Panangtulong ti Dadduma nga Agdayaw iti Dios

“Ngem no. . . sumrek ti maysa a di mamati wenno gangangay a tao, . . . dagiti palpalimed ti pusona maiparangarangda, ket iti kasta agrukbabto ket daydayawennanto ti Dios.”​—1 CORINTO 14:24, 25.

1-3. Kasano a natulongan dagiti adu idiay Corinto a makagun-od ti anamong ti Dios?

ITI maikadua a panagmisionerona, nagtaeng ni apostol Pablo idiay siudad ti Corinto iti maysa ket kagudua a tawen. Idiay “kareggetna unay ti mangaskasaba.” Aniat’ resultana? “Ket adu kadagiti taga Corinto ti nagdengngeg, namatida ken nabautisaranda.” (Aramid 18:5-11) Isuda ti “napagsanto. . . , naayaban nga agsanto.”​—1 Corinto 1:2.

² Iti kamaudiananna simmarungkar met ni Apolos idiay Corinto. Kasakbayanna, isu ti tinulongan da Priscila ken Aquila a nakaawat “a naan-anay pay ti dalan ti Dios,” agraman ti maipapan ti bautismo. Ngarud isut’ nagbalin a Kristiano nga addaan naimbag a nakem wenno anamong ti Dios. (Aramid 18:24–19:7) Ni Apolos, iti kasumbangirna, tinulonganna dagiti taga Corinto a naminsan ‘naipanda kadagiti ladladawan nga awan timekda.’ (1 Corinto 12:2) Nalabit dagitoy a tattao nasursuruanda ti Biblia kadagiti pagtaenganda; makaadalda met babaen iti itatabunoda kadagiti Nakristianuan a panaggigimong.​—Aramid 20:20; 1 Corinto 14:22-24.

³ Ti resulta ti kasta a panangisuro ket adu kadagiti dati a ‘di mamati ken gagangay a tattao’ ti naguyugoy iti pudno a panagdayaw. Anian a makapnek ti pannakakita kadagiti lallaki ken babbai a rumang-ay nga agturong iti bautismo ken anamong ti Dios! Kaskasdi a daytoy pay met laeng ti makapnek.

Panangtulong kadagiti ‘Di Mamati ken Gagangay a Tattao’

4. Kadagiti ania a pamay-an nga adu itatta ti matultulongan kas kadagidiay adda idiay Corinto?

⁴ Dagiti Saksi ni Jehova itatta pagtultulnoganda met ti bilin ni Jesus nga “agaramid ti ad-adalan iti amin a nasion, a bautisaran ida.” (Mateo 28:19, 20) Kalpasan ti panangimula kadagiti bin-i ti kinapudno kadagiti umawat a puspuso, agsublida ket sibugan dagitoy. (1 Corinto 3:5-9; Mateo 13:19, 23) Dagiti Saksi ti mangituktukon ti awan bayadna a linawas a panagadal ti Biblia kadagiti pagtaengan tapno masungbatan ti salsaludsod dagiti tattao ken makaadalda kadagiti kinapudno ti Biblia. Ti kakasta a tattao maaw-awisda met a tumabuno iti lokal a panaggigimong dagiti Saksi ni Jehova, kas met ti itatabuno “dagiti di mamati” idiay Corinto idi umuna a siglo. Ngem kasanot’ rebbeng a panangmatmat dagiti Saksi ni Jehova kadagiti tattao a makipagad-adal ti Biblia ken um-umay iti panaggigimong?

5. Ania a Nainkasuratan a pakaibatayan ti adda maipapan ti panagannad iti pannakilangen kadagiti dadduma nga indibidual?

⁵ Maragsakantayo a makakita kadakuada nga umad-adani iti Dios. Kaskasdi, ditay liplipatan a saanda pay a bautisado a manamati. Laglagipenyo met dagiti dua a leksion a naibatay iti napalabas nga artikulo. (1) Nangipakita dagiti Israelitas ti panagannad kadagiti ganggannaet a makipagili a, nupay addada iti aglawlaw ti ili ti Dios ken agtultulnog kadagiti dadduma a linlinteg, ket saanda pay a nakugit a proselita, kakabsat iti panagdaydayaw. (2) Dagiti Kristiano a taga Corinto a makilanglangen kadagiti ‘di mamati ken gagangay a tattao’ ket siaalertoda gapu iti sasao ni Pablo: “Saankay a makikaddua iti sangol kadagiti saan a mammati. Ta ania ti pakikadduaan ti kinalinteg iti kinakillo?”​—2 Corinto 6:14.

