Salsaludsod Dagiti Agbasbasa

Ania ti panangmatmat ti kongregasion Kristiano iti kinabuklis?

Ti Sao ti Dios agpadpada a matmatanna ti panagbartek ken kinabuklis kas ar-aramid a nasken a liklikan dagiti agserserbi iti Dios. No kasta, ti kongregasion Kristiano matmatanna ti maysa a napaneknekan a nabuklis a kas iti panangmatmatna iti maysa a mammartek. Saan a maikari nga agbalin a kameng ti kongregasion Kristiano ti maysa a mammartek wenno maysa nabuklis.

Kuna ti Proverbio 23:20, 21: “Dika makikadua kadagiti nakaro ti panagin-inumna iti arak, kadagidiay a nabuklis a mannangan iti lasag. Ta ti managbarbartek ken buklis kumurapaydanto, ket ti panagsaguyepyep kawesannanto ti maysa iti rigrigis laeng.” Iti Deuteronomio 21:20, mabasatayo ti maipapan iti maysa a “nasungit ken rebelioso” nga indibidual, a maikari a mapapatay iti sidong ti Mosaiko a Linteg. Sigun iti dayta a teksto, adda dua a kababalin dayta a rebelioso ken saan nga agbabbabawi nga indibidual: “nabuklis ken managbarbartek.” Nalawag nga iti nagkauna nga Israel, ti kinabuklis ket naibilang a di makaay-ayo nga aramid no kadagidiay agtarigagay nga agserbi iti Dios.

Ngem ania ti maibilang a nabuklis, ken ania ti kuna ti Kristiano a Griego a Kasuratan maipapan iti dayta? Ti nabuklis ket nadepinar kas “daydiay narawet ken nalabes ti pampannangan ken panagin-inumna.” No kasta, ti kinabuklis ket maysa a kita ti kinaagum. Sigun iti Sao ti Dios, “dagiti naagum a tattao” dida tawiden ti Pagarian ti Dios. (1 Corinto 6:9, 10; Filipos 3:18, 19; 1 Pedro 4:3) Maysa pay, idi pinakdaaran ni apostol Pablo dagiti Kristiano maibusor ‘kadagiti aramid ti lasag,’ dinakamatna ti “panagbarbartek, naariwawa a panagragragsak, ken bambanag nga umasping kadagitoy.” (Galacia 5:19-21) Masansan a ti nalabes a pannangan kakuyogna ti panagbarbartek ken naariwawa a panagragragsak. Kanayonanna, karaman ti kinabuklis iti kinuna ni Pablo a “bambanag nga umasping kadagitoy.” Kas kadagidiay mangar-aramid kadagiti dadduma pay nga “aramid ti lasag,” rumbeng laeng a mailaksid iti kongregasion ti maysa a Kristiano nga agdindinamag a nabuklis ken sisusubeg a di mangbalbaliw iti naagum a kababalinna.​—1 Corinto 5:11, 13.a

Nupay agpada ti panangmatmat ti Sao ti Dios iti maysa a mammartek ken iti nabuklis, nalaklaka a malasin ti nabartek. Saan a kas iti nabuklis a narigat a mailasin gapu ta saan a basta maibasar iti makinruar a langana. No kasta, masapul a naan-annad ken naun-uneg ti pannakaawat dagiti panglakayen iti kongregasion no tamingenda dagiti kastoy a situasion.

Kas pagarigan, ti kinalukmeg ket mabalin a pagilasinan ti kinabuklis, ngem saan a kanayon a kasta. Mabalin ngamin a ti kinalukmeg ket resulta ti maysa a sakit. Mabalin met a natawid dayta. Masapul met a laglagipentayo a ti kinalukmeg ket maysa a pisikal a kasasaad, idinto a ti kinabuklis ket maysa a kababalin. Ti kinalukmeg ket nadepinar kas “nalabes a kinataba ti bagi,” idinto a ti kinabuklis ket “kinarawet wenno kinamanaglablabes.” Gapuna, saan a marukod ti kinabuklis babaen ti pammagi ti maysa a tao no di ket iti kababalinna mainaig iti taraon. Mabalin a kalkalainganna ti pammagi ti maysa wenno nakuttong pay ketdi, ngem mabalin a maibilang latta a nabuklis. Maysa pay, saan nga agpapada ti panangmatmat kadagiti nagduduma a lugar no ania ti husto a kadagsen wenno pammagi ti maysa a tao.

Ania dagiti pagilasinan ti kinabuklis? Kanayon a makita iti maysa a buklis ti kinaawan ti panagteppel, narawet ken nalabes ti pampannanganna nga uray la agbubussog wenno makasarsarwa pay ketdin. Ipakita ti kinaawan panagteppelna nga isu ket saan a maseknan iti pannakaibabain nga iyegna ken ni Jehova ken iti reputasion ti ili ti Dios. (1 Corinto 10:31) Iti sabali a bangir, saan nga insigida a matmatan a “naagum” ti maysa a tao a sagpaminsan a makaadu iti kanenna. (Efeso 5:5) Kaskasdi, iti anag ti Galacia 6:1, mabalin nga agkasapulan iti tulong ti kasta a Kristiano. Kuna ni Pablo: “Kakabsat, uray pay ti maysa a tao makaaramid iti aniaman a di umiso nga addang sakbay a maammuanna dayta, dakayo nga addaan kadagiti naespirituan a kualipikasion padasenyo nga aturen ti kasta a tao iti espiritu ti kinaalumamay.”

Apay a nangnangruna a napateg ita ti balakad ti Biblia a liklikan ti nalabes a pampannangan? Gapu ta imballaag ni Jesus, partikular iti kaaldawantayo: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag, ket giddato a dayta nga aldaw kellaat nga umay kadakayo kas maysa a silo.” (Lucas 21:34, 35) Ti panangliklik iti nalabes a pampannangan ket maysa a napateg nga addang tapno maliklikan ti estilo ti panagbiag a makadangran iti espiritualidad.

Maysa a Nakristianuan a galad ti kinatimbeng. (1 Timoteo 3:2, 11) Gapuna, sigurado a tulongan ni Jehova amin dagidiay sipapasnek a mangyaplikar iti balakad ti Biblia maipapan iti panagbalin a natimbeng iti pampannangan ken panaginum.​—Hebreo 4:16.

[Footnote]