Saan nga Aglaklako iti Sao ti Dios

“ILAKLAKOMI ti ministeriomi gapu iti kuarta.” Dayta ti kinuna ti maysa a dati a “telephone prayer minister” nga ininterbiu ti maysa nga Americano nga ebanghelista iti telebision idi arintapusen ti 1991.

Iti tallo a televangelistic ministry idiay Estados Unidos ti nangipamaysaan daytoy a programa. Impalgakna a pinullo a milion a doliar iti tinawen ti mapurpuros dagitoy laeng a tallo manipud kadagiti umili. Nadeskribir ti maysa a “ministerio” kas “moderno a paktoria ti donasion.” Nairaman amin dagitoy iti adu a panangallilaw. Maklaatkayo kadi?

Maus-usig ti Relihion

Saan laeng a ti panagebanghelio iti telebision ti us-usigen dagiti gobierno, pribado nga organisasion a mangsalsaluad maibusor iti panangsayang, pannakalugi, wenno kadagiti ilegal nga aramid, ken dagiti umili, no di ket uray dagiti kadawyan, liberal a relihion. Iti dadduma a kasasaad mapagduaduaan metten dagiti stock portfolio ti simbaan, napolitikaan nga interes a busbusbosen ti relihion, ken ti nabarayuboy a panagbiag dagiti klero a mabaybayadan iti dakkel.

Kasanot’ pannakarukod dagiti dadduma a papangulo ti relihion iti nadayaw a panangiladawan ni apostol Pablo iti Nakristianuan a ministerio agarup 2,000 a tawen itan? Insuratna: “Saankami a kas kadagiti adu nga aglaklako iti sao ti Dios, no di ket agsaokami iti biang ni Kristo a kas buyogen ti kinapudno a kas nagtaud iti Dios, ken kas iti imatang ti Dios.” (2 Corinto 2:17) Siasino ti pakaitutopan dayta a panangiladawan ita?

Tapno matulongankayo a mangtingiting kadagiti bambanag, usigentayo a naimbag no kasano a napataud ti gastos iti Nakristianuan a ministerio ni Pablo ken dagiti kaduana. Iti ania a pamay-an a naiduma dayta manipud kadagiti sabsabali idi kaaldawanna?

Dagiti Agdaldaliasat a Manangaskasaba idi Umuna a Siglo

Kas maysa nga agdaldaliasat a manangaskasaba, saan a karkarna ni Pablo. Idi kaaldawanna adu dagiti nagdaliasat tapno itandudoda dagiti relihiuso a kapanunotan ken pilosopiada. Saritaen ti mannurat ti Biblia a ni Lucas ti “sumagmamano kadagiti Judio a baglan a mamagpagna.” (Aramid 19:13) Idi kinondenar ni Jesu-Kristo dagiti Fariseo, innayonna: “Lawlawenyo ti baybay ken daga tapno makaalakayo iti maysa a sumurot kadakayo.” (Mateo 23:15) Ni Jesus mismo ket maysa nga agdaldaliasat a ministro. Sinanayna dagiti apostol ken dagiti adalanna a tuladenda babaen ti panangaskasaba saan laeng nga idiay Judea ken Samaria no di ket uray “iti kaungtuan a paset ti daga.”​—Aramid 1:8.

Bayat dagiti panagdaliasatda, makasabet no kua dagiti pasurot ni Jesus kadagiti di-Judio a manangaskasaba. Idiay Atenas, nakisuppiat ni Pablo kadagiti pilosopo nga Epicureo ken Estoico. (Aramid 17:18) Iti intero nga Imperio ti Roma, adda dagiti Cinico a nagusar kadagiti naaweng a sasao iti panangallukoyda. Inkarkarian dagiti managdaydayaw kada Isis ken Serapis dagiti babbai ken tagabo iti relihiuso ken sosial a pannnakipada kadagiti nawaya a lallaki. Dagiti fertility cults iti dumaya ti nangrugian ti adu a misterioso a relihion iti Greco-Romano a lubong. Adut’ nagbalin a pasurot dagiti ulbod a didiosen a da Demeter, Dionysus, ken Cybele gapu iti kari a pannakapakawan ti basol ken tarigagay a makiraman kadagiti nadiosan a palimed.

