Mapabileg Koma ti Kongregasion

“Ti kongregasion . . . simrek iti maysa a panawen ti talna, a mapabpabileg.”​—ARAMID 9:31.

1. Ania dagiti salsaludsod no maipapan iti “kongregasion ti Dios”?

IDI aldaw ti Pentecostes 33 K.P., pormal a binigbig ni Jehova ti maysa a grupo dagiti adalan ni Kristo kas maysa a baro a nasion, ti “Israel ti Dios.” (Galacia 6:16) Dagitoy a napulotan iti espiritu a Kristiano ket nagbalin met a “ti kongregasion ti Dios” kas pangawag ti Biblia. (1 Corinto 11:22) Ngem ania ti iraman dayta? Kasano a naorganisar “ti kongregasion ti Dios”? Ania ti akemna ditoy daga, iti sadinoman a pagnanaedan dagiti kamengna? Ken kasano nga apektaran dayta ti biag ken kinaragsaktayo?

2, 3. Kasano nga impasimudaag ni Jesus a rumbeng a maorganisar ti kongregasion?

² Kas nadakamat iti immuna nga artikulo, impakpakauna ni Jesus ti pannakabukel dayta a kongregasion dagiti napulotan a pasurotna, a kunkunana ken apostol Pedro: “Iti daytoy a dakkel a bato [ni Jesu-Kristo] bangonekto ti kongregasionko, ket dagiti ruangan ti Hades saandanto a maringbawan dayta.” (Mateo 16:18) Kanayonanna, bayat a kadua pay la idi ni Jesus dagiti apostolna, impakaammona no kasano ti pannakaorganisar ken no ania ti akem dayta a kongregasion nga asideg idin a maipasdek.

³ Insuro ni Jesus babaen ti sao ken aramid no kasano ti pannakaidaulo ti kongregasion. Mangidaulonto ti dadduma babaen ti panagserbida kadagiti sabsabali iti grupoda. Kinuna ni Jesus: “Ammoyo a dagidiay agparang a kasla a mangiturturay kadagiti nasion dominaranda ida ket dagiti naindaklanda aramatenda ti autoridad kadakuada. Saan a kastoy kadakayo; no di ket siasinoman a kayatna ti agbalin a naindaklan kadakayo masapul nga agserbi kadakayo, ket siasinoman a kayatna ti agbalin nga umuna kadakayo masapul nga agbalin nga adipen ti isuamin.” (Marcos 10:42-44) Nalawag ngarud a “ti kongregasion ti Dios” ket saan a basta dagiti nasinasina, agbukbukod nga indibidual, a kas iti kongregasion a di naorganisar. Imbes ketdi, naorganisar dayta, a dagiti kamengna ket makikomkomunikar iti maysa ken maysa ken makipagtartrabaho a sangsangkamaysa.

4, 5. Kasanotayo nga ammo a kasapulan ti kongregasion ti naespirituan a pannakaisuro?

⁴ Daydiay agbalin nga Ulo dayta a “kongregasion ti Dios” impasimudaagna a dagiti apostolna ken ti dadduma pay a nakasursuro kenkuana ti maaddaan kadagiti masinunuo nga annongen para iti dadduma iti kongregasion. Ania ti aramidenda? Ti napateg nga annongenda ket mangisuro kadagiti kameng ti kongregasion maipapan ken Jehova. Lagipenyo nga iti imatang ti dadduma kadagiti apostol, kastoy ti kinuna ni napagungar a Jesus kenni Pedro: “Simon nga anak ni Juan, ay-ayatennak kadi?” Insungbat ni Pedro: “Wen, Apo, ammom nga adda panagayatko kenka.” Kinuna ni Jesus kenkuana: “Pakanem dagiti korderok. . . . Ipastoram dagiti babassit a karnerok. . . . Pakanem dagiti babassit a karnerok.” (Juan 21:15-17) Anian a nagdakkel nga annongen dayta!

⁵ Maawatantayo iti kinuna ni Jesus a dagidiay maitimpuyog iti kongregasion ket nayarigda kadagiti karnero iti maysa nga arban. Dagita a karnero​—Kristiano a lallaki, babbai, ken ubbing​—ket nasken a mataraonan iti naespirituan ken siuumiso a maipastoran. Kanayonanna, yantangay ni Jesus binilinna dagiti amin a pasurotna nga isuroda ti sabsabali ken mangaramidda iti ad-adalan, siasinoman a kabbaro nga agbalin a karnerona ket nasken a masanay a mangitungpal iti dayta a bilin ti Dios.​—Mateo 28:19, 20.

