Kapitulo 26

Ti Sagrado a Palimed ti Dios—Ti Nadayag a Tampokna!

1. (a) Kasano nga impakaammo kadatayo ni Juan a maileppasen ti sagrado a palimed? (b) Apay a nagpigsa ti panagsao ti buyot dagiti anghel?

MALAGIPMO kadi ti deklarasion a sinapataan ti napigsa nga anghel a nailanad iti Apocalipsis 10:1, 6, 7? Kinunana: “Awanton a pulos ti pannakataktak; no di ket kadagiti aldaw ti panangpaguni ti maikapito nga anghel, inton dandaninan puyoten ti trumpetana, ti sagrado a palimed ti Dios mayannurot iti naimbag a damag nga indeklarana kadagiti bukodna nga adipen a mammadto pudno unay a maileppasen.” Dimtengen ti tiempo nga intuding ni Jehova tapno mapuyotan ti maudi a trumpeta! Kasano ngarud a maileppas ti sagrado a palimed? Napalalo ti ragsak ni Juan a mangipadamag kadatayo! Insuratna: “Ket ti maikapito nga anghel pinuyotna ti trumpetana. Ket nagadda dagiti natbag a timek idiay langit, a kunkunada: ‘Ti pagarian ti lubong nagbalinen a pagarian ni Apotayo ken ni Kristona, ket agturayto kas ari iti agnanayon ken awan inggana.’” (Apocalipsis 11:15) Adda panggapuan dagidiay a buyot dagiti anghel nga agsao a sipipigsa, nga uray la gumgumluong ti timekda! Nagpateg daytoy a pakaammo ken pakaseknan unay dagiti amin a sibibiag a parsua.

2. Kaano ken iti ania a pasamak a naileppas a sibaballigi ti sagrado a palimed?

² Ti sagrado a palimed nagtengnan ti naragsak a tampokna! Idi 1914, sidadayag ken sitatan-ok a dimteng ti naballigi a pannakaileppasna idi a ni Apo Jehova insaadna ti Kristona kas kaduana nga Ari. Kas pannakabagi ni Amana, agturturayen ni Jesu-Kristo iti tengnga ti bumusbusor a lubong ti sangatauan. Kas naikari a Bin-i, isu ket naisaad kas Ari tapno rumekenna ti Serpiente ken dagiti pasurotna sa isublina ti natalna a paraiso ditoy daga. (Genesis 3:15; Salmo 72:1, 7) Kas Mesianiko nga Ari, tungpalento ni Jesus ti Sao ni Jehova ken alangonenna ni Amana, “ti Ari ti kinaagnanayon,” a masapul nga agturay kas Soberano nga Apo “iti agnanayon ken awan inggana.”​—1 Timoteo 1:17.

3. Nupay datin nga Ari ni Jehova a Dios, apay nga impalubosna a tumaud dagiti dadduma a turay ditoy daga?

³ Ngem kasano a “ti pagarian ti lubong nagbalinen a pagarian ti Apotayo” a ni Jehova? Saan aya a datin nga Ari ni Jehova a Dios? Pudno dayta, ta inkanta ni Asaf a Levita: “Ti Dios isu ti Arik manipud iti nabayagen a tiempo.” Inwaragawag ti sabali pay a salmista: “Ni met laeng Jehova nagbalinen nga ari! . . . Ti tronom naipasdek a sititibker manipud nabayagen a tiempo; manipudka iti tiempo a di nakedngan.” (Salmo 74:12; 93:1, 2) Nupay kasta, nainsiriban nga impalubos ni Jehova a tumaud dagiti dadduma a turay ditoy daga. Gapuna naan-anay a nasubok ti isyu a timmaud idiay Eden, no kabaelan met laeng ti tao nga iturayan ti bagina a mismo uray awan ti Dios. Kasta unay ti pannakapaay ti panangituray ti tao. Talaga nga umiso ti sasao ti propeta ti Dios: “Pagaammok unay, O Jehova, a saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” (Jeremias 10:23) Sipud idi nagsukir dagiti immuna a dadakkeltayo, ti intero a mapagnaedan a daga ket naipasidong iti turay “ti kadaanan a serpiente,” ni Satanas. (Apocalipsis 12:9; Lucas 4:6) Tiempo itan ti dakkel a panagbalbaliw! Tapno maalangon ti nainkalintegan a saadna, inrugi ni Jehova nga ipakat ti kinasoberanona ditoy daga iti baro a wagas, babaen ti impasdekna a Mesianiko a Pagarian.