Kasano a Napaadda dagiti Gastos?

Nupay kasta, dakkel ti magastos iti panagdaliasat. Malaksid kadagiti buis iti bagahe, ken gastos iti panaglayag, kasapulan dagiti agdaldaliasat ti taraon, pagdagusan, sungrod, kawes, ken pangaywan iti salun-at. Napaadda dagiti manangaskasaba, mannursuro, pilosopo, ken mistiko dagitoy a kasapulan iti lima a kangrunaan a pamay-an. (1) Patangdananda no mangisuroda; (2) sumrekda kadagiti nanumo a trabaho ken panggedan; (3) patganda dagiti mangpadagus kadakuada ken awatenda dagiti boluntario a donasion; (4) agserbida kadagiti nabaknang a tattao, masansan kas mannursuro kadagiti annakda; ken (5) makilimosda. Tapno maisaganana ti bagina manipud kadagiti pammabalaw, nagpalimos pay ketdi ti nalatak nga agpalpalama a Cinico a ni Diogenes kadagiti awan biagna nga estatua.

Adda ammo ni Pablo a sumagmamano a manangaskasaba nga agkunkuna a Kristiano a ministro ngem, kas kadagiti dadduma a Griego a pilosopo, nakipagayamda kadagiti nabaknang ken ginundawayanda dagiti napanglaw. Tinubngarna ti kongregasion idiay Corinto, a kunana: “Anusanyo ti . . . siasinoman a mangibus ti adda kadakayo, siasinoman a manggundaway ti adda kadakayo.” (2 Corinto 11:20) Di pulos nanggundaway ni Jesu-Kristo, uray ni Pablo ken dagiti katrabahuanna. Ngem dagiti naagum a manangaskasaba idiay Corinto ket “sinan apostolda, managsiksikapda,” ken ministro ida ni Satanas.​—2 Corinto 11:13-15.

Binilin ni Jesus dagiti adalanna a saanda a patangdanan no mangisuroda. “Inawatyo nga awan bayadna, itedyo nga awan bayadna,” imbalakadna. (Mateo 10:8) Nupay kadawyan ti panagpalimos, maum-umsi dayta kadagidi a tiempo. Iti maysa kadagiti pangngarigna, inladawan ni Jesus ti maysa a mayordomo a nangikuna, “Mabainak a makilimos.” (Lucas 16:3) Gapuna, awan pulos masarakantayo iti salaysay ti Biblia a nagdawat iti kuarta wenno kadagiti sanikua dagiti matalek a pasurot ni Jesus. Nagbiagda a maitunos iti prinsipio a: “No adda madi nga agtrabaho, di met koma mangan.”​—2 Tesalonica 3:10.

Pinaregta ni Jesus dagiti adalanna nga asikasuenda dagiti kasapulanda iti dua a pamay-an. Umuna, mabalinda, kas kinuna ni Pablo, nga “agbiag gapu iti naimbag a damag.” Kasano? Babaen ti panangpabus-oyda kadagiti sibubulos a mangsangaili kadakuada. (1 Corinto 9:14; Lucas 10:7) Maikadua, mabalinda a suportaran ti bagbagida.​—Lucas 22:36.