6. Kasano a dagiti “di mamati” ti “matubngar” babaen kadagiti gimgimong, ket aniat’ kasasaad dagita a panangtubngar?

⁶ Gapuna nupay abrasaentayo dagiti ‘di mammati ken gagangay a tattao,’ siaammotayo a saanda pay a naragpat dagiti pagannurotan ti Dios. Kas ti ipampamatmat ti Biblia idiay 1 Corinto 14:24, 25, dagiti kakasta ti masapul a “nasinged a masukimat,” ken uray pay “matubngar,” babaen iti inda maad-adal. Ti kasta a pannakatubngar ket saan a daydiay pannakaukom; saanda a maipasango iti hudisial a komite ti kongregasion agsipud ta saanda pay met nabautisaran a kameng dayta. Imbes ketdi, kas resulta ti inda maad-adal, dagitoy a kabbaro makumbinsirda a ti Dios kondenarenna ti aniaman a naagum ken imoral nga ar-aramid.

7. Ania a kanayonan a panagrang-ay ti tarigagayan koma nga aramiden dagiti adu a maisursuro ken apay?

⁷ Adu kadagiti di pay bautisado inton agangay kayatdanto metten ti ad-adda pay ngem ti basta itatabuno laeng ti gimgimong kas interesado nga agad-adal. Dagitoy a sasao ni Jesus ti mangipakita no apay: “Ti adalan saan a natantan-ok ngem ti mannursuro kenkuana, ngem ti tunggal adalan nga awan pagkuranganna umaspingto iti mannursurona.” (Lucas 6:40) Ti estudiante ti Biblia makitananto a ti mannursurona matmatmatanna ti ministerio iti tay-ak kas nasken ken magunggun-odannat’ ragsak iti dayta. (Mateo 24:14) Gapuna, babaen iti dumakdakkel a pammati, daydiay agad-adal kadagiti kinapudno ti Biblia ken makigimgimongen ipapusonanto metten dagiti sasao a: “Naglibnosen kadagidiay bambantay dagiti saksaka ti mangyeg kadagiti naimbag a damdamag, a mangiwaragawag iti talna, a mangyeg kadagiti naimbag a damdamag ti kinaimbag, a mangiwaragawag iti pannakaisalakan.” (Isaias 52:7; Roma 10:13-15) Nupay saan pay a nabautisaran, mabalin a kayatnan ti agbalin a manangibunannag ti Pagarian nga ibilang ti baginan iti kongregasion dagiti Saksi ni Jehova.

8, 9. (a) Aniat’ rebbeng nga aramiden no ti maysa nga estudiante ti Biblia kayatnan ti makiraman iti ministerio ti publiko? (b) No ti dua a panglakayen makisarita iti maysa a manamnama nga agibumbunannag ken ti mannursurona, aniat’ aramidenda? (c) Ania a responsabilidad ti ibakbaklay ti baro nga agibumbunannag?

⁸ No ti Saksi a mangidadaulo ti panagadal ti Biblia maammuanna a ti estudiante tarigagayanna ti makiraman iti tay-ak ti serbisio, mabalinna a pakisaritaan daytoy iti mangidadaulo a manangaywan, a mangiyurnos met kadagiti dua a panglakayen a makisango iti estudiante ti Biblia ken ti mannursurona. Maragsakan dagiti panglakayen no adda maysa a baro a tarigagayanna ti agserbi iti Dios. Saanda a manginanama nga isut’ addaan ti rukod ti pannakaammo nga ik-ikutan dagidiay nabautisaranen ken immadelantaren iti kinapudno, nga ad-adu ti makalikaguman kadakuada. Kaskasdi, kayat a makita dagiti panglakayen a sakbay a ti kabbaro ket makiraman iti tay-ak ti ministerio kadua ti kongregasion, isut’ addaanen ti pannakaammo kadagiti sursuro ti Biblia ken intunosnan ti biagna kadagiti prinsipio ti Dios. Gapuna agpaay kadagiti naimbag a rason a dua a panglakayen ti makisango iti manamnama nga agibumbunannag ken iti Saksi a mangidadaulo iti panagadal.a

