Bendituenyo ni Jehova “iti Agmalmalem”
1 Kinuna ni Ari David iti Salmo 145:2: “Iti agmalmalem bendituenkanto, ket idaydayawkonto ti naganmo iti tiempo a di nakedngan, uray iti agnanayon.” Kasano a matuladtayo ti ehemplo ni David a mangidayaw ken Jehova “iti agmalmalem”?
2 Punnuen ti Pusotayo iti Panangipateg ken Jehova: Ti regular a panagadal iti Sao ti Dios paunegenna ti panagyamantayo iti naaramidanen ken ti aramidento pay ni Jehova kadatayo. Bayat a dumakkel ti panangipategtayo, ulit-ulitentayo ti kinaimbagna. (Sal. 145:7) Sigagagartayo a mangidayaw ken Jehova iti kada aldaw.
3 Idayaw ni Jehova iti Inaldaw a Pannakisaotayo: No makisaotayo kadagiti kaarruba, kaeskuelaan, katrabahuan, ken dadduma pay a masabet iti inaldaw, makasaraktayo kadagiti gundaway a mangiranud iti namnamatayo kadakuada. Mabalin nga iyebkas ti kaarruba a maseknan maipapan ti krimen iti komunidad; mabalin a masikoran ti kaeskuelaan maipapan ti panangabuso iti droga wenno imoralidad; mabalin nga adda opinion ti katrabahuan maipapan iti sumagmamano a napolitikaan nga isyu. Mabalintayo nga isitar ti Sao ti Dios tapno maipakita ti umiso nga aramiden itan ken ti remedio iti kamaudiananna kadagitoy a problema. Mabalin a bendision no mayebkas dagita a sasao iti “umiso a tiempo!”—Prov. 15:23.
4 Agsaokayo Maipapan ken Jehova iti Amin-a-Tiempo: Ti tao a napasnek ti panangipategna ken Jehova kayatna nga iranud ti naimbag a damag iti adu a sabsabali agingga ti mabalin. (Sal. 40:8-10) Iti kasta isaludsodtay iti bagitayo: ‘Ar-aramidek aya ti amin kas ipalubos ti kasasaadko?’ Adu ti nakasarak a babaen laeng iti sumagmamano a panagbalbaliw, nabaelanda ti nagregular payunir. No saan nga ipalubos ti kasasaadtayo dayta, mabalintay kadi ti ag-auxiliary payunir? Idinto ta tiempo ti napalawa nga aktibidad ti panawen ti Memorial, nasayaat a gundaway a panag-auxiliary payunir dagiti bulan ti Marso, Abril, ken Mayo.
5 Tulongan Dagiti Agdadamo a Danggayandatayo a Mangbendito ken Jehova: Kanayon nga ipalagip kadatayo ti rambak ti Memorial iti ipapatay ni Jesus dagiti rason tapno bendituen ni Jehova. Nasayaat dayta a tiempo a mangparegta kadagiti estudiantetayo ti Biblia a danggayandatayo nga agsao iti publiko maipapan ti kinaari ni Jehova. Gutugoten ida a mangirimat iti naisao idiay parapo 7-9 iti pinanid 173-5 iti Pannakaammo a libro. No kualipikadoda, dida koma agkedked gapu laeng ta kurang pay ti kapadasanda. No maituredda ti mangasaba, makapagtalekda nga agpadpada a tulongan ida dagiti makabael nga agibumbunannag ken ni Jehova.—Ara. 4:31; 1 Tes. 2:2.
6 Maipaayantayo kadagiti agnanayon a pagimbagan ti bagbagitayo kasta met ti sabsabali no iwayaantay a bendituen ni Jehova iti agmalmalem.