Nagtaudantayo?

APAY A NAPATEG A SAPULEN TI SUNGBAT? Naisuro iti adu a tattao a naiparna laeng ti itataud ti biag ditoy daga. Naibaga kadakuada a gapu iti agsasaganad ken naiparna a paspasamak, timmaud ti puli ti tao agraman ti emosional, intelektual, ken naespirituan nga abilidadna.

Ngem utobem: No agpayso a timmaudtayo babaen iti ebolusion ken no talaga nga awan ti Namarsua, makuna ngarud nga ulila ti intero a sangatauan. Isursuro ngarud dayta nga awan ti natan-ok a gubuayan iti sirib a pagpabalakadan ti sangatauan, ket ngarud awan ti tumulong kadatayo a mangrisut kadagiti parikuttayo. Kapilitan ngarud a ti laeng siribtayo ti mabalintayo a pagpannurayan iti pananglapped iti didigra iti aglawlaw, panangsolbar kadagiti napolitikaan a susik, ken panangrisut kadagiti bukodtayo a parikut.

Natalged kadi ti riknam no ammom nga awan ti sabali a mabalinmo a pagpannurayan? No saan, napateg ngarud nga usigem ti maipapan iti maysa nga agik-ikut iti katan-okan a sirib. Ti kasta a panangusig ket saan la a makaay-ayo no di ket lohikal pay, saan a kas iti ebolusion.

Ti Isursuro ti Biblia

Isursuro ti Biblia a ti sangatauan ket direkta a pinarsua ti Dios. Saantayo a timmaud babaen iti awan rikna ken panunotna nga ebolusion. Imbes ketdi, datayo ket annak ti maysa a naayat ken masirib nga Ama. Usigem dagitoy a nalawag nga ibagbaga ti Biblia.

Genesis 1:27. “Ti Dios pinarsuana ti tao iti ladawanna, iti ladawan ti Dios isu pinarsuana; pinarsuana ida a lalaki ken babai.”

Salmo 139:14. “Idayawkanto agsipud ta iti nakaam-amak a pamay-an nakaskasdaaw ti pannakaaramidko. Nakaskasdaaw dagiti aramidmo, kas pagaammo unay ti kararuak.”

Mateo 19:4-6. “Saanyo aya a nabasa a ti nangparsua kadakuada nanipud idi damo inaramidna ida a lalaki ken babai ket kinunana, ‘Iti daytoy a rason, ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag’? Iti kasta saandan a dua, no di ket maymaysadan a lasag. Gapuna, ti pinagsinnangol ti Dios saan koma a pagsinaen ti tao.”

Aramid 17:24, 25. “Ti Dios a nangaramid iti lubong ken amin a bambanag nga adda iti dayta, yantangay, Daytoy ket, Apo ti langit ken daga, saan nga agnaed kadagiti templo nga inaramid ti ima, saan met a pagserserbian ti natauan nga im-ima a kasla ket agkasapulan iti aniaman a banag, agsipud ta isu mangted iti biag ken anges ken amin a bambanag iti amin a tattao.”

Apocalipsis 4:11. “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.”

No Kasano a ti Sungbat ti Biblia ket Makaipaay iti Napaypayso a Talna ti Panunot

Agbaliw ti panangmatmattayo iti dadduma a tattao no ammotayo a ti Dios ti “nakautangan ti tunggal pamilia . . . iti daga ti naganna.” (Efeso 3:15) Sumayaat pay ti panangmatmattayo iti bagitayo ken kadagiti parikuttayo. Ipakita dagiti sumaganad no kasano mapasayaat ti panagpampanunottayo.

No maipasangotayo kadagiti narikut a desision, saantay unay a madanagan maipapan iti agsusupadi a kapanunotan dagiti tattao. Imbes ketdi, agtalektayo iti balakad ti Biblia. Apay? Agsipud ta “amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.”​—2 Timoteo 3:16, 17.

Siempre, nasken nga agregget ken disiplinaentayo ti bagitayo tapno mayaplikartayo ti balakad ti Biblia. No dadduma, mabalin pay ketdi a ditay magustuan dagiti ibalbalakadna nga aramidentayo. (Genesis 8:21) Ngem no patientayo a pinarsuanatayo ti maysa a naayat a nailangitan nga Ama, maamiristayo la ketdi nga ammona ti kasayaatan nga aramidentayo. (Isaias 55:9) Gapuna, ipanamnama kadatayo ti Saona: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” (Proverbio 3:5, 6) No iyaplikartayo dayta a balakad, saantayo unayen a madanagan no maipasangotayo kadagiti parikut ken panagdesision.

No agbalintayo a biktima ti diskriminasion, ditayto marikna a nababbaba wenno basbassit ti pategtayo ngem kadagidiay sabali ti puli wenno kulturada. Imbes ketdi, maaddaantayo iti balanse a panagraem iti bagitayo. Apay? Agsipud ta ti Amatayo a ni Jehova a Dios ket “saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”​—Aramid 10:34, 35.

Gapu iti dayta a pannakaammo, sumayaat ti panangmatmattayo iti sabsabali uray no nagbalintayo a biktima ti diskriminasion. Maamiristayo a di rumbeng nga ibilangtayo a natantan-oktayo ngem iti dadduma a puli yantangay ti Dios “inaramidna ti tunggal nasion dagiti tattao, tapno agnaedda iti intero a rabaw ti daga.”​—Aramid 17:26.

Kinapudnona, maaddaantayo iti napaypayso a talna ti panunot no ammotayo nga adda Namarsua kadatayo ken maseknan isuna kadatayo. Ngem ad-adu pay ti kasapulan tapno kanayon a natalna ti panunottayo.

[Blurb iti panid 4]

Timmaud kadi ti puli ti tao gapu iti ebolusion?

[Ladawan iti panid 5]

Maaddaantayo iti napaypayso a talna ti panunot no ammotayo a ti Namarsua ket maseknan kadatayo