4. Idi napuyotan dagiti trumpeta idi 1922, ania ti nayunay-unay? Ilawlawagmo.

⁴ Idi napuyotan ti pito a trumpeta idi 1922, ti kombension dagiti Estudiante ti Biblia idiay Cedar Point, Ohio, intampokna ti palawag ni J. F. Rutherford, a naibatay iti teksto a “Ti pagarian ti langlangit asidegen.” (Mateo 4:17) Ingngudona daytoy babaen kadagitoy a sasao: “Agsublikayo ngarud iti tay-ak, O dakayo nga annak ti kangatuan a Dios! Ibarikesyo ti igamyo! Agparbengkayo, agridamkayo, agsalukagkayo, pakirdenyo ti nakemyo. Agtalinaedkayo a matalek kas pudno a saksi ti Apo. Umabantekayo a makidangadang agingga nga aglangalang amin a paset ti Babilonia. Iwaragawag ken isaknapyo ti mensahe. Masapul a maammuan ti lubong a ni Jehova isu ti Dios ket ni Jesu-Kristo isu ti Ari dagiti ari ken Apo dagiti appo. Daytoy ti aldaw dagiti amin nga aldaw. Adtoy, agturturayen ti Ari! Dakayo dagiti para-waragawagna. Gapuna iwaragawagyo, iwaragawagyo, iwaragawagyo ti Ari ken ti pagarianna.” Nayunay-unay ti Pagarian ti Dios babaen ken Kristo Jesus, ket dayta ti nangrubrob iti trabaho a panangikasaba iti Pagarian a pakairamanan ti panangukom nga inwaragawag ti pito a trumpeta dagiti anghel.

5. Idi 1928, ania ti napasamak iti kombension dagiti Estudiante ti Biblia a nangitampok iti maikapito nga uni ti trumpeta?

⁵ Ti uni ti trumpeta ti maikapito nga anghel ket nangngegan kadagiti tampok ti kombension dagiti Estudiante ti Biblia idiay Detroit, Michigan, idi Hulio 30-Agosto 6, 1928. Iti daydi a tiempo, adda 107 nga estasion ti radio a naggigiddan a nangibrodkas iti inawagan ti The New York Times kas ‘ti kasaknapan ken kanginginaan a panangibrodkas iti radio a naaramid iti historia.’ Sireregta a naanamongan iti dayta a kombension ti napuersa a “Deklarasion Maibusor ken ni Satanas ken Maipaay ken ni Jehova,” a nangipakdaar nga inton Armagedon, maduprakto ni Satanas ken ti dakes nga organisasionna ken mawayawayaanto dagiti amin a mangay-ayat iti kinalinteg. Naragsakan dagiti nasungdo nga iturayan ti Pagarian ti Dios idi inawatda ti 368 ti panidna a libro a napauluan iti Government, a nairuar iti dayta a kombension. Daytoy ti nangted iti kalalawagan a pammaneknek nga “idi 1914, ti Dios insaadnan iti trono ti Napulotan nga Ari.”

Ni Jehova Innalanan ti Pannakabalinna

6. Kasano nga impadamag ni Juan ti anunsio maipapan iti pannakaitrono ni Kristo iti Pagarian ti Dios?

⁶ Naitronon ni Kristo iti Pagarian ti Dios​—anian a makaparag-o daytoy nga anunsio! Impadamag ni Juan: “Ket ti duapulo ket uppat a panglakayen a situtugaw kadagiti tronoda iti sanguanan ti Dios inruknoyda dagiti rupada ket nagdaydayawda iti Dios, a kunkunada: ‘Agyamankami kenka, Jehova a Dios, a Mannakabalin-amin, Daydiay adda ita ken adda idi, agsipud ta innalamon ti naindaklan a pannakabalinmo ket nangrugikan nga agturay a kas ari.’”​—Apocalipsis 11:16, 17.

