Kasapulantayo ti Kongregasion
1 Inyebkas dagiti annak ni Core iti naminsan ti apresasionda iti kongregasion ni Jehova iti kastoy a wagas: “Ti maysa nga aldaw kadagiti paraanganmo nasaysayaat ngem ti sangaribu iti sabali a lugar.” (Sal. 84:10) Kadakuada, awan ti maipada a maitukon daytoy a lubong. No kasta ti riknayo, rebbeng ngarud a ti kongregasion ti pangipamaysaanyo iti biagyo.
2 Manipud rugina kanayon nga imparangarang ti Nakristianuan a kongregasion nga adda kenkuana ti bendision ni Jehova. (Ara. 16:4, 5) Awan koma kadatayo ti manglaglag-an iti kongregasion wenno mangipagarup a maysa laeng dayta a mamagtitipon kadatayo iti pisikal. Ti kongregasion ket isut’ sentro ti panggep kadagiti Saksi ni Jehova iti kada komunidad. Mangipaay iti nagkaykaysa nga asosasion tapno maisuronatayo ni Jehova ken maorganisartayo a maipaay iti trabaho ti Pagarian.—Isa. 2:2.
3 Ti Nakristianuan a kongregasion isut’ pamunganayan a kalasugan a maipaay iti pannakaisurotayo iti kinapudno. (1 Tim. 3:15) Masapul a dagiti pasurot ni Jesus ket “maymaysada koma amin”—a naikaykaysa iti Dios, ken Kristo, ken iti tunggal maysa. (Juan 17:20, 21; idilig iti Isaias 54:13.) Sadinoman a papanantayo ditoy lubong, mamati dagiti kakabsattayo iti sursuro ken prinsipio ti Biblia ket agtignayda a maitunos kadagitoy,
4 Nasanay ken nakabalantayo a mangtungpal iti annongentay nga agaramid ti ad-adalan. Kada bulan, Ti Pagwanawanan, Agriingkayo!, ken Ti Ministeriotayo iti Pagarian itukonda dagiti makatulong nga impormasion a mangbadang kadatayo a mangirugi iti Nainkasuratan a panagsasarita. Nadisenio dagiti gimong a mangipakita kadatayo no kasano a masarakan ken mapatanor ti interes. Patalgedan ti makitkitatayo a panagrang-ay iti sangalubongan nga addaantay iti nailangitan a pannarabay iti daytoy a trabaho.—Mat. 28:18-20.
5 Babaen ti kongregasion, awatentay ti inaldaw a pammabileg a ‘mangparegta kadatayo iti ayat ken naimbag nga ar-aramid.’ (Heb. 10:24, 25) Mapapigsatayo a simamatalek nga agibtur kadagiti pakasuotan. Tulongannatayo dagiti naayat a manangaywan a mangsaranget kadagiti pakarigatan ken pakaringgoran. (Ecl. 4:9-12) Maipaayantayo iti kasapulan a balakad no agpeggadtayo iti pannakayaw-awan. Adda pay kadi sabali nga organisasion a makaited iti kasta a naayat panangtaripato?—1 Tes. 5:14.
6 Pagayatan ni Jehova nga agtalinaedtayo a nasinged iti organisasionna tapno mataginayon ti panagkaykaysatayo. (Juan 10:16) Ti maysa a wagas a pangtulongan ti kongregasion kadatayo tapno mapagtalinaed ti kinaasidegtay iti klase matalek nga adipen isut’ panangibaonna kadagiti agbambaniaga a manangaywan a maipaay a pakaparegtaantayo. Ti panangipangagtay iti naayat a panangiwanwan ti mamagkaykaysa kadatayo iti kinasinged a tumulong a mangtaginayon kadatayo a nabileg iti naespirituan.
7 Nasken ti kongregasion iti naespirituan a pannakailasattayo. Imposible a maawat ti panagserbitayo ken Jehova no sumina iti dayta. Agtalinaedtay ngarud a nadekket iti aniaman nga ipaay ni Jehova. Sapay koma ta agtrabahotay a maitunos kadagiti kalatna ken sipupudno nga iyaplikar dagiti pammagbaga a magun-odan sadiay. Iti kastoy laeng a wagas a maipakitatayo no kasano ti kapateg ti kongregasion kadatayo.—Sal. 27:4.