Pagtalinaedenyo a Natibker ti Panagtalekyo Agingga iti Panungpalan
ILADAWANYO ti bassit nga eroplano nga agtaytayab iti narikut a kasasaad ti panawen. Saanen a makita ti piloto dagiti pagilasinan iti daga. Nabungon kadagiti napuskol nga ulep. Dinan makita no ania ti adda iti sanguananna, nupay masiguradona a sitatalged a maturposna ti panagdaliasatna. Aniat’ makagapu iti panagtalekna?
Addaan kadagiti umiso nga instrumento a tumulong kenkuana nga agtayab a bumallasiw kadagiti ulep ken daga uray pay iti kasipngetan. Iti dalanna, nangruna iti asideg ti eropuerto, addada senial a silaw a mangiwanwan kenkuana babaen ti elektroniko, ken mabalinnat’ makikomunikar kadagiti tripolante ti eropuerto babaen ti radio.
Iti umasping a pamay-an, kabaelantay a sanguen ti masanguanan buyogen ti panagtalek, nupay sumipsipnget dagiti kasasaad iti lubong iti inaldaw. Mabalin a napapaut ngem iti ninamnama ti dadduma ti panagdaliasattayo iti daytoy dakes a sistema, ngem makapagtalektayo nga addatayo iti umiso a direksion ken tiempo. Apay a makasiguradotayo? Agsipud ta adda kadatayo ti giya a tumulong kadatayo a mangilasin iti di mailasin ti tao.
Ti Sao ti Dios maysa a ‘pagsilawan iti dalantayo,’ ken ‘manamnama, a pagsiribenna ti nanengneng.’ (Salmo 19:7; 119:105) Kas kadagiti senial a silaw a mangipakpakita iti dalan a suroten ti piloto, siuumiso nga ibalabala ti Biblia dagiti pasamak iti masanguanan ken ipaayannatayo kadagiti nabatad nga instruksion tapno masigurado a sitatalged a makadanontayo iti papanantayo. Nupay kasta, tapno magunggonaan iti nadibinuan a panangiwanwan, masapul nga agtalektayo iti dayta.
Iti suratna kadagiti Hebreo, indagadag ni Pablo kadagiti Kristiano a Judio nga ‘irutanda a sititibker ti panangpetpetda iti panagtalek nga adda kadakuada idi damo agingga iti panungpalan.’ (Hebreo 3:14) Kumapuy ti panagtalek no ti panangpetpettayo iti dayta ket saan a ‘nairut.’ Gapuna tumaud ti saludsod, Kasanotay a mapagtalinaed a natibker ti panagtalektayo ken Jehova agingga iti panungpalan?
Alagadenyo ti Pammatiyo
Sakbay a makapagtayab ti piloto babaen dagiti instrumento, a naan-anay a nakadepende kadagiti instrumento ken kadagiti tripolante iti eropuerto, kasapulanna ti umdas a panagsanay ken adu nga oras ti panagtayab. Kasta met, kasapulan ti Kristiano nga alagaden ti pammatina nga agtultuloy tapno mapagtalinaed ti panagtalekna iti panangiwanwan ni Jehova, nangruna no tumaud dagiti narikut a kasasaad. Nagsurat ni apostol Pablo: “Agsipud ta addaankami iti isu met laeng nga espiritu ti pammati a kas iti daydiay adda a naisurat: ‘Inalagadko ti pammati, gapuna nagsaoak,’ alagadenmi met ti pammati ket gapuna agsaokami.” (2 Corinto 4:13) Iti kasta, no agsaotayo maipapan iti naimbag a damag ti Dios, al-alagaden ken pabpabilgentayo ti pammatitayo.
Ni Magdalena, a nangbusbos iti uppat a tawen iti kampo konsentrasion idi maikadua a gubat sangalubongan, ilawlawagna ti kinapateg ti trabaho a panangasaba: “Insuro kaniak ni nanangko a tapno mapagtalinaed a natibker ti pammati, nasken a maseknantayo iti naespirituan a pagimbagan dagiti sabsabali. Malagipko ti maysa a pasamak a mangyilustrar no aniat’ nariknami. Kalpasan ti pannakawayawayami manipud kampo konsentrasion idiay Ravensbrück, nakagtengkami ken nanang iti pagtaenganmi iti aldaw ti Biernes. Dua nga aldaw kalpasanna, iti Domingo, nakiramankami kadagiti kakabsat iti panangasaba iti binalaybalay. Sititibker a mamatiak a no ipamaysatayo a tulongan dagiti sabsabali nga agtalek kadagiti kari ti Dios, ad-adda nga agbalin a pudno kadatayo dagidiay a kari.”—Idiligyo ti Aramid 5:42.
