No Apay nga Addatayo Ditoy
IPALGAK ti Biblia a ti Namarsua kadatayo, ni Jehova a Dios, kanayon nga adda panggep ti aniaman nga aramidenna. Kas pagarigan, usigentayo ti siklo ti danum a diniseniona tapno agbalin a posible ti biag ditoy daga. Kastoy ti naindaniwan ngem umiso a panangiladawan ti Biblia: “Agturong iti taaw ti amin a karayan, ngem saan a mapno ti taaw. Agsubli ti danum iti pangrugian dagiti karayan ket mangrugi manen.”—Eclesiastes 1:7, Ti Baro a Naimbag a Damag Biblia.
Pinagdilig ti Biblia ti kinamapagtalkan dagiti kari ti Dios ken ti nadakamat a siklo ti danum. Kas pagaammotayo ita, ti bara ti init pagalingasawenna ti danum manipud kadagiti taaw, baybay, ken danaw, kalpasanna, agsubli ditoy daga kas tudo. Dinakamat ni Jehova daytoy a siklo sa kinunana: “Kasta ti pagbalinanto ti saok a rummuar manipud iti ngiwatko. Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”—Isaias 55:10, 11.
Dagiti ulep itudoda ti nadalus a danum tapno agbalin a posible ti biag ditoy daga. Umasping iti dayta, ti ‘sao a rummuar manipud iti ngiwat ti Dios’ kabaelanna a penneken ti naespirituan a kasapulantayo. Maitunos dayta iti kinuna a mismo ni Jesu-Kristo: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.”—Mateo 4:4.
Ti panangipauneg iti naespirituan a taraon manipud iti Dios tulongannatayo nga agbiag maitunos iti panggepna. Ngem tapno maaramidtayo dayta, masapul a matarusantayo no ania ti panggep ti Dios. Kas pagarigan, apay a pinarsua ti Dios ti daga? Ania ti epektona kadatayo ti panggepna mainaig iti daga? Kitaentayo.
Ti Panggep ti Dios Agpaay iti Daga
Gapu ta ti Dios kayatna ti kasayaatan para iti sangatauan, inkabilna ti umuna a lalaki ken babai, da Adan ken Eva, iti paraiso a minuyongan ti Eden. Imbilinna nga aganakda, a kunkunana: “Agbungakayo ken agadukayo ket punnuenyo ti daga ken parukmaenyo, ket pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga.”—Genesis 1:26-28; 2:8, 9, 15.
Ania ti maadaltayo iti dayta a bilin? Saan kadi a nalawag a kayat ti Dios nga agbalin a paraiso ti intero a daga tapno pagnaedan ti sangatauan? Kuna ti Biblia: “No maipapan iti langlangit, kukua ni Jehova ti langlangit, ngem ti daga intedna iti annak ti tattao.”—Salmo 115:16.
Ngem tapno matagiragsak dagiti tattao ti kaitungpalan ti panggep ti Dios nga agbiagda nga agnanayon ditoy daga, masapul nga idaydayawda ni Jehova babaen ti panagtulnogda kenkuana. Kasta kadi ti inaramid ni Adan? Saan, sinukirna ti Dios isu a nagbasol. Ania ti imbungana? Amin a kaputotan ni Adan, a pakairamanantayo ita, natawidtayo ti basol ken ipapatay, kas kunaen ti Biblia: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.”—Roma 5:12.
Kas resultana, matay dagiti amin a tattao ken saan a nagbalin a paraiso ti intero a daga. No kasta, nagbalbaliw kadin ti panggep ti Dios agpaay iti daga?
Saan, ta kinuna ti Dios: “Ti saok a rummuar manipud iti ngiwatko . . . saanto nga agsubli kaniak nga awanan kadagiti nagbanagan” no di ket “sigurado nga agballiginto iti banag a nangibaonak iti dayta.” Inkari pay ti Dios: “Isuamin a pakaragsakak aramidekto.” (Isaias 45:18; 46:10; 55:11) Ken pagayatan ti Dios nga agbalin a paraiso ti intero a daga tapno pagnaedan dagiti tattao nga agserbi kenkuana iti agnanayon buyogen ti kinaragsak, kas ti orihinal a panggepna.—Salmo 37:29; Isaias 35:5, 6; 65:21-24; Apocalipsis 21:3, 4.
Matungpal ti Panggep ti Dios—Kasano?
Imparangarang ni Jehova ti di maartapan a kinasirib ken panagayatna idi inyurnosna ti probision tapno mawayawayaan dagiti tattao manipud iti natawid a basol ken kadagiti imbungana—ti kinaimperpekto ken ipapatay. Inaramidna daytoy babaen ti panangyurnosna a mayanak ti maysa a lalaki nga awanan iti basol a kas iti natawid ti amin a kaputotan ti umuna a tao a ni Adan. Daytoy a probision ket maawagan iti subbot, a naipaay tapno dagidiay maikari magun-odanda ti agnanayon a biag. (Mateo 20:28; Efeso 1:7; 1 Timoteo 2:5, 6) Kasano a naipaay ti subbot?
Ti anghel ni Jehova a ni Gabriel impakaammona iti maysa a birhen nga agnagan iti Maria ti maipapan iti namilagruan a panagsikogna, a dineskribirna no kasano ti pannakaipasngay ti ubing uray no ‘saan pay a nakidenna iti lalaki.’ Ti Dios simimilagro nga inyakarna ti biag ti inauna nga Anakna manipud langit iti aanakan ni Maria. Gapuna, nagsikog ni Maria babaen ti panagtignay ti nasantuan nga espiritu ti Dios.—Lucas 1:26-35.
