Kawesanyo ti Bagiyo iti Kinapakumbaba
1 Nagtalek ti maysa nga agtutubo a pastor ken ni Jehova ket inabakna ti nabileg a mannakigubat. (1 Sam. 17:45-47) Maysa a nabaknang a tao ti siaanus a nangibtur iti didigra. (Job 1:20-22; 2:9, 10) Ti Anak ti Dios inturongna ken Amana amin a pammadayaw gapu iti pannursurona. (Juan 7:15-18; 8:28) Kadagitoy nga ehemplo, nagpateg ti kinapakumbaba. Kasta met laeng ita, nagpateg ti kinapakumbaba iti nadumaduma a kasasaad a pakaipasanguantayo.—Col. 3:12.
2 No Mangasabatayo: Kas Kristiano a ministro, sipapakumbaba nga iranudtayo ti naimbag a damag kadagiti amin a kita ti tattao, a ditay ukomen ida maigapu iti rasa, kultura, wenno nalikudanda. (1 Cor. 9:22, 23) No ti dadduma ket sigugubsang wenno sitatangsit a laksidenda ti mensahe ti Pagarian, ditay koma agtignay a kas kadakuada, no di ket siaanus a sapulentayo dagiti maikari. (Mat. 10:11, 14) Imbes nga iparammagtayo kadagiti sabsabali ti pannakaammo wenno adaltayo, iturongtayo ti atensionda iti Sao ti Dios, a bigbigentayo a daytoy ket ad-adda a makaguyugoy ngem iti aniaman a mabalintayo nga ibaga. (1 Cor. 2:1-5; Heb. 4:12) Kas panangtulad ken Jesus, iturongtay amin a pammadayaw ken ni Jehova.—Mar. 10:17, 18.
3 Iti Kongregasion: Dagiti Kristiano masapul met a ‘bariksanda ti bagbagida iti kinapakumbaba iti panagpampanunot maipaay iti maysa ken maysa.’ (1 Ped. 5:5) No ibilangtayo a natantan-ok ti dadduma ngem datayo, mangbiroktayo kadagiti pamay-an nga agserbi kadagiti kakabsattayo imbes a namnamaentayo nga isuda ti agserbi kadatayo. (Juan 13:12-17; Fil. 2:3, 4) Ditay koma panunoten a saantayo a karaman iti panagdalus iti Kingdom Hall.
4 Ti kinapakumbaba tulongannatayo nga ‘agiinnanus iti ayat’ ket iti kasta, maitandudo ti kappia ken panagkaykaysa iti kongregasion. (Efe. 4:1-3) Tulongannatayo nga agpasakup kadagidiay nadutokan a mangidaulo. (Heb. 13:17) Gutugotennatayo a mangawat iti aniaman a balakad wenno disiplina a mabalin nga ipaayda kadatayo. (Sal. 141:5) Ken ti kinapakumbaba tignayennatayo nga agtalek ken ni Jehova no itungpaltayo ti aniaman a pribilehio a maited kadatayo iti kongregasion. (1 Ped. 4:11) Kas ken David, bigbigentayo a ti balligi ket saan nga agdepende iti abilidad ti tao no di ket iti pamendision ti Dios.—1 Sam. 17:37.
5 Iti Imatang ti Diostayo: Kangrunaan iti amin, masapul nga ‘agpakumbabatayo iti sidong ti mannakabalin nga ima ti Dios.’ (1 Ped. 5:6) No makidangdangadangtayo kadagiti narikut a kasasaad, mabalin nga il-iliwentayo ti bang-ar nga itden ti Pagarian. Ngem sipapakumbaba nga aganustayo, nga ur-urayentayo ti panangtungpal ni Jehova kadagiti karina iti naituding a tiempo. (Sant. 5:7-11) Kas ken natarnaw a Job, ti kangrunaan a pakaseknantayo ket “ti nagan ni Jehova agtultuloy koma a mabendito.”—Job 1:21.
6 Ni propeta Daniel ‘impakumbabana ti bagina iti sanguanan ti Diosna’ isu a pinaraburan ni Jehova ken naipaayan iti adu a nagsayaat a pribilehio. (Dan. 10:11, 12) Kawesantayo met koma ti bagitayo iti kinapakumbaba, yantangay ammotayo a “ti bunga ti kinapakumbaba ken ti panagbuteng ken ni Jehova ket kinabaknang ken dayag ken biag.”—Prov. 22:4.