7. Kasano a ti panagyaman ken Jehova a Dios ket inyebkas (a) dagiti natda kadagiti simboliko a 24 a panglakayen ditoy daga? (b) dagidiay kameng ti simboliko a 24 a panglakayen a napagungaren idiay langit?

⁷ Dagidiay nangyebkas iti daytoy a panagyaman isu dagiti 24 a panglakayen, a mangisimsimbolo kadagiti napulotan a kakabsat ni Kristo nga adda kadagiti nailangitan a saadda. Sipud idi 1922, ti natda kadagiti 144,000 a napulotan ditoy daga okupadoda iti trabaho a nayussuat iti pannakapuyot dagiti trumpeta. Naan-anay a nabigbigda ti kaipapanan ti pagilasinan a nailanad iti Mateo 24:3–25:46. Ngem uray idi rugrugi pay laeng ti aldaw ti Apo, dagiti padada a saksi a ‘napaneknekan a matalek agingga iti ipapatayda’ napagungarda tapno makatugawdan kadagiti saadda idiay langit, iti kasta mairepresentardan ti intero a grupo ti 144,000 nga agruknoy kas panagrukbabda ken Jehova. (Apocalipsis 1:10; 2:10) Anian a yaman amin dagitoy ta saan a nagtaktak ti Soberano nga Apoda a nangileppas iti nagpateg a sagrado a palimed!

8. (a) Ania ti epektona kadagiti nasion ti pannakapuyot ti maikapito a trumpeta? (b) Maibusor kadagiti siasino ti nangyebkasan dagiti nasion iti pungtotda?

⁸ Iti sabali a bangir, saan a makaparagsak kadagiti nasion ti pannakapuyot ti maikapito a trumpeta. Dimtengen ti tiempo tapno maramananda ti pungtot ni Jehova. Kinuna ni Juan: “Ngem nagpungtot dagiti nasion, ket dimteng ti bukodmo a pungtot, ken ti naituding a tiempo maipaay kadagiti natay tapno maukomda, ken tapno itedmo ti gunggonada kadagiti adipenmo a mammadto ken kadagiti sasanto ken kadagidiay agbuteng iti naganmo, dagiti babassit ken dagiti dadakkel, ken tapno dadaelem dagidiay mangdaddadael iti daga.” (Apocalipsis 11:18) Sipud idi 1914, napalalo ti panangyebkas dagiti nasion ditoy lubong iti pungtotda maibusor iti maysa ken maysa, maibusor iti Pagarian ti Dios, ken nangnangruna maibusor kadagiti dua a saksi ni Jehova.​—Apocalipsis 11:3.

9. Kasano a dagiti nasion daddadaelenda ti daga, ket ania ti determinado nga aramiden ni Jehova maipapan iti dayta?

⁹ Iti intero a historia, dagiti nasion daddadaelenda daytoy daga babaen ti di agressat a panaggugubat ken di umiso a sistemada. Ngem sipud idi 1914, kimmaro iti kasta unay daytoy a panangdadael. Gapu iti kinaagum ken kinarinuker, limmawa dagiti desierto ken napukaw ti kinadam-eg ti daga. Adu a lugar ti dinadael ti acid rain ken radioaktibo nga ulep. Narugitanen dagiti gubuayan ti taraontayo, ti angin a langlang-abentayo, ken ti danum nga in-inumentayo. Agpegpeggaden ti biag dagiti adda iti takdang ken iti baybay gapu kadagiti rugit nga aggapu kadagiti industria. Naminsan, dagiti nabibileg a pagilian impangtada ti pannakatalipupos ti sangatauan babaen ti nuklear a panangikisap. Makaparagsak ta ni Jehova iyegnanto ti ‘pannakadadael dagidiay mangdaddadael iti daga’; ukomennanto dagidiay napalangguad, dakes a tattao a makimbasol iti nakaay-ay-ay a kasasaad ti daga. (Deuteronomio 32:5, 6; Salmo 14:1-3) Gapuna, mangipagteng ni Jehova iti maikatlo nga ay-ay, tapno singirenna dagitoy a managbasol.​—Apocalipsis 11:14.

