Dagiti Introduksion a Maaramat iti Ministerio idiay Tay-ak
Dagiti Komento: Tapno maikeddengyo ti klase ti introduksion nga usarenyo no makiramankayo iti ministerio idiay tay-ak, talloda a banag ti amirisenyo a siaannad: (1) Ti mensahe a naituding nga ipakaammotayo isu “daytoy naimbag a damag ti pagarian.” (Mat. 24:14) Uray pay saantayo a direktamente a sarsaritaen dayta, laglagipentay koma a tulongan ti tattao tapno makitada ti kinapateg dayta, wenno nalabit ikkatentayo dagidiay makalapped iti panangamirisda iti dayta. (2) Ti napudno a pannakaseknantayo iti pagimbagan ti tattao a masabattayo isut’ mangtulong kadatayo, a kas inaramid idi ni Jesus, a mangtignay iti puspusoda. (Mar. 6:34) Ti kasta a napudno nga interestayo maipakita babaen iti nabara nga isem ken nainggayyeman a wagas, situtulok nga iyiimdeng no agsaoda satayto ibagay dita ti komentotayo, kasta met ti panagusartayo ti salsaludsod tapno maparegtatay ida a mangiyebkas ti adda iti unegda ket iti kasta ad-addatay a matarusan ti punto de vistada. Ti 1 Corinto 9:19-23 ipakitana a ni apostol Pablo imbagayna ti panangidatagna iti naimbag a damag kadagiti sirkumstansia ti tattao a kinasaritana. (3) Kadagiti dadduma a paset ti lubong dagiti sangaili mainanama a salimetmetanda dagiti sumagmamano a pormalidad sakbay a sawenda ti gandat ti isasarungkarda. Kadagiti met dadduma a lugar mainanama a ti sangaili a bigla a simmarungkar masapul nga idiretsona nga ibaga ti gagarana.—Idiligyo ti Lucas 10:5.
Dagiti sumaganad nga introduksion ipakitada no kasano a luktan dagiti sumagmamano nga aduan kapadasanna a Saksi ti pannakisaritada. No ti agdama nga introduksion nga us-usarenyo ket saan a naballigi a manglukat iti pannakisarita, padasenyo dagitoy. No aramidenyo ti kasta nasaysayaat no isaoyo dagitoy iti bukodyo a sasao. Kasta met, a makatulong ti panangalayo iti singasing manipud dadduma a Saksi dita kongregasionyo a sibaballigi no iti pannakisaritada kadagiti umili.
ARMAGEDON
● ‘Adu a tattao ti maseknan maipapan iti Armagedon. Nangngeganda dagiti lider toy lubong nga us-usarenda dayta a mangtukoy iti sapasap a gubat iti nuklear. Ania ti makunayo nga epekto ti Armagedon iti sangatauan? . . . Kinapudnona, ti nagan nga Armagedon naala manipud iti Biblia, ket nagpaiduma ti kaipapananna no idilig iti gagangay a pangus-usaranda. (Apoc. 16:14, 16) Ipakita met ti Biblia nga addada bambanag a mabalintayo nga aramiden tapno maispaltayo. (Sof. 2:2, 3)’ (Kitaenyo met ti panid 41-46, iti sidong ti paulo nga “Armagedon.”)
BIBLIA/DIOS
● ‘Komusta. Sumarsarungkarak iti apagbiit ta adda nasken a mensahe a kayatko nga iyallatiw kadakayo. Pangngaasiyo ta kitaenyo ti kunana ditoy Biblia. (Basaenyo ti texto, a kas iti Apocalipsis 21:3, 4.) Aniat’ makunayo iti dayta? Saan kadi a nasayaat daytoy?’
