No Kasanoyo a Sungbatan Dagidiay Panggupedda iti Panagsasarita

‘SAANAK NGA INTERESADO’

● ‘Kayatyo kadi a sawen a saankayo nga interesado iti Biblia, wenno relihion ti saanyo a paginteresan? Damagek dayta yantangay adu dagiti nasarakanmi nga idi damo ket relihiosoda ngem itan didan makimismisa gapu ta adu a kinamanaginsisingpet ti napaliiwda kadagiti simbaan (wenno, ti kunada negosio laeng ti relihion; wenno, dida anamongan ti pannakinamin ti relihion iti politika; kdp.). Ti Biblia dina anamongan ti kakasta nga aramid ket itdenna ti kakaisuna a pangibasaran iti pananginanamatayo a sitatalek iti masanguanan.’

● ‘No ti kunayo ket saankayo nga interesado iti sabali a relihion, maawatak ti kayatyo a sawen. Ngem nalabit interesadokayo nga umammo no ania a kita ti masanguanan a namnamaentayo gapu ta adda iti pamutbuteng ti gubat nuklear (wenno, no kasanotayo a masalakniban dagiti annaktayo manipud droga; wenno, no aniat’ mabalin a pangpasardeng iti krimen tapno ditay koma agbuteng a magna kadagiti kalsada; kdp.). Adda kadi manamnamayo a napudno a solusion iti daytoy?

● ‘Gapu kadi ta adda relihionyon? . . . Ti kunayo, addanto ngata tiempo a maymaysan ti relihion dagiti amin a tattao? . . . Ania kadi ti mangtuben iti dayta? . . . Tapno adda serserbina dayta, ania ngata a pundasion ti kasapulan?’

● ‘Maawatak ti riknayo. Kasta met ti riknak idi. Ngem adda nabasak ditoy Biblia a nangtulong kaniak a nangbalbaliw iti panangmatmatko. (Ipakitayo kenkuana no ania dayta.)’

● ‘Interesadokay kadi no ipakitak kadakayo manipud Biblia no kasanoyonto a makita manen dagiti natay nga ay-ayatenyo (wenno, no ania a talaga ti gapu nga agbibiagtayo; wenno, no kasanonatay a tulongan tapno natunos koma ti pamiliatayo; kdp.)?’

● ‘No ti kayatyo a sawen ket saankayo nga interesado a gumatang iti aniaman, dikay koma madanagan. Saanak nga agnegnegosio. Ngem interesadokay kadi iti gundaway nga agbiag iti maysa a paraiso a daga, nga awanan sakit ken krimen, a dagiti kaarubayo talaga nga ay-ayatendakayo?’

● ‘Kasta kadi a kanayon ti isungsungbatyo no sarungkarandakayo dagiti Saksi ni Jehova? . . . Inutobyo kadin no apay a sumarsarungkarkami wenno no aniat’ ipadamagmi? . . . Iti ababa a pannao, simmarungkarkami ta adda banag nga ammomi a masapul a maammuanyo met. Apay a diyo padasen a denggen?’

‘SAANAK NGA INTERESADO ITI RELIHION’

● ‘Maawatak ti riknayo. Kinapudnona, di met pagbalbalinen dagiti simbaan daytoy lubong a nataltalged a pagtaengan, di ngamin? . . . Sigsigud kadi a kastat’ riknayo? . . . Ngem mamatikay kadi iti Dios?’

● ‘Adu dagidiay kasta met laeng iti panangmatmatda. Ti relihion talaga a di nakatulong kadakuada. Dayta ti maysa a rason no apay sumarsarungkarkami—ta dagiti simbaan dida imbaga kadagiti umili ti kinapudno maipapan iti Dios ken iti nakaskasdaaw a panggepna para iti sangatauan.’

● ‘Ngem masiguradok nga interesadokayo iti masanguananyo. Naammuanyo kadin nga impadto ti Biblia dagiti mismo a kasasaad a mapaspasarantayo ditoy lubong ita? . . . Ket ipakitana pay no anianto ti pagbanagan dagitoy.’

● ‘Sigsigud kadi a kastat’ riknayo? . . . Aniat’ makunayo maipapan iti masanguanan?’

