Baro a Programa iti Asamblea ti Sirkito
1 Kas panagtulnog iti sasao ni Jesus iti Mateo 6:33, dagiti pudno a Kristiano ti kanayon a manguna iti Pagarian kadagiti biagda. Ngarud, “Itultuloyyo a Biruken nga Umuna iti Pagarian” isut’ maitutop a tema ti programa iti asamblea ti sirkito a mangrugi inton Pebrero, 1994.
2 Manipud ti rugi iti programa ilawlawagna ti kinapudno iti Pagarian, a maigunamgunam a daytoy ket maysa nga agan-andar a gobierno nga addaan ti masakopan, agtuturay, iturayan, ken paglintegan. Kinapudnona, adu a linteg iti natauan a gobierno ti nakagunggona iti kagimongan ita a naibasar ti Biblia. Manipud 1914 nakitatayo iti epekto ti gobierno iti Pagarian kadagiti pagturayanna, nga adda itan iti 229 a nagduduma a pagilian ditoy daga.
3 Mausig dagiti salaknib ken bendision a maaw-awattayo manipud iti pananguna ti Pagarian iti amin a benneg ti biagtayo. Maited dagiti makatulong a pammagbaga a mangipakita no kasano a maliklikan iti di kasapulan a panagdanag. Dagiti palawag, demostrasion, ken diskusion ti mangipakita no apay a nasken iti panangsalimetmet a simple ti mata.
4 Iti Sabado ti asamblea, dagiti maikari a kandidato iti bautismo ti makipaay iti publiko a deklarasion ti dedikasionda ken Jehova. Ket iti Domingo, amintayo ti mayat a presente a maipaay iti palawag ti publiko, a napauluan iti “No Ania ti Aramiden iti Pagarian ti Dios iti Sangatauan.”
5 Siguruenyo ti agplano a presente iti las-ud ti dua nga aldaw nga asamblea iti sirkito, ken awisenyo met dagidiay ad-adalanyo ti Biblia a tumabuno. Ti manangaywan iti sirkitoyo ti mangipakaammo kadakayo iti petsa daytoy inton umiso a tiempo. Ti programa iti asamblea, a danggayan iti nainkabsatan nga asosasion wenno panagkakadua, ti mangted iti pammarang-ay ken makapresko a pammaregta nga awan kadatayo ti agmayat a maikapis.