Maiyalisyo Dagiti Bambantay!
MAYO 29, 1953, naipadamag ti kauunaan a daras a nagtakder ti tao idiay tuktok ti kangangatuan a bantay iti lubong—idiay Bantay Everest, 8,848 a metros iti ngato ti patas ti baybay. Babaen ti panangsuportar ti nasursurok ngem 450 a tattao, ni Edmund Hillary ti New Zealand ken ni Tenzing Norgay, maysa a Nepalese Sherpa, ti sibaballigi a nangparmek kadagiti peggad ti nakagalgalis a yelo, makabulsek a niebe, ken kinakurang ti oksihena tapno magtengda ti tuktok ti 8.8-kilometro ti kangatona a kalatda.
Ti pananguli ti tuktok dagiti nakangatngato a bambantay ket pudno a maysa a naisangsangayan a gapuanan. Kaskasdi daytat’ awan pannakaiyaspingna iti insalaysay ni Jesus kadagiti adalanna: “Kunak kadakayo, a no adda koma pammatiyo a kas iti bukel ti mostasa kunaenyonto itoy bantay, ‘Umaliska manipud ditoy agingga idiay a disso,’ ket umalisto; ket awanto ti di mabalin kadakayo.” Panunotenyo dayta, saan a pananguli no di ket panangiyalis iti maysa a bantay!—Mateo 17:20, The Jerusalem Bible.
Aniat’ nangtignay ken Jesus a kunaen daytoy kadagiti adalanna? Kapapaayda pay laeng a nangagas ti nagunggan ti demonio nga ubing a lalaki. Impaganetget ni Jesus no apay a napaayda: Kasapulanda ti dakdakkel pay a pammati. (Mateo 17:14-20) Inyarigna ti pammati iti bukel ti mostasa, banag a pagaammoda unayen. Nupay nairaman kadagiti “kababassitan,” ti bukel ti mostasa kalpasan sumagmamano a bulan a panagdakkelna agbalinton a kasla kayo a mula. (Mateo 13:31, 32) Gapuna, ipagpaganetgetna ti dakkel a potensial nga adda ti bassit a pammati no daytat’ umiso ti pannakasukay ken pannakataripatona-daydiay kasla imposible ti agbalin a posible.
Ngem kalpasan ti panangpadakkel ti kasta a pammati, ania a kita ti bambantay ti mabalinto nga iyalis dagiti adalan ni Jesus? No kasano a ti literal a bantay ket naranga, dagiti kakasla bantay a lapped ti mabalin a makatiped ti irarang-aytayo iti serbisio ni Jehova. Ania ngata dagita a “bambantay” ken kasanotayo a “maiyalis”ida?
Ni apostol Pablo ket maysa nga ulidan ti Kristiano a nangsango kadagiti adu a lapped. Idiay 2 Corinto 6:4-10 ken 2 Corinto 11:23-28, mabasayo dagiti panaglak-amna ti kinaawan nam-ay, pannakababaot, pannakaibalud, pannakarba ti sasakayan idiay taaw, ken adu pay a dadduma a kalamidad. Mainayon kadagitoy a bambanag, adda pay daydiay piguratibo a “siit iti lasag,” nalabit ti rigat ti panagkitana. (2 Corinto 12:7; Aramid 14:15) Kasano a posible ti panangparmekna kadagita kakasla bantay a lapped ken sibaballigi a naaramidanna ti panggep ti Dios para kenkuana? “Mabalinak dagiti amin a bambanag gapu iti daydiay mamapigsa kaniak,” insurat ni Pablo. Isu daytoy daydiay “tapno ti naindaklan a pannakabalin a nalablabes ngem ti gagangay ket biang ti Dios ket saan a kadatayo.” (Filipos 4:13; 2 Corinto 4:7) Gapuna, ni Pablo ti addaan naan-anay a panagtalek iti abilidad ni Jehova a mangpapigsa kenkuana kadagiti kanito a napeggad. Isut’ addaan pammati.
