No Ania ti Kuna ti Biblia Maipapan iti Diborsio ken Panagsina

Namnamaen ni Jehova a dagiti agassawa sustinerenda ti sapatada iti tunggal maysa iti aldaw ti kasarda. Idi pinagtipon ni Jehova ti umuna a lalaki ken babai kas agassawa, kinunana: “Ti maysa a lalaki . . . masapul a makitipon iti asawana ket masapul nga agbalinda a maymaysa a lasag.” Idi agangay, inulit ni Jesu-Kristo dagita a sasao sa innayonna: “Gapuna, ti pinagsinnangol ti Dios saan koma a pagsinaen ti tao.” (Genesis 2:24; Mateo 19:3-6) No kasta, iti imatang da Jehova ken Jesus, ti panagasawa ket tungpal-biag a singgalut a mapugsat laeng no matay ti maysa kadagiti agassawa. (1 Corinto 7:39) Yantangay sagrado nga urnos ti panagasawa, saan a rumbeng a tagtagilag-anen ti diborsio. Kinapudnona, kagura ni Jehova dagiti panagdiborsio nga awan ti Nainkasuratan a pakaibatayanna.​—Malakias 2:15, 16.

Ania ti Nainkasuratan a pakaibatayan ti diborsio? Bueno, kagura ni Jehova ti pannakikamalala ken pannakiabig. (Genesis 39:9; 2 Samuel 11:26, 27; Salmo 51:4) Wen, karimonna unay ti pannakiabig isu nga impalubosna a pakaibatayan dayta ti diborsio. (No ania ti ramanen ti pannakiabig, kitaem ti Kapitulo 9, parapo 7, a nakailawlawagan ti pannakiabig.) Daydiay naguliban nga asawa ket ikkan ni Jehova iti kalintegan nga agdesision no kayatna latta ti agtalinaed iti asawana wenno makidiborsio. (Mateo 19:9) Gapuna, no ikeddeng ti naguliban nga asawa ti makidiborsio, saan a karimon ni Jehova dayta. Nupay kasta, saan nga iparparegta ti kongregasion Kristiano ti panagdiborsio. Kinapudnona, adda dagiti kasasaad a mabalin a matignay ti naguliban nga asawa nga agtalinaed iti asawana nangruna no napasnek ti panagbabawina. Ngem iti biang dagidiay addaan iti Nainkasuratan a pakaibatayan a makidiborsio, nasken nga isuda a mismo ti agdesision ken awatenda ti aniaman a mabalin nga ibunga ti desisionda.​—Galacia 6:5.

Iti sumagmamano a nakaro a situasion, dagiti dadduma a Kristiano inkeddengda ti makisina wenno makidiborsio uray no saan a nakiabig ti asawada. Iti kasta a kasasaad, nalawag a kuna ti Biblia a daydiay sumina ket “agtalinaed koma a di makiasawa wenno no saan makikappia manen.” (1 Corinto 7:11) Ti kasta a Kristiano ket saan a nawaya a makiasawa manen iti sabali. (Mateo 5:32) Usigentayo ti sumagmamano a nakaro a situasion nga ibilang ti dadduma kas pakaibatayan ti panagsina.

Inggagara a di panangsuporta iti pamilia. Nalabit nga agbalin a nakakurkurapay ti pamilia, nga awananda kadagiti kangrunaan a kasapulan iti biag, gapu ta saan a supsuportaran ti asawa a lalaki ti pamiliana nupay kabaelanna nga aramiden dayta. Kuna ti Biblia: “No ti asinoman saanna nga ipaay ti kasapulan . . . dagidiay kameng ti sangakabbalayanna, pinaglikudanna ti pammati ket isu dakdakes ngem ti tao nga awanan pammati.” (1 Timoteo 5:8) No saan nga agbalbaliw ti kasta nga asawa a lalaki, mabalin nga ikeddeng ti asawa a babai no nasken a salaknibanna ti pagimbaganna ken dagiti annakna babaen ti legal a pannakisina. Siempre, dagiti Kristiano a panglakayen masapul nga usigenda a naimbag ti akusasion a ti maysa a Kristiano ket agkedked a mangsuporta iti pamiliana. Mabalin a mailaksid ti siasinoman no igagarana a baybay-an ti pamiliana.

Nakaro a pisikal a panangranggas. Ti nauyong nga asawa mabalin a ranggasanna ti asawana nga uray la agpeggad ti salun-at wenno biag daytoy. No maysa a Kristiano ti abusado nga asawa, masapul a siertuen dagiti panglakayen no agpayso a rangranggasanna ti asawana wenno saan. Mabalin a mailaksid ti tao a managpungpungtot ken naranggas.​—Galacia 5:19-21.

Naan-anay a panagpeggad ti espiritualidad. Ti maysa nga asawa mabalin a kanayon a lapdanna ti asawana a mangalagad iti pudno a panagdaydayaw wenno nalabit ikagumaanna pay ketdi a piliten a mangsalungasing kadagiti bilin ti Dios. Iti kasta a kasasaad, daydiay agpegpeggad nga asawa mabalinna nga ikeddeng no ti kakaisuna a pamay-an tapno ‘makapagtulnog iti Dios kas agturay imbes a kadagiti tattao’ ket babaen ti legal a pannakisinana.​—Aramid 5:29.

No mapasamak dagiti kasta a nakaro a situasion, awan koma ti mangkombinsir iti awan basolna nga asawa a makisina wenno agtalinaed iti asawana. Nupay dagiti gagayyem ken panglakayen a nataengan iti naespirituan ket mabalin a mangipaay iti naibatay iti Biblia a balakad, saanda nga ammo ti amin a mapaspasamak iti nagbaetan dagiti agassawa. Ni laeng Jehova ti makaammo iti dayta. Siempre, ti Kristiano nga asawa saanna a maidaydayaw ti Dios wenno raraemen ti urnos ti panagasawa no sobsobraanna ti kinadagsen ti parikutda nga agassawa tapno laeng maisinana ni lakayna wenno ni baketna. Ammo ni Jehova ti aniaman a panangimaniobra iti panagsina, kasano man ti panangikagumaan ti maysa a mangilimed iti dayta. Kinapudnona, “amin a bambanag lamolamoda ken sipapanayagda a naiparang kadagiti mata daydiay pagidatagantayo.” (Hebreo 4:13) Ngem no nabayagen nga agib-ibtur ti maysa a Kristiano iti napeggad a situasion, awan koma ti mangbabalaw kenkuana no ikeddengnan ti makisina gapu ta awanen ti sabali a pamuspusan. Iti kamaudiananna, “agtakdertayto amin iti saklang ti tugaw iti panangukom ti Dios.”​—Roma 14:10-12.