ANAK TI TAO

Iti Hebreo, kangrunaanna a daytoy ket pakaipatarusan ti sasao a ben-ʼa·dhamʹ. Imbes a tumukoy iti tao a ni Adan, ti ʼa·dhamʹ pangkaaduan a naaramat ditoy maipaay iti “sangatauan,” iti kasta ti sasao a ben-ʼa·dhamʹ kangrunaan a kaipapananna ti “anak ti sangatauan, maysa a tao, maysa a naindagaan nga anak.” (Sal 80:17; 146:3; Jer 49:18, 33) Ti sasao masansan a naaramat a kagidgiddan ti dadduma pay a Hebreo a termino maipaay iti “tao,” awan sabali, ti ʼish, kaipapananna ti “tao a lalaki” (idiligyo ti Nu 23:19; Job 35:8; Jer 50:40) ken ti ʼenohshʹ, “mortal a tao.” (Idiligyo ti Sal 8:4; Isa 51:12; 56:2.) Iti Salmo 144:3, ti “anak ti mortal a tao” ket ben-ʼenohshʹ, idinto ta ti katupagna iti Aramaiko (bar ʼenashʹ) agparang iti Daniel 7:13.

Iti Griego, ti sasao ket hui·osʹ tou an·throʹpou, a ti naud-udi a paset ti sasao irepresentarna ti Griego a pangkaaduan a sao maipaay iti “tao” (anʹthro·pos).​—Mt 16:27.

Iti Hebreo a Kasuratan, ti masansan unay a pagparangan ti sasao ket iti libro ti Ezequiel, a sadiay nasurok a 90 a daras a ti Dios awaganna ti mammadto kas “anak ti tao.” (Eze 2:1, 3, 6, 8) Daytoy nga awag kas pannakaaramatna nabatad nga agpaay a mangipaganetget a ti mammadto naindagaan a tao laeng, ngarud pagminarenna unay ti paggidiatan ti natauan a pannakangiwat ken ti Gubuayan ti mensahena, ti Kangatuan a Dios. Ti isu met laeng nga awag nayaplikar ken mammadto Daniel iti Daniel 8:17.

Ni Kristo Jesus, “ti Anak ti Tao.” Kadagiti salaysay ti Ebanghelio gistay 80 a daras a masarakan daytoy a sasao, nga iti tunggal kaso agaplikar ken Jesu-Kristo, nga inaramatna a pangtukoy iti bagina. (Mt 8:20; 9:6; 10:23) Dagiti pagparanganna iti ruar dagiti salaysay ti Ebanghelio ket iti Aramid 7:56; Hebreo 2:6; ken Apocalipsis 1:13; 14:14.

Ti panangyaplikar ni Jesus iti daytoy a sasao iti bagina nalawag nga impakitana nga iti dayta a tiempo, pudno a ti Anak ti Dios ket tao, a “nagbalin a lasag” (Jn 1:14), “nagtaud iti maysa a babai” babaen ti pannakayinaw ken pannakaipasngayna iti Judio a birhen a ni Maria. (Ga 4:4; Lu 1:34-36) Ngarud saan laeng a naglasag iti maysa a natauan a bagi kas inaramid dagiti anghel iti napalabas; saan a maysa nga inkarnasion no di ket aktual nga ‘anak ti sangatauan’ babaen iti natauan nga inana.​—Idiligyo ti 1Jn 4:2, 3; 2Jn 7; kitaenyo ti LASAG.

Maigapu itoy, mabalin nga iyaplikar ni apostol Pablo ti Salmo 8 kas pammadto maipapan ken Jesu-Kristo. Iti suratna kadagiti Hebreo (2:5-9), inadaw ni Pablo dagiti bersikulo a pakabasaan iti: “Ania ti mortal a tao [ʼenohshʹ] tapno sipapanunotka kenkuana, ken ti anak ti naindagaan a tao [ben-ʼa·dhamʹ] tapno aywanam? Isu pinagbalinmo met a nababbaba bassit ngem kadagidiay kas-dios [“nababbaba bassit ngem kadagiti anghel,” iti Hebreo 2:7], ket kalpasanna isu kinoronaam iti dayag ken kinangayed. Isu pinagbalinmo a mangdominar iti ar-aramid dagita imam; isuamin inkabilmo iti baba dagiti sakana.” (Sal 8:4-6; idiligyo ti Sal 144:3.) Ipakita ni Pablo a, tapno matungpal daytoy a naimpadtuan a salmo, pudno a ni Jesus napagbalin a “nababbaba bassit ngem kadagiti anghel,” nga aktual a nagbalin a mortal nga “anak ti naindagaan a tao,” tapno matay a kas tao ket ngarud “ramananna ni patay maipaay iti tunggal tao,” a kalpasan dayta koronaan ni Amana, a nangpagungar kenkuana, iti kinadayag ken kinangayed.​—Heb 2:8, 9; idiligyo ti Heb 2:14; Fil 2:5-9.

