Salsaludsod Dagiti Agbasbasa

Ania ti kaipapanan ti panagtipon ti dua a baston a nadakamat iti Ezequiel kapitulo 37?

Nangted ni Jehova iti mensahe ken Ezequiel maipapan iti inkarina a panagkaykaysa ti nasion ti Israel idi nagsublida iti Naikari a Daga. Dayta a mensahe ipakpakaunana met ti panagkaykaysa ti ili ti Dios a nangrugi a mapasamak bayat ti maudi nga al-aldaw.

Imbaga ni Jehova ken propeta Ezequiel a suratanna ti dua a baston. Isuratna iti maysa a baston, “Maipaay ken Juda ken maipaay iti annak ti Israel a kakaduana,” ket iti sabali a baston, “Maipaay ken Jose, ti baston ni Efraim, ken ti intero a balay ti Israel a kakaduana.” Ti dua a baston ket agbalinto a “maymaysa” a baston iti ima ni Ezequiel.​—Ezeq. 37:15-17.

Ania ti irepresentar ti sao nga “Efraim”? Ti umuna nga ari iti makin-amianan a sangapulo a tribu a pagarian, ni Jeroboam, ket manipud iti tribu ni Efraim, a nagbalin a kangrunaan a tribu. (Deut. 33:13, 17; 1 Ar. 11:26) Naggapu daytoy a tribu iti anak ni Jose a ni Efraim. (Num. 1:32, 33) Naawat ni Jose ti naisangsangayan a bendision manipud iti amana a ni Jacob. Gapuna, maitutop a maawagan iti “baston ni Efraim” ti baston a mangirepresentar iti sangapulo a tribu. Idi insurat ni Ezequiel ti padto maipapan iti dua a baston, ti makin-amianan a pagarian ti Israel ket nabayagen a kinautibo dagiti Asirio idi 740 B.C.E. (2 Ar. 17:6) Gapuna, iti dayta a tiempo, kaaduan kadagiti Israelita ti agnanaed iti nagduduma a paset ti Imperio ti Babilonia, a nangsukat iti Imperio ti Asiria.

Idi 607 B.C.E., nakautibo idiay Babilonia dagiti umili iti makin-abagatan a dua a tribu a pagarian ken mabalin a ti dadduma a nabati iti makin-amianan a pagarian. Dagiti ari iti linia ni Juda ti nagturay kadagitoy dua a tribu, ken kaduada dagiti papadi a nagserbi iti templo idiay Jerusalem. (2 Cron. 11:13, 14; 34:30) Maitutop ngarud nga irepresentar ti baston “maipaay ken Juda” ti dua a tribu a pagarian.

Kaano a nagtipon dagitoy dua a simboliko a baston? Idi nagsubli dagiti Israelita idiay Jerusalem tapno bangonenda manen ti templo idi 537 B.C.E. Nagsubli manipud pannakakautibo dagiti pannakabagi ti dua a tribu a pagarian ken ti sangapulo a tribu a pagarian. Saan idin a nabingaybingay dagiti annak ni Israel. (Ezeq. 37:21, 22) Nagkaykaysa manen dagiti Israelita a nagdayaw ken Jehova. Daytoy a panagkakappia ket impadto met idi da propeta Isaias ken Jeremias.​—Isa. 11:12, 13; Jer. 31:1, 6, 31.

Ania a nagpateg a kinapudno maipapan iti nadalus a panagdayaw ti naitampok iti daytoy a padto? Isu daytoy: Pagkaykaysaen ni Jehova dagiti agdaydayaw kenkuana. (Ezeq. 37:18, 19) Matungtungpal kadi dayta a kari a panagkaykaysa iti panawentayo? Wen. Nangrugi a matungpal dayta idi 1919 idi in-inut a naorganisar ken nagkaykaysa manen ti ili ti Dios. Saan a nagballigi ti panggep ni Satanas a naan-anay a mangbingaybingay kadakuada.

Iti dayta a tiempo, kaaduan kadagiti nagkaykaysa manen ket addaan iti namnama nga agbalin nga ar-ari ken papadi a kadua ni Jesus idiay langit. (Apoc. 20:6) Iti simboliko a pamay-an, nayarigda iti baston a maipaay ken Juda. Ngem bayat ti panaglabas ti panawen, nangrugi a makikadua kadagitoy a naespirituan a Judio dagiti umad-adu nga addaan iti namnama nga agbiag ditoy daga. (Zac. 8:23) Kaslada iti baston maipaay ken Jose, ken saandanto a makipagturay a kadua ni Kristo.

Agserserbi dagitoy dua a grupo kas ili ni Jehova iti panangituray ti maymaysa nga Ari, ni Jesu-Kristo, a natukoy iti padto kas “adipenko a David.” (Ezeq. 37:24, 25) Inkararag ni Jesus nga amin a pasurotna ‘maymaysada koma amin, a kas iti Amana a naikaykaysa kenkuana ket isu naikaykaysa iti Amana.’a (Juan 17:20, 21) Impadto met ni Jesus a ti bassit nga ipastoran, dagiti napulotan a pasurotna, ken ti “sabsabali a karnero” ket “agbalindanto a maymaysa nga arban” nga iwanwan ti “maymaysa a pastor.” (Juan 10:16) Nagsayaat ti panangiladawan ni Jesus iti naespirituan a panagkaykaysa ti ili ni Jehova ita aniaman ti namnamada iti masanguanan!