‘Natungday ti Eksperimento’
ITI daytoy lubong a nakaparpartak ti ibabassit ti sangalubongan a purok gapu iti teknolohia, makuna a lumawlawa ti nagbaetan dagiti nabaknang ken napanglaw. Iti panagkomentona maipapan iti panangikagumaan a mangipasdek iti sangalubongan nga ekonomia, kinuna ti maysa nga internasional a grupo dagiti aktibista: “Kalpasan ti maika-50 a tawen daytoy nga eksperimento, saanen nga epektibo dayta. Imbes a nakaipaay iti pakagunggonaan ti amin a tattao iti ekonomia, dayta ketdi ti makagapu nga agngangabit a madidigra ti aglawlaw ti planeta, nakirokiro unay ti kagimongan, nariribuk ti ekonomia ti kaaduan a pagilian, kumarkaro ti kinapanglaw, bisin, mapukpukawen dagiti talon, nagulo ken madaddadaelen ti urnos ti kagimongan. Mabalin a kunaen itan a natungday ti eksperimento.”
Ania ti napasamak? No agbalin a naagum dagiti tattao, posible unay a mangdangranda. Kastoy ti kuna ti kapitalista a ni George Soros: “Dagiti merkado pagbalbalinenda a tagilako ti amin a banag, agraman dagiti tattao (trabahador) ken ti nakaparsuaan (daga).” Ti kinaimperpekto ti tao ti maysa pay a makagapu. Maitunos iti opinion ti pilosopo a ni Karl Popper, kuna ni Soros: “Naisiguden a di naan-anay ti pannakaawattayo; kinaagpaysona ditay maawatan ti naan-anay a pannakadisenio ti kagimongan.”
Saanen a kabarbaro ti panagduduma iti ekonomia. Walo a siglo sakbay ni Kristo, sinarita ti maysa a mannurat ti Biblia ti maipapan kadagiti “mangsasaur kadagidiay nanumo, a mangilupitlupit kadagidiay napanglaw.” (Amos 4:1) Kalpasan ti panangpaliiwna iti umasping a kinaawan hustisia, insurat ti maysa nga estadista idi ugma agarup 3,000 a tawenen ti napalabas: “Ti tao dinominaranna ti tao iti pakadangrananna.”—Eclesiastes 8:9.
Ania ti solusion? Masolbar kadi dagiti natauan nga ahensia ti nakaro a di panagpapada ti ekonomia babaen ti internasional a panagtitinnulong? “Awanantayo kadagiti umdas nga internasional nga organisasion,” kuna ni Soros, “a mangsalaknib kadagiti wayawaya, kalintegan, ken ti aglawlaw ti tunggal tao, wenno mangpasayaat iti kinahustisia ti kagimongan—a mabalin a napatpateg pay ngem iti nadakamaten a pannakaitalimeng ti kappia. Kaaduan kadagiti institusion nga adda kadatayo ket asosasion dagiti gobierno, ket gagangay nga iyun-una dagiti gobierno ti bukodda a pagimbagan. Maibatay iti konstitusion saan a kabaelan ti United Nations a tungpalen dagiti inkarina a panggepna a nailanad iti kartana.”
Maupaytay kadi? Saan. Asidegen ti gobierno ti nalinteg a lubong! Dayta ti tema nga inkasaba ni Jesus. Inawaganna dayta a “ti pagarian ti Dios,” ket insurona kadagiti pasurotna nga ikararagda dayta. (Lucas 11:2; 21:31) Naipasdeken ti Pagarian ti Dios idiay langit, ket asidegen nga ikkatenna ti amin a kinaawan hustisia ditoy daga. (Apocalipsis 11:15, 18) Imbes a maysa a temporario nga eksperimento a panangituray, ti Pagarian ti Dios ket agpaut iti agnanayon. (Daniel 2:44) Permanentento a risutenna ti parikut a kinapanglaw ken panangilupitlupit. Anian a nagsayaat a namnama para kadagiti napanglaw ken kadagiti nailupitlupit—kinapudnona, agpaay iti amin!
[Ladawan iti panid 13]
Saan a narisut ti sangalubongan nga ekonomia ti parparikut dagiti napanglaw—binilion pay la ti agbibiag nga awanan danum a magun-odan babaen ti gripo wenno elektrisidad