Iturongyo iti Organisasion Dagiti Iyad-adalanyo iti Biblia
1 Masapul a maam-ammo dagiti estudiante ti Biblia ti organisasion ni Jehova. Masapul a mabigbigda a napateg iti pannakaisalakanda ti panagbalin a paset dayta nga organisasion. (Apoc. 7:9, 10, 15) Gapuna, nasken a rugiantayo nga iturong iti organisasion dagiti iyad-adalantayo iti Biblia apaman a naipasdek ti panagadal iti Biblia.
2 Tulonganyo dagiti iyad-adalanyo iti Biblia a mangammo iti adu nga aspeto ti organisasion ni Jehova, nga ipakitayo kadakuada a sursuroten dayta nga organisasion ti pagwadan dagiti Kristiano idi umuna a siglo. Kasano a maaramidan dayta?
3 Usarenyo ti Broshur a Dagiti Saksi ni Jehova: Ti broshur a Dagiti Saksi ni Jehova—Siasinoda? Ania ti Patpatienda? ket naglaon iti komprehensibo nga impormasion maipapan iti organisasion ni Jehova ken dagiti Saksina. Ditoy Pilipinas, magun-od dayta iti lima a lenguahe malaksid iti Ingles. Mangbusbusboskayo kadi iti sumagmamano a minuto kada lawas a mangusar iti dayta a broshur a mangparayray iti apresasion ti estudiante iti organisasion? Inikkanyo kadin ida iti kopiada? Adda kadi awityo a kopia no mapankayo mangyadal iti Biblia?
4 Ti panid 6 agingga 11 ti broshur salaysayenna ti pakasaritaan ken panagrang-ay ti ili ti Dios iti moderno a panawen. Mangted ti panid 12 ken 13 iti ababa a sumario dagiti patpatientayo. Ipakita ti panid 25 ken 26 ti sangalubongan a saklawen ti organisasion, idinto ta salaysayen ti panid 27 agingga 30 dagiti saludsod a masansan nga iyimtuod dagiti interesado a tattao.
5 Ti kasayaatan a pamay-an tapno mayam-ammoyo ti organisasion iti iyad-adalanyo isu ti panangawis kenkuana a makigimong. Sakbay nga aramidenyo dayta, mabalin nga irepasoyo kenkuana ti umuna a saludsod iti panid 30 ti broshur. Wenno, no madama ti panagbisita ti manangaywan iti sirkito iti dayta a lawas, mabalin nga irepasoyo kenkuana ti umuna a parapo iti sidong ti paulo a “Ti Sangalubongan nga Organisasion ken Trabahoda” iti panid 25. No awisenyo ti iyad-adalanyo iti maysa a kombension wenno asamblea, wenno agpasiar iti Bethel, makatulong ti impormasion iti panid 10 ken 11 a mangparayray iti gagarda kadagita.
6 Babaen ti panangusar kadagiti espesipiko a punto manipud iti broshur a Dagiti Saksi ni Jehova no adda gundaway ken panagkasapulan, matulonganyo ti estudiante a mangapresiar iti organisasion ken agtarigagay a makitimpuyog iti dayta. Bayat nga aramidenyo dayta, siguraduenyo a dakayo a ‘mangisursuro iti asinoman,’ ipasdekyo ti nasayaat nga ulidan iti panangipakita iti panangapresiar iti organisasion ni Jehova. (Roma 2:21) No aramidenyo ti kasta, matulonganyo ti dadduma a makitimpuyog iti “maymaysa nga arban” nga iturturong ni Jesus iti biag nga agnanayon.—Juan 10:16.