‘SAANAK NGA INTERESADO KADAGITI SAKSI NI JEHOVA’

● ‘Adu dagidiay mangibagbaga kadakami iti kasta. Inutobyo kadin no apay agbolboluntariokami a sumarungkar uray pay pagaammomi a kaaduan a bumalay ket didakami awaten? (Itdenyo ti kababagas ti Mateo 25:31-33, nga ilawlawagna ti agdama a panamaglalasin iti tattao iti amin a nasnasion ket ti tignayda para iti mensahe ti Pagarian ket nesesita unay iti daytoy. Wenno ibagayo ti kababagas ti Ezequiel 9:1-11, a sigun iti reaksion ti tattao iti mensahe ti Pagarian, tunggal maysa ket “mamarkaan” para iti pannakaisalakan inton dakkel a rigat wenno para pannakadadael babaen iti Dios.)’

● ‘Maawatak dayta ta kasta met idi ti panagriknak. Ngem, tapno diak mangidumduma, dinengngegko ti maysa kadakuada. Ket natakuatak a pammadpadakes la gayam dagidi nangngegko idi damo maipapan kadakuada. (Dakamatenyo ti kadawyan a pammadakesda sayonto ilawlawag ti pammatitayo iti dayta.)’

● ‘Di pay unay nabayag kasta met ti sinaok iti maysa a Saksi a simmarungkar kaniak. Ngem sakbay a pimmanaw nangpartuatak iti saludsod a siguradok a dina masungbatan. Kayatyo kadi nga ammuen no ania ti insaludsodko? . . . (Kas ehemplo: Nangalaan ni Cain iti asawana?)’ (Usaren daytoy dagidiay kastat’ kapadasanda.)

● ‘No relihiosokayo, maawatankayo. Talaga a napateg kadakayo ti bukodyo a relihion. Ngem ti kunak umanamongkayo nga agpadpadatayo nga interesado iti (ibagayo ti maitutop a topiko).’

● ‘Di pagduaduaan nga adda bukodyo a relihion. Di la mabalin nga ibagayo no ania ti relihionyo? . . . Tagiragsakenmi ti makisarsarita kadagiti kapammatianyo. Aniat’ makunayo iti (dakamatenyo ti topiko a pagsaritaanyo)?’

● ‘Wen, maawatak. Ngem ti gapu a sumarsarungkarkami a ta maysakami a pamilia a kayatmi a makita koma nga agbibiag a sitatalna dagiti tattao. Naumakamin kadagiti rinabii a damag maipapan iti panaggugubat ken panagsagsagaba. Siguro kastakayo met. . . . Ngem ania ngay ti makaited iti panagbalbaliw? . . . Naparegtakami kadagiti kari ti Biblia.’

● ‘Apresiarek ti panangibagayo iti riknayo. Di la mabalin nga ibagayo no ania a banag ti diyo kayat kadakami? Gapu kadi iti daydiay ipakpakitami kadakayo manipud iti Biblia, wenno daydiay yaaymi isasarungkar kadakayo?’

‘ADDA BUKODKO A RELIHION’

● ‘Di la mabalin nga ibagayo kadakami, No ti relihionyo ket isursurona nga addanto tiempo a dagidiay agayat iti kinalinteg ket agbiagdanto nga agnanayon ditoy daga? . . . Makaparagsak a kapanunotan dayta, saan kadi? . . . Adda a mismo dayta ditoy Biblia. (Sal. 37:29; Mat. 5:5; Apoc. 21:4)’

● ‘Mamatiak a no iti daytoy a banag masapul a tunggal maysa ikeddengna ti bukodna. Ngem nadamagyo kadin a ti Dios a mismo ket birbirukenna ti maysa a kita ti umili nga agbalin a pudno nga agdaydayaw kenkuana? Imdenganyo kadi ti Juan 4:23, 24. Aniat’ kaipapananna ti panagdayaw iti Dios a ‘buyogen iti kinapudno’? . . . Aniat’ inted ti Dios kadatayo a mangtulong kadatayo nga umammo iti pudno ken iti ulbod? . . . (Juan 17:17) Ket paliiwenyo man no kasano a nagpateg a personal kadatayo dayta? (Juan 17:3)’

● ‘Sigsigud kadi a relihiosokayo? . . . Ti kunayo agkaykaysanto ngata ti sangatauan iti maymaysa a relihion? . . . Nabayagkon a pinampanunot dayta gapu iti nairekord ditoy Apocalipsis 5:13. . . . Ania ti kasapulan tapno maikaritayo met iti dayta a ladawan?’