Ngarud, ti awag nga “Anak ti tao” agpaay met a pangyam-ammo ken Jesu-Kristo kas ti naindaklan a Kabagian ti sangatauan, addaan iti pannakabalin a mangsubbot kadakuada manipud pannakaadipen iti basol ken ipapatay, kasta met a pangyam-ammo kenkuana kas ti naindaklan a Manangibales iti dara.​—Le 25:48, 49; Nu 35:1-29; kitaenyo ti MANANGIBALES ITI DARA; SAKAEN, MANANGSAKA; SUBBOT.

Ngarud, ti pannakaawag ni Jesus kas “Anak ni David” (Mt 1:1; 9:27) ipaganetgetna nga isu ti agtawid iti tulag ti Pagarian a matungpal iti linia ni David; ti pannakaawagna kas “Anak ti tao” ipalagipna ti panagtaudna iti natauan a puli babaen ti nainlasagan a pannakayanakna; ti pannakaawagna kas “Anak ti Dios” ipaganetgetna a nadibinuan ti namunganayanna, saan a nagtaud iti managbasol a ni Adan ket saan met a nagtawid iti kinaimperpekto manipud kenkuana no di ket addaan iti naan-anay a nalinteg a takder iti Dios.​—Mt 16:13-17.

Ania ti “pagilasinan ti Anak ti tao”?

Nupay kasta, nabatad nga adda sabali pay a kangrunaan a rason iti masansan a panangaramat ni Jesus iti sasao nga “Anak ti tao” kas agaplikar iti bagina. Mainaig daytoy iti kaitungpalan ti padto a nailanad iti Daniel 7:13, 14. Iti sirmata, nakita ni Daniel ti “maysa a kasla anak ti tao” nga um-umay buyogen dagiti ulep iti langlangit, nga umad-adani iti “Kadaanan iti Al-aldaw,” ken naipaayan iti “panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo,” a ti Pagarianna ket manayon.

Agsipud ta ti impaay-ti-anghel a kayulogan ti sirmata iti Daniel 7:18, 22, ken 27 dakamatenna dagiti “sasanto Daydiay Katan-okan” kas mangtagikua iti daytoy a Pagarian, inkagumaan ti adu a komentarista nga ipakita a ti “anak ti tao” ditoy ket ‘ragup a persona,’ kayatna a sawen, ‘dagiti sasanto ti Dios iti ragup a kasasaadda, a naibilang a napagmaymaysa kas ili,’ ‘ti naipadayag ken mainugot nga ili ti Israel.’ Nupay kasta, daytoy a panagrasrason mapaneknekan a narabaw sigun iti lawag ti Kristiano a Griego a Kasuratan. Saanna nga ikabilangan a ni Kristo Jesus, Ari a pinulotan ti Dios, nangaramid kadagiti pasurotna iti ‘tulag maipaay iti maysa a pagarian’ tapno mabalinda ti makiraman kenkuana iti Pagarianna; kasta met, nupay agturayda kas ar-ari ken papadi, dayta a pannakipagturay adda iti sidong ti kinaulona ken agpannuray iti panangipaayna iti autoridad. (Lu 22:28-30; Apo 5:9, 10; 20:4-6) Gapuna, umawatda laeng iti autoridad a mangituray kadagiti nasion agsipud ta isu immuna nga immawat iti kasta nga autoridad manipud iti Soberano a Dios.​—Apo 2:26, 27; 3:21.

Ti umiso a pannakaawat naibatad nga ad-adda pay babaen ti mismo a sungbat ni Jesus iti panagpalutpot ti nangato a padi, a kunana: “Siak [ti Kristo, ti Anak ti Dios]; ket dakayo makitayonto ti Anak ti tao a situtugaw iti makannawan ti pannakabalin ken um-umay a buyogen dagiti ulep ti langit.”​—Mr 14:61, 62; Mt 26:63, 64.