Asi Pay Dagidiay a Manangdadael!

10. (a) Ania ti maikatlo nga ay-ay? (b) Kasano a mangyeg iti tuok ti maikatlo nga ay-ay?

¹⁰ Adtoyen ti maikatlo nga ay-ay. Sidadaras nga umay! Daytoy ti pamay-an ni Jehova a mangdadael kadagidiay mangtultulaw iti ‘pagbatayan ti sakana,’ daytoy nagpintas a daga a pagnanaedantayo. (Isaias 66:1) Imaniobra dayta ti Mesianiko a Pagarian​—ti sagrado a palimed ti Dios. Dagiti kabusor ti Dios, ken nangnangruna dagiti lider ti Kakristianuan, natutuokda kadagiti dua nga immuna nga ay-ay​—nga imbanag kangrunaanna ti saplit dagiti dudon ken ti buyot dagiti nakakabalio; ngem saan laeng a tuok ti iyeg ti maikatlo nga ay-ay nga iwayat a mismo ti Pagarian ni Jehova. (Apocalipsis 9:3-19) Mangipaay dayta iti makapapatay a saplit tapno maikkat ti makadadael a kagimongan ti tao ken dagiti agtuturayna. Daytoyto ti tampok ti panangukom ni Jehova inton Armagedon. Maitunos dayta iti impadto ni Daniel: “Ket iti kaaldawan dagidiay nga ar-ari [dagiti agtuturay a mangdaddadael iti daga] mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.” Kas iti nangato a bantay, ti Pagarian ti Dios iturayannanto ti napapintasen a daga, nga alangonenna ti kinasoberano ni Jehova ken mangyeg iti manayon a rag-o iti sangatauan.​—Daniel 2:35, 44; Isaias 11:9; 60:13.

11. (a) Ania dagiti agsasaruno a naragsak a pasamak a nadeskribir iti padto? (b) Ania a di kaikarian a kinamanangngaasi ti magun-odan, siasino dagiti makagun-od iti dayta, ken kasano?

¹¹ Ti maikatlo nga ay-ay ket napakuyogan iti agsasaruno a naragsak a pasamak nga in-inut a maaramid iti aldaw ti Apo. Tiempo dayta ti ‘pannakaukom dagiti natay, ken ti panangited ti Dios iti gunggona dagiti adipenna a mammadto ken dagiti sasanto ken dagidiay agbuteng iti naganna.’ Panagungar manipud ken patay ti kayat a sawen dayta! Kadagidiay napulotan a sasanto a naturogen ken patay, napasamak daytoy idi rugrugi ti aldaw ti Apo. (1 Tesalonica 4:15-17) Inton agangay, dagiti natda a sasanto makitimpuyogdanto kadakuada babaen ti panagungarda iti apagdarikmat. Magunggonaanto met dagiti dadduma, agraman dagiti mammadto idi ugma nga adipen ti Dios ken amin a kameng ti sangatauan nga agbuteng iti nagan ni Jehova, karamanda man iti dakkel a bunggoy a makalasat iti dakkel a rigat wenno kadagiti “natay, dagiti dadakkel ken dagiti babassit,” a mapagungarto bayat ti Milenio a Turay ni Kristo. Yantangay iggem ti Mesianiko nga Ari ti Dios dagiti tulbek ti patay ken ti Hades, ti turay ti Pagarianna luktanna ti dana tapno iburayna ti biag nga agnanayon kadagiti amin a mangikagkagumaan a mangragpat iti dayta a napateg a probision. (Apocalipsis 1:18; 7:9, 14; 20:12, 13; Roma 6:22; Juan 5:28, 29) Imortal man a biag dayta idiay langit wenno agnanayon a biag ditoy daga, dayta sagut a biag ket di kaikarian a kinamanangaasi ni Jehova, nga agnanayon a pagyamanan ti asinoman a makaawat iti dayta!​—Hebreo 2:9.

