Pammati—Makapabileg a Kualidad

ADDA nakaskasdaaw a bileg ti pammati. Kas pagarigan, uray kayatnatayo a papatayen ni Satanas iti naespirituan, tulongannatayo ti pammati a ‘mangdepdep iti amin nga umap-apuy a pana daydiay managdakdakes.’ (Efe. 6:16) Babaen ti pammati, kabaelantayo a sanguen dagiti arig bantay a problema. Imbaga ni Jesus kadagiti adalanna: “No adda pammatiyo a kas kabassit ti bukel ti mustasa, mabalinyo nga ibaga iti daytoy a bantay, ‘Umaliska, mapanka sadiay,’ ket umalis dayta.” (Mat. 17:20) Gapu ta makatulong ti pammati tapno bumilegtayo iti naespirituan, nasayaat a panunotentayo dagitoy a saludsod: Ania ti pammati? Kasano nga apektaran ti kasasaad ti pusotayo ti pammatitayo? Kasano a mapabilegtayo ti pammatitayo? Ken siasino ti rumbeng a pangipakitaantayo iti pammati?—Roma 4:3.

ANIA TI PAMMATI?

Ti pammati ket saan laeng a basta panamati wenno panangbigbig iti kinapudno, gapu ta uray dagiti demonio ket ‘mamati [nga adda Dios] ken agpigergerda met.’ (Sant. 2:19) Ania ngarud ti pammati?

Adda dua nga aspeto ti pammati sigun iti Biblia. Umuna, “ti pammati ket panagtalek a sigurado a mapasamak ti namnamaen.” (Heb. 11:1a) No adda pammatim, talaga a mamatika a pudno ken matungpal ti amin nga imbaga ni Jehova. Kas pagarigan, imbaga ni Jehova kadagiti Israelita: “No madadaelyo ti tulagko maipapan iti aldaw ken rabii, tapno saan a dumteng ti aldaw ken rabii iti umiso a tiempoda, madadaelto metten ti tulagko iti adipenko a ni David.” (Jer. 33:20, 21) Nadanaganka kadin baka saanen a sumingising ken lumnek ti init ket maawanen ti aldaw ken rabii? No saanmo a pagduaduaan dagiti pisikal a linteg a makagapu nga agtayyek ti daga iti axis-na ken agrikus iti init, pagduaduaam kadi a ti Namarsua kadagitoy a linteg kabaelanna a tungpalen ti saona? Siempre, saan!—Isa. 55:10, 11; Mat. 5:18.

Maikadua, ti pammati ket “nalawag a pammaneknek a dagiti saan a makita ket talaga nga adda.” Maikuna a ti pammati ket “nalawag a pammaneknek,” wenno “makakombinsir nga ebidensia,” nga agpayso ti maysa a banag uray saan a makita ti mata. (Heb. 11:1b; ftn.) Kasano? Ipapantayon nga insaludsod kenka ti maysa nga ubing, ‘Kasanoyo nga ammo nga adda angin?’ Uray no saanmo pay a nakita ti angin, matulongam ti ubing a mangpanunot kadagiti ebidensia nga adda angin—ti panagangestayo, dagiti epekto ti angin, ken dadduma pay. No makombinsir ti ubing, maawatanna a posible nga adda uray dagiti banag a saanna a makita. Kasta met, ti pammati ket naibatay iti nabileg nga ebidensia.—Roma 1:20.

