Kasapulantay Kadi ti Biblia?
NARAGSAKAN ni Oxana, maysa a balasang a Ruso, a nakakita iti Biblia nga ituktukon ti aglaklako ti libro iti lansangan sadi Moscow. Ti kaduana, ni John, a naggapu iti pagilian a sadiay nalaka a magun-odan ti Biblia, ket nasdaaw iti napalalo a gagar ni Oxana. “Maysaak nga ateista, ngem ginatangko daydiay para kenkuana,” inamin ni John. Nupay nagkedked ni Oxana iti damo, inawatna met laeng ti sagut ni John.
Adu ti kas ken Oxana, nga agtarigagay unay a maaddaan iti Biblia. Nangnangruna a pudno daytoy kadagiti pagilian a sadiay adu a tawen a naiparit ti Biblia. Kas pangarigan, ikagkagumaan dagiti nangipablaak itoy a magasin a leplepan ti pannakasapul kadagiti Biblia kadagiti sigud a republika ti Soviet, kasta met iti dadduma pay a paset ti lubong. Iti damdamo unay, adu kadagitoy a lugar ti addaanen iti gundaway a mangaramid iti umiso a panangusig iti Biblia—ket nakaad-adu ti maallukoy iti nabileg a mensahena.
Dagiti Kritiko ken Managduadua
Iti sabali a bangir, aglalo iti makin-amianan nga Europa, adda laeng ti Biblia iti estante ti libro nga agur-urnong ti tapuk. “Natay a historia!” kuna dagiti dadduma, sada inayon, “Naisurat dayta para iti sabali a panawen. Awan pakainaigan dayta iti moderno a tao.” Uray dagiti nalatak a klero babbabalawenda ti Biblia iti publiko. Naipadamag iti The Star, maysa a diario iti Sud Africa, a kinuna ti maysa nga Anglicano nga arsobispo a ni Desmond Tutu: “Adda dagiti paset ti Biblia nga awan manayon a pategda.” Ti kakastoy a sasao ti namagpanunot kadagiti adu no kasano kadakkel ti pammati a rebbeng nga isaadda iti Biblia.
Ti Pannakasapul iti Bagnos
Masapul nga annugoten dagiti kritiko ken dagiti mamati nga ad-adda a kasapulan ti lubong dagiti epektibo a solusion. “Malaksid no masursuro a dagus ti tao a tenglen ti kapartak ti panagbalbaliw kadagiti personal nga aramidna kasta met iti kagimongan,” insurat ni Alvin Toffler iti librona a Future Shock, “agtungpaltayto iti sapasap . . . a pannakapaay.” Nasurok a 20 a tawenen ti napalabas sipud iti panangiballaagna iti dayta. Agparang a mapaspasamak itan ti pannakapaay a nasao ni Toffler.
Bayat nga umad-adani ti panagngudo daytoy a siglo, napaay ti teknolohia ken dagiti natauan a pilosopia a mangyeg iti natalged a lubong. Dagiti nabiit pay nga inanama iti baro a lubong nga urnos ket sinukatan ti pannakapaay, ket ti panagbiag dagiti adu nagbanag iti inaldaw a pannakidangadang tapno agbiag.
Ipakita dagiti estadistika a limmawa ti giwang iti nagbaetan dagiti babaknang ken napanglaw. Ipamatmat ti maysa a nabiit pay a panagadal nga 82.7 porsiento iti kinabaknang ti lubong ti kukua ti 20 porsiento laeng iti populasion daytoy. Pakasdaawantay kadi no agraira ti gubat, bisin, sakit, riribuk, ken anarkia iti adu a pagilian? Ti kinarigat ti panangsaranget iti bumabbaba a kalidad ti panagbiag ti mangpadpadagsen iti rikrikna dagiti tao. Kas resulta, agrakrakayan uray ti kangrunaan a paset ti kagimongan, ti pamilia.
Nupay adu, kas ken Toffler, ti mangisingasing nga adda iti tao a “mangsapul kadagiti naan-anay a baro a wagas tapno makasarak iti kinatalingenngen ken kinatalged,” paneknekan ti ebidensia a di kabaelan dagiti tao ti mangipaay iti bukodda a solusion.
Ti Kakaisuna a Solusion
Ti Nasantuan a Biblia, a ti pannakaisuratna nangrugi agarup 3,500 a tawenen ti napalabas, saan a nagbalbaliw iti panaglabas dagiti siglo. Saan nga agbaliwbaliw dagiti prinsipiona. Kas pangarigan, ad-adda a naipakita a pudno itatta ti sasao ti Jeremias 10:23: “Ti dalan ti tao saan nga agtaud kenkuana met laeng. Saan nga agtaud iti tao a magna ti panangiturong kadagiti addangna.” No saan a kabaelan ti tao nga iturong ti panagbiagna, asino ti makabael? Itudo ti Biblia ti kakaisuna a pudno a Gubuayan ti pannakaiwanwan: “Siak ni Jehova a Diosmo, Daydiay mangisuro kenka iti pagimbagam, Daydiay mangiturong kenka iti dalan a rumbeng a pagnaam.”—Isaias 48:17.
Babaen kadagiti binulong ti Biblia, isuronatay ni Jehova a Dios a tulongan ti bagbagitayo. Napno dagitoy iti pammagbaga a mangipakita kadatayo iti dalan a rumbeng a pagnaantayo. Mayanatup ita ti balakadna a kas idi tiempo ti pannakaisuratna. Usigen ti sumaganad nga artikulo ti kinapraktikal ti Biblia iti moderno a panawentayo. Iti nagduduma a banag, manipud salun-at agingga iti kinabaknang, biag ti pamilia, ken personal a kababalin, makitayonto a ti Biblia ket pudno a kasla maysa a natibker a bato iti tengnga dagiti nariribuk a kasasaad iti lubong ita.
[Ladawan iti panid 4]
Ti Biblia ket maysa a sinipete ti kinatalged iti nariribuk a lubong ita