⁹ Pakaammuan dagiti dua a panglakayen ti estudiante nga inton makakualipikaren ken makiramanen iti tay-ak ti serbisio, mabalinnanto ti mangted ti report ti tay-ak ti serbisio ket maysa a Congregation’s Publisher Record card ti maaramidto iti naganna. Daytoy ti mangidemostra ti pannakitiponna a kadua iti teokratiko nga organisasion dagiti Saksi ni Jehova ken ti panagpasakopna iti dayta. (Pudno met daytoy kadagiti amin a dadduma a mangiyaw-awat ti report iti tay-ak ti serbisio.) Ti diskusion rebbeng a saklawenna met ti balakad ti Biblia, kas naibalabala iti panid 98 ken 99 ti Organisado a Mangitungpal ti Ministeriotayo.b Gapuna, maiyanatup met a tiempo daytoy para iti estudiante a mangalan ti personal a kopiana iti dayta a libro.

10. (a) Kasano a makapagtultuloy a rumang-ay ti di bautisado nga agibumbunannag, ken aniat’ kalatna? (b) Apay a maar-aramid ti panagbalbaliw maipapan iti termino nga “approved associate” wenno “naanamonganen a naitimpuyog”? (Kitaenyo ti footnote.)

¹⁰ Ti tao a nakakualipikaren kas di bautisado nga agibumbunannag ti naimbag a damag ket nagturongen iti direksion nga agbalin a ‘tao nga addaan naimbag a nakem.’c (Lucas 2:14) Nupay isut’ di pay dedikado ken bautisado, itan mabalinnan nga ireport ti trabahona a panangaskasaba a kadua dagiti minilmilion a dadduma pay nga aktibo iti intero a lubong a “mangipabpablaak ti sao ti Dios.” (Aramid 13:5; 17:3; 26:22, 23) Maysa nga anunsio nga isut’ maysan a baro a di bautisado nga agibumbunannag ti mabalin nga aramiden iti kongregasion. Isut’ rebbeng a mangitultuloy ti panagadalna ti Biblia, makiraman iti pannakigimong, iyaplikar ti adda a maad-adalna, ken iranud dayta kadagiti dadduma. Di agbayag, mabalin a kayatnanto metten nga alaen ti addang ti Nakristianuan a bautismo, iti kasta agbalin nga inanamongan ti Dios ken ‘tinandaan’ a maipaay iti pannakaisalakan.​—Ezequiel 9:4-6.

Tulong iti Maysa a Nagbiddut

11. Kasanot’ panangsango ti kongregasion kadagiti nabautisaranen a nakabasol?

¹¹ Iti napalabas nga artikulo, sinalaysaytayo dagiti probision ti kongregasion a mangtulong ti asinoman a bautisado a Kristiano a makabasol ti nadagsen. (Hebreo 12:9-13) Ken nakitatayo manipud iti Biblia a no ti maysa a bautisado a nakabasol ket saan nga agbabawi, mabalin a kasapulan nga isut’ ilaksid ti kongregasion ket manipud iti dayta liklikan ti aniaman a pannakikadkadua kenkuana. (1 Corinto 5:11-13; 2 Juan 9-11; 2 Tesalonica 2:11, 12) Ngem, ania dagiti addang, a mabalin nga alaen no ti maysa a di bautisado nga agibumbunannag agbiddut wenno agbasol ti nadagsen unay?

12. (a) Apay nga adda met ti naasi a tulong para kadagiti di bautisado nga agibumbunannag a nagbasol? (b) Kasano a ti prinsipio idiay Lucas 12:48 mainaig iti panangsungbat iti panagbasol?