● ‘Ninamnamak ti makabiruk ti kas kadakayo nga interesado iti naespirituan a bambanag. Mammano dagidiay kakasta. Damagek man kadakayo no aniat’ makunayo iti kari ti Biblia a ti Dios ikisapnanto amin a kinadakes ket pagbalinennanto ti daga a lugar para laeng kadagidiay mangayat iti kinalinteg? Maragsakankayo kadi iti dayta?’

● ‘Aktibokay kadi kadagiti aktibidad ti simbaanyo? . . . Napumpunno kadi ti simbaanyo kadagiti mannakimisa kadagitoy nga aldaw? . . . Kaaduan kadi a miembroyo ket talaga a napasnekda a mangipakpakat iti Sao ti Dios iti inaldaw a kabibiagda? (Wenno, Nagkaykaysa kadi ti kapanunotan dagiti miembroyo no maipapan iti pannakarisut dagiti problema a sangsanguen ti lubong itatta?) Natakuatanmi a makatulong unay ti personal a panagadal ti Biblia iti uneg ti balay.’

● ‘Nabatad a kontentokayo iti relihionyo. Ngem kaaduan a tattao dida kontento kadagiti kasasaad ditoy lubong. Nalabit kastakayo met; saan kadi? . . . Adinot’ pagturturongan amin dagitoy?’

● ‘Maysakayo kadi kadagidiay mangtagtagiragsak iti panangbasada iti Biblia? . . . Regular met la kadi ti panangbasayo iti dayta?’

● ‘Apresiarek ti panangibagayo iti dayta. Ngem ammok nga umanamongkayo nga, aniaman ti relihiontayo, interesadotayo unay iti sangalubongan a talna (wenno, kadagiti wagas a pangsalaknib kadagiti annaktayo manipud kadagiti dakes nga impluensia; wenno, kaadda ti sangakaarubaan a dagiti tattao talaga nga agiinnayan-ayatda; wenno, tagiragsakenda ti nasayaat a relasion kadagiti sabali, ken agbalin a karit dayta no tunggal maysa ket maparigat).’

● ‘Maragsakanak ta relihiosokayo gayam. Adu ngamin dagiti di mangipaspasnek iti relihionda ita. Adda pay dagiti agkuna nga awan ti Dios. Ngem, sigun iti naisuro kadakayo, ania a kita a persona ti Dios ti kunayo? . . . Paliiwenyo ta ti Biblia itdenna kadatayo ti personal a nagan ti Dios. (Ex. 6:3; Sal. 83:18)’

● ‘Idi imbaon ni Jesus dagiti disipulona tapno mangasabada, imbagana a danonenda amin a paset ti daga, iti kasta masabatdanto dagiti tattao a ti relihionda ket naiduma iti bukodda a relihion. (Ara. 1:8) Ngem ammona a dagidiay mabisin ken mawaw iti kinalinteg isudanto ti dumngeg. Ania a partikular a mensahe ti kunana a maipadamag iti kaaldawantayo? (Mat. 24:14) Aniat’ kaipapanan dayta a Pagarian kadatayo? . . . ’

‘KRISTIANOKAMI AMIN DITOY’

● ‘Maragsakanak nga umammo iti dayta. Pagaammoyo ngarud a ni Jesus a mismo ket kastoy idi ti inaramidna, sinarungkaranna dagiti balbalay, ket dinutokanna dagiti adalanna nga aramidenda met ti kasta. Kabisadoyo kadi ti tema nga inkaskasabada? . . . Daytat’ kayatmi a saritaen kadakay itatta. (Luc. 8:1; Dan. 2:44)’

● ‘No kasta apresiarenyo ti kinaserioso ti kinuna ni Jesus iti Sermonna idiay Bantay. Prangko idi ngem siaayat idi kinunana . . . (Mat. 7:21-23) Ti ngad isaludsodtayo iti bagitayo isu daytoy, Matarusak met la ngata ti pagayatan ti nailangitan nga Ama? (Juan 17:3)’

‘DIAK MASANGO DAYTA’

● ‘Apagbiitak laeng ngarud. Adda laeng maysa a napateg a damag a kayatko nga iyallatiw kadakayo. (Ibagayo ti kababagas ti topiko a salaysayenyo iti agarup dua laeng a sarita wenno sentensia.)’

