Agimtuod Dagiti Agtutubo . . .

Kasano a Matulongak Dagiti Agkasapulan?

“Sapay koma ta inton agturposak, makapagtrabahoak kas maysa nga elektrisian. Kayatko ti tumulong nga agbangon kadagiti Kingdom Hall.”—Tristan, 14.

”Agdonarak iti 20 a doliar (₱1,020) agpaay iti baro a pagimprentaan. Allowance-ko dayta, ngem kayatko nga ited kadakayo.”—Abby, 9.

ADU nga agtutubo ti mangpampaneknek—agraman dagiti nadakamat iti ngato—a saanda a managimbubukodan nupay dadduma ti dagus a mangdeskribir a managimbubukodan dagiti agtutubo kadagitoy a panawen. Kadagiti Saksi ni Jehova, adu nga agtutubo a lallaki ken babbai ti situtulok a mangusar iti panawen, pigsa, ken sanikuada agpaay iti sabsabali. (Salmo 110:3) Usigem ti dadduma pay a pagarigan.

Nabiit pay kalpasan a natay ni lolana, ti agtawen iti pito a ni Jirah a taga-Australia ket nakaawat iti sagut a $50 (₱1,887) manipud ken lolona. Ania ti inaramid ni Jirah iti dayta a kuarta? Iti simmaganad a gimong ti kongregasion, inkabilna amin dayta iti kahon ti donasion. Apay? “Nagadun ti ay-ayamko, ngem maymaysa ti lolak,” inlawlawag ni Jirah ken ni nanangna. “Ammok a kayat ni Lola nga idonarko daytoy a kuarta, agsipud ta ay-ayatenna unay ni Jehova.”

Ti agtawen iti lima a ni Hannah a taga-Estados Unidos pagay-ayatna dagiti kabalio. Kayatna ti gumatang iti ay-ayam a sinankabalio, nga aggatad iti $75 (₱3,825). Iti panangikagumaan ti nagannak ni Hannah a mangisuro kenkuana iti kinapateg ti panagurnong, sagpaminsan nga ikkanda iti kuarta tapno iyalkansiana. Di nagbayag, addan umdas nga igatang ni Hannah iti sinankabalio.

Ngem iti dayta a tiempo, dimmalapus ti Bagyo a Katrina iti Gulf Coast. Maseknan ni Hannah maipapan kadagiti biktima, isu nga inkeddengna nga idonar ti amin a naurnongna—nasurok a $100 (₱5,100)—tapno pangtulong kadakuada. Kastoy ti insurat ni Hannah iti hedkuarter dagiti Saksi ni Jehova: “Kayatko nga ited kadakayo daytoy a kuarta agsipud ta ay-ayatek ni Jehova ken kayatko ti tumulong.” Makitkita kadi ni Jehova dagiti kasta a kinamanagparabur? Kuna ti Biblia: “Dikay lipatan ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.”—Hebreo 13:16.

Ti agtutubo nga agnagan iti Tiffany, a taga-Estados Unidos met laeng, sinuratanna ti hedkuarter dagiti Saksi ni Jehova kalpasan nga adda dua a nagpipigsa a bagyo a dimmalapus iti Florida idi 2004. Kastoy ti insuratna: “Kayatmi ken ni adingko a Timothy ti agdonar iti $110 (₱5,610). Saan unay a nadadael ti balaymi, ngem nakitami ti napasamak iti dadduma a balbalay gapu kadagiti bagyo. Kayatmi ti tumulong, isu a rinugianmi ti agurnong iti kuartami. Naaddaan ni Timothy iti $10 (₱510) gapu ta timmulong a nangikkat iti drywall ti maysa a balay, ket nakaurnongak met iti $100 (₱5,100).” Agtawen ni Tiffany iti 13, ket agtawen laeng iti 7 ni adingna a Timothy! Ania ti mapasamak no ipangpangrunatayo dagiti pagimbagan ti sabsabali ngem dagiti pagimbagantayo? Kuna ti Proverbio 11:25: “Daydiay sibubulos a mangsibug iti sabsabali isu sibubulos a masibuganto met.”

Idiay Estados Unidos, nadamag ti maysa a grupo dagiti Saksi nga agtutubo, nga agtawen iti 4 agingga iti 15, nga agkasapulan dagiti kapammatianda idiay Africa kadagiti Kingdom Hall. Isu nga adda inkeddengda nga aramiden. “Naglakokami kadagiti biskuit ken mamon iti maysa a paglakuan iti baratilio, ket $106.54 (₱5,433.54) ti naganansiami. Imbagami kadagiti tattao a ti kuarta ket mabalin a mausar a pagipatakder kadagiti paggigimongan idiay Africa a mabalin a pagadalan dagiti tattao maipapan iti Biblia. Adu ti gimmatang. Siam nga oras a naglakokami, ngem makagunggona agsipud ta agpaay dayta ken Jehova!”

Mabalinmo ti Tumulong

Dagiti agtutubo a naisalaysay dagiti kapadasanda ditoy nasursuroda ti kinapudno ti kinuna ni Jesus: “Ad-adu ti kinaragsak iti panangted ngem iti panangawat.” (Aramid 20:35) Masagrapmo met ti kinaragsak ti panangted. Kadagiti ania a wagas?