¹² Inggunamgunam ni Judas a mapakitaan ti asi dagiti napulotan a Kristiano nga addaan panagduadua wenno natnag iti basbasol ti lasag, la ketdi no agbabawida. (Judas 22, 23; kitaenyo met ti 2 Corinto 7:10.) Ngarud, saan aya nga ad-adda a maiyanatup a ti asi maipakita iti nagbiddut a di pay nabautisaran a tao a mangipakita ti panagbabawi? (Aramid 3:19) Wen, ta ti naespirituan a pundasionna ket saan pay a natibker, ken ti kapadasanna iti Nakristianuan a panagbiag ket limitado pay. Mabalin a saanna pay a naadal ti kapanunotan ti Dios iti dadduma a bambanag. Isut’ di pay naglasat iti agsasaruno a pannakisarita ti Biblia kadagiti panglakayen sakbay iti bautismo, ken isut’ saan pay nga immay iti sidong ti serioso nga addang ti pannakaitaneb iti danum. Mainayon pay, kuna ni Jesus a “ti uray siasino a nakaitedan ti adu, ad-addanto ti masingir kenkuana.” (Lucas 12:48) Gapuna, dakdakkel ti manamnama kadagidiay bautisadon a, kakuykuyog ti naparangayen a pannakaammo ken dagiti bendision, addaanda ti dakdakkel a susungbatan.​—Santiago 4:17; Lucas 15:1-7; 1 Corinto 13:11.

13. No agbiddut ti di bautisado nga agibumbunannag, aniat’ aramiden dagiti panglakayen a mangtulong?

¹³ Maitunos iti pammagbaga ni Pablo, tarigagayan dagiti kualipikado iti naespirituan a kakabsat a lallaki a tulongan ti asinoman a di bautisado nga agibumbunannag a nakabasol sakbay nga ammona dayta. (Idiligyo ti Galacia 6:1.) Mabalin a dawaten dagiti panglakayen ti dua iti bilangda (nalabit dagidiay immuna a nakipatang kenkuana) a padasen nga iturong a baliwan ti panunotna no kayatna ti patulongan. Aramidenda dayta, saan a gaput’ tarigagayda a mangtubngar a siinget, no di ket iti naasi a pamay-an ken espiritu ti kinaemma. (Salmo 130:3) Iti kaaduan a kaso, ti Nainkasuratan a pammagbaga ken dagiti praktikal a suhestion umdasen a mamataud ti panagbabawi ken mangikabil kenkuana iti umiso a dana.

14, 15. (a) Aniat’ mabalin nga aramiden no ti nakabasol ket pudpudno nga agbabbabawi? (b) Ania a limitado a makailawlawag a komento ti mabalin a maaramid kadagiti sumagmamano a kaso?

¹⁴ Dagiti dua a panglakayen ti mangted kadagiti maiyataday a panangiwanwan iti kasasaad ti nakabasol. Iti dadduma a kaso, mabalin nga iyurnosda nga iti sumagmamano a panawen daydiay nakabasol ti saan a makipaset iti Teokratiko nga Eskuelaan ti Panagministro wenno mapalubosan nga agkomento iti gimgimong. Wenno mabalin a bilinenda a di pay makiramraman iti ministerio ti publiko a kadua ti kongregasion agingga nga isut’ nakaaramid ti ad-adda pay nga irarang-ay iti naespirituan. Kalpasanna mabalin nga ibagadanto kenkuana a mabalinnanto manen ti makipaset iti ministerio ti tay-ak. No ti kinadakes ket saan a nangyeg ti pakaibabainan ken saan a mangiparang ti pagpeggadan iti kinadalus ti arban, saan a nesesitan a riingen ti kongregasion iti aniaman pay nga anunsio.