Ti panamagtalinaed a natibker ti panagtalektayo agingga iti panungpalan kalikagumanna ti naespirituan nga aramid iti dadduma pay a tay-ak. Ti personal a panagadal isut’ maysa pay a nagsayaat a panagwatwat a mangpabileg-pammati. No tuladentayo dagiti taga Berea ket sigagaget a sukimatentayo dagiti Kasuratan iti inaldaw, matulongantayo a “maaddaan iti naan-anay a pammasiguro iti namnama agingga iti panungpalan.” (Hebreo 6:11; Aramid 17:11) Pudno, kasapulan ti personal a panagadal ti tiempo ken determinasion. Nalabit, daytat’ makagapu no apay a binallaagan ni Pablo dagiti Hebreo maipapan iti peggad iti panagbalin a “nabuntog,” wenno nasadut, iti kakasta a banag.—Hebreo 6:12.
Mabalin nga adda dagiti nakalkaldaang a pagbanagan ti nasadut a kababalin iti adu a paset ti panagbiag. Kinuna ni Solomon nga “iti di panagtignay dagiti ima agtedted ti balay.” (Eclesiastes 10:18) Iti di agbayag wenno kamaudiananna mangrugi nga agtedted ti tudo iti atep a di naaywanan. No palubosantay a di agtignay ti imatayo iti naespirituan a pamay-an ken ditay taginayonen ti pammatitayo, mabalin a sumrek dagiti panagduadua. Iti sabali a bangir, mangpabileg ken mangsalaknib iti pammatitayo ti regular a panagmennamenna ken panagadal iti Sao ti Dios.—Salmo 1:2, 3.
Panangpabileg ti Panagtalek Babaen ti Kapadasan
Siempre, maammuan ti piloto a mapagtalkan dagiti instrumentona babaen ti kapadasan kasta met ti panagadal. Umasping iti dayta, dumakkel ti panagtalektayo ken Jehova no makitatay iti mismo a panagbiagtayo ti pammaneknek ti naayat a panangaywanna. Napadasan dayta ni Josue, ken impalagipna kadagiti padana nga Israelita: “Ammuenyo iti amin a pusoyo ken amin a kararuayo, nga awan ti uray maysa a nagkurang kadagiti amin a naimbag a ni Jehova a Diosyo insaona a maipanggep kadakayo. Isuda amin natungpalda kadakayo.”—Josue 23:14.
Umasping nga adal ti nasursuro ni Josefina, maysa a naasawaan a kabsat a babai iti Pilipinas. Ilawlawagna no ania a kita ti biag ti adda idi kenkuana sakbay a naammuanna ti kinapudno: “Mammartek idi ni lakayko, ket no mabarteken, makapungtot ken kabilennak. Naapektaran met ti anakmi a lalaki iti di naragsak a panagasawami. Agtartrabahokam a dua ken ni lakayko, a makateggedkami iti adu a kuarta, ngem maisugalmi ti gistay kaaduan a masapulanmi. Nagadu ti gagayyem ni lakayko, ngem kaaduan kadakuada ti makigayyem laeng kenkuana tapno isut’ agbayad kadagiti mainumda, ken pinadas pay ketdi ti dadduma a barteken tapno laeng pagkakatawaanda.
“Nagbalbaliw ti bambanag idi naam-ammomi ni Jehova ken impapusomi ti pammagbagana. Din agin-inum ni lakayko, insardengmin ti agsugal, ken addaankami kadagiti pudno a gagayyem a mangipatpateg ken tumultulong kadakami. Naragsak ti panagasawami, ken dumakdakkel a maysa a nasayaat a baro ti anakmi. Kinissayanmi ti oras a panagtrabahomi, ngem ad-adu ti kuartami. Kapadasan ti nangisuro kadakami a ni Jehova umasping iti maysa a naayat nga Ama, a kanayonnatay nga iturong iti umiso a direksion.”
Kas resulta dagiti instruksion babaen ti radio wenno panangsukimat iti instrumento, no dadduma mabigbig dagiti piloto a kasapulan a korehirenda ti direksionda. Mabalin a kasapulan met a baliwantayo ti direksiontayo sigun iti instruksion ni Jehova. “Dagiti lapayagmo makangngegdanto iti maysa a sao iti likudam a kunana: ‘Isu daytoy ti dalan, magnakayo kenkuana,’ intono agbaw-ingkayo iti makanawan, ken intono agbaw-ingkayo iti makatigid.” (Isaias 30:21) Babaen ti Saona ken ti organisasionna, umaw-awattayo iti balakad a mamakdaar kadatayo kadagiti naespirituan a peggad. Maysa kadagitoy ti maipanggep kadagiti pannakitimpuyog.