Dagiti Prinsipio nga Inyaplikar ni Pablo

Kasano nga inyaplikar ni Pablo dagiti nasao a prinsipio? Bueno, maipapan iti maikadua a panagdaliasat ti apostol kas misionero, insurat ni Lucas: “Naglayagkami manipud Troas ket nagtaruskami idiay Samotracia, ngem iti sumuno nga aldaw idiay Neapolis, ket manipud sadiay napankam idiay Filipos, nga isu ti kangrunaan a siudad iti distrito ti Macedonia. Naggiankam iti daytoy a siudad iti sumagmamano nga aldaw.” Isuda a mismo ti nakaammo iti magastosda iti panagdaliasat, taraon, ken pagdagusan.​—Aramid 16:11, 12.

Idi agangay, inawat ti maysa a babai a managan Lidia “dagiti bambanag a sasawen ni Pablo. Ket idi a nabautisaran agraman dagiti kabbalayna, dinawatna: ‘No impatoyo a mamatiak ken ni Jehova, sumrekkay iti balayko ket agdaguskayo.’ Ket impapilitna kadakami.” (Aramid 16:13-15) Nalabit, iti pasetna, gapu iti kinamanagpadagus ni Lidia, naisurat ni Pablo kadagiti kapammatianna idiay Filipos: “Agyamanak iti Diosko tunggal pannakalagipko kadakayo iti tunggal panangikararagko kadakayo amin, nga agdawdawatak a sirarag-o, gapu iti naitulongyo iti naimbag a damag nanipud idi immuna nga aldaw agingga ita.”​—Filipos 1:3-5.

Dakamaten ni Lucas ti sumagmamano nga indibidual a nangpasangbay kadagitoy agdaldaliasat a Kristiano a trabahador. (Aramid 16:33, 34; 17:7; 21:7, 8, 16; 28:2, 7, 10, 14) Kadagiti naipaltiing a suratna, binigbig ken pinagyamanan ni Pablo ti panangsangailida kenkuana ken dagiti sagut a naawatna. (Roma 16:23; 2 Corinto 11:9; Galacia 4:13, 14; Filipos 4:15-18) Kaskasdi, dina impaspasagid ken dagiti kaduana a rumbeng a maikkanda kadagiti sagut wenno pinansial a suporta. Maikuna dagiti Saksi ni Jehova a makita pay laeng daytoy nasayaat a kababalin kadagiti agdaldaliasat a manangaywanda.

Di Nagpaspasangaili Lattan

Di nagpaspasangaili lattan ni Pablo. Adda nasursurona a panggedan nga agkasapulan ti panagbannog ken adu nga oras ngem nababa ti matgedan. Idi simmangpet ti apostol idiay Corinto kas maysa a misionero, “nasarakanna ti maysa a Judio a managan Aquila . . . ken ni Priscila nga asawana. . . . Isu a napan kadakuada ket agsipud ta agpapadada iti pagsapulan nagdagus kadakuada, ket nagtrabahoda, ta umaaramidda kadagiti tolda.”​—Aramid 18:1-3.

Idi agangay, idiay Efeso, inggaed latta ni Pablo ti nagtrabaho. (Idiligyo ti Aramid 20:34; 1 Corinto 4:11, 12.) Mabalin a ti cilicium, ti nakersang, lalat ti kalding a material ti tolda a naggapu iti ilina ti paglainganna nga aramiden. Darepdepenyo ni Pablo a nakatugaw iti bassit a bangko, nakarukob iti lamisaan a pagtartrabahuanna, nga agpuypuyat a mangtabtabas ken agdadait. Yantangay nalabit saan a naariwawa ti pagaramidan, isu a makapagsasaritada bayat ti trabaho, mabalin a naaddaan ni Pablo iti gundaway a nangasaba iti akinkukua iti pagaramidan, kadagiti empleado, adipen, gumatgatang, ken gagayyem.​—Idiligyo ti 1 Tesalonica 2:9.