● ‘Ala wen. Agsubliakto ngarud inton adda tiempoyo. Ngem sakbay nga agpakadaak, kayatko laeng nga ibasa ti maysa a texto a mabalin a pampanunotemto ta napateg unay.’

● ‘Maawatak ti kasasaadyo. Bilang ina (wenno, trabahador; wenno, estudiante) nakapumpunno met ti eskediolko. Gapuna mabiitak laeng. Sisasangotay amin iti grabe a situasion. Kunaen ti Biblia nga asidegen ti tiempo a panangdadael ti Dios iti agdama a dakes a sistema ti bambanag. Ngem addada makalasat. Daytoy ti saludsod, Ania ti masapultayo nga aramiden tapno makalasattayo? Sungbatan ti Biblia dayta. (Sof. 2:2, 3)’

● ‘Ammoyo, dayta ti eksakto a rason no apay immayak. “Busy” tayo amin—ket no dadduma mabaybay-antayo payen dagidiay banag a talaga a nasken, di ngamin? . . . Apagbiitak laeng, ket siguradok nga interesadokayo iti daytoy a texto. (Luc. 17:26, 27) Ditay kayat ti maitulad kadagidiay a tattao, gapuna asikasuentay koma no aniat’ ibagbaga ti Biblia kadatayo. (Itukonyon ti literatura.)’

● ‘Di kadi nasaysayaat no agsublikamto kalpasan ti 30 minuto, kalpasan a masarungkaranmi dagiti kaarubayo?’

● ‘Dimi kayat a masingakayo. Nalabit agsubliakto laengen iti sabali nga aldaw. Ngem sakbay nga agpakadaak, kayatko koma a magundawayanyo daytoy naisangsangayan a tukon. (Ipakitayo ti tukon ita a bulan.) Daytoy a libro linaonna ti kurso a mangiyam-ammo kadakayo iti sungbat ti Biblia kadagiti saludsod a kas iti (mangdakamatkayo iti maysa wenno dua).’

● ‘Ladingitek a natiempuankayo a nagadut’ as-asikasuenyo. Kas pagaammoyon, maysaak a Saksi ni Jehova. Adda koma iburayko kadakayo a nagpateg a mensahe manipud Biblia. Ngem gapu ta diyo masango ita, nalabit ibatik la kadakayon ti kabbaro a magasinmi, a mangsalsalaysay iti (ibagayo ti temana). Mabalinyonto a basaen dayta inton adda tiempoyo. Adda laeng sangkabassit a kontribusionyo a . . .’

● ‘Maawatak a talaga ti kasasaadyo. Kasla kanayon a di umdas ti tiempo a pangileppastayo iti ar-aramidentayo. Ngem nautobyo kadin no kasanot’ gidiatna no adda koma biagtayo nga agnanayon? Kasla di nakapapati dayta. Ngem palubosandak ta ipakitak kadakayo ti uray maysa la a texto iti Biblia a mangilawlawag no kasano a magun-odantay dayta. (Juan 17:3) Gapuna, ti masapul nga aramidentay itan isut’ pananggun-odtayo iti pannakaammo maipapan iti Dios ken iti Anakna. Daytat’ gapuna a kayatmi nga ibatiandakay iti daytoy.’

‘APAY NGA AGKARASUBLIKAYO?’

● ‘Ngamin ta mamatikami nga agbibiagtayon iti maudi nga al-aldaw a nakadamat ditoy Biblia. Ipapanmi a nasken unay a panunoten koma dagiti amin a tattao ti pagbanaganto dagiti agdama a kasasaad. (Mangdakamatkayo iti maysa wenno dua nga agdama a pasamak wenno situasion.) Ti saludsod isu daytoy, Aniat’ masapul nga aramidentayo tapno malasattayo ti panungpalan daytoy sistema ti bambanag?’

● ‘Gapu ta ay-ayatenmi ti Dios ken dagiti kaarubami. Dayta koma ti aramidentay amin, saan kadi?’

