Agimtuod Dagiti Agtutubo

Kasano a Matagiragsakko ti Panagbasak iti Biblia?

Kasano kasansan ti panangbasam iti Biblia? (Mangkur-itka iti maysa)

□ Inaldaw

□ Linawas

□ Dadduma pay ․․․․․

Kompletuem ti sumaganad a sasao.

No awan ganasko nga agbasa iti Biblia, masansan a gapu ta . . . (Kur-itam ti amin a makagapu)

□ Saanak nga interesado

□ Diak matartarusan

□ Adda pakasingaak

□ Dadduma pay ․․․․․

AWAN kadi ti ganasmo nga agbasa iti Biblia? No awan, nalabit umanamongka iti kinuna ti 18 anyos a ni Will, “Kasla makauma a basaen ti Biblia.” Nupay kasta, innayonna: “Dayta ket no dimo ammo ti umiso a pamay-an ti panangbasa iti dayta.”

Apay a nasken nga ammuem no kasano a basaen ti Biblia? Bueno, kayatmo kadi a maammuan ti ad-adu pay no kasano ti

◼ agaramid kadagiti nasayaat a desision?

◼ maaddaan iti pudno a gagayyem?

◼ mangdaer kadagiti pakarigatan?

Naglaon ti Biblia kadagiti arig saniata a nainsiriban a balakad kadagita a banag ken dadduma pay. Siempre, agkasapulan iti panagregget ti panangammo kadagita. Ngem ti panangaramid iti dayta ket umasping unay iti panagsapul iti gameng: No narigrigat a biroken, naragragsakkanto no masarakamon dayta!—Proverbio 2:1-6.

Kasanom a mabirokan dagiti gameng iti Biblia? Ti kahon iti kannawan ipaayannaka iti pamalatpatan no kasanom a basaen ti Biblia, ken iti likudna, no kasano ti panagsasaruno ti panangbasam iti dayta. Padasem met dagiti singasing a magustuam kadagiti sumaruno a panid.

Ad-adu pay nga artikulo ti masarakan iti serye nga “Agimtuod Dagiti Agtutubo” iti Web site a www.watchtower.org/ype

No makapag-Internetka, mabalinmo a basaen ti Biblia iti web site a www.watchtower.org/e/bible

UTOBEM DAGITOY

Adda pagsasao a no adu ti immulam, adunto met la ti apitem.

◼ Kasano nga agaplikar dayta no maipapan iti panagbasa iti Biblia?

◼ Kaanom a maiwayaan ti personal a panagbasam iti Biblia?

[Kahon/Ladawan iti panid 23]

NO KASANO A BASAEN TI BIBLIA

Sakbay nga agbasaka . . .

◼ Siertuem a naulimek ti aglawlawmo tapno maipamaysam ti atensionmo.

◼ Ikararagmo a maawatam koma.

Bayat nga agbasbasaka . . .

◼ Usarem dagiti mapa ken retrato dagiti salaysay iti Biblia tapno mailadawanmo iti panunotmo dagiti pasamak iti Biblia.

◼ Usigem ti eksena, ken tarusam dagiti detalye.

◼ Basaem dagiti footnote ken dagiti teksto a nainaig iti dayta.

◼ Isaludsodmo iti bagim ti kas kadagiti sumaganad:

DAGITI PASAMAK: Kaano a napasamak daytoy? Siasino ti nangibaga kadagitoy? Siasino ti nangibagaanna?

KAIPAPANANNA: Kasanok nga ilawlawag daytoy iti sabali?

PATEGNA: Apay nga impaisurat ni Jehova a Dios daytoy a pasamak iti Biblia? Ania ti isuro daytoy maipapan kadagiti galadna wenno iti wagas ti panangaramidna kadagiti bambanag? Ania dagiti masursurok a mayaplikarko iti biagko?

Kalpasan a nagbasaka . . .

◼ Agsukimatka pay iti ad-adu. Agusarka kadagiti impablaak dagiti Saksi ni Jehova kas iti Insight on the Scriptures ken “Amin a Kasuratan Impaltiing ti Dios ket Naimbag.”

◼ Agkararagka manen. Ibagam ken Jehova ti nasursurom ken no kasanom nga usaren dayta. Agyamanka kenkuana gapu iti Biblia a Saona.

[Kahon/Ladawan iti panid 24]

KASANO TI PANAGSASARUNO TI PANANGBASAM ITI BIBLIA?

Dagiti pagpilian . . .

□ Basaem manipud Genesis agingga iti Apocalipsis.

□ Basaem sigun iti panagsasaganad ti pannakaisurat dagiti libro ti Biblia, wenno sigun iti panagsasaruno dagiti pasamak.

□ Kada aldaw, mangbasaka iti sabali a paset ti Biblia.

