Saludsod

◼ Ania ti maitutop nga usar dagiti termino a “brother” ken “sister”?

No usaren iti literal a kababagasna, agaplikar ti termino a “brother” ken “sister” kadagiti indibidual a pareho ti nagannakda. Masansan a mangparnuay daytoy nainkasigudan a relasion iti nabara a singgalut.

Insuronatayo ni Jesus nga awagan ni Jehova iti kararag a kas “Amami.” Kas Kristiano, iparipirip daytoy a pasettayo amin ti maysa a nasinged a pamilia. Dayta ti nagkunaan ni Jesus kadagiti pasurotna: “agkakabsatkayo amin.”—Mat. 6:9; 23:8.

Gapu iti nadekket a naespirituan a singgaluttayo iti sangakabbalayan ti Dios, agiinnawagtayo iti “Brother” ken “Sister,” nangruna kadagiti gimong ti kongregasion. Kadagitoy a gimong, ilasin ti mangidadaulo dagiti bautisado nga indibidual babaen ti panangusarna iti ebkas a “brother” wenno “sister” a sarunuen ti apelyedo ti tao.

No ngay kayat ti di bautisado a tao ti makipaset kadagiti gimong? No ti maysa a tao ket nabayag bassiten a makitimtimpuyog ken agturturongen iti dedikasion, nga ibilangnan ti bagina kas maysa a Saksi ni Jehova, awan pagdaksanna no awagan ti “Brother” wenno “Sister.” Nangruna a pudno daytoy no nagbalinen a di bautisado nga agibumbunannag ti indibidual.

Iti sabali a bangir, saan pay nga inrugi nga ipabigbig dagiti interesado a tattao a nabiit pay a makigimgimong ti bagida a paset ti sangakabbalayan ti Dios. Saan a maawagan dagitoy nga indibidual iti “Brother” wenno “Sister,” tangay awan pay kadakuada ti naespirituan a relasion iti pamilia ti Dios. Gapuna a kadagiti gimong, rebbeng a naporpormal ti awagtayo kadakuada, nga usaren ti mayanatup a titulo kas ti “Mr.” a maipakuyog iti apelyedoda.

Iparangarang ti panangusar iti ebkas a “brother” ken “sister” kadagiti gimongtayo ti singgalut a nadekdekket nga adayo ngem ti aniaman nga ipasimudaag ti panangusar iti nagan. Ipalagipna kadatayo ti nabendisionan unay a relasion a tagtagiragsakentayo kas naespirituan a pamilia iti sidong ti maysa nga Ama, ni Jehova a Dios.—Efe. 2:19; 1 Ped. 3:8.