Salsaludsod Dagiti Agbasbasa
Kaano nga agpatingga ti pannakaayab dagiti Kristiano iti nailangitan a namnama?
Awan ti eksakto a sungbat ti Biblia iti dayta a saludsod. Ammotayo a nangrugi idi 33 K.P. ti pannakapulot dagiti adalan ni Jesus a makipagtawid kenkuana idiay langit. (Aramid 2:1-4) Ammotayo met a kalpasan ti ipapatay dagiti apostol, dagiti “trigo” a mangiladladawan kadagiti pudno a napulotan a Kristiano ‘dimmakkelda a kadua’ dagiti “ruot” a mangiladladawan kadagiti palso a Kristiano. (Mateo 13:24-30) Idi arinunos ti maika-19 a siglo, nakabatbatad nga aktibo manen dagiti napulotan a Kristiano. Idi 1919, nangrugin a maani “ti anien iti daga,” agraman ti pannakaurnong dagiti maudi a kameng dagiti napulotan.—Apocalipsis 14:15, 16.
Manipud iti arinunos ti maika-19 a siglo agingga idi 1931, ti pannakaurnong dagiti natda a kameng ti bagi ni Kristo ti kangrunaan a panggep ti panangasaba. Idi 1931, dagiti Estudiante ti Biblia inawatda ti naibatay-Biblia a nagan a Saksi ni Jehova, ket iti ruar Ti Pagwanawanan a Nobiembre 15, 1933, (iti Ingles) impasimudaagna a daytoy a naisangsangayan a nagan ti iladladawan ti “denario” a tinukoy ni Jesus iti pangngarigna a nailanad iti Mateo 20:1-16. Naipagarup a dagiti 12 nga oras a nadakamat iti pangngarig ket dagiti 12 a tawen manipud 1919 agingga iti 1931. Adu a tawen kalpasan a naipablaak dayta, mapapati a nagpatinggan idi 1931 ti pannakaayab iti nailangitan a Pagarian ket dagiti naayaban a makipagturay ken Kristo idi 1930 ken 1931 isuda dagiti “naudi” a naayaban. (Mateo 20:6-8) Nupay kasta, adda nalawlawag a pannakaawat iti dayta a pangngarig idi 1966, ket nalawlawagan nga awan ti pakainaiganna dayta iti panagpatingga ti pannakaayab dagiti napulotan.
Idi 1935, ti “dakkel a bunggoy” a nadakamat iti Apocalipsis 7:9-15 ket naawatan a buklen dagiti “sabsabali a karnero,” dagiti Kristiano nga addaan iti naindagaan a namnama, nga agparang iti ‘maudi nga al-aldaw’ ken makalasatto iti Armagedon kas maysa a grupo. (Juan 10:16; 2 Timoteo 3:1; Apocalipsis 21:3, 4) Kalpasan dayta a tawen, ti pannakaurnong ti dakkel a bunggoy ti nakaiturongan ti trabaho a panangaramid iti adalan. No kasta, nangnangruna kalpasan ti 1966, mapapati a nagpatinggan ti nailangitan a pannakaayab idi 1935. Kasla napatalgedan dayta a pannakaawat gapu ta patien ti dandani amin a nabautisaran kalpasan ti 1935 a naindagaan ti namnamada. Kalpasan dayta, siasinoman a maayaban iti nailangitan a namnama ket mapapati a kasukat dagiti napulotan a Kristiano a saan a nagtalinaed a matalek.
Awan duadua a no saan nga agbabawi ti maysa a napulotan a simiasi iti kinapudno, mangpili ni Jehova iti kasukatna. (Roma 11:17-22) Nupay kasta, mabalin a manmano dagiti napulotan a saan a nagtalinaed a matalek. Iti sabali a bangir, bayat ti panaglabas ti tiempo, dadduma a Kristiano a nabautisaran kalpasan ti 1935 addaanda iti pammaneknek a napulotanda iti nasantuan nga espiritu ket addaanda iti nailangitan a namnama. (Roma 8:16, 17) Gapuna, agparang a saantay a makaipaay iti espesipiko a petsa no kaano ti panagpatingga ti pannakaayab dagiti Kristiano iti nailangitan a namnama.
Ania koma ti panangmatmattayo iti tao a naimpusuan a nangikeddeng nga isu ket maysa kadagiti napulotan ken mangrugin a makipaset kadagiti emblema iti Memorial? Saantayo nga ukomen. Sungsungbatanna dayta a banag ken Jehova. (Roma 14:12) Nupay kasta, dagiti pudno a napulotan a Kristiano saanda a kalikaguman ti naisangsangayan nga atension. Nupay napulotanda, saanda a panunoten a naisangsangayan ti “pannakaawatda” ken nalalaingda ngem iti dadduma nga aduanen iti kapadasan a kameng ti dakkel a bunggoy. Saanda a matmatan nga ad-adu ti aw-awatenda a nasantuan nga espiritu ngem kadagiti kaduada a sabsabali a karnero. Saanda met a namnamaen a pagserbian ida dagiti sabsabali wenno gapu ta makipaspasetda kadagiti emblema, pagarupenda a natantan-okda ngem kadagiti nadutokan a panglakayen iti kongregasion. Sipapakumbaba a bigbigenda nga adda dagiti napulotan idi umuna a siglo a saan a kualipikado nga agserbi kas panglakayen ken ministerial nga adipen. (1 Timoteo 3:1-10, 12, 13; Tito 1:5-9; Santiago 3:1) Adda pay dagiti napulotan a Kristiano a nakapuy ti espiritualidadda. (1 Tesalonica 5:14) Ken uray dagiti babbai a napulotan saanda a mangisuro iti kongregasion.—1 Timoteo 2:11, 12.
Gapuna, dagiti napulotan a Kristiano, agraman dagiti kakaduada a sabsabali a karnero, ikagumaanda ti agtalinaed a nabileg iti naespirituan, patanoren dagiti bunga ti espiritu, ken salimetmetan ti talna iti kongregasion. Amin dagiti Kristiano, napulotan man wenno sabsabali a karnero, sigagaget nga ikasabada ti naimbag a damag ken agaramid kadagiti adalan iti sidong ti panangiturong ti Bagi a Manarawidwid. Dagiti napulotan a Kristiano kontentoda a mangaramid iti daytoy agingga a pagayatan ti Dios nga agtalinaedda ditoy daga kas ad-adipen ni Jehova.