Lunes: Makapikapik a paspasamak(Genesis agingga iti Ester)

Martes: Biag ken pannursuro ni Jesus(Mateo agingga iti Juan)

Mierkoles: Ti nagkauna a kongregasion Kristiano(Aramid)

Huebes: Padto ken mangiwanwan iti moral(Isaias agingga iti Malakias, Apocalipsis)

Biernes: Makatukay-rikna a daniw ken kanta(Job, Salmo, Kanta ni Solomon)

Sabado: Sirib a makatulong iti biag(Proverbio, Eclesiastes)

Domingo: Sursurat kadagiti kongregasion(Roma agingga iti Judas)

Aniaman nga urnos ti piliem, siguraduem nga irekord ti basbasaem! Mangikabilka iti ✔ iti tunggal kapitulo a sumaruno a basaem, wenno aniaman a sabali pay a wagas ti panangirekord iti nabasamon a kapitulo.

Kartibem daytoy a kahon sa isigpit iti Bibliam!

[Kahon/Diagram iti panid 24]

ARAMIDEM A NABIAG ITI ISIPMO TI BASBASAEM A PASET TI BIBLIA

Ipamuspusam a pagbalinen a makapainteres ti basbasaem. Kas pagarigan:

□ Urnosem dagiti listaan ti nagnagan babaen ti panamagsasangam kadagiti nagan dagiti agkakapuonan (family tree).

□ Mangaramidka kadagiti diagrama. Kas pagarigan, bayat a basbasaem ti maipapan iti maysa a matalek a karakter, siputam no kasano a nabendisionan gapu kadagiti galad ken aramidna.—Proverbio 28:20.

[Diagram]

Gayyem ti Dios

↑ Natulnog

↑ Matalek

↑ ↑

Abraham

□ Agdrowingka kadagiti ladawan a mangyilustrar iti salaysay.

□ Agaramidka iti storyboard, wenno agsasaruno a simple a ladawan a mangyilustrar iti panagsasaruno dagiti pasamak. Deskribirem no ania ti mapaspasamak iti kada eksena.

□ Mangaramidka iti bassit a modelo dagiti estruktura a kas iti daong ni Noe.—Kas pagarigan, kitaem ti Agriingkayo! nga Enero 2007, panid 22.

□ Agbasaka iti napigsa a kaduam ti gagayyemmo wenno kapamiliam. Singasing: Mangtudingka iti maysa a mangbasa iti salaysay. Basaen ti dadduma ti ibagbaga dagiti karakter iti kapitulo a basbasaenyo.

□ Mangpilika iti maysa a salaysay, sa pagbalinem dayta a kas iti maysa a padamag. Isalaysaymo ti pasamak iti nadumaduma a pamay-an. Ramanen dayta ti “pananginterbiu” kadagiti kangrunaan a karakter ken nakaimatang iti pasamak.

□ Mangpilika iti salaysay a ti karakter iti dayta ket nakaaramid iti di nainsiriban a desision sa baliwam ti ngudona! Kas pagarigan, usigem ti panangilibak ni Pedro ken Jesus. (Marcos 14:66-72) Ania ngata ti nasaysayaat koma nga inaramid ni Pedro iti daydi a narigat a situasion?

□ Agbuya wenno dumngegka kadagiti nairekord a drama a naibasar iti Biblia.

□ Mangisuratka iti bukodmo a drama. Iramanmo dagiti leksion a masursurom iti dayta a drama.—Roma 15:4.

IDEYA: Ipabuyam dayta a drama a kaduam ti sumagmamano kadagiti gagayyemmo.

[Kahon/Ladawan iti panid 25]

TAPNO MAPAREGTAKA

◼ Mangaramidka iti kalat! Isuratmo iti baba ti petsa a kayatmo a panangrugi iti inyurnosmo a panagbasa iti Biblia.

․․․․․

◼ Mangpilika iti paset ti Biblia a paginteresam. (Kitaem ti kahon a “Kasano ti Panagsasaruno ti Panangbasam iti Biblia?”) Kalpasanna, isuratmo iti baba ti paset ti Biblia a kayatmo nga iyun-una a basaen.

․․․․․

◼ Rugiam ti agbasa iti apagbiit laeng. Nasaysayaat ti uray 15 a minuto a panagbasa iti Biblia ngem ti awan a pulos. Isuratmo iti baba no mano a minuto wenno oras ti ilatangmo para iti panagbasam.

․․․․․

Singasing: Addaanka koma iti Biblia nga usarem laeng iti personal a panagadalmo. Aginotarka iti dayta. Markaam dagiti bersikulo a magusgustuam unay.

[Kahon/Dagiti Ladawan iti panid 25]

TI KUNA DAGITI PADAM NGA AGTUTUBO

“Tunggal rabii sakbay a maturogak, ikagkagumaak ti agbasa iti Biblia iti apagbiit tapno adda nasayaat a pampanunotek agingga a makaturogak.”—Megan.