6. Ania dagiti urnos a naaramid iti kabubuangay a “kongregasion ti Dios”?

⁶ Idi nabuangay “ti kongregasion ti Dios,” dagidiay mangbukel iti dayta ket regular a nagtataripnong tapno maisuroda ken makapagpipinnaregtada: “Intuloyda nga impamaysa ti bagbagida iti sursuro dagiti apostol ken iti panagririnnanud, kadagiti pannangan ken kadagiti panagkararag.” (Aramid 2:42, 46, 47) Ti sabali pay a nasayaat a detalye iti historikal a salaysay ket ti pannakadutok ti dadduma a kualipikado a lallaki tapno tumulong iti panangaywan iti masinunuo a praktikal a bambanag. Saanda a napili gapu iti kangato ti adalda wenno teknikal a paglainganda. Lallaki dagitoy a “napno iti espiritu ken sirib.” Ti maysa kadakuada ket ni Esteban, nga impaganetget ti salaysay kas “lalaki a napno iti pammati ken nasantuan nga espiritu.” Gapu iti dayta nga urnos iti kongregasion, “rimmangrang-ay ti sao ti Dios, ket ti bilang dagiti adalan nagtultuloy nga immadu iti kasta unay idiay Jerusalem; ket maysa a dakkel a bunggoy ti papadi ti nangrugi nga agtulnog iti pammati.”​—Aramid 6:1-7.

Lallaki nga Inusar ti Dios

7, 8. (a) Ania ti akem dagiti apostol ken dagiti lallakay iti Jerusalem idi panawen dagiti nagkauna a Kristiano? (b) Ania ti resultana idi maipaay ti instruksion babaen kadagiti kongregasion?

⁷ Nabatad a dagiti apostol ti nangidaulo kadagiti nagkauna a kongregasion, ngem saan la nga is-isuda. Naminsan, nagsubli da Pablo ken ti kakaduana iti Antioquia ti Siria. Isalaysay ti Aramid 14:27: “Idi nakagtengdan ket naurnongdan a sangsangkamaysa ti kongregasion, insalaysayda ti adu a bambanag nga inaramid ti Dios babaen kadakuada.” Idi addada pay laeng iti dayta a lokal a kongregasion, rimsua ti isyu maipapan iti panagkugit, no kasapulan a maipaalagad dayta kadagiti manamati a Gentil. Tapno marisut dayta, naibaon da Pablo ken Bernabe a mapan “kadagiti apostol ken lallakay idiay Jerusalem,” a nalawag a nagserbi kas bagi a manarawidwid.​—Aramid 15:1-3.

⁸ Ni Santiago, a kabsat ni Jesus iti ina ngem saan nga apostol, ti nangidaulo idi a “dagiti apostol ken dagiti lallakay naguurnongda a sangsangkamaysa tapno tamingenda daytoy a banag.” (Aramid 15:6) Kalpasan nga inusigda a naimbag ti bambanag ken babaen ti tulong ti nasantuan nga espiritu, nagdesisionda maitunos iti Kasuratan. Insuratda dayta ken impatulodda kadagiti lokal a kongregasion. (Aramid 15:22-32) Dayta a pakaammo ket inanamongan ken inyaplikar dagidiay immawat iti dayta. Ania ti resultana? Napabileg ken naparegta dagiti kakabsat. Kuna ti Biblia: “Gapuna, iti kinapudnona, dagiti kongregasion nagtultuloy a mapatibker iti pammati ken umadu iti bilang iti inaldaw-aldaw.”​—Aramid 16:5.