Adda kadin nadamagmo maipapan kadagiti kapammatiantayo nga agkasapulan? Kas pagarigan, adda kadi nabiit pay a napasamak a natural a didigra? Padasem a panunoten ti rikna ti mapukawan iti pagtaengan, sanikua, wenno uray ti matayan iti ay-ayatem iti biag. Insurat ni apostol Pablo a dagiti koma Kristiano ‘itultuloyda a kitaen, saan a ti panaginteres iti laeng bukodda a bambanag, no di ket kasta met ti personal a panaginteres iti bambanag ti sabsabali.’ (Filipos 2:4) Uray no adayo ti pagnanaedam manipud iti nakapasamakan ti natural a didigra, nalabit mabalinmo ti mangted iti donasion a makatulong iti panangsaranay dagiti Saksi ni Jehova.a

Adda pay dadduma a wagas a mabalinmo a tulongan dagiti agkasapulan. Kas pagarigan, no maysaka kadagiti Saksi ni Jehova, apay a dimo paliiwen dagiti tumabtabuno iti Kingdom Hall? Adda kadi asinoman a lallakay ken babbaket wenno dadduma pay nga agkasapulan? Mabalin kadi a tulongam ida kadagiti trabahoda? Kastoy ti insurat ni apostol Pablo kadagiti taga-Roma: “Iti nainkabsatan nga ayat maaddaankayo iti kinalailo iti maysa ken maysa. Iti panangipakita ti pammadayaw iti maysa ken maysa mangidaulokayo.” (Roma 12:10) No makitam nga agkasapulanda iti tulong, sikan ti umuna nga agtignay. Situtulokka koma a tumulong uray kadagiti nanumo a trabaho. Laglagipem met a ti panagserbi iti sabsabali ket nainaig unay iti panagserbi iti Dios. Kuna ti Biblia: “Daydiay mangipakpakita ti pabor iti daydiay nanumo agpapautang ken Jehova, ket ti panangtratona Isu supapakannanto kenkuana.”—Proverbio 19:17.

Siempre, ti panangiranudmo iti ammom maipapan iti Sao ti Dios nga isu ti Biblia ti kangrunaan a wagas tapno matulongam ti sabsabali. Kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Itan a nangnangruna a masapul a mangngegan dagiti tattao ti makaispal-biag a mensahe ti kinapudno manipud iti Biblia. Isu nga itultuloymo ti regular ken naregta a pannakiramanmo iti trabaho a panangasaba ket agtalekka a ‘ti panagbannogmo saan nga ubbaw.’—1 Corinto 15:58.

Ad-adu pay nga artikulo iti serye nga “Agimtuod Dagiti Agtutubo . . .” ti masarakan iti Web site a www.watchtower.org/ype

[Footnote]

PANUNOTEM

◼ Adda kadi ammom nga agkasapulan iti tulong?

◼ Ania ti maitulongmo?

[Blurb iti panid 25]

“Dikay lipatan ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.”—Hebreo 13:16

[Kahon/​Dagiti Ladawan iti panid 24, 25]

APAY A SURSURUEM TI MANGTED?

“Napaliiwko nga us-usaren dagiti nagannakko ti tiempo ken pigsada nga agserbi ken Jehova ken kadagiti kaarrubada isu a natignayak a mangtulad kadakuada. Kinuna kaniak ni tatangko: ‘Kasano man kabassit dayta, agtalinaed iti agnanayon ti aniaman nga ar-aramidem agpaay ken Jehova. Agnanayon a sibibiag ni Jehova, ket agnanayonto a malaglagipna dayta. Ngem awan ti serserbi ti panagbiag nga agpaay laeng iti bagim. Inton matayka, malipatanto metten ti aniaman nga inaramidmo.’”—Kentaro, 24, Japan.

“Kinapudnona, diak kayat idi ti tumulong kadagiti lallakay ken babbaket kadagiti trabaho iti balay no malem ti Sabado. Kayatko laeng ti agragragsak ken makikadua kadagiti kabarkadak. Ngem idi pinadasko ti makikadua kadagiti lallakay ken babbaket, talaga a nagustuak dayta. Naamirisko a tattaoda met laeng a kas kaniak ken napadasanda met idi ti nagbalin nga agtutubo. Daytoy ti nanggutugot kaniak a tumulong kadakuada.”—John, 27, England.

“Idi ub-ubingak pay, timmulongak a nagdalus iti Kingdom Hall ken iti dadduma pay a trabaho. Nagustuak met ti dadduma pay a pisikal a trabaho agpaay iti sabsabali a kakongregasionko. No adda matulongam, makitam a maragsakanda. Kas pagarigan, naminsan, nakikaduaak iti dadduma tapno pagtitinnulonganmi nga ikabil ti wallpaper iti apartment ti maysa a baket a kabsat. Napalalot’ ragsakna! Naragsakkanto met no adda maparagsakmo.”—Hermann, 23, Francia.

[Ladawan iti panid 24]

Adu nga agtutubo ti agdonar iti kuarta tapno matulonganda dagiti nadidigra