Adtoy ti Lakasa ti Tulagna!

12. (a) Sigun iti Apocalipsis 11:19, ania ti nakita ni Juan idiay langit? (b) Ania idi ti isimsimbolo ti lakasa ti tulag, ket ania ti napasamak iti dayta idi nakautibo ti Israel idiay Babilonia?

¹² Agturturayen ni Jehova! Babaen ti Mesianiko a Pagarianna, ipakpakatna ti kinasoberanona iti sangatauan iti nakaskasdaaw a wagas. Pasingkedan daytoy ti sumaruno a nakita ni Juan: “Ket naluktan ti templo a santuario ti Dios nga adda idiay langit, ket ti lakasa ti tulagna nakita iti templona a santuario. Ket nagadda dagiti kimat ken dagiti timek ken dagiti gurruod ken maysa a ginggined ken dakkel nga uraro.” (Apocalipsis 11:19) Iti Apocalipsis, daytoy ti kakaisuna a pannakadakamat ti lakasa ti tulag ti Dios. Ti Lakasa isu idi ti makita a simbolo ti kaadda ni Jehova iti ilina nga Israel. Idiay tabernakulo, ken iti templo a binangon ni Solomon idi agangay, naidulin dayta idiay Kasasantuan. Ngem idi a ti Israel ket kinautibo ti Babilonia idi 607 K.K.P., naglangalang ti Jerusalem ken nagpukaw daydi lakasa ti tulag. Isu dayta ti tiempo a nagsardengen dagiti pannakabagi ti balay ni David nga ‘agtugaw iti trono ni Jehova kas ari.’​—1 Cronicas 29:23.a

13. Ania ti ipasimudaag ti kaadda ti lakasa ti tulag iti nailangitan a santuario ti Dios?

¹³ Kalpasan ti nasurok a 2,600 a tawen, nagparang manen ti Lakasa. Ngem iti sirmata ni Juan, saan nga iti naindagaan a templo ti ayan dayta a Lakasa. Adda dayta iti nailangitan a santuario ti Dios. Agturturay manen ni Jehova babaen ti maysa nga ari a nagtaud iti kaputotan ni David. Ngem iti daytoy a gundaway, ti Ari a ni Kristo Jesus, ket naitrono idiay nailangitan a Jerusalem​—ti nangato a disso a sadiay nga ibanagna dagiti panangukom ni Jehova. (Hebreo 12:22) Maibuksilanto dagitoy kadagiti sumaganad a kapitulo ti Apocalipsis.

14, 15. (a) Idiay nagkauna a Jerusalem, siasino laeng ti makakita iti lakasa ti tulag, ken apay? (b) Idiay nailangitan a santuario ti templo ti Dios, siasino dagiti makakita iti lakasa ti tulagna?

¹⁴ Iti nagkauna a naindagaan a Jerusalem, ti Lakasa ket saan a nakita ti kaaduan nga Israelita, ken uray dagiti papadi nga agserserbi idiay templo, ta naikabil dayta idiay Kasasantuan a naisina iti Nasantuan a Disso babaen ti kortina. (Numeros 4:20; Hebreo 9:2, 3) Ti laeng nangato a padi ti makakita iti dayta no sumrek iti Kasasantuan bayat ti tinawen nga Aldaw ti Panangabbong. Ngem idi naluktan ti santuario ti templo idiay langit, saan laeng a ni Jesu-Kristo, a Nangato a Padi nga insaad ni Jehova, ti makakita iti simboliko a lakasa no di ket uray dagiti katulonganna a papadi, ti 144,000, agraman ni Juan.