9. Ania ti imbalabala ti Biblia nga akem dagiti kualipikado a Kristiano a lallaki?

⁹ Ngem kasano ti regular a panagandar dagiti lokal a kongregasion? Usigentayo, kas pagarigan, dagiti kongregasion iti isla ti Creta. Nupay saan a nasayaat ti reputasion ti adu a tattao sadiay, dadduma ti nagbalbaliw ket nagbalinda a pudno a Kristiano. (Tito 1:10-12; 2:2, 3) Agnanaedda iti nagduduma a siudad, ket adayoda amin manipud iti bagi a manarawidwid idiay Jerusalem. Ngem saan a dakkel a parikut dayta, agsipud ta adda dagiti “lallakay” a nadutokan iti tunggal lokal a kongregasion idiay Creta, kas iti dadduma a lugar. Naragpat dagita a lallaki dagiti kualipikasion a nailanad iti Biblia. Nadutokanda a panglakayen, wenno manangaywan, a makabael a “mamagbaga babaen iti sursuro a makapasalun-at ken mangtubngar kadagidiay sumupiat.” (Tito 1:5-9; 1 Timoteo 3:1-7) Dadduma a naespirituan a lallaki ket kualipikado a tumulong kadagiti kongregasion kas ministerial nga adipen, wenno diakono.​—1 Timoteo 3:8-10, 12, 13.

¹⁰ Impasimudaag ni Jesus nga addanto ti kasta nga urnos. Lagipenyo ti salaysay iti Mateo 18:15-17, idi kinunana nga adda dagiti gundaway a mabalin a tumanor ti parikut iti nagbaetan ti dua nga adipen ti Dios. Mabalin a ti maysa ket makabasol maibusor iti sabali. Daydiay nasaktan ket umasideg iti nakabasol kenkuana tapno ‘idatagna ti basolna’ nga is-isuda laeng. No saan a marisut ti parikut babaen dayta nga addang, maayaban a tumulong ti maysa wenno dua a sabsabali pay a makaammo iti pasamak. Ngem kasano no di latta marisut? Kinuna ni Jesus: “No di dumngeg kadakuada, agsaoka iti kongregasion. No di dumngeg uray iti kongregasion, agbalin koman kenka a kas maysa a tao dagiti nasion ken kas maysa nga agsingsingir iti buis.” Idi sinao ni Jesus dagita, dagiti pay laeng Judio ti mangbukel iti “kongregasion ti Dios,” isu a dagiti imbagana ti agaplikar idi damo kadakuada.a Ngem idi naipasdek ti kongregasion Kristiano, ti bilinna ket agaplikaren iti kongregasion Kristiano. Dayta ti sabali pay a mangpaneknek a ti ili ti Dios ket maaddaan iti kongregasion a mangpabileg ken mangiwanwan iti tunggal Kristiano.

¹¹ Mayanatup unay a dagiti lallakay wenno manangaywan, ibagida ti lokal a kongregasion iti panangtaming wenno panangsolbar kadagiti parikut wenno iti panangasikaso kadagiti kaso a panagbasol. Maitunos dayta kadagiti kualipikasion dagiti panglakayen a nadakamat iti Tito 1:9. Siempre, dagiti lokal a panglakayen ket imperpektoda a lallaki, a kas kenni Tito, nga imbaon ni Pablo kadagiti kongregasion a ‘mangilinteg iti bambanag nga addaan pakapilawan.’ (Tito 1:4, 5) Iti kaaldawantayo, dagidiay mairekomenda kas panglakayen masapul a napaneknekanda ti pammati ken debosionda iti medio nabayag a tiempo. Iti kasta, adda rason dagiti kameng ti kongregasion nga agtalek iti panangiwanwan ken panangidaulo babaen dayta nga urnos.

¹² Kinuna ni Pablo kadagiti panglakayen iti kongregasion ti Efeso: “Asikasuenyo ti bagbagiyo ken ti isuamin nga arban, a kadakuada dinutokannakayo ti nasantuan nga espiritu kas manangaywan, tapno ipastoranyo ti kongregasion ti Dios, a ginatangna babaen ti dara ti bukodna nga Anak.” (Aramid 20:28) Umasping iti dayta, dagiti manangaywan iti kongregasion ita ket nadutokanda ‘tapno ipastoranda ti kongregasion ti Dios.’ Aramidenda dayta buyogen ti ayat, a saanda nga iturayan ti arban. (1 Pedro 5:2, 3) Dagiti manangaywan rumbeng nga ikagumaanda a pabilgen ken tulongan ti “isuamin nga arban.”

