Manipud Kadagiti Agbasbasa
Ti Silo ti Panaginum—Madangrannaka Aya? (Oktubre 8, 2005) Adun ti nabasak a surat dagiti agbasbasa a nangibaga iti: “Dimteng dayta nga artikulo iti umiso a tiempo.” Diak pulos impagarup a kasta met ti makunak, ngem dayta ti eksakto nga imbagak iti bagik bayat a binasak daytoy a serye ti akkub. Medio nabayag met a nariribukanak gapu iti inaldaw a panaginumko, nupay saanak met idi a mabartek. Kalpasanna, dimteng daytoy a serye. Kalpasan a nabasak dagiti peggadna, kombinsidoak a tiempo idin nga isardengko ti kanayon a panaginumko.
K. W., Alemania
Dinakamat daytoy a serye ti kapadasan ni Hilario, a mangnginum iti 30 a tawen ken “namin-adu a nagsubli iti panaginum.” Kinunana a dagiti kakongregasionna “kanayon a paregtaen ken bagbagaandak.” Ngem saan kadi a rumbeng koma a natubngar wenno nailaksid iti kongregasion Kristiano?
R. L., Estados Unidos
Sungbat ti “Agriingkayo!”: Saan a nadakamat iti ababa a pannakaisalaysay ti kapadasan ni Hilario no kaano a nagbalin a bautisado a Kristiano kabayatan ti 30 a tawen a kinamangnginumna. Dina met nadakamat no tinubngar dagiti panglakayen iti kongregasion. Sigun iti artikulo, naipaayan ni Hilario iti “naintiempuan a balakad ti Biblia,” a pasaray aramiden ti hudisial a komite. No dadduma, dagidiay mangikagkagumaan a mangisardeng iti alkoholismo mamin-aduda nga agsubli iti panaginum, kas iti napasamak ken Hilario. No kasano ti pannakataming dagita a banag no nairaman ti maysa a bautisado a Kristiano, pangngaasim ta kitaem “Ti Pagwanawanan,” Nobiembre 1, 1983, panid 7-11.
Agimtuod Dagiti Agtutubo . . . Apay a Maallukoyak Kadagiti Tattao nga Addaan iti Dakes nga Impluensia? (Hulio 22, 2005) Impaamiris kaniak daytoy nga artikulo a saan a mabalin nga agpangpangaduaak kadagiti kalatko. Dayta ti nangparegta kaniak a mangitungpal iti determinasionko a sumina kadagiti dakes a pakitimtimpuyogak. Sumingsingedak itan iti adu a kakongregasionko, agtutubo man ken nataengan. Iparpariknada kaniak ti ayat dagiti agay-ayat ken Jehova ken parparegtaendak nga agtultuloy a magna iti dana ti biag.
M. D., Mexico
Nagporsegiak a Nangragpat iti Kalatko (Hunio 22, 2005) Nakasangitak bayat a basbasaek ti kapadasan ni Martha agsipud ta agkissiwak met. Maysaak nga amin-tiempo nga ebanghelisador iti napalabas a sangapulo a tawenen, ket no dadduma, narigat—nangruna no sumro ti sakitko. Gapu iti pakasaritaan ni Martha, napabileg ti determinasionko a saan a sumuko. Naliwliwaak unay.
J. S., Poland
Agkissiwak met a kas ken Martha. Kalpasan ti panangbasak iti pakasaritaanna, agan-annadak metten iti taraonko. Nasurok a sangapulo a tawenen nga impalubosko a ti panagkissiw ti manglapped iti naan-anay a panagserbik ken Jehova. Ngem dandani tallo a tawen ti napalabasen, inkeddengko ti agbalin nga amin-tiempo nga ebanghelisador, ket awan ti pagbabawyak. Sapay koma ta bendisionannakayo ni Jehova gapu iti panangipablaakyo kadagita a makaparegta a kapadasan!
B.C.C., Brazil
Ti kangrunaan a nangparegta kaniak maipapan iti daytoy nga artikulo ket saan a naawanan ni Martha iti namnama. Naliwliwaak ta nupay masapul nga isardengna biit ti panagpayunirna, addaan iti natimbeng a kababalin ken panagtalek a maragsakan ni Jehova iti amin-kararua a panagserbitayo.
S. H., Japan
Napasarak met ti napasaran ni Martha, isu a masapul nga ammok dagiti limitasionko. Kas ken Martha, nabaelak ti agserbi kas amin-tiempo nga ebanghelisador. Dayta ti gapuna a makaparegta unay kaniak ti pakasaritaanna.
F. G., Switzerland