ALDAW TI APO

Piho a periodo ti tiempo a bayat dayta sibaballigi a pagpatinggaen ni Apo Jesu-Kristo ti sumagmamano a banag mainaig iti panggep ti Dios.

Iti pannakaaramatna iti Biblia, ti sao nga “aldaw” mabalin a mangipasimudaag iti maysa periodo ti tiempo nga adayo nga at-atiddog ngem iti 24 nga oras. (Ge 2:4; Jn 8:56; 2Pe 3:8) Ti pammaneknek ti konteksto ipatuldona a ti “Aldaw ti Apo” iti Apocalipsis 1:10 ket saan a piho a 24-oras nga aldaw. Yantangay ti kaadda ni Juan “iti aldaw ti Apo” ket “babaen iti paltiing,” saan la ketdi a maysa a piho nga aldaw ti lawas ti matuktukoy. Saanen a kasapulan a mapaltiingan pay ni Juan a maadda iti maysa nga espesipiko nga aldaw ti lawas. Ngarud, ti “aldaw ti Apo” isu la ketdi daydiay masanguanan a tiempo a bayat dayta mapagteng dagiti pasamak a pribilehio a makita ni Juan iti sirmata. Iraman daytoy ti paspasamak a kas iti gubat idiay langit ken pannakapagtalaw ni Satanas, pannakadadael ti Babilonia a Dakkel ken ti ar-ari iti daga ken ti buybuyotda, pannakaparaut ken pannakaigarangugong ni Satanas, pannakapagungar dagiti natay, ken ti Sangaribu a Tawen a Panagturay ni Kristo.

Ti konteksto itudona ni Jesu-Kristo kas ti Apo a ‘makin-aldaw’ iti dayta. Madagdagus kalpasan a naadda “iti aldaw ti Apo,” nangngeg ni Juan, saan a ti timek ti Mannakabalin-amin a Dios, no di ket ti timek ti napagungar nga Anak ti Dios. (Apo 1:10-18) Kasta met, ti ‘aldaw ti Apo’ a nadakamat iti 1 Corinto 1:8; 5:5; ken 2 Corinto 1:14 ket aldaw ni Jesu-Kristo.