Panagtalinaed a Nasinged iti Kongregasion

¹³ Imperpekto dagiti panglakayen ken ti amin iti kongregasion, isu a pasaray tumaud dagiti di panagkikinnaawatan ken parikut, a kas met laeng idi umuna a siglo idi sibibiag pay laeng ti dadduma kadagiti apostol. (Filipos 4:2, 3) Ti maysa a manangaywan wenno sabali a manamati ket mabalin a makaibaga iti banag a kasla nagubsang, nasakit, wenno saan nga interamente a pudno. Wenno mabalin a mapanunottayo nga adda mapaspasamak a di nainkasuratan, ngem agparang a saan a korkorehiren dagiti lokal a panglakayen nupay ammoda dayta. Siempre, mabalin a nataming wenno matamtaming dayta a banag maitunos iti Kasuratan ken sigun iti lawag dagiti pasamak a ditay ammo. Ngem uray pay no agpayso nga adda mapaspasamak a di nainkasuratan, usigenyo daytoy: Maysa a nadagsen a basol ti saan idi a dagus a nataming iti kongregasion ti Corinto, maysa a kongregasion nga ipatpateg ni Jehova. Ngem kalpasan ti sumagmamano a tiempo, inyurnosna a mataming dayta, iti umiso ken natibker a pamay-an. (1 Corinto 5:1, 5, 9-11) Mabalin nga iyimtuodtayo iti bagbagitayo, ‘No nagbiagak idi idiay Corinto, ania ngata ti nagbalin a reaksionko iti dayta a situasion?’

¹⁴ Usigenyo ti sabali pay a posibilidad mainaig iti kongregasion. Kasano ngay no marigatan ti maysa a mangtarus ken mangawat iti maysa a pannursuro ti Kasuratan? Mabalin a nagsukimaten iti Biblia ken kadagiti publikasion a magun-odan iti kongregasion ken nagpatulong pay ketdin kadagiti nataengan a padana a Kristiano, ken uray kadagiti panglakayen. Kaskasdi, dina latta matarusan ken maawat ti panangilawlawag. Ania ti mabalinna nga aramiden? Umasping iti dayta ti napasamak agarup makatawen sakbay ti ipapatay ni Jesus. Kinunana nga isu “ti tinapay ti biag” ket tapno agbiag nga agnanayon ti maysa a tao, masapul a ‘mangan iti lasag ti Anak ti tao ken uminum iti darana.’ Dayta ti nakakigtotan ti dadduma kadagiti adalanna. Imbes nga ipailawlawagda wenno siaanus nga agurayda buyogen ti panagtalek, adu nga adalan ti ‘saanen a nakipagna ken Jesus.’ (Juan 6:35, 41-66) No addatayo manen idi sadiay, ania ngata ti inaramidtayo?

¹⁵ Iti moderno a panawen, dadduma ti nagsardengen a makitimpuyog iti lokal a kongregasion ta panagriknada ket makapagserbida iti Dios a bukbukodda. Mabalin nga ibagada a dayta ket maigapu iti pannakasairda, a saan ngamin a nakorehir ti maysa a basol, wenno saanda a maawat ti dadduma a pannursuro. Nainkalintegan kadi ti inaramidda? Nupay agpayso a tunggal Kristiano ket rumbeng a maaddaan iti personal a relasion iti Dios, ditay mailibak nga adda ti sangalubongan nga organisasion nga us-usarenna, kas idi kaaldawan dagiti apostol. Maysa pay, inusar ken binendisionan ni Jehova dagiti lokal a kongregasion idi umuna a siglo, nga inyurnosna ti pannakadutok dagiti kualipikado a panglakayen ken ministerial nga adipen a pakagunggonaan dagiti kongregasion. Kasta met ti ar-aramidenna iti kaaldawantayo.

¹⁶ No ipagarup ti maysa a Kristiano nga umdasen ti panagpannurayna iti Dios a dina kasapulan ti makitimpuyog, ilaklaksidna ti urnos ti Dios​—agpadpada ti sangalubongan a kongregasion ken dagiti lokal a kongregasion ti ili ti Dios. Ti maysa ket mabalin nga agbukbukod nga agdayaw iti Dios wenno makitimpuyog iti sumagmamano laeng, ngem ayannan ngay ti inyurnos ti Dios nga akem dagiti panglakayen ken ministerial nga adipen iti kongregasion? Makapainteres ta idi nagsurat ni Pablo iti kongregasion idiay Colosas ken imbilinna a maibasa met dayta a surat idiay Laodicea, dinakamatna ti panagbalin a ‘nairamut ken naibangon ken Kristo.’ Dagidiay naitimpuyog kadagiti kongregasion, saan a dagiti indibidual a naisina iti dayta, ti nagunggonaan.​—Colosas 2:6, 7; 4:16.