‘KABISADOK UNAYEN TI TRABAHOYO’

● ‘Maragsakanak unay a makadamag iti dayta. Adda kadi kabagianyo wenno gayyemyo a Saksi? . . . Damagek kadi: Mamatikayo kadi iti isursuromi manipud Biblia, nga agbibiagtayon iti “maudi nga al-aldaw,” a din agbayag dadaelenen ti Dios dagiti nadangkes, ket daytoy daga agbalinton a paraiso a mabalin a pagnaedan ti tattao nga agnanayon a buyogen ti perpekto a salun-at iti nagtetengngaan dagiti kaaruba nga adda panagayan-ayatda?’

‘AWAN KUARTAMI’

● ‘Saankami nga agurur-or iti pundo. Ngem ituktukonmi ti libre a panagadal iti Biblia ditoy balayyo. Maysa kadagiti tema a masaklaw isu daytoy (usarenyo ti maysa a titulo ti kapitulo iti agdama a publikasionyo). Ipakitak komat’ biit kadakayo no kasanot’ panagadalmi. Awan pulos ti bayadanyo.’

● ‘Narigat itan ti biag. Ngem interesadokami kadagiti tattao, saan ket nga iti kuartada. (Ituloyyo ti temayo. Kalpasan ti panangitukonyo iti literatura, ibagayo a naawatanyo daytay imbagada nga awan nairana a kuartada. No maikanatad, isukatyo ti literatura iti produktoda wenno ibagayo a maragsakankayo a mangala iti orderda sakayto agsubli iti aldaw a tarigagayanda.)’

NO ADDA AGKUNA, ‘BUDISTAAK’

● ‘Dikay ipapan a ti pammati dayta a tao ket isu met lat’ pammati dagiti amin a Budista. Di nalawag dagiti pannursuro dagiti Budista ket isuda a mismo nagduduma ti interpretasionda. Ti Budismo dagiti Hapon naigidiat iti Budismo ti Dumaya nga Abagatan ti Asia. Nagduduma, met, ti punto de vista ti tunggal indibidual. Para iti kaaduan, nupay kasta, dagitoy a punto ti makatulong: (1) Ti Budismo dina bigbigen ti kaadda ti naisalsalumina a Dios, ti maysa a personal a Namarsua. Ngem adu a Budista ti agdaydayaw kadagiti imahen ken ramramit ni Budha. (2) Ni Siddhartha Gautama, a naikkan ti titulo a Budha, minatmatanda a kas relihioso nga ehemplo dagiti pasurotna, a masapul a tuladenda. Pinaregtana ti pananggun-od iti lawag babaen ti panangadalna iti tao manipud natauan a panangmatmat, kasta met ti pananggupedna kadagiti ramot ti panagsagaba babaen iti panangtengngelna iti isip tapno mailaksid dagiti amin a naindagaan a tarigagay. Insurona a babaen itoy a wagas magun-odan ti tao ti Nirvana, a saanen nga aglasat iti pannakabalbaliw a pannakayanak babaen iti transmigrasion. (3) Dagiti Budista daydayawenda dagiti inapoda, yantangay matmatanda ida a kas gubuayan ti biagda.

Dagiti maisingasing a pagsaritaan: (1) No Budista ti kasarsaritayo, ipaganetgetyo a saankay a paset ti Kakristianuan. (2) Dagiti Budista raemenda ti “nasantuan a liblibro,” ket gagangay a raemenda ti Biblia gapu iti dayta. Imbes a pagsaritaanyo ti pilosopia ti Budismo, idatagyo ti positibo a mensahe ti Biblia. Ipakaammoyo kadakuada a ti Biblia saan a natauan a pilosopia no di ket isut’ napudno a Sao ti namarsua iti tao, ni Jehova a Dios. Damagenyo a siraraem no mabalinyo nga ibasa kadakuada ti nagsayaat a punto iti daytoy a nasantuan a libro, ti Biblia. (3) Adu a Budista ti interesado unay iti talna ken iti biag ti pamilia ket kayatda ti biag a nadalus iti moralidadna. Masansan a denggenda ti kakastoy a panagsasarita. (4) Ipakitayo a ti Biblia itudona ti kaadda ti nalinteg a nailangitan a gobierno a mangituray iti daga a kas isut’ pudno a solusion kadagiti parikut ti sangatauan. Ilawlawagna ti masanguanan ti daga ken ti nakaskasdaaw a namnama a panagbiag nga agnanayon iti naindagaan a paraiso. (5) Mabalin nga ipatuldoyo a ti Biblia ilawlawagna ti punganay ti biag, ti kayulogan ti biag, ti kasasaad dagiti natay ken ti namnama a panagungar, ti gapu iti kaadda ti kinadakes. Ti naasi a panangidatag kadagiti nabatad a kinapudno a linaon ti Sao ti Dios masupapakanto iti manangipateg nga isusubad iti puspuso dagidiay marakarnero.