● ‘Kasarsaritami dagiti kaarubami no adinot’ pakabirokan iti praktikal a tulong maipapan kadagiti problema iti biag. Idi immuna a tiempo Biblia ti nagkonsultaran dagiti adu. Ngem itan agbalbaliw metten dagiti panangmatmat ti kaaduan. Aniat’ makunayo maipapan iti dayta? Mamatikayo kadi a ti Biblia ket Sao ti Dios wenno ti kunayo maysa laeng a napintas a libro dayta nga insurat ti tattao? . . . No naggapu iti Dios dayta, kasanoyo a masierto ngay a kasta?’ (Kitaenyo ti panid 69-78, iti sidong ti paulo a “Biblia.”)
● ‘Maragsakanak ta nadanunkayo. Adda iburburayko kadagiti kaarubak a makaparegta a kapanunotan manipud Biblia (wenno, kadagiti Nasantuan a Kasuratan). Inutobyo kadin: . . . ? (Mamataudkayo iti saludsod nga agturong iti topiko a salaysayenyo.)’
● ‘Parparegtaenmi dagiti gagayyem a mangbasa iti Bibliada. Dagiti itdenna a sungbat kadagiti nasken a salsaludsod masansan a pagsiddaawenna dagiti adu. Kas pangarigan: . . . (Sal. 104:5; wenno Dan. 2:44; wenno dadduma pay).’
● ‘Adda apagbiit nga isasarungkarmi ita kadagiti kaarubami. Dagiti dadduma a makasarsaritami adda panagtalekda iti Dios. Dagiti met dadduma problemada ti panamatida kenkuana. Aniat’ makunayo? . . . Ti Biblia awisennatayo a mangamiris iti kinapateg ti pisikal nga uniberso. (Sal. 19:1) . . . Daydiay Maysa a ti lintegna isut’ mangiturturong kadagitoy a nailangitan a parparsua nangipaay met iti napateg a giya para kadatayo. (Sal. 19:7-9)’ (Kitaenyo met ti panid 113-119, 313-317 iti sidong ti paulo a “Dios” ken “Panamarsua.”)
KRIMEN/KINATALGED
● ‘Komusta. Kasarsaritami dagiti gagayyem maipapan iti problema ti personal a kinatalged. Agraira ti krimen iti lawlawtayo ket apektaranna ti biagtayo. Ti kunayo addanto ngata tiempo a dakayo ken siak mabalintay ti magna kadagiti kalsada iti rabii a sitatalged? (Wenno, Ti kunayo adda kadi makarisut iti dayta a problema?) (Prov. 15:3; Sal. 37:10, 11)’
● ‘Siak ni ——. Taga ditoyak met laeng. Itay rumuarak itay bigat nadlawko a ti pagsasaritaan ti tattao isu daydiay (dakamatenyo ti krimen a napasamak dita lugaryo, wenno dadduma pay a problema a pakaseknan dita a lugar). Aniat’ makunayo maipapan iti dayta? . . . Adda kadi aniaman a makunayo a mamagbalin iti biagtayo a nataltalged? (Prov. 1:33; 3:5, 6)’
AGDAMA A PASPASAMAK
● ‘Naimbag a malemyo. Siak ni ——. Taga ditoyak (ibagayo ti kalye wenno lugar). Nabuyayo kadi ti damag idiay TV idi rabii? . . . Maipapan iti (dakamatenyo ti damag a pakaseknanyo)—aniat’ makunayo iti daydiay? . . . Saan a karkarna nga iyimtuod ti tattao, Aniat’ pagturturongan daytoy lubong? Dakami bilang Saksi ni Jehova mamatikami nga agbibiagtayon iti tiempo nga inawagan ti Biblia a kas “maudi nga al-aldaw.” Paliiwenyo kadi daytoy detaliado a panangsalaysayna ditoy 2 Timoteo 3:1-5.’ (Kitaenyo met ti panid 224-233.)
● ‘Nabasayo kadi daytoy iti periodiko ita a lawas? (Ipakitayo ti kinartibyo a damag.) Aniat’ makunayo . . . ?’