Ngarud ti padto maipapan iti iyaay ti Anak ti tao iti sanguanan ti Kadaanan iti Al-aldaw, ni Jehova a Dios, nalawag nga agaplikar iti maysa nga indibidual, ti Mesias, ni Jesu-Kristo. Ti pammaneknek ipakitana a kasta ti pannakatarus dagiti Judio. Kadagiti Rabbiniko a surat, ti padto nayaplikar iti Mesias. (Soncino Books of the Bible, inurnos ni A. Cohen, 1951, komentario iti Da 7:13) Awan duadua a gapu iti panagtarigagayda iti literal a kaitungpalan daytoy a padto, dagiti Fariseo ken dagiti Saduceo kiniddawda ken Jesus a “mangipakita kadakuada iti pagilasinan manipud langit.” (Mt 16:1; Mr 8:11) Kalpasan a natay ni Jesus kas maysa a tao ken napagungar iti espiritu a biag, naaddaan ni Esteban iti sirmata nga iti dayta ‘ti langlangit nalukatan’ ket nakitana ti “Anak ti tao nga agtaktakder iti makannawan ti Dios.” (Ara 7:56) Ipakita daytoy a, nupay insakripisiona ti natauan a kasasaadna kas subbot maipaay iti sangatauan, nainkalintegan nga agtultuloy ken Jesu-Kristo ti Mesianiko nga awag nga “Anak ti tao” iti nailangitan a saadna.

Iti umuna a paset ti sasao ni Jesus iti nangato a padi maipapan iti iyaay ti Anak ti tao, natukoy ni Jesus kas “situtugaw iti makannawan ti pannakabalin.” Nabatad a maysa a paripirip daytoy iti naimpadtuan a Salmo 110, a daytoy a salmo immun-una nga impakita ni Jesu-Kristo kas agaplikar kenkuana. (Mt 22:42-45) Daytoy a salmo, kasta met ti panangyaplikar iti dayta ti apostol iti Hebreo 10:12, 13, ipalgakna nga adda periodo a panaguray ni Jesu-Kristo sakbay nga ibaon ni Amana a ‘mapan mangparukma iti tengnga dagiti kabusorna.’ Agparang ngarud a ti kaitungpalan ti padto iti Daniel 7:13, 14 dumteng, saan nga iti tiempo ti panagungar ken iyuuli ni Jesus idiay langit, no di ket iti tiempo a panangautorisar kenkuana ti Dios tapno agtignay buyogen ti nabileg a panangiparangarang iti naarian nga autoridadna. No kasta, ti ‘iyaadani ti Anak ti tao iti Kadaanan iti Al-aldaw’nalawag a katupagna ti kasasaad a naiparang iti Apocalipsis 12:5-10 no maipapan iti tiempo, inton ti simboliko nga anak a lalaki maipasngay ken marabsut a maipan iti trono ti Dios.

Nupay kasta, iti Mateo 24:30 ken Lucas 21:27, nagipadto ni Jesus mainaig iti “pagilasinan ti Anak ti tao” kalpasan a mismo ti panangdakamatna iti karkarna a paspasamak iti langit, awan sabali, dagidiay inaig ti Biblia iti nadibinuan a pannakaipakat ti panangukom kadagiti nadangkes a tattao. (Idiligyo ti Mt 24:29 ken Lu 21:25, 26 iti Isa 13:9, 10 ken Joe 2:30, 31.) Yantangay “dagiti amin a tribu ti daga . . . makitadanto ti Anak ti tao nga um-umay kadagiti ulep ti langit nga addaan pannakabalin ken dakkel a dayag” ket “saplitendanto ti bagbagida iti panagun-unnoy,” nabatad a tumukoy daytoy iti tiempo inton ti karkarna unay a parangarang ti naarian a pannakabalin ni Jesus mamataud iti buteng iti puspuso ti tattao a saan a nagtignay mayannurot iti pagayatan ti Dios.

Dagiti kanayonan a naimpadtuan a sirmata iti Apocalipsis (17:12-14; 19:11-21) ipakitada ti panangwatwat ti Mesianiko nga Ari iti naan-anay a pannakabalin a mangituray kadagiti “ili, nasional a bungbunggoy ken pagsasao” (Da 7:14), ket ngarud daydiay “kaasping ti anak ti tao” iti Apocalipsis 14:14 awan duadua nga irepresentarna met ni Jesu-Kristo, kas met laeng iti daydiay nadeskribir iti Apocalipsis 1:13.

No maipapan iti ‘iyaay ti Anak ti tao kadagiti ulep’ ken iti pannakakita kenkuana ti “tunggal mata” (Mt 24:30; Apo 1:7), kitaenyo ti KAADDA; MATA; ULEP (Piguratibo nga Usar).