Ti polieto nga In Search of a Father nairanta a para iti pagimbagan dagiti napasnek a Budista.

NO ADDA AGKUNA, ‘HINDUAK’

● ‘Sipapanunotkay koma a ti pilosopia ti Hindu ket komplikado unay ket di maitunos iti gagangay a panagpampanunot. Makatulong kadakayo ti pananglaglagip kadagiti sumaganad a punto: (1) Isursuro ti Hinduismo a ni dios a Brahman adda tallo a pormana—ni Brahma a Namarsua, ni Vishnu a Manangispal, ken ni Siva a Manangdadael. Ngem di kunaen dagiti Hindu nga adda personal a dios a naisalsalumina ti kaaddana. (2) Mamati dagiti Hindu nga amin a natural a banag ket adda kararuada a di matay, a ti kararua aglasat iti bale di mamingga a panagrikrikos ti reinkarnasion, a dagiti porma a pagbalinanna inton mayanak manen ket maikeddeng babaen kadagiti gapuanan (Karma), a ti pannakaluk-at manipud iti daytoy ‘awan inggana a rueda’ ket maipamuspusan laeng no maiddep amin a pisikal a tarigagay, ket inton mapasamak daytoy makikaykaysanton dayta a kararua iti dayta unibersal nga espiritu. (3) Kas gagangay, dagiti Hindu raemenda ti sabsabali a relihion. Mamati dagiti Hindu nga, uray agsisimparat dagiti doktrina nga isursuroda, amin a relihion agturong iti isu met la nga isu a kinapudno.

Imbes a risutenyo dagiti komplikado a pilosopia ti Hindu, idatagyo kenkuana dagiti makapnek a kinapudno a masarakan idiay Nasantuan a Biblia. Dagiti naayat a probision ni Jehova para iti biag ket silulukat kadagiti isuamin a klase a tattao, ket dagiti nabatad a kinapudno a masarakan iti Saona danonendanto dagiti puso dagidiay mabisin ken mawaw iti kinalinteg. Ti laeng Biblia ti mangipaay iti pudpudno a natibker a namnama para iti masanguanan; ti laeng Biblia ti mangited iti pudpudno a makapnek a sungsungbat kadagiti nasken a saludsod a sangsanguen ti amin a tattao. Itdenyo kadakuada ti gundaway a mangdengngeg kadagita a sungbat. Makapainteres ta ti Rig-Veda nga himno ti Hindu, 10. 121, ket napauluan “Iti Di Am-ammo a Dios.” Kadagiti dadduma a kaso maikanatad a tukoyenyo daytoy kas iti panangtukoy ni apostol Pablo iti altar para “Iti Di Am-ammo a Dios” idiay Atenas. (Ara. 17:22, 23) Makapainteres ta, ti nagan ti Hindu a dios a ni Vishnu, no maikkat ti digamma, ket Ish-nuh, a no iti Caldeo kaipapananna “ti tao a ni Noe.” Ipatuldoyo no aniat’ kuna ti Biblia maipapan iti kinapateg daydi sangalubongan a Layus idi tiempo ni Noe. Dagidiay agledleddaang gapu iti pananginanamada iti di mamingga a reinkarnasion mabalin a makatulong kadakuada ti panid 360, 361, iti paulo a “Reinkarnasion.”

Dagiti polieto a The Path of Divine Truth Leading to Liberation ken From Kurukshetra to Armageddon—And Your Survival naglaonda iti impormasion a makatulong unay kadagiti napasnek a Hindu.

NO ADDA AGKUNA, ‘JUDIOAK’

● ‘Umuna, siguraduenyo no kasanot’ panangmatmatna iti bagina bilang Judio. Mammano kadakuada ti relihioso. Kaaduanna, ti Kinajudioda ket kas nagan laeng ti maysa a rasa.

