Wayawaya ti Relihion Naitandudo Idiay Japan

ITI las-ud ti adu a tawen idiay Japan, naipasango dagiti agtutubo nga estudiante a Saksi ni Jehova iti maysa a parikut: Surotenda kadi ti sinanay-Biblia a konsiensiada, wenno surotenda ti kurikulum ti eskuelaan a maikontra iti konsiensiada. Apay nga adda kasta a parikut? Gapu ta ti panagsanay iti martial arts ket paset ti kurso a physical education (edukasion a mangwatwat iti bagi) kadagiti eskuelaanda. Nausig dagiti agtutubo a Saksi a ti kasta a panagsanay di maitunos kadagiti prinsipio ti Biblia, kas iti daydiay masarakan iti Isaias kapitulo 2, bersikulo 4. Kastoy ti mabasa: “Pandayendanto dagiti kampilanda a pagbalinen a dingding ti arado ken dagiti pikada a pagbalinen a komkompay. Ti nasion saannanto nga itag-ay ti kampilanna a maibusor iti nasion, ket didanto met adalenen ti pannakigubat uray kaano.”

Tangay dida kayat ti makasursuro kadagiti laing a pakilaban, a mairaman ti panangdangran iti sabali a tao, inlawlawag dagiti agtutubo a Kristiano a Saksi kadagiti mannursuroda a saan nga ipalubos ti konsiensiada a makipaset iti martial arts. Kalpasan nga inkagumaanda nga allukoyen dagitoy nga estudiante a sumurot iti kurikulum ti eskuelaan, adu a mannakaawat a mannursuro iti kamaudiananna immanamong a mangraem iti konsiensia dagiti estudiante ken mangipaay kadagiti sandi a trabaho.

Nupay kasta, nagarsagid ti dadduma a mannursuro, ken impaidam ti sumagmamano nga eskuelaan kadagiti agtutubo a Saksi dagiti kredito para iti physical education. Idi 1993, agarup siam a Saksi ti di nakastrek iti sumaganad a grado ket napilitan nga agsardengda nga ageskuela ta no saan maikkatda gapu ta dida makiraman iti martial arts.

Nabatad, tiemponan tapno ilaban ti kalintegan dagiti agtutubo a Kristiano nga ageskuela a dida ikompromiso ti konsiensiada. Lima nga estudiante a di napalubosan a sumrek iti maikadua a grado iti Kobe Municipal Industrial Technical College (maaw-awagan Kobe Tech iti ababa) ti nangikeddeng nga agdarum.

Ania ti Isyu?

Idi primavera ti 1990, idi nageskuela dagiti lima nga estudiante idiay Kobe Tech, inlawlawagda kadagiti mannursuro a dida makiraman iti panagsanay iti kendo (panagarnis dagiti Hapones) gapu iti sinanay-Biblia a panangmatmatda. Dagiti mangisursuro iti physical education siiingetda a bimmusor ket impaidamda kadakuada ti sandi a pamuspusan tapno makaalada koma iti gradoda para iti physical education. Kamaudiananna, saan a nakapasa dagiti estudiante iti klase a physical education ket nagbanaganna inulitda manen ti umuna a grado (umuna a tawen iti kolehio). Idi Abril 1991, nagdarumda iti Kobe District Court, a kinunada a ti aksion ti eskuelaan ket maikontra iti ginarantisaran ti konstitusion a wayawaya iti relihion.a

Inkalintegan ti eskuelaan a ti panangipaay iti sandi a trabaho katupagna ti pananganamong iti maysa a partikular a relihion ket iti kasta maikontra iti panagbalin a neutral ti edukasion publiko. Malaksid pay, kinunada nga awan pasilidadda wenno tattao man a mangipaay iti sandi a programa para iti physical education.

Pangngeddeng ti District Court Tinignayna Dagiti Mannakaawat

Bayat a nausig ti kaso, dua kadagiti lima nga estudiante ti di manen nakapasa iti physical education, bayat a ti sabali a tallo ti apagpasado laeng ken nakastrek iti sumaganad a grado. Sigun ti regulasion ti eskuelaan dagiti estudiante a nababat’ markada ken nangulit iti maysa a grado iti aniaman a dua nga agsaruno a tawen ti mabalin nga ikkaten. Gapu itoy, maysa kadagiti dua nga estudiante inkeddengna ti umikay iti eskuelaan sakbay a maikkat, ngem ti maysa, ni Kunihito Kobayashi, dina kayat ti umikay. Gapuna naikkat. Makapainteres, ti promedio ti marka ni Kunihito iti amin nga asignatura agraman ti physical education, a dina naipasa ta 48 lat’ puntosna, ket 90.2 puntos manipud 100 a marka. Isut’ kalaingan kadagiti 42 a kaklasena.

