Aramatenyo Dagiti Broshur a Mangiranud iti Namnama ti Pagarian
1 Bayat a masaksiantayo ti kaitungpalan iti padto ti Biblia, agrag-otayo iti namnama ti Pagarian, ket matignaytayo nga agsao maipapan iti dayta kadagiti siasinoman a dumngeg. (Luc. 6:45; Roma 12:12) Ti panangaramat iti broshur idiay tay-ak ti ministerio bayat iti Agosto isut’ maysa a wagas ti panangiranud iti namnama ti Pagarian kadagiti dadduma kas imbilin ni Jesus.—Mat. 24:14.
2 Idinto ta adda sumagmamano a broshur a pagpiliantayo, ania kadagitoy iti kasayaatan a pangsabet kadagidiay adda ti teritoriatayo a pangriing iti interesda? Tapno maaramat iti kasayaatan dagiti broshur, masapul nga ammotayo iti linaonda. Ti sumaruno nga ababa a repaso isut’ tumulong kadatayo iti daytoy a banag.
3 Ti Gobierno a Mangiyegto iti Paraiso: Idi adda ni Jesus ditoy rabaw iti daga, ti Pagarian isut’ tema iti panangasabana. Daytoy a broshur iti mangipakita a ti Pagarian ket maysa a pudno a gobierno ken no kasano a solbarenna dagiti problema a mamagrikut iti panagbiag kadagitoy nga aldaw.
4 Tagiragsakenyo ti Biag nga Agnanayon Ditoy Daga: Ilawlawag daytoy no apay nga inaramid ti Dios iti tao ken no kasano a pagragsakan ti biag nga agnanayon ditoy daga. Dagiti ilustrasion ken ababa a salaysay daytoy a broshur ti makaallukoy kadagiti agtutubo ken kadagidiay limitado iti abilidadda nga agbasa.
5 Ti Nasantuan a Nagan nga Agtalinaed iti Agnanayon: Daytoy a broshur ti mangilawlawag iti nagan ti Dios manipud iti Kasuratan ken historikal a langa, a mangipakita no apay a nasken kadagiti Kristiano nga agpadpada ti panangammo ken panangusar iti dayta bayat ti panagdayawda.
6 Adtoy! Pagbalinek dagiti Isuamin a Bambanag a Baro: Daytoy a broshur ti mangiladawan iti paraiso ken patanorenna ti panangipateg iti Biblia ken ti Namarsuatayo. Kalpasan a nalawaganna no apay a pinalubosan iti Dios ti kinadakes, iturongnaka kadagiti tallo a pamunganayan a sursuro ti Biblia: ti subbot, ti panagungar, ken ti Pagarian. Daytoy a broshur ket addaan met iti saludsod idiay baba ti pinanid, a mamaglaka a mangikondukta iti panagadal ti Biblia babaen daytoy.
7 Rumbeng Aya a Patienyo ti Trinidad?: Mabalin a kunaen dagiti tattao a patienda iti Trinidad, ngem nagduduma ti pannakaawatda iti dayta. Daytoy a broshur ti sumungbat kadagiti saludsod a kas iti: Ania ti Trinidad? Isursuro kadi ti Biblia dayta? Ni Jesu-Kristo aya ket mannakabalin amin a Dios ken paset iti Trinidad? Ania ti nasantuan nga espiritu, ken kasano ti panagtignayna?
8 Apaman nga adda napilitayo a broshur a kayattayo nga aramaten, repasuentayo dagiti artikulo idiay likud ti panid daytoy a ruar iti Ti Ministeriotayo iti Pagarian. Sadiay a masarakantayo dagiti singasing a mangitukon iti literatura ken agsarungkar tapno patauden ti interes ken irugi iti panagadal ti Biblia.
9 Iti adu nga okasion, babaen ti pormal ken impormal a panangasaba, ti masinnunuo a broshur isu laeng iti kasapulan tapno maited ti naimbag a pammaneknek. Sapay koma ta ti bendision ni Jehova iti naregta a ministeriotayo ket agresulta ti ad-adu a panagrag-otayo iti namnama ti Pagarian!—Ara. 13:47, 48.