Saan nga inkomersio ni misionero a Pablo ti ministeriona wenno pinagparang nga us-usarenna ti Sao ti Dios kas panguartaan. Kinunana kadagiti taga Tesalonica: “Dakayo mismo ammoyo no kasano ti rebbengyo a panangtulad kadakami, ta dikami nagna iti nakulkol iti tengngayo ket dikami met kinnan ti taraon ti siasinoman a tao nga awan bayadna. No di ket nagtrabahokami a nagbannog ken binuyog ti narigat a panagtrabaho, iti rabii ken aldaw, tapno dikami agbalin a pakadagsenan iti siasinoman kadakayo. Saan a gapu ta awan ti kalinteganmi, no di ket tapno agbalinkami nga ulidan kadakayo tapno tumuladkayo kadakami.”​—2 Tesalonica 3:7-9.

Maikaduapulo-Siglo a Tumutulad

Agpapan ita sursuroten dagiti Saksi ni Jehova ti nasayaat nga ulidan ni Pablo. Saan nga agpapasueldo wenno patpatangdanan dagiti panglakayen ken ministerial nga adipen kadagiti kongregasion a pagserbianda. Imbes ketdi supsuportaranda dagiti pamiliada a kas kadagiti dadduma, a kaaduan kadakuada ti addaan pagsapulan. Supsuportaran met dagiti amin-tiempo a payunir a ministro ti bagbagida, nga adu ti agtartrabaho tapno mapaadda dagiti kangrunaan a kasapulanda. Tunggal tawen adda dagiti Saksi nga agdaliasat iti bukodda a gastos tapno mangasaba kadagiti adayo a lugar a manmano a madanon ti naimbag a damag. No awisen ida dagiti lokal a pamilia a makipangan wenno agdagus, apresiarenda daytoy ngem saanda a ruamen.

Amin a panangasaba ken panangisuro nga ar-aramiden dagiti Saksi ni Jehova ket boluntario, ken saanda pulos nga agpabpabayad iti ministerioda. Nupay kasta, maawat ken maipatulod dagiti nanumo a donasion para iti sangalubongan a trabahoda a panangasaba iti Watch Tower Society maipaay iti dayta a panggep. (Mateo 24:14) Saan pulos a komersial ti ministerio dagiti Saksi. Kas ken Pablo sipupudno a maikuna ti tunggal maysa kadakuada: “Siraragsak nga inkaskasabak kadakayo ti naimbag a damag ti Dios nga awan bayadna.” (2 Corinto 11:7) Dagiti Saksi ni Jehova saanda nga “aglaklako iti sao ti Dios.”

[Kahon iti panid 27]

NO KASANO TI ITUTULONG TI DADDUMA ITI TRABAHO A PANANGASABA TI PAGARIAN

◻ KONTRIBUSION ITI SANGALUBONGAN A TRABAHO: Adu ti mangilasin wenno mangibadyet ti kantidad nga itinnagda kadagiti kahon ti kontribusion a nasuratan ti: “Kontribusion para iti Sangalubongan a Trabaho ti Sosiedad​—Mateo 24:14.” Binulan nga ipatulod dagiti kongregasion dagitoy a kantidad iti sangalubongan a hedkuarter idiay Brooklyn, Nueva York, wenno iti kaasitgan a sanga nga opisina.

◻ SAGSAGUT: Mabalin nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, Inc., P. O. Box 2044, 1099 Manila, wenno iti lokal a sanga nga opisina ti Sosiedad. Mabalin met nga idonar dagiti alahas wenno dadduma pay a sanikua. Masapul a mapakuyogan dagitoy a kontribusion iti ababa a surat a mangibagbaga a dayta ket maysa a direkta a sagut.

◻ KONDISIONAL A DONASION NGA URNOS: Mabalin nga italek ti kuarta iti Watch Tower Society agingga iti ipapatay ti nangidonar, iti kondision a no rumsua ti personal a pakasapulan, maisubli dayta iti nangidonar.

◻ SEGURO: Mabalin a ti Watch Tower Society ti mapanaganan kas benepisario ti life insurance policy wenno ti retirement/pension plan. Rumbeng a mapakaammuan ti Sosiedad maipapan iti kasta nga urnos.