¹⁵ Daytoy a simboliko a lakasa ket maasitgan dagidiay immuna a napagungar sadi langit, yantangay naisaaddan kas kameng ti 24 a panglakayen nga adda iti aglikmut ti trono ni Jehova. Ket babaen ti espiritu ni Jehova, nalawagan ti klase Juan ditoy daga tapno mailasinda ti kaadda ti Dios iti naespirituan a templona. Adda met dagiti tanda tapno mapakaammuan ti sangatauan maipapan iti daytoy a nakaskasdaaw a pasamak. Iti sirmata ni Juan, nadakamat dagiti kimat, dagiti timek, dagiti gurruod, maysa a ginggined, ken uraro. (Idiligmo ti Apocalipsis 8:5.) Ania ti isimbolo dagitoy?

16. Kasano a naadda dagiti kimat, dagiti timek, dagiti gurruod, maysa a ginggined, ken dakkel nga uraro?

¹⁶ Sipud idi 1914 adda dakkel a panagbalbaliw iti tay-ak ti relihion. Nupay kasta, makaparagsak ta daytoy a “ginggined” ket napakuyogan kadagiti dedikado a timek a mangipapaay iti nalawag a mensahe maipapan iti naipasdeken a Pagarian ti Dios. Nagallangogan dagiti naibatay iti Biblia a ‘pakdaar maipapan iti bagyo.’ Kas iti kimat, nakita ken naipablaaken dagiti rimat ti nauneg a pannakaawat maipapan iti naimpadtuan a Sao ti Dios. Dagiti panangukom ti Dios ket nagdissuoren a kasla “uraro” maibusor iti Kakristianuan ken iti amin a palso a relihion. Amin dagitoy ket rumbeng a nasiputan koma dagiti tattao. Ngem nakalkaldaang ta kaaduanna​—kas kadagiti umili ti Jerusalem idi tiempo ni Jesus​—saanda a nailasin dagitoy a tanda a nailanad iti Apocalipsis.​—Lucas 19:41-44.

17, 18. (a) Ti pannakapuyot ti trumpeta dagiti pito nga anghel nangyeg iti ania a responsabilidad kadagiti dedikado a Kristiano? (b) Kasano nga itungtungpal dagiti Kristiano ti annongenda?

¹⁷ Agtultuloy ti panangpuyot dagiti pito nga anghel iti trumpetada, nga iwarwaragawagda dagiti napapateg a pasamak ditoy daga. Dagiti dedikado a Kristiano dakkel ti responsabilidadda nga agtultuloy a mangiwaragawag kadagitoy a mensahe iti intero a lubong. Anian a rag-oda a mangitungtungpal iti dayta nga annongen! Nabatad daytoy ta bayat ti 20 a tawen manipud 1986 agingga iti 2005, dandani nagdoble ti oras a mabusbusbosda iti ministerio iti tunggal tawen​—ti 680,837,042 nagbalin a 1,278,235,504. Pudno a “ti sagrado a palimed ti Dios mayannurot iti naimbag a damag” maiwarwaragawagen “agingga kadagiti ungto ti mapagnaedan a daga.”​—Apocalipsis 10:7; Roma 10:18.

¹⁸ Agur-uray kadatayo dagiti dadduma pay a sirmata bayat nga agtultuloy a maibuksilan dagiti panggep ti Pagarian ti Dios.

[Footnote]

[Kahon iti panid 173]

Dagiti Tampok ti Arig Trumpeta a Pannakaiwaragawag ti Panangukom ni Jehova

1. 1922 Cedar Point, Ohio: Nakarit dagiti lider ti relihion, politika, ken dadakkel a negosio ti Kakristianuan tapno ikalinteganda ti pannakapaayda a mangyeg iti talna, kinarang-ay, ken kinaragsak. Ti Mesianiko a Pagarian laeng ti solusion.

2. 1923 Los Angeles, California: Ti palawag publiko nga, “Amin a Nasion Agturturongda Itan Iti Armagedon, Ngem Minilion Dagiti Agbibiag Itan a Dinto Pulos Matay,” aw-awaganna dagiti “karnero” a managayat iti talna a panawandan ti makapapatay a baybay ti sangatauan.