Maisiasinatayo Dagiti Pannakitimpuyog
Silalaka a maisiasi iti direksion ti bassit nga eroplano no di maaramid dagiti kasapulan a pannakakorehir. Kasta met, agtultuloy a mararaut dagiti Kristiano ita kadagiti impluensia iti ruar. Agbibiagtayo iti nainlasagan panagpampanunotna a lubong nga adut’ manguyaw kadagiti naespirituan a pagalagadan, nga ad-adda a maipatpateg ti kuarta ken ragragsak. Pinakdaaran ni Pablo ni Timoteo nga agbalin a “narigat a pakilangenan” dagiti maudi nga al-aldaw. (2 Timoteo 3:1-5) Dagiti tin-edyer, nga agtartarigagay iti pannakaanamong ken kinalatak, ti nangnangruna a nalaka a maimpluensiaan kadagiti dakes a pannakitimpuyog.—2 Timoteo 2:22.
Ilawlawag ni Amanda, nga agtawen iti 17: “Iti apagapaman kimmapuy bassit ti pammatik gapu kadagiti kaeskuelaak. Kanayonda nga ibagbaga a nainget ken di nainkalintegan ti relihionko, ket daytoy ti nangrugi a mangupay kaniak. Nupay kasta, tinulongandak dagiti dadakkelko a mangtarus a dagiti Nakristianuan a pagalagadan agserbi a salaknib imbes a manginget. Mautobko itan a tumulong kaniak dagitoy a prinsipio a maaddaan iti ad-adda a makapnek a biag ngem kadagiti dati a kakaduak iti eskuelaan. Nasursurok a pagtalkan dagidiay pudpudno a maseknan kaniak—dagiti dadakkelko ken ni Jehova—ken tagtagiragsakek ti panagserbi kas payunir.”
Ubingtay man wenno nataengan, makasaraktayo kadagiti tattao a mangumsi kadagiti patpatientayo. Agparang a masiribda, ngem iti Dios, nainlasaganda, di naespirituan. (1 Corinto 2:14) Ti maysa a nabileg a grupo idiay Corinto idi kaaldawan ni Pablo isuda dagiti nailubongan a masisirib a Managduadua. Dagiti sursuro dagitoy a pilosopo ti nalabit nangiturong iti sumagmamano a Kristiano a taga-Corinto a mapukaw ti pammatida iti namnama a panagungar. (1 Corinto 15:12) “Dikay paiyaw-awan,” impakdaar ni apostol Pablo. “Dagiti dakes a pannakitimpuyog dadaelenda dagiti makagunggona nga ug-ugali.”—1 Corinto 15:33.
Iti sabali a bangir, pabilgennatay iti naespirituan dagiti nasayaat a pannakitimpuyog. Iti uneg ti kongregasion Kristiano, adda gundawaytayo a makipulapol kadagiti tattao nga agbibiag buyogen ti pammati. Ni Norman, maysa a kabsat a lalaki a nakaammo ti kinapudno idi 1939, maysa pay laeng a gubuayan ti dakkel a pammaregta iti isuamin. Aniat’ namagtalinaed a nalawag iti naespirituan a panangmatmatna? “Napateg dagiti gimong ken ti nadekket a pannakigayyem kadagiti matalek a kakabsat,” kunana. “Daytoy a kita ti panagtitimpuyog tinulongannak a silalawag a mangkita ti pagdumaan ti organisasion ti Dios ken ni Satanas.”
Ti Makaallilaw a Pannakabalin ti Kinabaknang
Ilawlawag ni Brian, maysa a nasigo a piloto, a “no maminsan marigatan ti piloto a mamati kadagiti instrumentona—gapu laeng ta maisupadi dayta iti katutúbo a pagannayasanna. Adda dagiti addaan kapadasan a piloto ti militar a naammuan nga agtayab a pabaliktad ti eroplanoda gapu ta kasla bituen dagiti silaw iti daga—nupay saan a kasta ti ipakpakita kadakuada dagiti instrumentoda.”
Iti umasping a pamay-an, mayaw-awannatay dagiti managimbubukodan a katutúbo a pagannayasantayo iti naespirituan nga anag. Kinuna ni Jesus nga addaan “makaallilaw a pannakabalin” dagiti kinabaknang, ket namakdaar ni Pablo a ‘ti ayat iti kuarta inyaw-awanna ti adu manipud iti pammati.’—Marcos 4:19; 1 Timoteo 6:10.
Kas kadagiti makaallilaw a rumimatrimat a silaw, maiturongnatay dagiti materialistiko a kalat iti di umiso a direksion. Imbes nga agragsak iti “panangsegga kadagiti bambanag a namnamaen,” maisiasinatayo ti kinaparammag ti lubong nga aglablabasen. (Hebreo 11:1; 1 Juan 2:16, 17) No ‘determinadotayo’ a maaddaan iti naranga nga estilo ti panagbiag, nalabit a bassit laengen ti tiempotayo para iti naespirituan nga irarang-ay.—1 Timoteo 6:9; Mateo 6:24; Hebreo 13:5.
