Kinapayunir—Serbisio a Mangyeg iti Nabaknang a Gunggona
1 Kayat ni Jehova nga agrag-otayo ken makita dagiti naimbag a nagbannogantayo. (Ecl. 5:18) Ti kangrunaan a trabaho a timmapugantayo isu daytoy panangikasaba iti Pagarian ken panagaramid ti adalan. Imballaag ni Pablo ken Timoteo: “Aramidem ti trabaho iti managibanghelio, anayem a tungpalen iti ministeriom.” (2 Tim. 4:5) Iti dadduma, ti naan-anay a panangitungpal iti ministerioda kaipapananna ti panagregular payunirda. Apay a dikay sikakararag nga usigen no ti kasasaadyo ket palubosanna nga ibaklayyo iti amin a tiempo a ministerio?
2 Kasapulan ti Positibo a Tignay: Tapno makatapugkayo iti payunir a trabaho kasapulanna ti desidido nga addang a maitunos iti kararagyo. Kultibarenyo ti napusuan a tarigagay iti serbisio ni Jehova, agraman ayat kadagiti tattao. Parang-ayenyo ti aktibidadyo idiay tay-ak, a patanorenyo dagiti sarungkaran ken maadalan ti Biblia. Itrabahoyo ti praktikal nga iskediol. Kiddawenyo iti singasing dagiti panglakayen ken payunir. Agintekkayo iti regular a rikos ti trabaho a panangasaba. Nasken ti disiplina iti bagi ken determinasion. (1 Cor. 9:23, 25, 27) Dagitoy iti positibo nga addang ti impakat dagidiay nagpalista iti napalabas a bulbulan.
3 Ti panangituyang iti depinido a kalat ken sireregta a ragpaten dagitoy isut’ tumulong kadatayo nga agprogreso iti panangasabatayo. Mapasayaat kadi dagiti introduksiontayo wenno ti panangsumra kadagiti kumontra? Makaidaulotayo aya iti naprogreso a panagadal ti Biblia? Mairugitayo kadi ti auxiliary payunir a trabaho itan a sipapanunottayo nga agregular payunir iti kalpasanna? Maitutop dagiti kalat a maiwayat sigun iti kabaelan nga itungpal.—1 Tim. 4:15, 16.
4 Makagunggona a Wagas ti Biag: Ti panagpayunir nga addaan iti naimbag a motibo isut’ mangyeg ti adu a gunggona. Mapatanor iti nabileg a panagtalek ken Jehova. Maparang-ay ti abilidad a mangaramat iti Sao ti Dios. Naimbag ti impluensiana iti kongregasion, ket maparegta ti dadduma iti ad-adu a pannakiraman ti ministerio gapu iti mapaguadan nga ehemplotayo. Ti kinapayunir isut’ tumulong kadatayo a gumun-od iti lalo pay nga espiritual a panangmatmat ti biag ken saluad pay kadatayo manipud iti nailubongan nga ambision ken asosasion.
5 Imbaga ni Jesus kadagiti pasurotna: “Adu ti anien, ngem bassit dagiti agani. Gapuna, dawaten iti Apo ti panagani a mangibaon koma kadagiti agani iti paganianna.” (Mat. 9:37, 38) Ti panagkasapulan iti agani ket dakdakkel ita ngem idi aldaw ni Jesus. Ti kinapayunir isut’ mangipalubos kadatayo iti gundaway a maaddaan ti naan-anay a pannakiraman iti daytoy naganat, makasalbar ti biag a trabaho. Awan ti pumadpad iti kinakontento ken pannakapnek a dumteng kadatayo ngem ti panangusar iti maysa ti biagna iti amin a tiempo a serbisio ti Naindaklan a Namarsuatayo.—Prov. 10:22.