Idi Pebrero 22, 1993, nagdesision ti Kobe District Court pabor iti Kobe Tech a kinunana: “Dagiti aksion ti eskuelaan saanda a kinontra ti konstitusion,” nupay inaminna a “di mailibak a ti wayawaya ti panagdayaw dagiti nagdemanda ket medio nakedngan gapu iti pagannurotan ti eskuelaan a panagsanay iti kendo.”

Kas ken apostol Pablo idi umuna a siglo, inkeddeng dagiti nagdemanda ti agapelar iti nangatngato a korte. (Aramid 25:11, 12) Naipan ti kaso iti Nangato a Pangukoman ti Osaka.

Awan Panagimbubukodanna a Motibo Dagiti Nagdemanda

Maysa a nalatak nga eskolar, ni Propesor Tetsuo Shimomura iti Unibersidad ti Tsukuba, ti immanamong a mangipaay iti pammaneknek kas maysa nga eksperto a testigo iti Nangato a Pangukoman ti Osaka. Gapu ta nasigo iti edukasion ken linteg, impaganetgetna ti kinaawan konsiderasion ti eskuelaan iti panangtratona kadagiti estudiante. Inyebkas ni Kunihito Kobayashi iti korte ti rikriknana, ket ti napasnek a kababalinna tinignayna ti puso dagiti adda iti pangukoman. Mainayon pay, idi Pebrero 22, 1994, gapu ta ti Kobe Bar Association, inyebkasna a ti inaramid ti eskuelaan sinalungasingna ti wayawaya ti panagdayaw ni Kunihito ken iti kalinteganna nga umawat ti edukasion, inrekomendana a ti eskuelaan isublina koma ni Kunihito.

Idi dandanin rummuar ti pangngeddeng ti Nangato a Pangukoman ti Osaka, amin nga agtutubo a Kristiano a nairaman nagagaranda a makipaset iti dangadang aginggat’ ngudona. Pinanunotda nga ilablabanda ti maysa a legal a dangadang para kadagiti rinibu nga agtutubo a Saksi a maipaspasango iti kasta met la nga isyu kadagiti eskuelaan iti intero a Japan. Ngem tangay dida met naikkat iti eskuelaan, nalabit waswasenton ti pangukoman ti kasoda. Ken makitada a no isanudda ti demandada, maitandudo ti di kina-nainkalintegan ti eskuelaan iti panangikkatna ken ni Kunihito. Gapuna, inkeddeng dagiti amin nga estudiante malaksid ken ni Kunihito nga isanud ti kaso.

Idi Disiembre 22, 1994, ti Kangrunaan nga Ukom a ni Reisuke Shimada iti Nangato a Pangukoman ti Osaka binaliktadna ti pangngeddeng ti Kobe District Court. Nasarakan ti pangukoman a napasnek ti rason ni Kunihito iti panagkedkedna nga agsanay iti kendo sa pudno a dakkel ti pukawna gapu iti aksionna a naibatay iti relihioso a pammatina. Ti eskuelaan, sigun ti Kangrunaan nga Ukom a ni Shimada, nangipaay koma iti sandi a trabaho. Daytoy nasayaat a pangngeddeng ket inanamongan dagidiay maseknan kadagiti natauan a kalintegan. Ti eskuelaan, nupay kasta, nagapelar iti Korte Suprema ti Japan, isu a nasurok manen a makatawen a di nakaeskuela ni Kunihito.

Idiay Korte Suprema

Maysa nga editorial iti pagiwarnak a Kobe Shimbun kinunana kalpasanna: “Ti Kobe City School Board ken ti eskuelaan inawatna koma ni Mr. Kobayashi idin [kalpasan ti pangngeddeng ti Nangato a Pangukoman ti Osaka]. . . . Ti kababalinda, nupay dida makisinnubang, impaidamna iti maysa a tao ti napateg a paset ti kinaagtutubona.” Kaskasdi, estrikto ti takder ti Kobe Tech iti daytoy a kaso. Kas resultana, nagbalin dayta a topiko dagiti nasional a pagiwarnakan. Nadlaw dayta dagiti mannursuro ken dagiti autoridad iti eskuelaan iti intero a pagilian, ket ti desision ti kangatuan a korte ti pagilian agserbinto a natibtibker a legal a pagibatayan para kadagiti umasping a kaso iti masanguanan.

