Salsaludsod Dagiti Agbasbasa
Ania ti maadaltayo iti Proverbio 24:27?
Kas balakad kadagiti agtutubo, kuna ti mannurat iti Proverbio: “Isaganam dagiti trabahom iti ruar, ket saganaem maipaay kenka iti tay-ak. Kalpasanna masapul a bangonem met ti sangakabbalayam.” Ania ti isuro daytoy a naipaltiing a proverbio? Masapul nga agsagana a naimbag ti lalaki sakbay a mangasawa ken agpamilia, a bigbigenna dagiti responsabilidad a kakuyog dayta a pannakikumit.
Adda idi dagiti gundaway a nausar daytoy a bersikulo tapno idagadag kadagiti assawa a lallaki ken amma a saanda laeng a maseknan iti sekular a trabahoda no di ket pagreggetanda a bangonen wenno pabilgen ti pamiliada, kas pagarigan, babaen ti panangisuroda iti Sao ti Dios. Nupay umiso ken Nainkasuratan dayta, saan nga isu ti kangrunaan a tuktukoyen ti bersikulo. Apay? Usigentayo ti dua a rason.
Umuna, ti panagbangon a tuktukoyen dayta a bersikulo ket saan a ti panangpabileg iti agdama a pamilia. Imbes ketdi, tuktukoyenna ti literal a panangibangon iti balay. Ti sao a naipatarus a “bangonem” ket mabalin met a mangipasimudaag iti panangibangon, wenno panangipasdek iti pamilia—kayatna a sawen, panagasawa ken pannakaadda iti annak.
Maikadua, ipagpaganetget dayta a bersikulo dagiti umiso nga agsasaganad nga aramiden, a kas man la ibagbagana, “Daytoy ti umuna nga aramidem; kalpasanna, dayta.” Ngarud, ibagbaga kadi ti proverbio nga iyun-una ti sekular ngem iti naespirituan a responsabilidad? Saan la ketdi!
Idi tiempo ti Biblia, no kayat ti lalaki ti ‘mangbangon iti sangakabbalayanna,’ wenno agpamilia, masapul nga isaludsodna, ‘Nakasaganaak kadin a mangaywan ken mangsuporta iti agbalinto nga asawak ken annakmi?’ Sakbay nga agpamilia, masapul nga adda trabahona, nga adda koma talon wenno mulana. Gapuna, kastoy ti panangipatarus Ti Baro a Naimbag a Damag Biblia iti dayta a bersikulo: “Sakbay nga agbalay ken mangasawaka, isaganam pay nga umuna ti talonmo ken sumapulka iti panggedam.” Agaplikar met kadi dayta a prinsipio ita?
Wen. Ti lalaki nga agngayngayangay a mangasawa masapul a saganaanna a naimbag dayta a responsabilidad. No kabaelanna, masapul nga agtrabaho. Siempre, saanna laeng nga ipaay ti material a kasapulan ti pamiliana. Ipakita ti Sao ti Dios a ti lalaki a saan a mangipaay iti pisikal, emosional, ken naespirituan a kasapulan ti pamiliana ket dakdakes pay ngem iti maysa nga awanan iti pammati! (1 Tim. 5:8) Gapuna, sakbay a makiasawa ken agpamilia ti maysa a lalaki, nasken nga isaludsodna: ‘Kabaelak kadin nga ipaay ti material a kasapulan ti agbalinto a pamiliak? Nakasaganaak kadin nga agbalin a naespirituan nga ulo ti pamilia? Maitungpalkonto ngata ti responsabilidad a mangikondukta iti regular a panagadal iti Biblia a kadua ti asawak ken annakmi?’ Sigurado nga ipaganetget ti Sao ti Dios dagita a napateg a responsabilidad.—Deut. 6:6-8; Efe. 6:4.
Gapuna, ti lalaki a kayatnan ti mangasawa nasken a tingitingenna a naimbag ti prinsipio iti Proverbio 24:27. Umasping iti dayta, nasayaat met a panunoten ti babai no isu ket nakasaganan kadagiti responsabilidad ti maysa nga asawa ken ina. Ikabilangan met koma dayta dagiti kabbaro nga agassawa no kayatdan ti maaddaan iti annak. (Luc. 14:28) Ti panangannurot kadagita a naipaltiing a giya tulonganna dagiti adipen ti Dios a mangliklik iti adu a parikut ken mangtagiragsak iti naballigi a biag ti pamilia.
[Blurb iti panid 12]
Ania dagiti masapul nga isaludsod ti lalaki nga agngayngayangay a mangasawa?