◻ DEPOSITO ITI BANKO: Mabalin nga italek wenno payable on death iti Watch Tower Society dagiti deposito iti banko, certificate of deposits, wenno individual retirement accounts, maitunos kadagiti alagaden ti lokal a banko. Rumbeng a mapakaammuan ti Sosiedad maipapan iti kasta nga urnos.

◻ STOCKS KEN BONDS: Mabalin nga idonar dagiti stocks ken bonds iti Watch Tower Society kas maysa a direkta a sagut wenno babaen ti maysa nga urnos a ti masapulan ket agtultuloy a maited iti nangidonar.

◻ REAL ESTATE: Mabalin nga idonar iti Watch Tower Society ti mailako a real estate babaen ti panangaramid iti direkta a sagut wenno babaen ti panangireserba ti life estate iti nangidonar, a makapagtultuloy nga agnaed sadiay bayat a sibibiag. Masapul a makiuman ti maysa iti Sosiedad sakbay ti legal a panangiyallatiw kadagiti papeles ti aniaman a real estate iti Sosiedad.

◻ TESTAMENTO KEN TALEK: Mabalin nga ipatawid ti sanikua wenno kuarta iti Watch Tower Bible and Tract Society of Pennsylvania babaen ti legal pannakapatalgedna a testamento, wenno iti Sosiedad a mabalin a mapanaganan kas benepisario ti maysa a trust agreement. Mabalin nga adda bentahana iti buis no maysa a relihiuso nga organisasion ti benepisario ti talek. Rumbeng a mapatulodan ti Sosiedad iti kopia ti testamento wenno trust agreement.

Para iti kanayonan nga impormasion maipapan kadagita a banag, agsuratkayo iti Watch Tower Bible and Tract Society of the Philippines, Inc., P. O. Box 2044, 1099 Manila, wenno iti lokal a sanga nga opisina ti Sosiedad.

[Kahon iti panid 29]

KAYATNA TI TUMULONG

MAYSA nga estudiante ni 11-años a Tiffany idiay Baton Rouge, Louisiana, E.U.A. Itay nabiit, nagsurat daytoy agtutubo a Saksi ni Jehova iti salaysay iti tema nga “Edukasion iti America.” Kas resultana, naawat dagiti Saksi a dadakkelna daytoy a surat a naggapu iti prinsipal ti eskuelaan:

“Bayat ti lawas ti Edukasion iti America, maibasa iti intercom ti maysa a kangrunaan a salaysay para iti tunggal grado. Naragsakanak a nangibasa iti salaysay ni Tiffany itay agsapa. Pudno a naidumduma a balasitang. Natimbeng, adda talekna iti bagina, nasaririt, ken nadayaw. Manmano a nakakitaak iti sixth grader nga addaan kadagitoy a galad. Pakairanudan ti eskuelaanmi ni Tiffany.”

Inabak ni Tiffany ti umuna a puesto iti salip iti panagsurat ti salaysay. Kalpasanna nagsurat iti Watch Tower Society ket kinunana: “Mabalin a diak koma nangabak no saan a gapu iti publikasion a Dagiti Saludsod nga Iyimtuod ti Agtutubo​—Dagiti Sungbat nga Epektibo. . . . Inusarko dagiti kapitulo maipapan iti edukasion. . . . Agyamanak unay kadakayo gapu iti panangipablaakyo itoy makatulong ken makaallukoy a libro. Pito a doliar ti premiok iti panangabakko iti salaysay. Itulongko daytoy pito a doliar ken 13 pay, nga agdagup iti 20 a doliar iti sangalubongan a trabaho a panagasaba. . . . No dumakkelak, namnamaek met ti agserbi kas boluntario iti Bethel.”

[Ladawan iti panid 26]

No dadduma, teggeden ni Pablo ti pagbiagna babaen ti panangaramid kadagiti tolda