Panangiyalis ti Bambantay Itatta
Tarigagayanyo aya a parang-ayen ti serbisioyo ken Jehova? Kas kadagiti ginasgasut a ribo a timmiponen iti dumakdakkel a ranggo dagiti amin-tiempo a manangaskasaba (payunirs), mabalin a dakayo marikriknayo met ti kinaganat dagiti panawen ket siinget a pampanunotenyo a pasaknapen ti ministerioyo. Nupay kasta, adda aya lapped a kasla di maparmek kas dakkel a bantay iti sanguananyo? No kasta, mabalinyo kadi nga iyalis dagiti bambantay? Rinibribo dagiti nakaaramiden iti dayta iti panagreggetda a parang-ayen ti serbisioda ken Jehova. Adtoy ti sumagmamano laeng kadagiti kapadasanda.
Maysa nga agtutubo a kabsat a babai nga agraduaren manipud eskuelaan a kalalaingan iti klaseda tinarigagayanna ti agpayunir, ngem ti kinaawan panggedan ti kas bantay kenkuana. Insalaysayna:
“Ti bukodko a negatibo a panagpampanunot ken panagduadua maipapan ti panagpayunirko ti nagbalin a lapped kaniak a parmeken. Gapu ta maseknannak unay iti pannakakita ti trabaho sakbay a mangrugiak nga agpayunir, saanko nga ikabkabil ti naan-anay a panagtalekko ken kompiansak ken ni Jehova ken iti abilidadna a mangipaay kadagidiay mangiyun-una ti panagdayaw kenkuana. Kanayon a pampanunotek, ‘Umuna agsapulak ti trabaho, kalpasanna iyawatkonton ti aplikasionko nga agpayunir.’ Saanak nga agpaypayunir; kinapudnona saysayangek laeng ti nagpateg a panawen. Nupay kasta, maysa kadagiti panglakayen ti kongregasion ti nangibaga a no mabaybayagak nga aguray a mangirugi ti panagpayunirko, nasaysayaatto metten ti panagkitak kadagiti amin-tiempo a panggedan, ta awan met aniaman a manglaplapped kaniak a mangawat kadagita.”
Aniat’ inaramid ti kabsat a babai? “Nagkararagak a di agressat ken Jehova a maipaay ti panangiwanwan ti nasantuan nga espirituna ken iturongna ti tigtignay ken panagpampanunotko.” Kalpasan ti graduasion daytoy a kabsat a babai ti nag-auxiliary payunir, kalpasanna isut’ simrek iti regular payunir a ministerio. Di nagbayag kalpasan dayta, isut’ nakasarak ti kalalainganna a sekular a panggedan a nangilugar ti eskediol ti panagpayunirna.
Maysa a panglakayen, a ti asawana ti adda iti payunir a serbisio ken addaan dua nga annak a padpadakkelenna, ti namati a rebbeng nga isut’ mangaramid ti ad-adu pay ngem basta panangsupsuportar a pinansial iti pamiliana. Kadagiti dadduma nga agpalpaliiw, dagiti sirkumstansia a manglaplapped kenkuana iti payunir a serbisio ti kasla di maparmek, kaskasdi tarigagayanna a palawaen ti ministeriona. Aniat’ masapul nga agbaliw?
“Ti kunak ti kadadakkelan a lapped a masapul a parmekek ket ti bagik met laeng,” kunana. “Ti ministerio iti tay-ak ket banag a tagtagiragsakek unay, ket iti pannakisarsarita kadagidiay adda iti amin-tiempo a ministerio ken iti pannakakitkita dagiti bendisionda, nakitak a ti nagsayaat nga espirituda ket makaakar. Makitkitak ti bagik nga addanto aldaw nga addaak iti amin-tiempo a ministerio. Ti problema iti panagpampanunotko a ta ti panagpayunir ket nagbalin laeng a banag a pampanunotek. Ngem diak pulos inikkan ti bagik ti petsa no kaano a maragpatko daytoy a kalat.”
Kalpasan ti panangusigna a buyogen ti panagkararag, daytoy a kabsat a lalaki rinugianna a maragpat ti kalatna iti amin-tiempo a serbisio. Inasitganna ti superbisorna iti panggedanna, inlawlawagna ti planona, ket indawatna a mapalubosan nga agtrabaho ti basbassit nga oras kada lawas. Ni maipapan iti pagalagadan ti kompania, ti tipo ti eskediol a birbirukenna ket awan immuna pakaipadaanna.
