Baro a Programa iti Asamblea Sirkito
1 Ti baro a programa iti asamblea sirkito a mangrugi iti Pebrero ilawlawagna ti tema a “Panangsagrap iti Dakdakkel a Kinaragsak iti Panangted.” (Ara. 20:35) Nadeskribir ti kinaragsak kas “maysa a kasasaad ti kinaimbag ken pannakapnek.” Apagkanito laeng a ragsak iti biag ti masarakan ti kaaduan a tattao ita. Kaskasdi, isuronatayo ni Jehova no kasano a magunggonaantayo iti agnanayon. (Isa. 48:17; 1 Juan 2:17) Igunamgunam ti baro a programa iti asamblea sirkito no kasanotay a magun-od ti dakdakkel a kinaragsak babaen ti panangted iti naespirituan a wagas.
2 Masursurotayo dagiti praktikal a wagas no kasanotay a maipaay ti bagbagitayo iti ministerio. Napauluan ti dadduma kadagiti palawag nga ipaay dagiti agdaldaliasat a manangaywan iti: “Pannakigayyem Babaen Kadagiti Nakillo a Kinabaknang,” “Raemenyo Dagiti ‘Sagut a Tattao’ nga Impaay ti Dios,” ken “Sagrapenyo ti Adu a Langa ti Pudno a Kinaragsak.” Dagidiay agngayangay nga agpabautisar iti asamblea makisaoda koma iti mamangulo a manangaywan tapno mayurnosna ti panangirepaso dagiti panglakayen kadakuada kadagiti saludsod a para kadagiti agpabautisar. Mangyeg iti dakkel a ragsak kadagiti kababautisar ti panagserbi ken Jehova a buyogen ti nadalus a relasion.
3 Mangyeg met iti pudno a kinaragsak ken kinatalged ti umiso a panangbigbig iti autoridad ni Jehova. Masapul a maammuan daytoy dagiti amin a tattao. Gapuna, ilawlawag ti palawag publiko iti asamblea sirkito ti tema a “Makikaykaysakayo iti Naragsak nga Ili ti Dios.” Siguraduenyo nga awisen dagiti amin nga interesado iti kinapudno nga umay iti daytoy a palawag. Saanda a masarakan ti napaypayso a kinatalged ken manayon a kinaragsak iti sidong ti natauan a turay. (Ecl. 8:9) Ngem anian a rag-o ti masarakanda iti pannakitimpuyogda iti naragsak nga ili ni Jehova!—Sal. 144:15b.
4 Iti laksid ti kumarkaro a kasasaad iti daytoy a sistema dagiti bambanag, saanto a pulos a paayen ti naragsak a Dios dagidiay makagun-od iti dakdakkel a kinaragsak iti panangted iti naespirituan a wagas. (1 Tim. 1:11) Ipakita ti baro a programa iti asamblea sirkito a pudno daytoy. Diyo liwliwayan!