Inamin ti agkabannuag a naasawaan a lalaki nga agnagan Patrick nga insakripisioda ken ni baketna dagiti naespirituan a kalat tapno matagiragsakda ti nanamnam-ay a kasasaad ti panagbiag. Ilawlawagna: “Inimpluensiaannakami dagidiay adda iti kongregasion nga addaan nangingina a kotse ken nararanga a pagtaengan. Nupay pulos a saanmi a nalipatan ti namnama iti Pagarian, nariknami a mabalinmi met ti agbiag a nanam-ay. Ngem idi agangay, nabigbigmi a ti pudno a ragsak dumteng babaen ti panagserbi ken Jehova ken manipud iti irarang-ay iti naespirituan. Ita simple manen ti panagbiagmi. Kinissayanmi dagiti oras ti panagtrabahomi, ket nagregular pioneerkami.”
Agpannuray ti Pammati iti Manangipangag a Puso
Adda met napateg nga akem ti manangipangag a puso iti panangpatibker ti panagtalek ken Jehova. Pudno, “ti pammati isu ti sigurado a panangsegga kadagiti bambanag a namnamaen, ti nabatad a parangarang [wenno, “makakombinsir nga ebidensia,” footnote (iti Ingles)] dagiti kinapudno nupay saan a nakita.” (Hebreo 11:1) Ngem no saan a manangipangag ti pusotayo, adayo a makombinsirtayo. (Proverbio 18:15; Mateo 5:6) Iti daytoy a rason a kinuna ni apostol Pablo a ti “pammati saan nga ik-ikutan ti isuamin a tattao.”—2 Tesalonica 3:2.
No kasta, kasanotay a mapagtalinaed a manangipangag ti pusotayo kadagiti amin a makakombinsir nga ebidensia a magun-odan? Babaen ti panangsukay kadagiti nadiosan a galad, dagiti galad a mangparayray ken mangtukay ti pammati. Idagadag ni Pedro kadatayo nga ‘inayontayo iti pammatitayo ti naimbag a kababalin, pannakaammo, panagteppel, panagibtur, nadiosan a debosion, nainkabsatan a panagayat, ken ayat.’ (2 Pedro 1:5-7; Galacia 5:22, 23) Iti kasumbabangirna, no agbalintay a managimbubukodan wenno ipaay laeng ken Jehova ti sangkabassit a panagserbi, di nainkalintegan a manamnamatay a rumang-ay ti pammatitayo.
‘Insagana [ni Esdras] ti pusona’ a mangbasa iti Sao ni Jehova ken mangyaplikar iti dayta. (Esdras 7:10) Addaan met ni Mikias iti manangipangag a puso. “No maipapan kaniak, kumitaakto ken Jehova. Agpannurayakto iti Dios ti pakaisalakanak. Ti Dios denggennakto.”—Mikias 7:7.
Ni Magdalena, a nadakamat itay, siaanus met a naguray ken Jehova. (Habacuc 2:3) Kunana: “Addaantayon iti naespirituan a paraiso. Ti sumaganad, ti pisikal a Paraiso, asidegen a dumteng. Kabayatanna ginasut a ribu ti makikadkadua iti dakkel a bunggoy. Maragsakanak a makakita iti kasta a kaadu a tumiptipon iti organisasion ti Dios.”
Panangnamnama iti Dios ti Pannakaisalakantayo
Ti panamagtalinaed a natibker ti panagtalektayo agingga iti panungpalan kalikagumanna ti panangalagad ti pammatitayo ken siaannad a panagimdeng iti panangiwanwan a maaw-awattayo manipud ken Jehova ken iti organisasionna. Awan duadua a maikari ti panagregget. Napalaus ti ragsak ti piloto no kalpasan ti napaut, narikut a panagdaliasat, agdisson ket kamaudiananna nalusotanna dagiti napuskol nga ulep. Adda iti sanguananna ti daga—berde ken makaay-ayo. Adda iti baba ti runway ti eropuerto, nga agur-uray nga umawat kenkuana.
Maysa a makapagagar a kapadasan ti agur-uray met kadatayo. Iwayaanto daytoy nalidem, nadangkes a lubong ti maysa a baro a daga ti kinalinteg. Agur-uray kadatayo ti panangpasangbay ti Dios. Makadanontayto sadiay no ipangagtayo ti sasao ti salmista: “Sika ti inanamak, O Soberano nga Apo Jehova, pagtalkak manipud kinaubingko. . . . Kenka kankanayon ti panangidaydayawko.”—Salmo 71:5, 6.