PANAGSARUNGKAR
LEKSION 8
Kinaanus
Prinsipio: “Ti ayat ket naanus.”—1 Cor. 13:4.
Ti Inaramid ni Jesus
1. Buyaem ti VIDEO, wenno basaem ti Juan 7:3-5 ken 1 Corinto 15:3, 4, 7 sa sungbatam dagitoy a saludsod:
Idi damo, ania ti reaksion dagiti kakabsat ni Jesus iti mensahena?
Ania ti mangipakita nga inan-anusan ni Jesus ti kabsatna a ni Santiago?
Ania ti Masursurotayo ken Jesus?
2. Masapul nga agan-anustayo gapu ta aglabas pay ti panawen sakbay nga awaten ti dadduma ti naimbag a damag.
Tuladem ni Jesus
3. Padasem ti sabali a pamay-an. No saan pay a kayat ti maysa ti agpayadal iti Biblia, saanmo a pilpiliten. No maitutop, agusarka kadagiti video wenno artikulo a tumulong kenkuana a mangammo no ania ti maar-aramid iti panagadal iti Biblia ken no kasano a pagsayaatanna dayta.
4. Saanka nga agikompara. Saan nga agpapada ti tunggal tao. No saan a kayat ti maysa a kapamiliam wenno sarsarungkaram ti agpayadal iti Biblia wenno saanna nga awaten ti maysa a pannursuro ti Biblia, panunotem no apay. Adda kadi espesipiko a narelihiosuan a doktrina a patienna unay? Parparitan kadi dagiti kabagianna wenno uy-uyawen dagiti kaarrubana? Mangpalabaska iti tiempo tapno mapagpanunotanna ti imbagam ken tapno makitana ti pateg ti ibagbaga ti Biblia.
5. Iramanmo iti kararagmo ti maysa nga interesado. Kiddawem ken Jehova a tulongannaka nga agtalinaed a positibo ken nataktika. Ikararagmo ken Jehova a tulongannaka a mangammo no interesado a talaga ti maysa a tao wenno no masapul nga isardengmon a sarungkaran.—1 Cor. 9:26.