Ti Talaga a Makinggapuanan iti Gubat ken Panagsagaba

Nagpatingga ti Gubat Sangalubongan I idi Nobiembre 11, 1918. Nagserra dagiti negosio, ken nagragragsak dagiti tattao kadagiti kalsada. Ngem saan a nagpaut dayta. Maysa a didigra nga ad-adda a makapapatay ngem iti masinggan ti dagus a simmaruno iti sangalubongan a gubat.

Maysa a makapapatay a sakit a naawagan iti trangkaso Espaniol ti nangrugi kadagiti paggugubatan iti France idi Hunio 1918. Dagus a napaneknekan a makapapatay dayta. Kas pagarigan, iti sumagmamano laeng a bulan, ad-adu nga Amerikano a soldado ti natay idiay France gapu iti dayta a virus ngem ti pinapatay dagiti kalabanda. Idi nagpatingga ti gubat, nagwaras a dagus ti sakit iti intero a lubong gapu ta nayawid dagiti soldado ti virus idi nagsublida kadagiti pagilianda.

Kalpasan ti gubat, nakapasar met ti lubong ti bisin ken narigat a biag. Kaaduan a taga-Europe ti nagbisin idi nagpatingga ti gubat idi 1918. Awan ti balor ti kuarta ti Germany idi 1923. Kalpasan ti innem a tawen, nagsuek ti ekonomia ti intero a lubong. Kamaudiananna, idi 1939, nangrugi ti maikadua a gubat sangalubongan nga arigna tuloy ti umuna a gubat sangalubongan. Ania ti ipamatmat dagiti nagpaiduma nga agsasaruno a didigra?

TI PAGILASINAN TI MAUDI NGA AL-ALDAW

Makatulong dagiti padto iti Biblia tapno maammuantayo ti kaipapanan dagitoy a pasamak iti historia ket agpayso daytoy nangruna iti Gubat Sangalubongan I. Impadto ni Jesu-Kristo ti tiempo a ti ‘nasion bumusorto iti nasion’ ken addanto kinakirang ti taraon, ken saksakit iti intero a lubong. (Mateo 24:3, 7; Lucas 21:10, 11) Imbagana kadagiti adalanna a dagita a kalamidad ti pagilasinan ti maudi nga al-aldaw. Ad-adu pay ti mabasa iti libro nga Apocalipsis maipapan iti rigat ditoy daga ken ti gubat idiay langit.​—Kitaem ti kahon a “Gubat Ditoy Daga ken Gubat Idiay Langit.”

Imbinsabinsa dayta a libro ti Biblia ti maipapan iti uppat a kumakabalio, a maaw-awagan met iti uppat a kumakabalio iti Apocalipsis. Tallo kadagitoy isimboloda dagiti didigra nga impadto ni Jesus​—gubat, bisin, ken sakit. (Kitaem ti kahon a “Talaga Kadi nga Agtigtignayen ti Uppat a Kumakabalio?”) Nalawag a ti umuna a gubat sangalubongan ti nangrugian ti agtultuloy a panawen ti rigat. Ipalgak ti Biblia a ni Satanas ti makinggapuanan iti dayta. (1 Juan 5:19) Agpatingganto ngata ti panangiturayna?

Impasigurado kadatayo ti libro nga Apocalipsis a ni Satanas ket “ababan ti periodo ti tiempona.” (Apocalipsis 12:12) Isu a makapungtot unay ken nangyeg iti adu a rigat ditoy daga. Dagiti mapaspasaran a didigra paneknekanda met a dandanin agpatingga ti tiempo ni Satanas.

PANANGDADAEL KADAGITI ARAMID TI DIABLO

Talaga a dakkel ti epekto ti Gubat Sangalubongan I iti historia. Daytoy ti nangrugian ti panaggugubat, rebolusion ken di panagtalek kadagiti agtuturay. Paneknekan met daytoy a napagtalaw ni Satanas idiay langit. (Apocalipsis 12:9) Gapuna, nagtignay daytoy a di makita nga agturay iti lubong kas narungsot a diktador ta ammona nga ababan ti tiempona. Inton agpatingga dayta a tiempo, agpatingga metten ti riribuk a rinugian ti Gubat Sangalubongan I.

Sigun iti padto ti Biblia, agtalekka a ti nailangitan nga Ari a ni Jesu-Kristo dandaninan ‘dadaelen dagiti aramid ti Diablo.’ (1 Juan 3:8) Minilionen ti nangikararag nga umay ti Pagarian ti Dios. Ikarkararagmo kadi dayta? Babaen iti Pagarian ti Dios, makitanton dagiti matalek a tattao a matungpal ti pagayatan ti Dios ditoy daga. (Mateo 6:9, 10) Iti Pagarian ti Dios, awanton ti aniaman a kita ti gubat! (Salmo 46:9) No ammuem ti maipapan iti dayta a Pagarian, masagrapmonto ti naruay a talna ditoy daga!​—Isaias 9:6, 7.