“Maysa a bersikulo ti usigek iti 15 a minuto. Basaek ti amin a ‘footnote,’ kitaek ti amin a teksto a nainaig iti dayta (cross-reference), ken agsukimatak pay iti ad-adu. No dadduma, kurang ti 15 a minuto a panangusigko iti maysa a bersikulo, ngem nagadu ti masursurok iti kastoy a pamay-an!”—Corey.

“Adda tiempo a binasak ti Biblia iti 10 a bulan. Iti kasta a kapartak, naammuak dagiti panagnanaig ti nadumaduma a paset ti Biblia a diak nadnadlaw idi.”—John.

[Kahon iti panid 25]

AGPILIKA!

□ Mangpilika iti pasamak. Napno ti Biblia iti adu a makapikapik a salaysay ti pudno a pasamak iti biag. Mangpilika iti salaysay a paginteresam, ket basaem manipud rugi agingga iti pagpatinggaanna.

Singasing: Tapno maammuam no kasano nga ad-adu pay ti masursurom iti maysa a salaysay, kitaem ti panid 292 ti libro a Dagiti Saludsod nga Iyimtuod Dagiti Agtutubo—Dagiti Sungbat nga Epektibo, Tomo 2, nga impablaak dagiti Saksi ni Jehova.

□ Mangpilika iti Ebanghelio. Basaem ti Mateo (ti umuna nga Ebanghelio a naisurat), Marcos (pagaammo nga aduan iti makapagagar ken makapikapik a pasamak), Lucas (a nangdakamat a nangnangruna iti kararag ken kadagiti babbai), wenno Juan (a nangisalaysay iti nagadu nga impormasion a saan a nadakamat iti dadduma nga Ebanghelio).

Singasing: Sakbay nga agbasaka, kitaem biit ti impormasion maipapan iti dayta a libro ti Biblia ken no siasino ti nangisurat tapno ad-adda a maawatam ti nakaidumaan dayta nga Ebanghelio.

□ Mangpilika iti Salmo. Kas pagarigan:

No malmaldayka ken mariknam a kasla awananka iti gayyem, basaem ti Salmo 142.

No maup-upayka gapu kadagiti pagkapuyam, basaem ti Salmo 51.

No pagduaduaam ti kinapateg dagiti pagalagadan ti Dios, basaem ti Salmo 73.

Singasing: Mangaramidka iti listaan dagiti nabasamon a Salmo a makaparegta unay kenka.

[Kahon iti panid 26]

SUKIMATEM A NAIMBAG

◼ Usigem ti eksena. Ammuem no kaano ken sadino a napasamak, ken ania dagiti kasasaad a dakdakamaten ti teksto.

Pagarigan: Basaem ti Ezequiel 14:14. Mano ngata ti tawen ni Daniel idi kinuna ni Jehova nga isu ket mapagwadan a kas kada Noe ken Job?

Pamalatpatan: Ti Ezequiel kapitulo 14 ket naisurat lima la a tawen kalpasan a naidestiero ni Daniel idiay Babilonia, idi nalabit barito pay.

Ti nalmeng a gameng: Gapu kadi ta ubing pay ni Daniel ket saan a mapaliiw ni Jehova ti kinamatalekna? Ania dagiti nasayaat a desision nga inaramid ni Daniel a nagresulta iti adu a bendision kenkuana? (Daniel 1:8-17) Kasano a makatulong kenka ti ulidan ni Daniel tapno makaaramidka kadagiti nasayaat a desision?

◼ Tarusam dagiti detalye. No dadduma, nagpateg ti maysa wenno dua laeng a sao.

Pagarigan: Pagdiligem ti Mateo 28:7 ken Marcos 16:7. Apay nga inraman ni Marcos ti detalye nga agparangto ni Jesus kadagiti adalanna “ken ni Pedro”?

Pamalatpatan: Saan a nakita a mismo ni Marcos dagita a pasamak; nabatad a naammuanna dayta manipud ken Pedro.

Ti nalmeng a gameng: Apay a sigurado a nabang-aran ni Pedro idi naammuanna a kayat manen ni Jesus a makita isuna? (Marcos 14:66-72) Kasano a pinaneknekan ni Jesus nga isu ket pudno a gayyem ni Pedro? Kasano a matuladmo ni Jesus tapno agbalinka met a pudno a gayyem iti sabsabali?

◼ Agsukimatka pay iti ad-adu. Kitaem ti panangilawlawag dagiti naibasar-Biblia a literatura.

Pagarigan: Basaem ti Mateo 2:7-15. Kaano a simmarungkar dagiti astrologo ken Jesus?

Pamalatpatan: Kitaem Ti Pagwanawanan nga Enero 1, 2008, panid 31, nga impablaak dagiti Saksi ni Jehova.

Ti nalmeng a gameng: Kasano nga impaay ni Jehova ti material a kasapulan ti pamilia ni Jesus bayat nga addada idiay Egipto? Kasano a matulongannaka ti panagtalek iti Dios tapno mabaelam a sanguen dagiti narigat a kasasaad?—Mateo 6:33, 34.