Pumigsakayo iti Naespirituan, Agtalinaedkayo a Nadalus iti Serbisio ni Jehova
1 Iti Isaias 60:22, nagkari ni Jehova iti maysa a kari a matungtungpalen iti mismo nga imatangtayo: “Ti bassit agbalinto a sangaribo, ket ti kabassitan agbalinto a napigsa a nasion. Siak a mismo, ni Jehova, aramidekto a nadaras iti panawenna.” No panunoten iti maysa a nasion, mailadawantayo ti nawadwad a grupo dagiti tattao nga agkaykaysa a maipaay iti komon nga interes ken agtigtignay iti sidong ti autoridad iti maysa a naipasdek a gobierno.
2 Ti 1991 a report iti serbisio ti tay-ak ipakitana iti maysa a peak wenno kangatuan a 4,278,820 nga agibumbunannag ti naimbag a damag iti sangalubongan, maysa a 6.5-porsiento a panagadu manipud idi napalabas a tawen. Pudno nga inurnong ni Jehova ti nawadwad a pangen dagiti sinsero a tattao isuda a nagtarigagay a sumina manipud iti daytoy manangirurumen a sistema ket nagbalinda a nasungdo a pagturayan ti Mesianiko a gobierno iti Pagarian babaen ti Anakna, ni Kristo Jesus. Tinawentawen a ti bilang dagiti maur-urnong ket agtultuloy nga umadu. Agrag-otayo kas paset daytoy a nasion a mabalin a literal a madeskribe kas baro a lubong a sosiedad. Iti daydi rambak ti Memorial iti 1991, ti dagup iti timmabuno isut’ 10,650,158, maysa a 7-porsiento a panagadu manipud idi 1990. Irepresentana daytoy ti nagpaiduma a pangnamnamaan iti ad-adu pay a tumimpuyog kas pagturayan ti Pagarian.
3 Maamiristayo, siempre, a saan nga amin a kabilang iti dagup dagiti timmabuno ti Memorial ket insinadan iti bagbagida manipud daytoy a lubong agingga ti kasapulan tapno maawatdan a kas tattao ni Jehova. Dagiti tattao manipud amin a nasion ket ‘agayusda iti balay ni Jehova,’ ngem masapul a naan-anayda a ‘masuruan maipapan iti dalanna’ tapno mabalinda ti “magna iti danana.” (Isa. 2:2-4) Nasurok nga uppat a milion dagiti timmabuno ti Memorial iti nangawat ti instruksion iti Dios, a gimmun-odda ti espiritual a pigsa a mangtignay kadakuada a mangsalimetmet iti nadalus a kondukta ket maikarida a makiraman iti trabaho a panangikasaba ti Pagarian nga isu itan iti mairingpas. (Mat. 24:14) Dagitoy ti addaan naimbag a takder iti imatang ni Jehova ken agsagrap ti gunggona kadagiti amin a nakaskasdaaw a parabor nga agpaay kadakuada. Ania ti masapul nga aramiden dagiti natda pay nga innem a milion tapno agbalinda met a napigsa iti naespirituan ken nadalus a maipaay iti serbisio ni Jehova?
4 Masapul a makabalanda ti “maysa a napinget a pannakibakal a maipaay iti pammati.” (Judas 3) Apaman a pinilida ti magna iti dalan ni Jehova, dumtengda iti sidong ti pammarigat manipud iti Diablo babaen kadagiti suot, sulisog, ken dakes nga impluensiana. Kas ken Pablo, masapul a kumitada ken Jehova a maipaay iti bileg tapno makaibtorda. (Fil. 4:13) Ipaay ni Jehova iti pigsa kadagitoy a tattao babaen dagidiay mismo a napapigsan ti pammatida. Imballaag ni Pablo a “datayo . . . a napigsa rebbengtayo nga awiten iti kinakapoy dagidiay a nakapoy.” (Roma 15:1, 2) No dagiti napigsa ken nakapoy ket agkaykaysada, maaddaanda ti pigsa a makapagtakder a sibibileg. “Ti dua ket nasaysayaat ngem iti maymaysa. . . . No adda mangparukma iti agwaywayas, dagiti dua ti makadaer a bumusor kenkuana.”—Ecl. 4:9, 12.