NAPATEG TI UMISO A KASASAAD TI PUSO

Gapu ta ti pammati ket naibatay iti ebidensia, masapul a maaddaan nga umuna ti maysa iti “umiso a pannakaammo iti kinapudno” sakbay a maaddaan iti pammati. (1 Tim. 2:4) Ngem saan nga umanay dayta. Insurat ni apostol Pablo: “Babaen ti puso, ipakita ti maysa a tao ti pammatina.” (Roma 10:10) Masapul a saan laeng a patien ti maysa a tao ti kinapudno no di pay ket ipategna dayta. Iti kasta, matignay a mangipakita iti pammati, kayatna a sawen, agbiag maitunos iti kinapudno. (Sant. 2:20) Ti tao a saan a mangipatpateg iti kinapudno mabalin a laksidenna uray dagiti makakombinsir nga ebidensia. Baka saanna a kayat a baliwan ti dati a patpatienna wenno ikalinteganna dagiti nainlasagan a tarigagayna. (2 Ped. 3:3, 4; Jud. 18) Dayta ti makagapu nga idi panawen ti Biblia, saan nga amin a nakakita iti milagro ket namati. (Num. 14:11; Juan 12:37) Patauden laeng ti nasantuan nga espiritu ti pammati kadagidiay talaga a mangipatpateg iti kinapudno.—Gal. 5:22; 2 Tes. 2:10, 11.

NO KASANO A NAADDAAN NI DAVID ITI NABILEG A PAMMATI

Maysa ni Ari David kadagiti nabileg ti pammatina. (Heb. 11:32, 33) Ngem saan nga amin a kapamiliana ket addaan iti kasta a pammati. Kas pagarigan, ni Eliab, nga inauna a kabsat ni David, impakitana a nakapuy ti pammatina iti maysa a gundaway idi inungtanna ni David gapu iti reaksionna iti karit ni Goliat. (1 Sam. 17:26-28) Awan ti tao a nayanak nga adda pammatina; ken saantayo a matawid dayta kadagiti nagannaktayo, isu a ti pammati ni David ket resulta ti bukodna a relasion iti Dios.

Iti Salmo 27, imbaga ni David no kasano a naaddaan iti kasta a nabileg a pammati. (Ber. 1) Inutob ni David dagiti napalabas a kapadasanna ken no ania ti inaramid ni Jehova kadagiti kabusorna. (Ber. 2, 3) Inapresiarna unay ti urnos ni Jehova maipapan iti panagdaydayaw. (Ber. 4) Nagdaydayaw ni David iti Dios idiay tabernakulo a kaduana dagiti kapammatianna. (Ber. 6) Sipapasnek a nagkararag ken Jehova. (Ber. 7, 8) Kayat met ni David a masursuro ti dalan ti Dios. (Ber. 11) Nakapatpateg ken David ti pammati isu nga insaludsodna: “Sadino ngata koma itan ti ayanko no awan pammatik?”​—Ber. 13.

NO KASANOM A PABILGEN TI PAMMATIM

Maaddaanka iti nabileg a pammati a kas ken David no tuladem ti panagpampanunot ken kababalin a naipakita iti Salmo 27. Gapu ta naibatay ti pammati iti umiso a pannakaammo, nalaklakam a mapataud daytoy nga aspeto ti bunga ti espiritu ti Dios no kanayonmo nga adalen ti Saona ken dagiti naibatay iti Biblia a publikasion. (Sal. 1:2, 3) Agutobka bayat nga agad-adalka. Ti panagutob ket kasla daga a pagtubuan ti apresasion. Bayat nga umun-uneg ti apresasionmo ken Jehova, ad-adda met a kayatmo nga ipakita ti pammatim babaen ti panangidaydayaw kenkuana kadagiti gimong ti kongregasion ken panangipakaammo iti namnamam. (Heb. 10:23-25) Kasta met, ipakpakitatayo nga adda pammatitayo no itultuloytayo ti ‘agkararag ken saantayo a sumuko.’ (Luc. 18:1-8) Isu nga ‘itultuloytayo ti agkararag’ ken Jehova, nga agtalektayo nga ‘ipatpategnatayo.’ (1 Tes. 5:17; 1 Ped. 5:7) Tignayennatayo ti pammati a mangaramid iti umiso, ket no aramidentayo ti umiso, bumileg ti pammatitayo.—Sant. 2:22.

