloytayo nga agtrabaho a sigagaget a maitunos kadagiti nainlangitan nga anghel bayat a pagregreggetantayo a sapulen amin dagiti tattao a kimmarnero, dagiti “napateg a gamgameng” ni Jehova, sakbay nga agpatinggan ti trabaho a panagani.
Mailawlawagyo Aya?
◻ Ania ti kangrunaan a pasamak pay laeng iti daytoy maika-20 a siglo?
◻ Ania “ti anien iti daga,” ket kasanot’ pannakaur-urnongda?
◻ Aniat’ sumagmamano a pakailasinan dagiti “karnero” ni Jehova?
◻ Kasano a ti tinawen a report ipakpakitana ti panangbendision ni Jehova iti trabaho a panagani?
◻ Apay a naganat unay ti trabaho a panangasaba?
[Tsart iti panid 12-15]
1987 TAWEN SERBISIO A SANGALUBONGAN A REPORT DAGITI SAKSI NI JEHOVA
(Kitaem ti bound volume)