Kalpasan ti agarup siam a bulan, nayanak ni Jesus kas perpekto a tao nga umasping iti umuna a tao a ni Adan. Idi agangay, intedna ti perpekto a natauan a biagna kas daton. Babaen iti dayta, nagbalin ni Jesus kas ‘ti maikadua nga Adan’ ken nangipaay iti pangibatayan tapno amin a matalek iti Dios ket masubbotda manipud iti basol ken ipapatay.—1 Corinto 15:45, 47.
Awan duadua a matignaytayo gapu iti daytoy a naindaklan nga ayat nga impakita ti Dios kadatayo! Kas kunaen ti Biblia, “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Ti saludsod ket, Kasanotayo a masubadan ti ayat ti Dios? Ditay kadi matignay a mangapresiar iti sagutna? Usigentayo ti pagarigan ti dadduma a nangaramid iti dayta.
Maaddaan iti Makagunggona a Biag
Ni Denise, a nadakamat iti napalabas nga artikulo, natakuatanna a naaddaan iti direksion ken kaipapanan ti biagna gapu iti panangipangagna kadagiti linlinteg ken bilbilin ti Dios. Kinunana: “Naadalko manipud iti Biblia a malaksid nga adda panggep ti Dios a naan-anay a matungpalto iti masanguanan, adda pay espesipiko a trabaho nga impaannong ti Dios kadagidiay agdaydayaw kenkuana. Awanen ti ad-adda pay a makapnek a biag ngem iti panangusarko iti intedna a wayawaya nga agpili tapno Isu ket maidaydayawko babaen iti panagbiagko a maitunos iti panggepna.”
Maaramidtayo met dayta babaen ti panangadal ken panangitungpal iti pagayatan ti Dios. Pudno, saantay pay a naan-anay a nagunggonaan iti daton a subbot, a mamagbalin a posible iti panangtagiragsaktayo iti perpekto a biag iti baro a lubong ti kinalinteg. Ngem kabayatanna, masapul a penkentayo pay ti naespirituan a kasapulantayo nga inkabil kadatayo ti Dios idi pinarsuanatayo.
Napennek ti naespirituan a pannakawaw ni Dave, a nadakamat iti umuna nga artikulo daytoy a serye. Nasungbatan dagiti saludsodna maipapan iti panggep ti biag. “No lagipek ti napalabas sakbay a naammuak ti panggep ti Dios,” kunana, “awan gayam ti serserbi dagiti panagreggetko. Diak ammo a ti pannakariknak idi iti kinakawaw ket maigapu iti saan a pannakapennek ti naespirituan a kasapulak. Saanen a kasta ti riknak ita. Ammokon no apay nga addaak ditoy ken no ania ti rumbeng nga aramidek iti biagko.”
Wen, saan a kas iti panangmatmat ti imperpekto a tao, ti panangmatmat ti Dios iti panggep ti biag, kas kinuna ti Biblia, ti mangyeg iti pudno a pannakapnek. Addatayo ditoy maigapu iti panggep ni Jehova a nangparsua kadatayo—tapno idayaw ti naganna, maaddaan iti nasged a relasion kenkuana, ket iti kasta, mapennek ti naespirituan a kasapulantayo. Ita ken iti agnanayon, matagiragsaktayo ti kaitungpalan ti naipaltiing a proklamasion: “Naragsak ti ili a ti Diosna isu ni Jehova!”—Salmo 144:15.
[Kahon/Ladawan iti panid 8]
TI PANAGSAGABA
Maibilang ti panagsagaba kas maysa kadagiti kangrunaan a lapped iti panangtarus no apay nga addatayo ditoy. Kuna ni Viktor Frankl: “No adda makagapu nga addatayo ditoy, adda met ngarud makagapu no apay nga agsagsagabatayo. Ti panagsagaba ket di maikkat a paset ti biag a kas met iti gasat ken ipapatay.”
Ilawlawag ti Biblia no apay nga agsagsagaba ken mataytayo. Saan a ti Dios ti makinggapuanan. Imbes ketdi, resulta dayta ti di umiso a pangngeddeng ti immuna nga agassawa, a pinilida ti agbiag a naisina iti Namarsua. Dayta a di umiso a pagannayasan ket natawid ti amin a kaputotanda ken dayta ti ramut ti panagsagaba ti tao.
Nupay ti pannakaammo nga addatayo ditoy dina marisut ti amin a parikut ti biag, ammotayo no apay a mapaspasarantayo ken no kasano a mapagballigiantayo dagita. Mangted met dayta kadatayo iti namnama iti masanguanan, inton naan-anay nga ikkaten ti Dios ti panagsagaba ken ipapatay.
[Diagram/Ladawan iti panid 7]
Pinagdilig ti Biblia ti kinamapagtalkan dagiti kari ti Dios ken ti nakaskasdaaw a siklo ti danum
[Diagram]
(Para iti aktual a pannakaurnosna, kitaem ti publikasion)
Tudo ← Panagalingasaw ← Panagalingasaw
↓ ↑
↓ ↑
Danaw, karayan ↑
↓
→ → Taaw
[Ladawan iti panid 8, 9]
Apay a masiguradotayo nga agbalinto ti daga a paraiso a pagnaedan dagiti naragsak ken nasalun-at a tattao?
[Ladawan iti panid 9]
‘Awanen ti ad-adda a makapnek a biag ngem iti panangusarko iti wayawayak nga agpili tapno agserbiak iti Dios.’—Denise