¹⁵ Ngem, kasanon, no naduktalan dagiti dua a panglakayen a ti tao ket pudpudno nga agbabbabawi, ngem ti kinadakes pagaammo unay ti kaaduanen? Wenno anian no ti kinadakes ti aglatakton iti kamaudiananna? Iti aniaman a kaso, mabalin a pakaammuanda ti Service Committee ti Kongregasion, a mangiyurnosto ti pannakaaramid ti simple nga anunsio, kas iti sumaganad: “Ti banag a nakairamanan ni. . . ti natamingen, ket isut’ makapagtultuloy nga agserbi kas di bautisado nga agibumbunannag a kadua ti kongregasion.” Kas kadagiti isuamin a kakasta a bambanag, determinaren ti bagi dagiti panglakayen no maiparbengto iti masanguanan a mangted ti Nainkasuratan a palawag nga addaan balakad maipapan iti nairaman a kinadakes.

16, 17. (a) Ania dagiti dua a situasion a mabalin pangibatayan iti nagduma nga anunsio? (b) Ania ti punto daytoy nga anunsio?

¹⁶ Sagpaminsan, ti di bautisado nga agibumbunannag a nakabasol ti di dumngeg iti naayat a tulong. Wenno mabalin a maikeddeng ti di bautisado nga agibumbunannag a saanna a kayat ti agtultuloy a rumang-ay iti bautismo, ket pakaammuanna dagiti panglakayen a dina kayat ti mabigbig kas maysa nga agibumbunannag. Ania ngay ita ti maaramidan? Saan a maala ti aksion a panangilaksid maipapan kadagiti kakasta a ti kinapudnona saanda pay a naanamongan iti Dios. Ti urnos a panangilaksid kadagiti awan panagbabawina a managdakdakes ket agaplikar kadagidiay ‘maaw-awagan a kakabsat,’ kadagidiay nabautisaranen. (1 Corinto 5:11) Ngem, kayat kadi a sawen daytoy, a saanen nga ikankano ti kinadakes? Saan.

¹⁷ Dagiti panglakayen responsableda a ‘mangipastor ti arban ti Dios nga adda iti panangaywanda.’ (1 Pedro 5:2) No dagiti dua a panglakayen a tumultulong naikeddengda a ti di bautisado a nakabasol ket awan panagbabawina ken saan a kualipikado kas agibumbunannag, pakaammuanda dayta nga indibidual.d Wenno no ti di bautisado ibagana kadagiti panglakayen a saannan a kayat ti mabigbig kas agibumbunannag, awatendanto ti desisionna. Iti aniaman kadagita a kaso, maiyanatup para iti Service Committee ti Kongregasion a maaddaan ti simple laeng nga anunsio iti maiyanatup a tiempo, a kunkunaen “. . . saanen nga agibumbunannag ti naimbag a damag.”

18. (a) Kalpasan ti kasta nga anunsio, aniat’ masapul a laglagipen dagiti Kristiano iti personal a panangikeddengda no kasanot’ panagtignayda? (b) Nasken kadi ti panangliklik nga interamente kadagidiay di bautisado a nakaaramid ti basol iti napalabas?

¹⁸ Kalpasan dayta kasanonto ti panangmatmat dagiti Saksi iti kasta a tao? Bueno, iti nasapsapa a tiempo isut’ maysa a ‘di mamati’ a tumabtabuno laeng ti panaggigimong. Kalpasanna agpadpada a tinarigagayanna ti agbalin ken nakakualipikar kas agibumbunannag ti naimbag a damag. Saanen a kastoy ti kaso ita, gapuna isut’ nagbalin manen a tao iti lubong. Ti Biblia saanna a kalkalikaguman a dagiti Saksi ti mangliklik ti pannakisasao kenkuana, ta isut’ saan met a nailaksid.e Kaskasdi, masapul nga agannad dagiti Kristiano maipapan iti kasta a tao ti lubong a di managdaydayaw ken Jehova, kas ti panangibilang dagiti Israelitas kadagiti di nakugit a ganggannaet a makipagili. Daytoy a panagannad ti makatulong a mangsalaknib ti kongregasion manipud aniaman a “bassit a lebadura,” wenno makadadael nga elemento. (1 Corinto 5:6) No iti masanguanan iyebkasna ti pudpudno a tarigagayna nga isut’ maiyadalan ti Biblia, ket agparang a kasla mabalin met daytoy kadagiti panglakayen, nalabit daytat’ makatulong kenkuana a mangapresiar manen nga anian a pribilehio gayam ti agdayaw ken Jehova a kadua ti ilina.​—Salmo 100.