Idi Enero 17, 1995, agarup makalawas kalpasan a nagapelar ti eskuelaan idiay Korte Suprema, daydi ginggined ti Kobe inramanna ti Ashiya City a pagnanaedan ni Kunihito ken ti pamiliana. Idi agarup alas 5:30 iti daydi nga agsapa, sumagmamano a minuto sakbay a nagginggined dita a lugar, rimmuar ni Kunihito iti balayda tapno mangged. Agbisbisikleta idi iti sirok ti Hanshin Expressway, ket idi nagginggined, asidegen iti paset a narba. Dagus a nagsubli idiay pagtaenganda ket nakitana a naan-anay a narba ti umuna a kadsaaran ti balayda. Nakita ni Kunihito a dagus koma a napukaw ti biagna gapu iti ginggined ket nagyaman ken Jehova iti panangipalubosna kenkuana a makalasat. No koma ta natay, nalabit ti kaso ti kendo nalpas nga awan pangngeddeng ti Korte Suprema.

Gagangay a sukimaten ti Korte Suprema idiay Japan dagiti apela babaen la iti papeles sananto kedngan no umiso wenno biddut ti pangngeddeng ti nababbaba a korte. Malaksid no adda nasken a rason tapno baliktadenna ti pangngeddeng ti nababbaba a korte, awanen ti maaramid a bista. Saan a pakaammuan ti korte dagiti maseknan a partido no kaano a mayulog ti pangngeddeng. Gapuna naklaat ni Kunihito idi agsapa ti Marso 8, 1996, idi naibaga kenkuana a maiyulogen ti pangngeddeng iti dayta nga agsapa. Anian a rag-o ken ragsakna idi naammuanna nga intandudo ti Korte Suprema ti pangngeddeng ti Nangato a Pangukoman ti Osaka.

Uppat nga ukom, nga indauluan ni Hues Shinichi Kawai, ti nagnunumo a nangikeddeng a “ti aksion ti eskuelaan maibilang nga estrikto unay no idilig iti normal a pagalagadan, a simmiasi iti linteg, gapuna saan a legal dayta.” Binigbig ti korte ti kinapasnek ti panagkitakit ni Kunihito nga agensayo iti kendo ket kinunana: “Ti rason ti nagapelar nga agkitakit nga agensayo ti kendo ket napasnek ken nainaig unay iti pundasion ti pammatina.” Inkeddeng ti Korte Suprema a ti eskuelaan mabalin ken kasapulan koma a nangipaay iti maisandi nga aktibidad tapno maraem ti narelihiosuan a pammati ti nagapelar.

Epekto a Nalawat’ Saknapanna

Di pagduaduaan a daytoy a pangngeddeng mangipasdek iti nasayaat a pagwadan a pabor iti wayawaya ti panagdayaw kadagiti eskuelaan. Kinuna ti The Japan Times: “Ti pangngeddeng ket damo unay iti Korte Suprema no maipanggep iti isyu ti edukasion ken wayawaya ti relihion.” Nupay kasta, dayta a desision dina ikkaten ti responsabilidad ti tunggal agtutubo nga estudiante a maaddaan iti bukod a takder no maipasango kadagiti suot iti pammati.

Kinuna ni Propesor Masayuki Uchino iti Unibersidad ti Tsukuba a natignay dagiti ukom a nangpangabak ken ni Kunihito gapu ta isu ket “napasnek nga estudiante a karkarna ti kangato ti markana idiay eskuelaan.” Kastoy ti balakad ti Biblia kadagiti Kristiano a naipasango kadagiti suot iti pammatida: “Taginayonenyo a nasayaat ti kababalinyo iti tengnga dagiti nasion, tapno, iti banag a pangsawanda iti maibusor kadakayo a kasla managaramid iti dakes, dayawenda koma ti Dios iti aldaw a panangsukimatna kas bunga ti nasayaat nga ar-aramidyo a masaksianda.” (1 Pedro 2:12) Maipakita dagiti matalek nga agtutubo a Kristiano a ti Nainkasuratan a takderda ket maikari iti panagraem dagiti tao babaen ti panagbiagda sigun kadagiti pagalagadan ti Biblia.

Kalpasan ti pangngeddeng ti Korte Suprema, naawat manen ni Kunihito Kobayashi idiay Kobe Tech. Kaaduan nga estudiante a kinagiddan idi ni Kunihito ti nagraduar. Dagiti kaklase ni Kunihito ita ket in-inaudida iti lima a tawen. Iti imatang ti adu a tattao iti lubong, nasayang ti lima a nagpateg a tawen ti kinaagtutubona. Nupay kasta, nagpateg ti kinatarnaw ni Kunihito iti imatang ni Jehova a Dios, ket ti sakripisiona talaga a di nasayang.

[Footnote]

[Dagiti ladawan iti panid 20]

Kannigid: Ti pagtaengan ni Kunihito kalpasan ti ginggined

Baba: Ni Kunihito ita