● ‘Adda koma imtuodek kadakayo. No adda koma pannakabalinna, ania kadagiti nagadu a problema ditoy lubong ti kayatyo a maiyun-una a marisut? (Kalpasan a maamuanyo ti kangrunaan a pakaseknanna, usarenyo dayta a kas isut’ pagsaritaanyo.)’
PANGGEDAN/PAGTAENGAN
● ‘Nakasaritami dagiti kaarubayo no maipapan iti kasapulan a maaramid tapno sigurado nga adda koma panggedan ken pagtaengan dagiti amin nga umili. Ti kunayo kabaelan ngata dagiti natauan a gobierno nga itden dayta? . . . Ngem adda makabael a mangrisut kadagitoy a problema; dayta isu ti Namarsua iti tao. . . . (Isa. 65:21-23)’
● ‘Ipadpadamagmi kadagiti kaarubamit’ maipapan iti naimbag a gobierno. Tarigagayantay koma daytay gobierno a saan a korap, gobierno a mangipaay iti panggedan ken nasayaat a pagtaengan para kadagiti isuamin. Ania a kita a gobierno ti kunayo a kabaelanna nga ipaay dayta? . . . (Sal. 97:1, 2; Isa. 65:21-23)’ (Kitaenyo met panid 154-159, iti sidong ti paulo a “Gobierno.”)
PAMILIA/ANNAK
● ‘Kasarsaritami dagiti gagayyem nga interesado no kasanotay nga ad-adda a marisut dagiti problema ti pamilia. Ikagkagumaanantayo nga aramiden ti kabaelantayo, ngem no adda makatulong kadatayo tapno ad-adda nga agballigitayo, interesadotayo, saan kadi? . . . (Col. 3:12, 18-21) Ti Biblia ipaayna kadatayo ti karkarna a namnama, banag a mangipaay ti pudpudno a masanguanan dagiti pamiliatayo. (Apoc. 21:3, 4)’
● ‘Kayattay amin a dagiti annaktayo maaddaanda koma ti naragsak a biag. Ngem kunayo adda ngata ti naimbag a rason tapno namnamaentayo ti naragsak a pagbanagan ti riribok a sangsanguen ti lubong ita? . . . Gapuna, ania a kita ti lubong ti kunayo a sagrapento dagiti annaktayo inton dumakkelda? . . . Ipakita ti Biblia a ti Dios pagbalinennanto daytoy daga a nakaskasdaaw a lugar a pagianan. (Sal. 37:10, 11) Ngem no kayattayo a maramanan dagiti annaktayo dayta agpannurayto unay dayta iti intay pilien. (Deut. 30:19)’
MASANGUANAN/KINATALGED
● ‘Naimbag a bigatyo. Komustakayo? . . . Ikagkagumaanmi nga ipadamag kadagiti kaarubami ti positibo a panangmatmat iti masanguanan. Kasta met kadi ti panangmatmatyo iti biagtayo? . . . Nadlawyo kadi nga addada situasion a mangparigat iti panangmatmattayo a kasta? . . . Natakuatak a makatulong unay ti Biblia no iti daytoy. Realistiko ti panangdeskribirna kadagiti kasasaad iti kaaldawantayo, ngem ilawlawagna met ti kayulogan dagita ken ibagana kadatayo no anianto ti resultana. (Luc. 21:28, 31)’
● ‘Komusta. Siak ni ——. Ania met ti naganmo? . . . Parparegtaek dagiti agtutubo a kas kenka a mangamiris iti nagsayaat a masanguanan a sarsaritaen ti Biblia a maipaayto kadatayo. (Basaenyo ti texto, kas iti Apocalipsis 21:3, 4.) Saan kadi a nagsayaat ti kunana?’