3. 1924 Columbus, Ohio: Naakusar dagiti klero gapu iti panangitan-okda iti bagida ken panagkedkedda a mangikasaba iti Mesianiko a Pagarian. Dagiti pudno a Kristiano masapul nga ikasabada ti ibabales ti Dios ken liwliwaenda ti agledleddaang a sangatauan.

4. 1925 Indianapolis, Indiana: Maysa a mensahe ti namnama a naiduma iti naespirituan a kinasipnget ti Kakristianuan ta addaan daytoy iti nalawag a kari ti Pagarian kas iti talna, kinarang-ay, salun-at, biag, wayawaya, ken manayon a kinaragsak.

5. 1926 London, England: Adda arig dudon a nangdidigra iti Kakristianuan ken iti klerona, a nangibutaktak iti panangilaksidda iti Pagarian ti Dios, ken nangitan-ok iti naipasngayen a nailangitan a gobierno.

6. 1927 Toronto, Canada: Adda awis, nga awit dagiti arig buyot dagiti nakakabalio, a mangibagbaga kadagiti umili a tallikudandan ti ‘organisado a Kristianidad’ ket naimpusuan nga ipakitada ti kinasungdoda ken Jehova a Dios ken iti Arina ken iti Pagarian.

7. 1928 Detroit, Michigan: Ti deklarasion a maibusor ken Satanas ken maipaay ken Jehova, imbatadna a ti napulotan nga Ari ti Dios, a naitrono idi 1914, dadaelennanto ti dakes nga organisasion ni Satanas ken luk-atanna ti sangatauan.

[Kahon iti panid 175]

Panangdadael iti Daga

“Tunggal tallo a segundo, kas kalawa ti pagay-ayaman iti football ti madaddadael a paset ti orihinal a kabakiran. . . . Ti pannakaibus dagiti kangrunaan a kakaykayuan dadaelenna dagiti rinibu a kita ti mula ken animal.”​—Illustrated Atlas of the World (Rand McNally).

“Iti uneg ti dua a siglo a panagtaeng ti tao, [dagiti Great Lakes] ket nagbalin metten a kadakkelan a pagbasuraan ditoy lubong.” ​—The Globe and Mail (Canada).

Idi Abril 1986, ti panagbettak ken pannakauram ti nuklear a planta idiay Chernobyl, U.S.S.R., ti “kakaruan a nuklear a pasamak . . . sipud idi nabomba ti Hiroshima ken Nagasaki,” a “nangipugso iti nakaro a radiasion iti angin, daga ken danum ti lubong. Nakarkaro daytoy ngem iti panangsubokda kadagiti amin a nuklear a bomba.”​—JAMA; The New York Times.

Idiay Minamata, Japan, adda maysa a planta ti kemikal a nangibelleng iti methylmercury iti baybay. Ti pannangan kadagiti ikan ken kappo a nasabidongan iti kasta a kemikal ket nangpataud iti Minamata disease (MD) a maysa a “sakit iti sistema nerbio. . . . Ita [1985], addan 2,578 a tattao iti intero a Japan a natakuatan nga addaan iti MD.”​—International Journal of Epidemiology.

[Kahon iti panid 176]

Dagiti agkakadagsen a mensahe iti Apocalipsis 11:15-19 ket pakauna dagiti sumaruno a sirmata. Ti Apocalipsis kapitulo 12 sublianna ti napalabas ken parayrayenna dagiti detalye ti nadayag a mensahe iti Apocalipsis 11:15, 17. Ti kapitulo 13 ket mangted iti pamalatpatan iti 11:18, ta deskribiren daytoy ti punganay ken itatanor ti napolitikaan nga organisasion ni Satanas nga isu ti nangdadael iti daga. Ti kapitulo 14 ken 15 salaysayenda dagiti kanayonan a panangukom ti Pagarian a nainaig iti pannakapuyot ti maikapito a trumpeta ken iti maikatlo nga ay-ay.

[Dagiti ladawan iti panid 174]

Dadaelento ni Jehova “dagidiay mangdaddadael iti daga”