Masalbar Pay Kadi ti Panagasawayo?
Bigbigen dagiti makimbalay a narukopen ti balayda ngem inkeddengda a tarimaanen dayta.
KAYATYO met kadi nga aramiden ti kasta iti relasionyo nga agassawa? No wen, kasanoyo a rugian? Padasenyo dagitoy a singasing.
1 Agtinnulongkayo.
Pagnumuanyo nga agassawa nga agtinnulongkayo a mangpasubli iti natalna a relasionyo. Padasenyo nga isurat dagiti desisionyo. No naikumiten ti tunggal maysa kadakayo, agtinnulongkayo a mangsalbar iti relasionyo.—Eclesiastes 4:9, 10.
2 Ammuenyo ti problema.
Ania ti mangdaddadael iti relasionyo nga agassawa? Isuratyo iti maysa a sentensia ti pagarupenyo a kurang wenno ti kayatyo a mabalbaliwan iti relasionyo. (Efeso 4:22-24) No agduma man ti insuratyo a parikut, gagangay laeng dayta.
3 Mangaramidkayo iti kalat.
Ania ti kayatyo a kasasaad ti relasionyo kalpasan ti innem a bulan? Aniada nga espesipiko a panagrang-ay ti kayatyo a maragpat? Isuratyo dagita a kalatyo. No nalawagen iti panunotyo no ania ti kasapulan ti relasionyo, nalaklakanton a ragpaten ti kalatyo.—1 Corinto 9:26.
4 Iyaplikaryo ti balakad ti Biblia.
No naammuanyon ti problema ken naikeddengyon dagiti kayatyo nga aramiden a panagrang-ay, usigenyo ti balakad ti Biblia. Saan nga agkupas dagiti prinsipiona ken talaga nga epektibo. (Isaias 48:17; 2 Timoteo 3:17) Kas pagarigan, iparparegtana kadagiti agassawa nga agbalinda a manangpakawan. Kinapudnona, kuna ti Biblia a “kinapintas . . . ti panangpalabas iti salungasing.”—Proverbio 19:11; Efeso 4:32.
Nupay iti damo ket kasla awan pagbambanagan dagiti panagreggetyo, dikay maup-upay! Ti libro a The Case for Marriage impadamagna dagiti makaparegta a resulta ti maysa a panagadal: “Makapakellaat ti kinapudno: kadagiti saan a naragsak nga agassawa a nagtultuloy a nagkabbalay, 86% kadakuada ti nagbalin a naragragsak kalpasan ti lima a tawen.” Nakapasar iti panagbalbaliw uray dagiti agassawa a nangibilang iti bagida a nakalidliday.
Nalabit kastanto met ti mapasamak kadakayo. Dagiti Saksi ni Jehova, a mangipabpablaak iti daytoy a magasin, naammuanda a mangipapaay ti Biblia kadagiti praktikal a prinsipio para iti agassawa. Kas pagarigan, sumayaat ti relasion ti adu a pagassawaan no agbalinda a naasi, nadungngo a mannakipagrikna, ken sisasagana nga agpinnakawan. Naamiris dagiti assawa a babbai ti pateg ti panangiparangarang iti “naulimek ken naalumamay nga espiritu,” ken nasagrap dagiti assawa a lallaki dagiti gunggona nga itden ti saan a nakaro a panagunget kadagiti assawada.—1 Pedro 3:4; Colosas 3:19.
Epektibo dagitoy a Nainkasuratan a prinsipio gapu ta ni Jehova a Dios nga Autor ti Biblia ti nangyurnos iti panagasawa. Apay a dikay agdamag kadagiti Saksi ni Jehova no kasano a makatulong ti Biblia iti panagasawayo?a
a Tapno matulonganda dagiti pamilia, nangipablaak dagiti Saksi ni Jehova iti libro a 192 ti panidna ken napauluan Ti Sekreto ti Kinaragsak iti Pamilia. Para iti ad-adu pay nga impormasion, agsuratkayo kadagiti nangipablaak iti daytoy a magasin. Nailista iti panid 5 dagiti maitutop nga adres.