Intuloyna: “Pinagpatingga ti superbisorko ti tungtunganmi babaen ti panagkunana a mabalbalin diakto maawat ti eskediol a dawdawatek. Makasiguradoak a no ti desision ti agpannuray laeng kenkuana, ti sungbatto ket saan. Gapuna ti anamong ti umay laeng babaen iti tulong ni Jehova. Maysa ket kagudua a lawas kalpasanna, ti anamong iti baro nga eskediolko ti bimmaba a naggapu manipud kadagiti manangaywan. Kalpasan ti panagyamanko iti superbisorko, napanak iti kotsek, nagmaneho iti sumagmamano a bloke, sa nagparada iti maysa a dasig, ket inyebkasko ti panagyamanko ken panangapresiarko ken Jehova. Wen, ti kalatko iti amin-tiempo a serbisio ti agbalinen a pudno.”
Kasano nga “inyalis” ti maysa a kasado a kabsat a babai ti bantayna? Insalaysayna: “Adda uppat nga annakko ken asawa a di mamati. Idi rugiak a pampanunoten ti panagpayunir, addaanak ti sumagmamano a lapped. Maysa kadagitoy, a ta ni lakayko ti temporario a naawanan ti trabaho, ta ti trabahona ket panapanawen, ket agtartrabahoak iti paset-tiempo tapno makatulong kadagiti utang. Gapuna kunak iti bagik a naupay addaanak ti tarigagay, saanak a makapagpayunir gapu iti sirkumstansiak. Nupay kasta, ditoy ti panagbalbaliwak ti panunotko. Nalasinko a no kanayon a pampanunotek a diak makapagpayunir, diakto pulos pagreggetan a padpadasen. Ti sumaganad a nasken a saludsod a masapul a sungbatak ket, Sadinot’ pangalaak ti pammigsa nga agpayunir? Nasarakak ti sungbat idiay Filipos 4:13. Saanak laeng a nagkararag ken Jehova maipapan iti dayta a banag no di ket ad-adda pay a nagpannurayak kenkuana. Nangalaak met kadagiti praktikal nga addang nga agturong it panangragpatko iti kalatko babaen ti panangiyurnos ti nasayaat nga eskediol ken nagpasalistaak kas auxiliary payunir. Bayat ti panaglabas ti panawen, intultuloy a linukatan ni Jehova ti dalan para kaniak tapno makastrek iti payunir a serbisio. Ni lakayko ti nakasublin iti trabahona, ket nabalinak met a linimitaran ti paset-tiempo a trabahok iti maysa nga aldaw laeng iti kada lawas. Di nagbayag kalpasan daytoy, nagbalinakon a regular payunir.”
Mainayon pay, ti pribilehio a tumabuno iti Pioneer Service School ti naglukat kenkuana, a nagbalin a dakkel a tulong kenkuana iti ministeriona. “Kayatko laeng nga ibaga iti asinoman nga agpampanunot maipapan iti panagpayunir nga agkararag ken Jehova ket ikabil dayta kadagiti imana,” imbagana. “Kalpasan pagreggetanyo dayta, ket bendisionannanto ti panangpadpadasyo.”—Salmo 37:5.
Saan kadi a dagitoy a kapadasan tulongannakayo a makakita no kasano a ti pammati no alagaden ket matulonganna ti maysa a Kristiano a mangparmek kadagiti kakasla bantay a lapped? Gapuna, no tarigagayanyo ti agpayunir, sukimatenyo dagiti sirkumstansiayo. Makisaritakayo kadagiti dadduma maipapan iti panagpayunir, ket makaadalkayo manipud kapadasanda. Mangalakayo kadagiti praktikal nga addang tapno maragpat ti kalatyo. Ken kangrunaan iti isuamin, agkararagkayo ken Jehova maipapan iti tarigagayyo; kalpasanna agpannuraykayo kenkuana a mangbendision ti panagreggetyo. Wen, uray dakayo mabalinyo met a maiyalis dagiti bambantay!