19. Kasano a makaipaay dagiti panglakayen ti pribado a tulong iti sumagmamano a kaso?

¹⁹ No dagiti panglakayen makitada a ti maysa a kastoy ti klasena a tao ket pudno a peggad iti arban, mabalinda a pakdaaran a pribado dagidiay agpegpeggad. Kas pangarigan, mabalin a daydiay dati nga agibumbunannag ket maysa nga agtutubo a mammartek wenno imoral. Agpapan pay adda anunsio nga isut’ saanen a maysa a di bautisado nga agibumbunannag, kaskasdi a padpadasennanto pay met laeng ti makilanglangen kadagiti agtutubo iti kongregasion. Iti kasta a situasion, dagiti panglakayen ti makisao a pribado kadagiti nagannak dagidiay agpegpeggad, wenno mabalin met a kadagidiay agtutubo a mismo. (Hebreo 12:15, 16; Aramid 20:28-30) Iti natakkon a kaso a ti maysa a tao ket nagulo wenno naranggas, mabalin a maibaga kenkuana nga isut’ saan a maawaten kadagiti panaggigimong ket aniaman a panangpadasna a sumrek ti maibilang a trespassing.

Panangtulong kadagiti Menor nga Agdayaw iti Dios

20. Dagiti Kristiano a nagannak ti mangipapaay ti ania a tulong kadagiti annakda, ken ania ti resultana?

²⁰ Inted ti Biblia kadagiti nagannak ti responsabilidad a mangisuro kadagiti annakda iti dalan ti nadiosan a kinapudno. (Deuteronomio 6:4-9; 31:12, 13) Gapuna, nabayagen a parparegtaen dagiti Saksi ni Jehova dagiti Nakristianuan a pamilia a maaddaan ti linawas a panagadal ti Biblia. Dagiti nagannak a Kristiano rebbeng a paregtaenda dagiti annakda a rumang-ay agingga iti dedikasion ken bautismo ket iti kasta magun-odanda ti anamong ti Dios. (Proverbio 4:1-7) Makitkitatayo kadagiti kongregasion ti makaay-ayo a resulta​—ginasgasut a ribo dagiti mapagulidanan nga agtutubo nga agayat ken Jehova ken tarigagayanda ti agdayaw nga agnanayon kenkuana.

21-23. (a) Kangrunaanna, kasano a mataming ti panagbasol ti maysa a menor? (b) Ania a paset ti maaramidan dagiti panglakayen ti kongregasion iti kakasta a kasasaad?

²¹ Addaan met dagiti Kristiano a nagannak ti kangrunaan a responsabilidad a mangdisiplina ken mangtubngar ti annakda, nga ipaalagad ti aniaman a restriksion wenno naayat a pannusa a makitada a nasken. (Efeso 6:4; Hebreo 12:8, 9; Proverbio 3:11, 12; 22:15) Nupay kasta, no ti maysa a menor nga ubing a makitimtimpuyog kas di bautisado nga agibumbunannag mairaman iti serioso a kinadakes, daytat’ pakaseknan koma dagiti panglakayen a ‘mangigaggaga ti karkararua’ ti arban.​—Hebreo 13:17.

²² Kangrunaanna, ti kasta a panagbasol ti rebbeng a mataming kas immuna a naibalabalan iti daytoy nga artikulo. Dua a panglakayen ti mabalin a maituding a mangasikaso itoy a banag. Mabalinda, kas pangarigan, nga umuna a pakisaritaan dagiti nagannak (wenno naganak) no aniat’ napasamak, no aniat’ kababalin ti anakda, ken no ania a makakorehir a pamay-an ti mabalin nga alaen. (Idiligyo ti Deuteronomio 21:18-21.) No ti situasion ket addan a maas-asikason dagiti nagannak, dagiti panglakayen ti mabalin a sagpaminsan umuman kadakuada tapno mangitukon ti makatulong a balakad, suhestion, ken naayat a pammaregta.