Adtoy ti sumagmamano a punto a makatulong no laglagipenyo: (1) Dagiti relihioso a Judio matmatanda a kas maiparit ti pannakabalikas ti nagan ti Dios. (2) Adu dagiti Judio nga ipapanda a “ti Biblia” ket libro dagiti Kristiano, ngem no dagiti “Hebreo a Kasuratan” ti tukoyenyo, wenno “dagiti Kasuratan,” wenno “ti Torah,” saan a rumsua dayta a parikut. (3) Ti tradision isut’ sentral a paset ti pammatida ket isut’ matmatan dagiti relihioso a Judio a pumatas iti autoridad dagiti Kasuratan. (4) Mabalin nga inaigda ni Jesu-Kristo iti nakas-ang a pannakaidadanes a napasaran dagiti Judio manipud Kakristianuan gapu iti nagan ni Jesus. (5) Masansan a mamatida a ti Dios binilinna dagiti Judio a salimetmetanda ti Sabbath, a saklawenna dayta ti pannakaiparitda nga aggasto iti dayta nga aldaw.

Tapno adda pagtunosanyo, mabalinyo a kunaen: (1) ‘Nalabit umanamongkayo a, nupay nagduma ti pammatitayo, pareparehotay a sangsanguen dagiti parikut ditoy lubong itatta. Mamatikay kadi nga addanto ti talaga a manayon a solusion kadagiti dadakkel a problema a sangsanguen daytoy a kaputotan? (Sal. 37:10, 11, 29; Sal. 146:3-5; Dan. 2:44)’ (2) ‘Saankami a paset ti Kakristianuan ket dikam mamati iti Trinidad no di ket daydayawenmi ti Dios ni Abraham. Interesadokam unay maipapan iti narelihiosuan a kinapudno. Di la mabalin a damagek no kasanoyo nga ikeddeng no ania ti pudno, nangnangruna ta dakkel ti naggigidiatan ti pampammati dagiti Judio? . . . (Deut. 4:2; Isa. 29:13, 14; Sal. 119:160)’ (3) ‘Interesadokam unay iti inkari ti Dios ken Abraham a baeten iti bin-ina mabendisionanto amin a tattao kadagiti isuamin a nasion. (Gen. 22:18)’

No ibagana nga awan pammatina iti Dios, damagenyo no sigud nga isu ket kasta. Sayonto pagsaritaan no apay nga impalubos ti Dios ti kinadakes ken panagsagaba. Adu a Judio ti maseknan no maipalagip kadakuada ti panangikisap dagiti Nazi kadagiti adu a Judio.

No pagsaritaanyo ti kinapateg ti panangusar iti nagan ti Dios, siertuenyo pay nga umuna no aniat’ makunana iti dayta. Ipatuldoyo a ti Exodo 20:7 iparitna ti panangaramat iti nagan ti Dios iti barengbareng, ngem dina iparit ti panangusar dayta a buyogen ti raem. Sayonto pagsinnaritaan dagiti texto kas iti Exodo 3:15 (wenno Salmo 135:13); 1 Ar-ari 8:41-43; Isaias 12:4; Jeremias 10:25; Malakias 3:16.

No pagsaritaanyo ti Mesias: (1) Pagsaritaanyo pay nga umuna dagiti masanguanan a bendision iti sidong ti turayna, imbes a daydiay kinasiasinona. (2) Sakayto pagsaritaan dagiti texto a mangipatuldo iti kaadda ti personal a Mesias. (Gen. 22:17, 18; Zac. 9:9, 10; Dan. 7:13, 14) (3) Nalabit nesesita a pagsaritaanyo ti dua a yaay ti Mesias. (Idiligyo ti Daniel 7:13, 14 iti Daniel 9:24-26.) (4) No tukoyenyo ni Jesus, igunamgunamyo ti progresibo a panagandar ti panggep ti Dios. Dakamatenyo nga, idi a nangisuro ni Jesus, asideg idin ti tiempo a panangipalubos ti Dios a pannakadadael ti maikadua a templo, a dinton pulos mabangon manen. Ngem ni Jesus impaganetgetna ti kaitungpalan ti Linteg ken dagiti Mammadto ken ti nadayag a masanguanan a pangipatpatulduan dagitoy kadagiti addaan pammati.