JACINTO

Nakaas-asul a bato a medio napateg; iti Griego, hy·aʹkin·thos. (Ti sao kangrunaan a tumukoy iti sabong a kasta ti naganna, nalabit iladawanna ti natayengteng nga asul a mula nga iris.) Naikuna a jacinto ti maika-11 kadagiti pamuon a bato ti Baro a Jerusalem.​—Apo 21:20.

Ti “asul a kas iti jacinto” (jacintino) ket maysa kadagiti maris dagiti kabal ti barukong iti pannakailadawan ti nakakabalio a buybuyot, iti Apocalipsis 9:16, 17. Dagiti kabal ti barukong a natukoy ket nalabit dagidiay inyaruat dagiti nakasakay kadagiti kabalio. Ti “nalabaga a kas iti apuy ken duyaw a kasla asupre” ket nadakamat kas sabali pay a dua a maris ti kabal ti barukong. Maigapu iti naud-udi a sasao a dagiti kabalio nangipugsoda iti apuy, asuk, ken asupre, ti asul a kas iti jacinto mabalin nga irepresentarna ti kinasipnget ti asuk. Ti asuk, agraman ti apuy ken asupre, ket mabalin a makadadael iti biag.