5 Kaipapananna daytoy a dagiti agdadamo ket maikanatad laeng nga agpannurayda kadatayo a kas pamuspusan tapno gumun-odda ti bileg manipud ken Jehova. Kadatayo a dedikadon a Kristiano ti masapul a mangtaginayon iti kinabilegtayo a mismo tapno matulongantayo dagidiay agdadamo. Dagiti napigsa a Kristiano isuda ti makabael a ‘mangipaay iti espiritual a sagsagut,’ nga agresulta iti ‘panagsisinnukat ti pammaregta.’ (Roma 1:11, 12) Daytoy ti maysa a primaria a wagas nga usaren ni Jehova a mamagkaykaysa kadatayo tapno maaramidnatayo amin a ‘natibker ken nabileg.’—1 Ped. 5:9-11.
6 Masapul nga aramidentayo a ponteria a tulongan dagidiay agdadamo bayat a ti isu met laeng a kanito ket sipupuottayo iti espiritual a kasapulantayo. (Mat. 5:3) Ti espiritualidad isut’ tulbek iti pigsatayo. Daytoy ti kualidad a masapul a taraonan ken sarikedkedan babaen iti regular a panangipastrek ti espiritual a taraon. Babaen ti organisasionna, ipapaay ni Jehova iti natimbang a programa ti panagadal iti Saona. Dagiti lima a linawas a gimong iti kongregasion ti mangala iti nasken a papel ti panangpapigsa kadatayo, ‘a matignay iti ayat ken naimbag nga ar-aramid.’—Heb. 10:24.
7 Ti magunggona kadagitoy a gimong isudat’ mapawadwad no danggayan iti naimbag nga ugali ti personal ken pamilia a panagadal. Kas kalalainganna a kalat, amintayo ti masapul nga agbasa ken mangusig iti inaldaw a teksto, a suroten ti programa iti panagbasa ti Biblia a naituyang iti Iskediol ti Teokratiko a Pagadalan iti Ministerio, ken agsagana a maipaay iti Panagadal ti Libro iti Kongregasion ken Panagadal ti Pagwanawanan. Kada pamilia ti mangeddeng no kasano a maurnos daytoy, a siguruen a maaramid iti regular a pamay-an. Kitaen met iti ulo ti pamilia a daytoy a programa iti panagadal ket mairukod a pangsabet kadagiti masinnunuo a naespirituan a kasapulan iti pamilia. Iti kastoy a wagas ti “sangakabalayan isut’ mapatakder . . . ken sititibker a maipasdek.” (Prov. 24:3) No naridamtayo iti ugali a panagadal kas indibidual ken kas pamilia, makapagtalektayo a bendisionannatayo ni Jehova ket ti espirituna isut’ tumulong kadatayo nga agibtor a sibaballigi iti amin a nagduduma a pakasuotan.—Sant. 1:2, 3; 1 Ped. 4:11.
8 Agtalinaedkayo a Nadalus ken Awan Pakaumsianna: Bayat a sibabara nga awisennatayo ni Jehova nga umadani kenkuana, iti isu met laeng a tiempo, imbatadna a maaramidtayo daytoy a maibatay iti panangalagad ti pammati iti naibukbok a dara ni Jesus, isu a “mangdalus kadatayo manipud iti amin a basol.” (1 Juan 1:7; kitaen met iti Hebreo 9:14.) Maitultuloytayo a pabilgen ti pammatitayo babaen iti personal a panagadal ti Sao iti Dios ken babaen ti panangalagad iti naadaltayo. Adda dadduma iti kalpasanna ti napukaw iti daytoy a nalabit gapu ti saanda a panagtaraon iti naespirituan wenno saanda nga naalagad ti naadalda iti biagda. Daytoy ti namaglaka ken Satanas a nangatakar kadakuada. Dagiti dadduma ti kimmapoy iti naespirituan, ket nagresulta ti panaginaktiboda. Nakalkaldaang, a dadduma ket pinalubosanda ti bagbagida a naisagmak iti serioso a panagbasol, nga isut’ nakailaksidanda. Impakdaar ni Pablo: “Gapuna a daydiay mangipagarup nga adda a sitatakder ket agannad a saan koma a matuang.” No gagaraentayo ti agliway iti panagadal, tumabuno iti gimong, ken iti serbisio, nalakatayo laeng a matallakeban iti narugit nga impluensia ken sulisog.—Heb. 2:1; 2 Ped. 2:20-22.