IPAKITAM TI PAMMATIM KEN JESUS

Iti rabii sakbay a natay ni Jesus, imbagana kadagiti adalanna: “Ipakitayo ti pammatiyo iti Dios; ipakitayo met ti pammatiyo kaniak.” (Juan 14:1) Isu a masapul nga ipakitatayo ti pammatitayo, saan laeng a ken Jehova, no di pay ket ken Jesus. Kasanom a maipakita ti pammatim ken Jesus? Usigentayo ti tallo a pamay-an.

Umuna, ibilangmo ti subbot kas personal a sagut ti Dios kenka. Imbaga ni apostol Pablo: “Agbibiagakon maitunos iti pammatik iti Anak ti Dios a nangayat kaniak ken nangisakripisio iti biagna para kaniak.” (Gal. 2:20) No ipakitam ti pammatim ken Jesus, kombinsidoka a makatulong kenka ti subbot, dayta ti pakaibatayan ti pannakapakawan dagiti basolmo, ikkannaka iti namnama nga agbiag nga agnanayon, ken dayta ti kadakkelan a pammaneknek nga ay-ayatennaka ti Dios. (Roma 8:32, 38, 39; Efe. 1:7) Makatulong dayta kenka a mangikkat kadagiti negatibo a rikriknam maipapan iti bagim.—2 Tes. 2:16, 17.

Maikadua, umasidegka ken Jehova babaen ti kararag maibatay iti sakripisio ni Jesus. Gapu iti subbot, makapagkararagtayo ken Jehova a “siwayawaya . . . tapno maawattayo ti asi ken magun-odantayo ti nagpaiduma a kinaimbag a makatulong kadatayo iti umiso a tiempo.” (Heb. 4:15, 16; 10:19-22) Pabilgen ti kararag ti determinasiontayo a manglaban iti sulisog nga agbasol.—Luc. 22:40.

Maikatlo, agtulnogka ken Jesus. Insurat ni apostol Juan: “Ti mangipakita iti pammati iti Anak maaddaan iti biag nga agnanayon; ti sumukir iti Anak saan a maaddaan iti biag, no di ket lak-amennanto ti pungtot ti Dios.” (Juan 3:36) Paliiwem ta pinagduma ni Juan ti resulta ti panangipakita iti pammati ken ti kinasukir. Gapuna, ipakpakitam ti pammati ken Jesus no agtulnogka kenkuana. Agtultulnogka ken Jesus no surotem ti “linteg ti Kristo,” wenno ti amin nga insuro ken imbilinna. (Gal. 6:2) Kasta met, agtultulnogka ken Jesus no surotem ti panangiwanwan nga ipapaayna babaen ti “matalek ken masirib nga adipen.” (Mat. 24:45) No agtulnogka ken Jesus, mapabilegka a mangibtur kadagiti arig bagyo a problema.—Luc. 6:47, 48.

“PABILGENYO TI NASANTUAN A PAMMATIYO”

Naminsan, impukkaw ti maysa a lalaki ken Jesus: “Adda pammatik! Ngem papigsaem koma ti pammatik!” (Mar. 9:24) Adda pammati ti lalaki, ngem sipapakumbaba a binigbigna a kasapulanna ti natibtibker a pammati. Kas iti daytoy a lalaki, adda dagiti gundaway iti biagtayo a kasapulantayo ti natibtibker a pammati. Ken kabaelantayo amin a pabilgen ti pammatitayo itan. Kas nadakamaten, bumileg ti pammatitayo no adalentayo ti Sao ti Dios ken utobentayo dayta. Iti kasta, ad-adda nga umuneg ti apresasiontayo ken Jehova. Bumileg met ti pammatitayo no makikaduatayo kadagiti kapammatiantayo nga agdaydayaw ken Jehova, ipakaammotayo ti namnamatayo iti sabsabali, ken itultuloytayo ti agkararag. Kasta met, no pabilgentayo ti pammatitayo, maawattayo ti kasayaatan pay laeng a gunggona. Iparegta kadatayo ti Sao ti Dios: “Patpatgek a kakabsat, pabilgenyo ti nasantuan a pammatiyo . . . tapno agtalinaedkayo iti ayat ti Dios.”—Jud. 20, 21.