Panagrag-o iti Sagrado a Serbisioyo
1 Nagsublida nga “addaan rag-o.” Ibaga ti salaysay ti Biblia ti narikna dagiti 70 nga adalan idi nagsublida nga agreport ken Jesus, kalpasan ti nasaknap a panangasaba. Napalalo ti ragsakda a nagaramid iti pagayatan ti Dios. (Luc. 10:17) Ania ti makatulong kadakayo a maaddaan iti umasping a rag-o iti sagrado a serbisio?
2 Positibo a Kababalin: Addaankayo iti inted-Dios a pribilehio a mangipakaammo kadagiti tattao maipapan iti naindaklan a panggep ni Jehova. Babaen ti panangasabayo, matulonganyo ti indibidual a lumapsut kadagiti rinuker nga ar-aramid daytoy a lubong ken iti kawar ti palso a relihion. Maitukonyo kadagiti tattao ti namnama a biag iti maysa a lubong nga awanan iti riribuk a kas kadagiti adda iti aglawlawtayo itatta. Panunotenyo ti rag-o ni Jehova no sibaballigi a maimulayo dagiti bin-i ti kinapudno iti nasingpet a puso. Positibokayo koma a mangikararag iti espiritu ti Dios a mangpataud kadakayo iti bunga a rag-o bayat a makipasetkayo a naimpusuan iti ministerio.
3 Praktikal a Pannakasanay: Ti sesion a panangisuro ni Jesus kadagiti 70 nga adalan ket mayarig iti moderno-aldaw a Gimong ti Serbisio. Nangipaay iti panangsanay tapno mairingpasda a sieepektibo ti ministerioda. (Luc. 10:1-16) Itatta, sanayennakayo ti Gimong ti Serbisio kadagiti wagas a pannakisarita iti tattao, no kasano ti mangirugi iti saritaan, ken no kasano ti mangirugi ken mangidaulo iti panagadal ti Biblia iti pagtaengan. Babaen ti panangigaed ken panangparang-ayyo iti laingyo a mangasaba, makitayonto a maksayan ti aniaman a panagdanag wenno panangpampanunot iti kinakapuyyo ket maringbawan dayta iti panagtalek ken rag-o.
4 Ipamaysa a Matmatan ti Masanguanan: Nagrag-oan ni Jesus ti sagrado a serbisiona iti laksid dagiti panagsagaba nga inibturanna. Apay? Gapu ta impamaysana a minatmatan dagiti bendision ken pribilehio nga adda iti sanguananna. (Heb. 12:2) Maaramidyo met ti kasta babaen ti patinayon a panangipamaysayo iti panunot ken pusoyo ti nagan ni Jehova ken kadagiti bendision a dumteng iti baro a lubong ti Dios. Daytoy ti mangnayon iti rag-o ken kaipapanan ti ministerioyo.
5 Ti panangipaay iti sagrado a serbisio ken Jehova isu ti kadaklan a pribilehio a mabalinyo a gun-oden itatta. Gapuna, kunaenyo koma: “Pagragsakak nga aramiden ti pagayatam, O Diosko.”—Sal. 40:8.