PANANGYADAL TI BIBLIA ITI PAGTAENGAN
● ‘Simmarungkarak ta kayatko ti mangitukon kadakayo iti libre a kurso iti Biblia ditoy balayyo. No palubosandak, kayatko koma nga ipakita kadakayo iti sumagmamano la a minuto no kasanoda a pagsasaritaan ti Biblia kadagiti balbalay kas grupo dagiti pamilia kadagiti nasurok a 200 a dagdaga. Mabalintay nga usaren ti aniaman kadagitoy a topiko kas pangibasaran iti pagsasaritaantayo. (Ipakitayo ti panid a mangipakita iti linaon dayta a libro.) Ania a topiko ti makapainteres kadakayo?’
● ‘Ipakpakitami kadagiti kaarubami daytoy libro a katulong iti panagadal iti Biblia. (Ipakitayo.) Nakitayo kadi daytoyen? . . . No palubosandak laeng iti apagbiit ipakitak no kasano a mausar daytoy nga aramatentayo ti mismo a kopia ti Bibliayo.’
KINAULPIT/PANAGSAGABA
● ‘Inutobyo kadin: Talaga kadi a maseknan ti Dios iti kinaulpit ken panagsagaba a napasaran ti tattao? . . . (Ecl. 4:1; Sal. 72:12-14)’ (Kitaenyo met dagiti paulo a “Panagsagaba” ken “Pammaregta.”)
PAGARIAN
● ‘Bayat a nakisarsaritaak kadagiti kaarubak, napaliiwko nga adu dagiti mayat nga agbiag iti sidong ti gobierno a talaga a kabaelanna a risuten dagiti dadakkel a problema a sarsarangtentayo ita—ti kinangina ti gagatangen (wenno aniaman a problema a pampanunoten dagiti kaaduan). Nakaay-ayat ti kasta, saan kadi? . . . Adda kadi kasta a gobierno itatta? . . . Adu a tattao ti nangikarkararagen iti gobierno a makaaramid kadagitoy. Di pagduaduaan nga uray dakayo inkararagyo met, ngem adu dagidiay dida impapan a maysa a gobierno dayta. (Dan. 2:44; Sal. 67:6, 7; Mik. 4:4)’ (Kitaenyo met ti panid 266-275 ken 154-159, iti sidong ti paulo a “Pagarian” ken “Gobierno.”)
● ‘Adda im-imtuodenmi kadagiti kaarubami. Apresiarenmi ti maikomentoyo. Ammoyo, insuronatayo ni Jesus a mangikararag iti yaay ti Pagarian ti Dios ken ti pannakaaramid ti pagayatanna ditoy daga a kas sadi langit. Ti kunayo masungbatanto ngata dayta a kararag tapno iti kasta ti pagayatan ti Dios talaga a maaramid ditoy daga? . . . (Isa. 55:10, 11; Apoc. 21:3-5)’
● ‘Sarsaritaek kadagiti kaarubak ti maysa a kuestion a masapul a maipasango kadatay amin: Kayattay kadi ti gobierno ti Dios, wenno kaykayattay ti panangituray ti tao? Gapu ta kastoy metten ti kasasaad ti lubong, ti kunayo masapul kadi nga adda sabali koma a saan laeng a dagitoy pinartuat ti tattao? . . . (Mat. 6:9, 10; Sal. 146:3-5)’
MAUDI NGA AL-ALDAW
● ‘Simmarungkarkami tapno salaysayenmi ti kaipapanan ti mapaspasamak iti intero a lubong itatta. Adu dagiti tattao a napukawdan ti interesda iti Dios ken kadagiti pagalagadan iti panagbiag nga insaadna iti Biblia. Daytoy ti nangimpluensia unay iti kababalin ti tattao iti maysa ken maysa. Pangngasiyo ta denggenyo daytoy salaysay a nairekord iti 2 Timoteo 3:1-5 ket ibagayo man no apagpag-isu unay iti daytoy lubongtay ita. (Basaenyo) . . . Mainanamatay kadi nga addanto ti nasaysayaat a kasasaad iti masanguanan? (2 Ped. 3:13)’
● ‘Adu dagiti mamati a dandanin manungpal ti lubong. Ibagbagada a ti kaaldawantayo isut’ “maudi nga al-aldaw.” Ngem nabigbigyo kadin a ti Biblia ket ibagana no kasanotay a lasaten ti panungpalan ti agdama a lubong ket agbiagtayto iti daga nga agbalin a paraiso? (Sof. 2:2, 3)’ (Kitaenyo met ti panid 224-233, iti sidong ti “Maudi nga Al-aldaw.”)
