Panangawat, Panangalagad, ken Magunggonaan iti Sao ti Dios
1 Nupay minilion a tattao ti addaan iti kopia ti Biblia, kaaduan ti saan a mangalagad iti nasirib a balakadna, gapuna a bassit ti magunggonaan kenkuana. Agpapan kasta, patien dagiti tattao ni Jehova a daytoy ket makagunggona iti amin a bambanag. (2 Tim. 3:16, 17) Ngarud, ti tema iti programa ti asamblea iti sirkito nga agpaay ti 1993 isut’ “Panangawat, Panangalagad, ken Magunggonaan iti Sao ti Dios.”
2 Addanto dagiti palawag, demostrasion, kapadasan, ken panagpalutpot a mangparegta ken tumulong kadatayo a mangalagad iti Sao ti Dios a naan-anay iti amin a benneg ti biag. Ti programa iti malem ti Sabado isut’ pannakausig iti pammagbaga ken disiplina ti sirkulo iti pamilia maipapan ti pagliwliwaan, asosasion, ken materialismo. Ipakitana no kasano a masapul a naidumatayo iti daytoy lubong ken ditay koma maakaran ti dakes a kababalin ken naalas a pagsasaona. Mainayon pay, maited ti pammaregta a makagunggona kadagiti agwaywayas a nagannak ken dagiti ulila iti ama ken ina nga annak.
3 Iti met Sabado, dagiti baro a dedikado a tattao ti maaddaan iti oportunidad a mabautisaran. Dagiti agplano a mabautisaran ti masapul a mangipakaammo iti mangidaulo a manangaywan ti kongregasion iti kabiitan a tiempo tapno adda umdas a panawen a maiyurnos dagiti panglakayen ti pannakairepaso dagiti saludsod kadagiti kandidato iti bautismo.
4 Ti programa iti agsapa ti Domingo isut’ mangtingiting kadagiti wagas no kasano a naidumatayo iti daytoy a lubong babaen ti panangalagad iti Sao ti Dios. Ti importansia iti langatayo ken no kasano a maliklikan ti pannakarugit iti panunot isut’ mausig. Iti malem, ipalawag ti manangaywan iti distrito ti palawag iti publiko a napauluan ti “What Marks the Bible as Authentic.” Kayattayo a siguruen a maawis dagiti interesado a tattao iti daytoy a nagsayaat a programa.
5 Ti petsa ken lugar daytoy a programa iti asamblea ti sirkito isut’ ipaay iti manangaywan ti sirkitoyo, ket paregtaendakayo amin a tumabuno tapno umawat, mangalagad, ken magunggonaankayo iti pammagbaga ti Sao iti Dios.—Sant. 1:22-25.