Ania ti Maibanagtayo Bayat Daytoy a Tawen ti Serbisio?
1 Bayat a sumrektayo iti 1994 a tawen ti serbisio, maitutop itan a tiempo kadatayo amin a tattao ni Jehova nga ipasdek a sibabatad iti panunottayo no aniada ti kayattayo a maibanag kas indibidual ken kas maysa nga organisasion bayat daytoy a tawen ti serbisio.
2 Rumang-aykayo iti Espiritual: No agdadamotayo a naitimpuyog iti kinapudno, masapul a kayattayo ti bumileg iti pammati. (Heb. 6:1-3) No napigsatayon iti espiritual, saan laeng a tulongan dagiti agdadamo ken sabsabali ngem masapul nga ipaaytayo met ti asikaso iti bukodtayo nga espiritualidad, a ditay riknaen nga ammotayo aminen dagiti nasken a pannakaammo ti Biblia ken kapadasan iti Kristiano a panagbiag. Us-usigentayo met laeng ti inaldaw a teksto, makidangdanggay iti programa ti panagbasa ti Biblia a naituyang iti Theocratic Ministry School Schedule, ken agsagsagana a maipaay iti Panagadal ti Libro iti Kongregasion ken ti Panagadal iti Pagwanawanan? Kalalainganna a kalat dagitoy kadatayo. Agtultuloytayo a rumang-ay iti espiritual tapno makalasattayo iti pannakadadael daytoy dakes a sistema dagiti bambanag ken masalbar nga agturong idiay baro a lubong ti Dios.—Maidilig iti Filipos 3:12-16.
3 Agtalinaedkayo a Nadalus iti Espiritual: Tapno naan-anaytayo a maawat iti saklang ni Jehova, masapul a nadalustayo iti “tunggal kinarugit ti lasag ken espiritu.” (2 Cor. 7:1) Apaman a nadalustayon, apay a kayattayo manen ti ‘agtulid iti lugnak’ daytoy dakes a daan a lubong? (Maidilig iti 2 Pedro 2:22.) Masapul a determinadotayo nga agtalinaed a nabileg ken nadalus. Iti kasta saantayo nga ignorante kadagiti dakes a sikap ni Satanas ken saannatayo a magammatan, nga agtinnag iti basol ken maiyadayo iti pabor ni Jehova.—2 Cor. 2:11.
4 Ipangag ti Nainsiriban a Pammalakad: Itudo ti Proverbio 15:22: “Iti kaadu dagiti mamalakad adda magapuanan.” Laglagipenyo, nupay kasta, a daydiay tao a nangisao kadagitoy a sasao, ni Salomon, kamaudiananna impalubosna ‘dagiti assawana a namagduyos ti pusona a sumurot iti sabali a didios’ gapu ta natungday a nangipangag iti pammalakad ti Dios maipapan ti saan a panangala iti ganggannaet nga assawa. (1 Ar. 11:1-4) No ngarud ta ditay ipangag iti nainsiriban a balakad, kasanotayo a manamnama nga agbalintayo nga epektibo iti serbisio ni Jehova wenno makaited iti ehemplo a maikari a tuladen? (1 Tim. 4:15) Ti pammagbaga iti Biblia ti tumulong kadatayo a mangsaluad iti pusotayo. (Prov. 4:23) Ti panangayat iti daydiay ayaten ni Jehova, busoren daydiay kabusorna, kanayon a sapulen ti panangidalanna ken aramiden iti makay-ayo kenkuana sigurado daytoy a makasaluad.—Prov. 8:13; Juan 8:29; Heb. 1:9.
5 Ti panagdayawtayo ken Jehova ket saan laeng a maysa a porma iti nadiosan a debosion a kas kadagiti agkunkuna a Kristiano ditoy lubong, ngem maysa a napnuan espiritu, aktibo, ken nabiag a maitunos iti kinapudno a masarakan iti Sao ti Dios.—Juan 4:23, 24.
6 Ti pangngeddengtayo nga aramiden iti pagayatan ti Dios isut’ maysa a karit iti inaldaw. Masalaknibantayo babaen ti pannakaammo a ni Jehova iti mamapigsa kadatayo. (1 Ped. 5:9, 10) Iti kasta mabalintayo a maibanag a naan-anay ti ministeriotayo bayat iti 1994 a tawen ti serbisio.—2 Tim. 4:5.