Kitaenyo met ti “Agdama a Paspasamak” a masarakan kadagitoy naisingasing nga introduksion.
BIAG/KINARAGSAK
● ‘Sarsarungkaranmi dagiti kaarubami tapno mabirokanmi dagidiay maseknan unay iti kayulogan ti biag. Kaaduan a tattao dagiti makapaspasar iti kinaragsak. Ngem adu met a problema ti sangsanguenda. Bayat a lumaklakaytayo, mabigbigtayo nga ababa unay ti panagbiag. Dayta latta ngatan ti kaipapanan ti panagbiag? Aniat’ makunayo iti dayta? . . . (Saritaenyo ti orihinal a panggep ti Dios kas naipakita idiay Eden; sayonto ibasa ti Juan 17:3 ken Apocalipsis 21:3, 4.)’ (Kitaenyo met iti panid 64-68, iti sidong ti paulo a “Biag.”)
● ‘Im-imtuodenmi itatta kadagiti kaarubami no aniat’ makunada no mabasada kadagiti Bibliada ti ebkas a “biag nga agnanayon.” Makapainteres unay kadatayo yantangay agarup 40 a daras ti panagparang dayta idiay Biblia. Ania ngata ti kaipapananna kadatayo ti kasta a biag? . . . Kasanotay a magun-odan dayta? (Juan 17:3; Apoc. 21:4)’
● ‘Kasarsaritami dagiti tattao a talaga a maseknan iti kalidad ti panagbiag itatta. Kaaduan kadatayo ti maragsakan ta sibibiagtayo, ngem adut’ agim-imtuod, Posible ngata a magun-odan ti maysa ti naragsak a panagbiag? Aniat’ makunayo iti dayta? . . . Aniat’ makunayo a kadaklan a tuben iti kinaragsak itatta? . . . (Sal. 1:1, 2; iramanyo ti dadduma pay a texto a maitutop iti pakaseknan ti bumalay)’
AYAT/KINAMANANGAASI
● ‘Natakuatanmi nga adu dagiti maseknan gaput’ kinaawan ti pudpudno a panagayat ditoy lubong. Kasta met kadi ti makunayo? . . . Aniat’ makunayo a makagapu iti daytoy a pagannayasan? . . . Naammuanyo kadin nga impadto ti Biblia dayta? (2 Tim. 3:1-4) Ilawlawagna met ti makagapu iti dayta? (1 Juan 4:8)’
● ‘Siak ni ——. Kaarubadak met laeng. Sumarsarungkarak iti apagbiit kadagiti kaarubak maipapan iti banag a pakaseknak unay, ket siguradok a napaliiwyo met dayta. Saan a narigat ti mangipakita iti kinamanangaasi, ngem kasla mammanon a makita dayta. Inutobyo kadin no apay a kasta ti situasion ita? . . . (Mat. 24:12; 1 Juan 4:8)’
KINALAKAY/IPAPATAY
● ‘Inutobyo kadin no apay a lumakay ken mataytayo? Adda dagiti pawikan nga agbiag iti ginasut a tawen. Adda dagiti kayo a nagbiag iti rinibo a tawen. Ngem ti tattao agbiagda laeng iti 70 wenno 80 a tawen sadanton matay. Inutobyo kadin no apay? . . . (Roma 5:12) Agbalbaliwto aya ti kasta a kasasaad? . . . (Apoc. 21:3, 4)’
● ‘Inimtuodyo kadin: Ni patay isu ngatat’ tungpal ti isuamin? Wenno adda pay sabali a banag kalpasan ti ipapatay? . . . Lawlawagan ti Biblia dagiti saludsodtayo maipapan iti ipapatay. (Ecl. 9:5, 10) Ipakitana pay nga adda ti pudpudno a namnama dagidiay addaan pammati. (Juan 11:25)’ (Kitaenyo met ti panid 166-172 ken 275, iti sidong dagiti paulo nga “Ipapatay” ken “Pammaregta.”)