9 Nasken unay nga agtalinaedtayo a nadalus iti amin a wagas: iti pisikal, mental, espiritual, ken moral. (2 Cor. 7:1) Ti lubong iti aglawlawtayo ket kumarkaro ti kinabaliktad ken kinalaadna iti inaldaw. Agtultuloy ti Diablo a mangraut kadatayo iti lalo pay a makaallilaw a wagas tapno makemmegnatayo. Ti panagtalinaedtayo a napigsa iti naespirituan isut’ mangisiguro a ‘saantayo nga ignorante kadagiti sikapna ket matukmaannatayo.’ (2 Cor. 2:11) Dagiti instruksion ken balakad a maawattayo manipud iti organisasion ni Jehova ti tumulong kadatayo a mangilasin ken makirupak iti dakes nga impluensiana.
10 Dagidiay mangidadaulo iti kongregasion addaanda ti responsabilidad a mangituyang iti maysa a naimbag nga ulidan ti sabsabali iti panagtalinaed a napigsa ken nadalus. Impaganetget ni Pablo daytoy a responsabilidad idi a kinunana: “Laglagipenyo dagidiay a mangidadaulo kadakayo. . . . a bayat a pampanunotenyo ti nagtungpalan iti kababalinda tuladenyo ti pammatida.” (Heb. 13:7) Nasken unay a dagiti nadutokan a panglakayen ken ministerial nga adipen ket mapagulidananda iti personal a kondukta agraman ti panangtamingda iti rebbengenda kas ulo ti pamilia. Ikagumaanda ti pumada ken ni agtutubo a Timoteo, isu a nakiddaw nga “agbalin a pagulidanan . . . iti panagsao, iti kababalin, iti ayat, iti pammati, iti kinadalus.” (1 Tim. 4:12; 1 Ped. 5:3) Amintayo ti makiraman met iti daytoy a responsabilidad nga agbalin a naimbag nga ehemplo babaen ti panangsalimetmet iti nadayaw a kondukta. Masansan nga ukomen dagiti agdadamo iti kinapudno, agraman ti organisasion ni Jehova, babaen iti makitada kadatayo. Kayattayo a siguruen nga no ania ti makitada kadatayo isut’ mangparegta kadakuada a mangilugar kadagiti bagida iti nadalus nga organisasion ni Jehova.
11 Ti panangurnong kadagiti makalasat “iti dakkel a rigat” isut’ agtultuloy nga awan sardayna. (Apoc. 7:14) Dagidiay laeng agbalin a nabileg iti naespirituan ken mamagtalinaed a nadalus ti bagbagida iti ultimo a maisalakan. Nawadwad ti panagpannuray kadagitoy a bambanag: (1) panangsalimetmet iti naimbag a personal nga ugali ti panagadal ken panangutob iti Sao ti Dios; (2) panangipakita ti napudno a personal nga interes iti maysa ken maysa a buyogen ti tarigagay a mamaregta; ken (3) panagtrabaho a sangsangkatunos a mangtaginayon ti nadalus a kondukta a mangidayaw iti nagan ni Jehova. Ti panangaramid kadagitoy a bambanag ti mangisiguro kadatayo iti bendision ken saluad ni Jehova inton daytoy a lubong ket manungpalen. Mabalintayo ti agtalek a maysatayto kadagidiay “dagiti matalek a saluadan ni Jehova.”—Sal. 31:23.