²³ Nupay kasta, no maminsan, ti pannakipatang kadagiti nagannak ipakitana a nasaysayaat para kadagiti panglakayen a makipagkita iti nasukir nga anak ken kadagiti nagannak. Babaen ti pananglaglagip kadagiti limitasion ken pagannayasan dagiti agtutubo, pagreggetan koma dagiti manangaywan a sursuruan ti agtutubo, di bautisado nga agibumbunannag buyogen ti kinaemma. (2 Timoteo 2:22-26) Iti sumagmamano a kaso, mabalin a nalawag nga isut’ saanen a kualipikado nga agibumbunannag ket masapul a maaramid ti maiyanatup nga anunsio.

24. (a) Uray no ti maysa a menor nairaman iti serioso a kinadakes, aniat’ maiyanatup nga aramiden dagiti nagannak, ken kasanoda nga aramiden daytoy? (b) Kasano nga agaplikar daytoy iti maysa a menor a nailaksid?

²⁴ Manipud iti dayta, aniantot’ rebbeng nga aramiden dagiti nagannak maipaay iti nakabasol a menor nga anakda? Kaskasdi a responsableda iti anakda, nupay isut’ diskualipikado kas di bautisado nga agibumbunannag wenno uray no isut’ nailaksid gaput’ panagbasolna kalpasan ti pannakabautisarna. No kasanot’ panangitultuloyda a panangipaay kenkuana iti taraon, pagkawes, ken pagtaengan, kasapulan met ti panangisuro ken panangdisiplina kenkuana maitunos iti Sao ti Dios. (Proverbio 6:20-22; 29:17) Dagiti naayat a nagannak ngarud ti mangiyurnos nga isut’ maiyadalan ti Biblia, uray no isu ket nailaksid.f Nalabit isut’ makagun-od ti kadakkelan a makakorehir a gunggona manipud iti pannakipagad-adalda kenkuana nga agmaymaysa. Wenno mabalin a maikeddengda nga isut’ mabalinna ti agtultuloy a makiraman iti urnos a panagad-adal ti pamilia. Nupay simmiasi, kayatda nga isut’ agsubli ken Jehova, kas inaramid daydiay anak a naiyaw-awan iti pangngarig ni Jesus.​—Lucas 15:11-24.

25. Apay a maiturturong ti naayat nga interes ken tulong kadagiti “di mamati” itatta?

²⁵ Ti kalat ti panangaskasaba ken panangisursurotayo ket isut’ panangtulong kadagiti dadduma nga agbalin a naragsak a managdaydayaw iti pudno a Dios. Dagiti ‘di mamati ken gagangay a tattao’ idiay Corinto natignayda a ‘nagrukbab ken nagdaydayaw iti Dios,’ a kunkunada: “Ti Dios pudno nga adda iti nagtengngaanyo.”’ (1 Corinto 14:25) Anian a rag-o itatta ti pannakakita ti ad-adu a tattao nga umay agdaydayaw iti Dios! Daytoy ti nadayag a kaitungpalan ti pakaammo dagiti anghel: “Dayaw iti Dios idiay kangatuan, ken ditoy rabaw ti daga talna kadagiti tattao nga addaan naimbag a nakem [wenno, tattao nga addaan anamong ti Dios].”​—Lucas 2:14.

[Dagiti Footnote]

Malagipyo Pay Aya?

◻ Aniat’ panangmatmat dagiti Kristiano kadagiti “di mamati” a makigimgimongen?

◻ No ti maysa nga estudiante ti Biblia makiramanen iti tay-ak ti serbisio, ania nga addang ti rebbeng a suroten dagiti panglakayen, ket ania a responsabilidad ti aw-awaten ti estudiante?

◻ Aniat’ aramiden no ti di bautisado nga agibumbunannag makaaramid ti serioso a basol?

◻ Kasano a matulongan dagiti nagannak ken dagiti panglakayen ti menor nga annak nga aggigian iti pagtaenganda, uray no dagita nga agtutubo makabasolda ti nadagsen?

[Ladawan iti panid 16]

Ti panagbalin nga agibumbunannag, nupay di pay bautisado, ket maysa nga importante ken responsable nga addang iti pananggun-od ti anamong ti Dios