GUBAT/TALNA
● ‘Dandani amin a tattao kadagitoy nga aldaw ket maseknanda iti pamutbuteng ti gubat nuklear. Ti kunayo makitatayto met la ngata ti pudpudno a kinatalna ditoy daga? . . . (Sal. 46:8, 9; Isa. 9:6, 7)’
● ‘Agbirbirokak kadagiti tattao nga agtarigagay nga agbiag iti lubong nga awanan gubat. Iti daytoy laeng a siglo naangay dagiti ginasut a gubgubat, agraman dua a sangalubongan a gubat. Ita sangsanguentayo ti pamutbuteng ti gubat nuklear. Aniat’ kunayo a kasapulan tapno maliklikantayo ti kasta a gubat? . . . Asino ti makaited iti kasta? . . . (Mik. 4:2-4)’
● ‘Masarakanmi a dandani amin a tattao kunada a kayatda ti sangalubongan a talna. Kaaduan kadagiti lider ti lubong kasta met ti kunada. Apay, ngarud, a nagrigat a gun-oden dayta? . . . (Apoc. 12:7-12)’
NO KUNAEN DAGITI ADU: ‘ADDA RELIHIONKON’
● ‘Naimbag a bigatyo. Sarsarungkaranmi amin a pamilia ditoy a lugar ket natakuatanmi a kaaduan kadakuada ket adda relihionda. Di pagduaduaan nga adda met relihionyo. . . . Ngem, uray pay no aniat’ relihiontayo, addada parikut a padapada a pakaseknantayo—ti kinangina ti gagatangen, krimen, sakit—saan kadi? . . . Ti kunayo adda ngata ti talaga a solusion dagitoy? . . . (2 Ped. 3:13; kdp.)’
NO KUNAEN DAGITI ADU: ‘DIAK MASANGO DAYTA’
● ‘Komustakayo. Sarsarungkarandakayo amin ditoy itatta ta adda nasken unay a mensahemi. Ammok nga adut’ as-asikasuenyo, isut’ gapuna a mabiitak laeng.’
● ‘Komusta. Siak ni ——. Nakaumayak ta kayatko nga ipadamag kadakayo dagiti bendision nga ipaay ti Pagarian ti Dios ken no kasanotay a magun-odan dagita. Ngem makitak nga adut’ as-asikasuenyo (wenno, adda papananyo). Adda laeng koma ababa a mensahe nga ibatik kadakayo?’
KADAGITI TERITORIA A MASANSAN A MAAS-ASAK
● ‘Naimbag man ta nadanundakayo. Ar-aramidenmi manen ti linawas nga isasarungkarmi ditoy, ket adda pay kanayonan a mensahe a tarigagayanmi nga iburay kadakayo maipapan iti nakaskasdaaw a bambanag nga itdento ti Pagarian ti Dios para iti sangatauan.’
● ‘Komusta. Maragsakanak a makakita manen kadakayo. . . . Sapay koma ta napiakay amin ditoy? . . . Dimmagasak ta adda nagsayaat nga ipadamagko maipapan iti . . . ’
● ‘Naimbag a bigatyo. Komustakayo? . . . Ninamnamak a makasaritakay koma manen. (Sayonto ibaga ti tema a kayatyo a pagsaritaan.)’