Adigi ken Sadiri ti Kinapudno

¹⁷ Iti umuna a suratna iti Kristiano a panglakayen a ni Timoteo, imbalabala ni apostol Pablo dagiti kualipikasion dagiti panglakayen wenno ministerial nga adipen kadagiti lokal a kongregasion. Kalpasan unay dayta, dinakamat ni Pablo “ti kongregasion ti sibibiag a Dios,” a kunkunana a dayta ket “maysa nga adigi ken sadiri ti kinapudno.” (1 Timoteo 3:15) Ti intero a kongregasion dagiti napulotan a Kristiano ket pudno unay a nagbalin a kasta nga adigi idi umuna a siglo. Ket nalawag a ti kangrunaan nga urnos tapno maawat dagiti indibidual a Kristiano ti kasta a kinapudno ket babaen ti pannakitimpuyogda iti lokal a kongregasion. Dita a mangngeganda a maisuro ken maikalintegan ti kinapudno tapno mapabilegda.

¹⁸ Umasping iti dayta, ti sangalubongan a kongregasion Kristiano ket sangakabbalayan ti Dios, “maysa nga adigi ken sadiri ti kinapudno.” Ti regular nga itatabuno ken pannakipasettayo kadagiti gimong iti lokal a kongregasiontayo ket maysa a kangrunaan a pamay-an tapno mapabileg ti relasiontayo iti Dios ken nakasaganatayo a mangaramid iti pagayatanna. Iti panagsuratna iti kongregasion idiay Corinto, inggunamgunam ni Pablo no ania ti rumbeng a maibagbaga kadagita a gimong. Insuratna a tarigagayanna a ti maibagbaga koma kadagiti gimongda ket nalawag ken maawatan tapno ‘mapabileg’ dagiti tumabtabuno. (1 Corinto 14:12, 17-19) Mapabilegtayo met ita no mabigbigtayo a ni Jehova a Dios ti nangibilin iti pannakaorganisar dagiti lokal a kongregasion ken isu ti mangsupsuporta iti dayta.

¹⁹ Wen, no tarigagayantayo ti mapabileg kas Kristiano, masapul nga agtalinaedtayo iti kongregasion. Nabayagen nga agserserbi dayta a baluarte maibusor kadagiti palso a sursuro, ken us-usaren dayta ti Dios tapno maipakaammo iti intero a lubong ti naimbag a damag ti Mesianiko a Pagarianna. Awan duadua a nagadun ti nagapuanan ti Dios babaen ti kongregasion Kristiano.​—Efeso 3:9, 10.

[Footnote]

Malagipyo Kadi?

• Apay a rumbeng a namnamaentayo a ti Dios us-usarenna dagiti kongregasion ditoy daga?

• Nupay imperpekto dagiti panglakayen, ania ti magapgapuananda para iti kongregasion?

• Kasanonakayo a pabpabilgen ti lokal a kongregasion?

10. Sigun iti Mateo 18:15-17, kasano a masolbar dagiti nadagsen a parikut?

11. Ania ti akem dagiti panglakayen iti panangsolbar kadagiti parikut?

12. Ania ti annongen dagiti panglakayen agpaay iti kongregasion?

13. No dadduma, ania ti mabalin a tumaud iti kongregasion, ken apay?

14, 15. Apay nga adda dagiti nagsardeng a sumurot kenni Jesus, ket ania ti maadaltayo iti dayta?

16. No marikna ti maysa a dinan kasapulan ti makitimpuyog iti kongregasion, ania ti rumbeng a panunotenna?

17. Ania ti ipakita ti 1 Timoteo 3:15 maipapan iti kongregasion?

18. Apay a napateg dagiti gimong iti kongregasion?

19. Apay a rumbeng nga ipategyo ti nakaitimpuyoganyo a kongregasion?

[Ladawan iti panid 26]

Dagiti apostol ken lallakay iti Jerusalem ket nagserbi kas bagi a manarawidwid

[Ladawan iti panid 28]

Masuruan dagiti panglakayen ken ministerial nga adipen tapno maitungpalda dagiti annongenda iti kongregasion