Ti Bassit a Librok a De Rosas

Kas insalaysay ni Cynthia Newell

IDI agtawenak iti pito, maysa nga ubing iti serbismi a bus idiay Shreveport, Louisiana, U.S.A., ti nangitukon kaniak iti bassit a de rosas a libro a napauluan iti Panagimdeng iti Naindaklan a Mannursuro. Kinunana nga itedna kaniak dayta iti gatad a 50 a sentabo. Kalpasanna, immay iti balaymi ket nangbilangkami iti 50 a sentabo.

Magusgustuak dayta a bassit a de rosas a libro. Di nagbayag kalpasan a nagun-odko dayta, nagsakitak isu a nayospitalak. Tapno maliwliwaak, dagiti kapamiliak ibasaandak iti salaysay manipud iti dayta nga ipatpategko a libro. Ngem bayat nga agmatmataenganak, manmano laengen a basaek ti libro gapu ta nangnangruna a nadisenio dayta para kadagiti ubbing. Adu ti naadalko iti dayta a libro ngem kasapulak ti naun-uneg a pannakaawat. Inkeddengko ti tumabuno iti nadumaduma a relihion iti kada lawas gapu iti panagbirbirokko iti sungbat ti Biblia kadagiti saludsodko. Ngem awan ti nasarakak a makapnek a sungbat.

Idi haiskulak, saanen a kasta kapateg kaniak ti relihion, nupay agbirbirokak pay latta iti pannakaammo iti Biblia ken regular a basbasaek dayta. Naminsan, nadlawko ti maysa a kaklasek a di nakiraman iti panagsapata iti bandera. Dinamagko no apay, ket kinunana, “Intedkon ti debosionko ken Jehova, isu a kasano koma a maitedko dayta nga agpadpada iti Dios ken iti bandera?” Husto dayta a rasonna! ‘Ngem asino ni Jehova?’ pinampanunotko.

Aniaman ti isaludsodko, adda sungbat ti kaklasek manipud iti Biblia. Pinampanunotko: ‘Apay nga ammona amin dagitoy? Agkatawenankami laeng; ngem adu ti ammona maipapan iti Biblia!’ Inlawlawagna, “Nasursurok ti maipapan iti Biblia idiay Kingdom Hall.” Sigagagar a pinatgak ti awisna a tumabuno iti gimong iti Domingo. Natabunuakon ti dandani amin a relihion iti lugarmi ngem diak pay napadas ti mapan iti Kingdom Hall dagiti Saksi ni Jehova. Iti dayta a Domingo, ammok a nasarakakon ti mangisursuro iti kinapudno a linaon ti Biblia.

Kalpasan ti gimong, napanak iti pagalaan iti literatura ket nakitak iti estante dagiti babassit a de rosas a libro a kas iti librok! Sangapulo a tawenen ti napalabas sipud idi naawatko dayta manipud iti ubing iti bus, isu a nalipatakon no asino ti nangited kaniak. Ngem malagipko itan—ni Nancy, ti met laeng kaklasek a nangawis kaniak a makigimong iti dayta nga aldaw!

Idi agangay, linawas a nayadalanak iti Biblia ken napartak ti panagrang-ayko. Adu ti naadalko iti bassit a de rosas a librok isu a nalaklakak a maawatan itan ti maad-adalko iti Biblia. Di nagbayag, indedikarko ti biagko ken Jehova ket nagpabautisarak idi 1985 idi agtawenak iti 18. Kabayatanna, immakar ni Nancy idiay Florida, isu nga awanen ti komunikasionmi.

Kalpasan ti sumagmamano a tawen, nakiasawaak. Idi 1991 nagserbikami ken lakayko a Drew iti amin-tiempo a ministerio kas payunir iti bassit nga ili iti makindaya a Texas. Ngem komusta ngata ni Nancy? Awan damagko kenkuana. Maysa a rabii, bayat a basbasaek ti Disiembre 1, 1992, a Pagwanawanan, inriawko: “Nakitak ni Nancy! Nakitak ni Nancy!” Isu ket karaman iti retrato dagiti kalkalpas a nagraduar iti Gilead. Naibaonda ken lakayna a Nick Simonelli iti Ecuador, South America.

Idi 2006, nagpasalistakami ken lakayko kas boluntario iti internasional a panagibangon kadagiti proyekto dagiti Saksi ni Jehova. Anian a ragsakmi idi naammuanmi a ti damo a proyekto a pakaibaonanmi ket iti panangpalawa ti sanga nga opisina iti Ecuador! Iti umuna pay laeng nga aldawko iti sanga nga opisina iti Ecuador, nakitak ni Nancy! Nairana a bimmisita iti sanga nga opisina iti dayta nga aldaw. Naginnarakupkami—ket nagkaduakami manen, 32 a tawen sipud idi naawatko ti bassit a de rosas a librok! Anian a yamanko ken Jehova gapu iti dayta a libro ken iti ubing a nangitukon kaniak iti dayta!

[Kahon/Dagiti Ladawan iti panid 23]

INIMPLUENSIAANDA TI BIAG TI MINILION A TATTAO

Idi 2003, kalpasan ti 32 a tawen a pannakaipablaak ti Panagimdeng iti Naindaklan a Mannursuro, naipablaak ti narebisar nga edisionna. Napauluan dayta iti Agsursuroka iti Naindaklan a Mannursuro. Iti agdama, agdagup iti nasurok nga 65 a milion a kopia daytoy a libro maipapan kadagiti pannursuro ni Jesus ti mayim-imprenta iti nasurok a 100 a lenguahe. Mabalinyo ti agkiddaw iti kopia ti Agsursuroka iti Naindaklan a Mannursuro manipud kadagiti Saksi ni Jehova iti lugaryo.

[Dagiti Ladawan iti panid 23]

Babassit a ladawan: Idi ubbingkami pay

Ni Cynthia

Ni Nancy

Makinlikud a ladawan: Iti sanga nga opisina iti Ecuador, sumagmamano a tawen kalpasanna