Maysa a Kolektor a Kayatna a Padayawan ti Namarsua
IDI natay ti Americano nga eskultor ken kolektor iti kulibangbang a ni Herman Strecker maysa a siglo ti napalabasen, nabatina ti kadakkelan ken kapatgan idi a koleksion dagiti kulibangbang ken simotsimot idiay kontinente ti America. Kaaduan a koleksionna, a buklen ti agarup 50,000 nga ispesimen, ket kukua itan ti Field Museum idiay Chicago, Illinois, E.U.A. Iti intero a koleksion, naisalsalumina ti maysa a klase ti nagdakkel a silk moth iti Abagatan nga America gapu iti naganna. Inlawlawag ni Mr. Strecker iti librona a Lepidoptera a daytoy a klase ti simotsimot ket saanna a pinanaganan iti nagan ti tao a nalabit nanggunggona koma kenkuana iti padaya wenno nagpautang koma kenkuana iti kuarta.a Imbes ketdi, pinanagananna dayta iti nagan ti Namarsua. Iti kasta, ti Dios ti panunoten dagiti makakita iti daytoy “nakaskasdaaw unay” a klase ti simotsimot. Yantangay kayat ni Mr. Strecker a padayawan ti Namarsua, dayta a silk moth ti addaan itan iti nasientipikuan a nagan a Copiopteryx jehovah.
Nupay kasta, binabalaw ti dadduma kadagiti kasadar ni Mr. Strecker ti panangusarna iti nagan ti Dios agsipud ta, kas iti insurat ti maysa a kritiko, “gapu iti nagan, panunoten dagiti napasnek ken managpanunot a tattao ti amin a banag a sagrado.” Kastoy ti insungbat ni Mr. Strecker iti dayta a pammabalaw: “No kasta ti mapasamak, talaga ngarud a maragsakanak iti inkeddengko, agsipud ta para kaniak, aniaman a mamagpanunot kadatayo maipapan iti Namarsua . . . ket nagsayaat; ket adda pay aya nasaysayaat ngem iti panangutob kadagiti sagrado a banag,—kadagiti ebidensia ti kinatan-ok ken pannakabalin ti Katan-okan a Persona?” Gapuna, inngudo ti kolektor a ni Strecker: “Nagrigat a panunoten nga adda aniaman a nainkalintegan a pammabalaw iti pannakainagan ti Namarsua iti maysa kadagiti makapainteres unay a parsuana.”
Naisangsangayan ti kinarelihioso ni Strecker ken ti panagraemna iti Namarsua. Naannad dagiti Kristiano ita iti panangusarda iti natan-ok a nagan a Jehova kadagiti wagas a mangidayaw iti dayta.
[Footnote]
a Ti kompleto a paulo ti libro ni Mr. Strecker ket Lepidoptera, Rhopaloceres and Heteroceres, Indigenous and Exotic; With Descriptions and Colored Illustrations (1872).
[Ladawan iti panid 31]
Ni Herman Strecker
[Credit Line]
Ni Herman Strecker: Manipud iti libro a The Passing Scene, Tomo 8/The Historical Society of Berkes County
[Ladawan iti panid 31]
(Aktual a kadakkel)